1. Ta teng’erai ũũ na ũũ njĩra-inĩ cia Jerusalemu, mũrore, na mũcarie, na mũtuĩrie njĩra-inĩ iria njariĩ ciakuo, kana hihi mwakĩhota kuona mũndũ o na ũmwe wĩkaga maũndũ ma kĩhooto, kana akarũmbũiya ũhoro ũrĩa mwerekereru, na nĩngohera itũũra rĩu rĩothe.
2. No rĩrĩ, o na kũngĩtuĩka atĩ nĩmehĩtaga makiugaga ũũ: O ta ũrĩa Jehova atũũraga muoyo-rĩ, ti-itherũ mwĩhĩtwa wao nĩ wa maheni.
4. Hĩndĩ ĩo niĩ na niĩ ngiuga atĩrĩ, Ti-itherũ andũ acio nĩ athĩni, nĩngĩ nĩ andũ akĩgu arĩa materutĩte maũndũ ma kũrũmĩrĩra Jehova, o na kana makemenyeria ũhoro wa matuĩro ma Ngai wao.
5. Wega no ndĩĩthiĩre, nginye harĩ andũ arĩa anene twaranĩrie nao; nĩ ũndũ acio nĩo merutĩte ũhoro wa kũrũmĩrĩra Jehova, na makemenyeria matuĩro ma cira ma Ngai wao. No rĩrĩ, acio me hamwe nĩmoinangĩte mĩtĩ yao ya ngingo, magatua mĩhĩndo.
6. Tondũ ũcio mũrũthi ũkoima mũtitũ-inĩ ũmorage, o nayo hiti ĩrĩa ĩcangaga kĩhwaĩ-inĩ ĩmatamburange, o nayo ngarĩ ĩikare ĩmoheirie matũũra-inĩ mao; na mũndũ o wothe ũrĩa ũkoimagara oime kuo nĩagatinangio tũcunjĩ nĩyo, nĩ ũndũ ũhoro wao wa kwagarara watho nĩ mũnene mũno, o naguo ũhoro wao wa kũ’hutatĩra nĩ muongerereku.
7. Ndakĩhota atĩa gũkuohera, kuona atĩ ciana ciaku nĩindirikĩte, na ikehĩta ikĩgwetaga marĩĩtwa ma ngai cia tũhũ? Hĩndĩ ĩrĩa ndaciheete irio ikahũna-rĩ, nĩguo ciaitĩkire gũtharia, na igĩkĩũngana ikahatĩkanĩre nyũmba-inĩ cia aka a maraya.
8. Andũ acio-rĩ, maacangacangaga ta mbarathi ĩheetwo irio ĩkahũna, o mũndũ wao akeriragĩria mũka wa mũndũ ũrĩa ũngĩ.
10. Haicai thingo-inĩ ciakuo mũninane, no mũtikaninũkanie biũ; cuurai honge ciakuo, nĩ gũkorũo andũ acio ti a Jehova.
11. Nĩ ũndũ andũ a nyũmba ya Isiraeli, o na a nyũmba ya Juda, nĩmangarũkĩte na ũrĩa-ng’ũũrũ; ũguo nĩguo Jehova ekuuga.
12. Nĩmakaanĩte Jehova, makoiga atĩrĩ, Ũcio tiwe Ngai; na gũtirĩ ũũru o na ũrĩkũ ũgatũkora, o na kana tuone tũtharĩkĩirũo na rũhiũ rũa njora, o na kana tũkorũo nĩ ng’aragu;
13. ningĩ anabii magatuĩka a mũhuhu mũtheri, nĩ kwaga ndũmĩrĩri cia Jehova; ũguo nĩguo magekwo.
14. Tondũ ũcio Jehova Ngai Mũnene wa Ita ekuuga ũũ: Tondũ wa ũrĩa mwaragia ndeto ta icio, atĩrĩrĩ, ndũmĩrĩri yakwa ĩrĩa ngwĩkĩrĩte kanua gaku nĩyo ngatua ta mwaki, nao andũ acio ndĩmatue ngũ, naguo mwaki ũcio nĩũkamarĩa ũmanine.
15. Atĩrĩrĩ, inyuĩ andũ a nyũmba ya Isiraeli, nĩngũtũma mũũkĩrĩrũo nĩ rũrĩrĩ ruumĩte kũndũ kũraya; ũguo nĩguo Jehova ekuuga. Naruo nĩ rũrĩrĩ rũĩ hinya kuuma o tene wa tene, na nĩ rũrĩrĩ ũtangĩmenya mwarĩrie waruo o na kana ũigue rũthiomi rũaruo.
