2. Thiĩ ũrũgame kĩhingo-inĩ kĩa nyũmba ya Jehova, ũhunjanĩrie ũhoro ũyũ wĩ ho, uuge atĩrĩ, Ta thikĩrĩriai ndũmĩrĩri ya Jehova, inyuĩ andũ othe a Juda, o inyuĩ mũtonyagĩra ĩhingo-inĩ ici nĩguo mũkainamĩrĩre Jehova mũmũhoe.
3. Jehova Mũnene wa Ita, o we ũrĩa Ngai wa Isiraeli, ekuuga atĩrĩ, Agĩriai mĩthiĩre yanyu o na ciĩko cianyu, nĩ getha ngatũũrania na inyuĩ kũndũ gũkũ.
4. Tigai gũtũũra mwĩhokete mohoro ma kũhenania, mũkiugaga atĩrĩ, Ĩno nĩyo hekarũ ya Jehova; ĩĩ, ti-itherũ ĩno nĩyo hekarũ ya Jehova; nĩyo hekarũ yake ki!
5. Nĩ ũndũ-rĩ, mũngĩagĩria mĩthiĩre yanyu o na ciĩko cianyu o kwagĩria kũna, na mutuithanie cira na kĩhooto wa mũndũ na mũndũ ũrĩa ũngĩ,
6. o na mũtige kũhinyĩrĩria mũgeni, kana mwana wa ndigwa, o na kana mũka wa ndigwa, na mwage gũita thakame ya mũndũ ũtarĩ na ũũru kũndũ gũkũ, o na kana mwĩgerithie ngero na ũndũ wa gũtungatĩra ngai ingĩ-rĩ,
7. hĩndĩ ĩo nĩngareka mũtũũre kũndũ gũkũ, o gũkũ bũrũri ũyũ ndaheire maithe manyu kuuma o tene mũno nginya o tene na tene.
8. Rĩu mũtũire mwĩhokete ndeto cia kũhenania, iria itangĩguna mũndũ o na ũrĩkũ.
9. Anga nĩ kũiya mũgũkĩiya, na mũkoragana, na mũgatharia, na mũkehĩta na maheni, na mũgacinĩra Mabaali ũbumba, na mũkarũmĩrĩra ngai ingĩ iria mũtoĩ,
10. na ningĩ mũgacoka gũũka kũrũgama mbere yakwa, gũkũ nyũmba ĩno, o ĩno ĩĩtanĩtio na rĩĩtwa rĩakwa, mũkiugaga atĩrĩ, Tũrĩ ahonokie; nĩguo mwĩkage maũndũ macio mothe me thahu?
11. Anga nyũmba ĩno ĩĩtanĩtio na rĩĩtwa rĩakwa mũkuona ta ĩgĩtuĩtwo ngurunga ya atunyani? Atĩrĩrĩ, niĩ-rĩ, niĩ mwene nĩ kuona ndĩĩoneire ũndũ ũcio; ũguo nĩguo Jehova ekuuga.
12.
No rĩrĩ, rĩu ta thiĩi na kũu Shilo, o kũu ndatuire gũtuĩke gĩikaro kĩa rĩĩtwa rĩakwa tene, mũkone ũrĩa ndagĩgwĩkĩthirie nĩ ũndũ wa waganu wa andũ akwa a Isiraeli.
13. Na rĩrĩ, Jehova ekuuga ũũ: O na harĩa ndamwaragĩria ta arĩ kũroka ndokete gũũkĩra rũcinĩ tene nĩguo ndĩmwarĩrie, na inyuĩ mũkĩrega kũigua, mũgĩcoka mũgĩĩka maũndũ macio mothe, ningĩ ngĩĩtana, no mũkĩrega kũnjĩtĩka-rĩ,
14. tondũ wa maũndũ macio, nyũmba ĩno ĩĩtanĩtio na rĩĩtwa rĩakwa, o ĩno mũikaraga mwĩhokete, o na kũndũ gũkũ ndamũheire o na ngĩhe maithe manyu-rĩ, ngamĩĩka o ta ũrĩa ndekire Shilo,
15. njoke ndĩmweherie, muume harĩ niĩ, o ta ũrĩa ndeheririe ariũ a ithe wanyu, nao nĩo rũciaro ruothe rũa Efiraimu.
16. Tondũ ũcio, tiga kũhoera andũ aya, o na kana wanĩrĩre ũkĩrĩra, o na kana ũ’thaithe nĩ ũndũ wao, nĩ ũndũ o na weka ũguo ndikũigua.
17. Kaĩ wee ũtegũkĩĩonera ũrĩa mareka matũũra-inĩ ma Juda, o na njĩra-inĩ cia Jerusalemu?
18.
Ciana nĩ kuuna iroina ngũ, namo maithe magaakia mwaki, nao andũ-a-nja makamanda kĩmere, nĩguo marugĩre ngai ya mathara tũmĩgate, o ĩo ĩĩtagwo mũthamaki mũndũ-wa-nja wa kũrĩa igũrũ, na maitire ngai ingĩ cia mathara magongona ma indo cia kũnyuwo, nĩ getha ma’thirĩkie ndakare.
