1.
Na gũgĩkinya atĩrĩ, atĩ mweri wa mũgwanja, Ishumaeli, mũrũ wa Nethania, wa Elishama, ũrĩa warĩ wa rũciaro rũa mũthamaki, na nĩ ũmwe wa anene a mũthamaki, magĩgĩthiĩ kwa Gedalia wa Ahikamu me hamwe na andũ angĩ ikũmi, magĩkinya Mizipa; nakuo kũu Mizipa makĩrĩanĩra irio marĩ o hamwe othe.
2. Hĩndĩ ĩo Ishumaeli wa Nethania, o na andũ acio ikũmi maarĩ hamwe nake, magĩũkĩra, magĩtemenga Gedalia, mũrũ wa Ahikamu wa Shafani, na rũhiũ rũa njora, makĩmũũraga, o we ũcio watuĩtwo barũthi wa bũrũri ũcio nĩ mũthamaki wa Babuloni.
3. O na ningĩ Ishumaeli ũcio akĩũraga Ayahudi othe arĩa maarĩ hamwe nake, o acio maarĩ hamwe na Gedalia kũu Mizipa, o na Akalidei arĩa maakorirũo kuo, andũ a ita.
4. Na gũgĩkinya atĩrĩ, atĩ mũthenya wa ĩĩrĩ thutha wa aarĩkia kũũraga Gedalia, o ũhoro ũcio ũtanamenyeka-rĩ,
5. hagĩũka andũ mĩrongo ĩnana moimĩte Shekemu, na Shilo, o na Samaria, nao magĩkorũo menjete nderu, na magatembũranga nguo ciao, na magetemenga mwĩrĩ, magĩgĩũka manyitĩte indo cia kũrutwo magongona na moko, o na ũbumba, nĩguo macitware nyũmba ya Jehova.
6. Nake Ishumaeli wa Nethania akiuma Mizipa athiĩ akamatũnge, nake agĩgĩthiĩ na njĩra akĩrĩraga; na gũgĩkinya atĩrĩ, atĩ aacemania nao, akĩmera atĩrĩ, Ũkai he Gedalia wa Ahikamu.
7. Na gũgituĩka atĩrĩ, atĩ maakinya o itũũra-inĩ gatagatĩ, Ishumaeli wa Nethania, me na andũ arĩa maarĩ hamwe nake, makĩmoraga, makĩmaikia irima.
8. No rĩrĩ, thĩinĩ wa andũ acio nĩkwarĩ andũ ikũmi merire Ishumaeli atĩrĩ, Menya ũtũũrage, nĩ ũndũ twĩ handũ tũhithĩte indo cia bata o kũu werũ-inĩ, nacio nĩ ngano, na cairi, na maguta, na ũũkĩ. Na tondũ ũcio agĩkĩmatiga, na ndamoraganirie na acio angĩ maarehanĩte nao.
9. Na rĩrĩ, irima rĩrĩa Ishumaeli aaikirie ciimba cia andũ acio othe oragĩte nĩ rĩrĩa inene rĩenjithĩtio rĩa maĩ nĩ Asa, mũthamaki, nĩ ũndũ wa gwĩtigĩra Baasha, mũthamaki wa Isiraeli, nake Ishumaeli wa Nethania akĩrĩiyũria ciimba cia andũ acio moragĩtwo.
10. Hĩndĩ ĩo Ishumaeli agĩkĩnyita andũ othe arĩa maatigarĩte a andũ arĩa maarĩ Mizipa, akĩmataha, hamwe na airĩtu a mũthamaki, na andũ othe arĩa maatigarĩte kũu Mizipa, o arĩa othe Nebuzaradani, mũnene wa arangĩri, aatuĩte atĩ maroragwo nĩ Gedalia wa Ahikamu. Nake Ishumaeli ũcio wa Nethania agĩkĩmanyita, akĩmataha, agĩcoka akiuma kũu nĩguo atuĩkanie bũrũri erekeire harĩ ciana cia Amoni.
11. No rĩrĩ, hĩndĩ ĩrĩa Johanani wa Karea, o na anene othe a mbũtũ cia ita arĩa maarĩ hamwe nake, maaiguire ũhoro wa ũũru ũcio wothe wekĩtwo nĩ Ishumaeli wa Nethania,
12. makĩoya andũ ao othe, magĩthiĩ kũrũa mbaara na Ishumaeli mũrũ wa Nethania, nao makĩmũkora Gibeoni handũ harĩ maĩ maingĩ.
13. Na gũgĩkinya atĩrĩ, atĩ hĩndĩ ĩrĩa andũ othe arĩa maatahĩtwo nĩ Ishumaeli monire Johanani wa Karea, o na anene othe a mbũtũ cia ita arĩa maarĩ hamwe nake, magĩkena.
14. Tondũ ũcio andũ acio othe maatahĩtwo nĩ Ishumaeli, amarutĩte Mizipa, makĩhũndũka magĩthiĩ he Johanani wa Karea.
15. No rĩrĩ, Ishumaeli wa Nethania e hamwe na andũ anana nĩmetharire matikanyitwo nĩ Johanani, magĩthiĩ he ciana cia Amoni.
16. Hĩndĩ ĩo Johanani wa Karea, o na anene othe a mbũtũ cia ita arĩa maarĩ hamwe nake, makĩoya matigari macio mothe ma andũ, mamahonoketie he Ishumaeli wa Nethania, o acio aarutĩte Mizipa aarĩkia kũũraga Gedalia wa Ahikamu, nao nĩ andũ a ita, o na andũ-a-nja, na ciana, o na andũ arĩa ehokere wĩra wa nyũmba ya mũthainaki, acio aahũndũrĩte akamaruta Gibeoni;
17. nao magĩkiuma kũu magĩthiĩ gũtũũra Geruthu Kimuhamu, o kũu gũkuhĩ na Bethi-lehemu, nĩguo macoke gũthiĩ magatonye Misiri,
18. nĩ ũndũ wa Akalidei; nĩ gũkorũo nĩmaametigagĩra, nĩ ũndũ wa ũrĩa Ishumaeli wa Nethania oragĩte Gedalia wa Ahikamu, ũrĩa watuĩtwo barũthi wa bũrũri ũcio nĩ mũthamaki wa Babuloni.