16. Mathiaka ma andũ aruo maiyũire mĩguĩ ya kũroria andũ mbĩrĩra-inĩ ĩrĩa ĩtathikĩtwo, nao andũ ao othe nĩ njamba irĩ hinya.
17. Nao nĩmakarĩa magetha maku, o na irio ciaku iria ingĩkarĩo nĩ ihĩĩ ciaku o na airĩtu aku, o na marĩe ndũru ciaku cia mbũri o na cia ng’ombe; o na ningĩ marĩe mĩthabibu yaku, o na mĩkũyũ yaku; ningĩ matũũra maku marĩa mairigĩtwo, o macio ũikaraga wĩhokete, nĩmakamamomora mamatharĩkĩte magwete hiũ ciao cia njora, mamagũithie thĩ.
18. No rĩrĩ, Jehova ekuuga ũũ: Atĩrĩrĩ, o na gwatuĩka atĩ ũguo nĩguo gũgekwo matukũ macio-rĩ, ndikareka mũninũkĩrĩrio biũ.
19. Na nĩgũgakinya atĩrĩ, atĩ hĩndĩ ĩrĩa makoria atĩrĩ, Kaĩ Jehova Ngai witũ atwĩkĩte maũndũ maya mothe nĩ ũndũ kĩ? Hĩndĩ ĩo wee nawe ũkĩmere atĩrĩ, O ta ũrĩa mwandirikire mũgĩtungatĩra ngai cia ndũrĩrĩ mwĩ kũu bũrũri wanyu-rĩ, ũguo noguo mũgatungatĩra andũ a kũngĩ mwĩ bũrũri ũtarĩ wanyu.
20. Umbũrĩrai andũ a nyũmba ya Jakubu ũhoro ũyũ, na mũũhunjanĩrie o kũu Juda, muuge ũũ:
21.
Ta thikĩrĩriai ũhoro ũyũ, inyuĩ andũ aya akĩgu na mũtarĩ ngoro nguũku, o inyuĩ mwĩ na maitho, na mũtionaga, na mwĩ na matũ, na mũtiiguaga.
22.
Jehova ekũũria atĩrĩ, Anga mũtingĩĩndigĩra? Anga mũtingĩinaina mwĩ mbere yakwa, o niĩ ndaigire mũthanga ũtuĩke mũhaka wa iria rĩrĩa inene, naguo ũndũ ũcio ũgĩtuĩka watho wa gũtũũra tene na tene, na rĩtikanawagarare? O na makũmbĩ ma maĩ mangĩtũũra marũũgarũũgaga-rĩ, matingĩhota kũũhoota; o na mangĩtũũra marurumaga-rĩ, matingĩhota kũwagarara.
23. No andũ aya-rĩ, nĩ kũũmia momĩtie ngoro makanema, makagĩa na ngoro itangĩnjathĩkĩra o na hanini; ti-itherũ nĩ kũũmia momĩtie ngoro makarũmanĩria kũnema.
24. Nao matingĩĩĩra na ngoro ciao ũũ, Rĩu nĩtwĩtigĩrei Jehova Ngai witũ, ũrĩa ũheanaga mbura ya kũmeria hĩĩra o na ya gũkũria irio, o kĩmera kĩayo gĩakinya; o we ũrĩa ũtatĩragia ihinda rĩrĩa aatuire rĩa kũgetha.
25. Waganu wanyu nĩguo wanatũma maũndũ macio magarũrũke, o namo mehia manyu nĩmo maanatũma mũtuĩke aimwo-nĩ-iri.
26. Nĩ ũndũ-rĩ, thĩinĩ wa andũ akwa nĩkuonekaga andũ aaganu, nao maikaraga meiguĩte o ta ũrĩa ategi maikaraga moheirie ndutura; maambaga mũtego makagwatia andũ.
27. O ta ũrĩa kanyũmba ka nyoni kaiyũraga nyoni-rĩ, ũguo noguo nyũmba ciao ciiyũrĩtwo nĩ uungumania, na tondũ ũcio nĩmagĩtuĩkĩte akaru, na magagĩtonga mũno.
28. Nĩ gũtunguha matunguhĩte makanora, na magakenga; ĩĩ, ti-itherũ waganu wao nĩmaũkĩritie njano; matirĩ mũndũ mangĩrũĩrĩra ũhoro-inĩ wake, ta wa gũteithia mwana wa ndigwa nĩ getha agaacĩre. O nake mũndũ ũrĩa mũkĩa matingĩmũcirĩrĩra atĩ nĩguo one kĩhooto gĩake.