19. No rĩrĩ, Jehova ekũũria atĩrĩ, Anga nĩ niĩ mathirĩkagia ndakare? Githĩ tio o ene methirĩkagia magĩĩconorithia o ene?
20. Tondũ ũcio Mwathani. Jehova ekuuga ũũ: Atĩrĩrĩ, marakara makwa, o na mang’ũrĩka, nĩmagaitwo kũndũ gũkũ, makorerere andũ, na nyamũ, na mĩtĩ ya gĩthaka, o na maciaro ma thĩ; namo nĩmagacinana, na matihoreke.
21. Ningĩ Jehova Mũnene wa Ita, o we Ngai wa Isiraeli, ekuuga ũũ: Atĩrĩrĩ, ta turanĩrai mahaki manyu ma njino na magongona marĩa mangĩ, na mwĩrĩĩre nyama ciamo.
22. Nĩ ũndũ ndiaaririe na maithe manyu o na kana ngĩmaatha mekage ũndũ o na ũmwe ũkoniĩ mahaki ma njino, o na kana magongona marĩa mangĩ, mũthenya ũrĩa ndamarutire bũrũri wa Misiri;
23. no rĩrĩ, ũndũ ũyũ nĩguo ndamaathire mekage, ngĩkĩmera atĩrĩ, Iguagai uuge wakwa, na niĩ nĩngũtuĩka Ngai wanyu, na inyuĩ mũtuĩke andũ akwa. Ningĩ mũthiage na mĩthiĩre ĩrĩa yothe ndĩrĩmwathaga mũthiage nayo, nĩ getha muonage wega.
24. No rĩrĩ, matiigana kũigua, o na kana magĩtega matũ, no nĩ kũrũmĩrĩra maarũmĩrĩire irĩra ciao o ene, o na ũremi wa ngoro ciao njũru, nao magĩgĩcoka na thutha makĩaga gũthiĩ na mbere.
25. Kuuma mũthenya ũrĩa maithe manyu moimire bũrũri wa Misiri o nginya ũmũthĩ-rĩ, ndũire ndĩmũrekagĩria ndungata ciakwa ciothe cia anabii, ta arĩ kũroka ndokaga gũũkĩra rũcinĩ tene mũthenya o mũthenya nĩguo ndĩcirekie;
26. no rĩrĩ, matiigana kũnjigua, o na kana magĩtega matũ, no nĩ kũrema maaremire, makĩũmia ciongo na makĩagana gũkĩra maithe mao.
27. Wee nawe-rĩ, nĩũkamaarĩria ũmahe ũhoro ũcio wothe, no matigakũigua. O na ningĩ nĩũkameta, no matigagwĩtĩka.
28. Nawe nĩũgagĩcoka ũmere atĩrĩ, Rũrũ nĩruo rũrĩrĩ rũrĩa rũtaiguĩte mũgambo wa Jehova Ngai waruo, o na kana rũgetĩkĩra gũtaarũo. Ũhoro-wa-ma nĩũthirĩte; nĩũmorĩire o kũũra, ũkoima kanua-inĩ kao biũ.
29. Atĩrĩrĩ, wee Jerusalemu, wĩcume tanji yaku ya ũnene ũmĩte, ũitĩkane na kĩrĩro, ũrĩre ũrũgamĩte kũndũ kũrĩa gũtigĩtwo ũtheri tũcũmbĩrĩ-inĩ twa ithũngũri, nĩ gũkorũo Jehova nĩaregete rũciaro rũrũ rũmũrakarĩtie akarũteania.
30. Nĩ ũndũ ciana cia Juda nĩciĩkĩte maũndũ moru ikĩonagwo nĩ niĩ; ũguo nĩguo Jehova ekuuga. Nĩ rĩrĩ, mĩhianano yao ĩrĩa ĩrĩ thahu-rĩ, mamĩĩkĩrĩte o kũu nyũmba ĩrĩa ĩĩtanĩtio na rĩĩtwa rĩakwa magakĩmĩthahia.
31.
O na ningĩ nĩmaakĩte matĩri ma kũndũ gũtũũgĩru ma Tofethi o kũu gĩtuamba-inĩ kĩa mũrũ wa Hinomu, nĩguo macinagĩre ariũ ao na airĩtu ao na mwaki kuo; naguo ũndũ ũcio nĩ ũrĩa itaathanire wĩkwo, o na kana ũkĩngĩa ngoro.
32. Na atĩrĩrĩ, tondũ wa maũndũ macio Jehova ekuuga atĩ matukũ nĩmagoka marĩa kũu gũtagacoka gwĩtwo Tofethi, o na kana Gĩtuamba kĩa mũrũ wa Hinomu, no gũgetagwo ũũ: Gĩtuamba kĩa Rĩũraganĩro; nĩ ũndũ kũu Tofethi gũgathikanwo o nginya kwage handũ hangĩcoka gũthikanwo.
33. Nacio ciimba cia andũ aya igatuĩka nyama cia kũrĩo nĩ nyamũ cia rĩera-inĩ, o na nyamũ cia gĩthaka, na gũtikoneka mũndũ o na ũmwe wa gũcirira.
34. Hĩndĩ ĩo nĩguo ngagĩtũma matũũra ma Juda, o na njĩra-inĩ cia Jerusalemu, gũkire ihooru, gũtige gũcoka kũiguwo mĩtheko na mĩgambo ya gĩkeno, o na kana mũgambo wa mũhikania, o na kana wa mũhikio; nĩ ũndũ bũrũri ũyũ nĩũkaanangwo biũ ũtigwo ũtheri ũtarĩ kĩndũ.