Go Back

Macakaya Chapter 1

• 1. HĨ! Ĩ kaĩ gĩtũũro nĩgĩikaire gĩĩkonotete-ĩ, na no kĩrĩa kĩratũire kĩiyũire andũ! Kaĩ kĩrĩ gũkĩhaana o ta mũtumia wa ndigwa-ĩ! Ũyũ ũrarĩ mũnene ndũrĩrĩ-inĩ, agagĩtuĩka ta mwarĩ wa mũnene ng’ongo-inĩ cia bũrũri-rĩ, rĩu kaĩ atuĩkĩte o njaguti-ĩ!
• 2. Ũtukũ araaraga akĩrĩra, maithori make makamũnyũrũrũkagĩra makai; arĩa othe marendaine nake ndarĩ o na ũmwe angĩona wa kũmũkiria: arata ake othe nĩmamũgarũkĩte, magagĩtuĩka thũ ciake.
• 3. Juda nĩ gũthama athamĩrĩire kwene nĩ ũndũ wa mathĩna na tondũ wa ũkombo mũnene; atũire rũrĩrĩ-inĩ rũcenji, ndangĩona ũhurũko o na hanini: rĩrĩa aagĩire hatĩka-inĩ nĩrĩo arĩa maamũthingatĩte othe maamũkinyĩrĩire.
• 4. Mathiĩro ma gũthiĩ Zayuni no gũcakaya macakayaga nĩ tondũ gũtirĩ andũ mokaga gĩathĩ kĩrĩa gĩathane; ihingo ciake ciothe, we Zayuni, nĩitigĩtwo maganjo, nao athĩnjĩri-Ngai ake no gũcaya macayaga: airĩtu ake nĩ ekĩre ihooru, nake we mwene no ũcũngũ arĩ naguo ngoro.
• 5. Amuku ake matuĩkĩte atĩ nĩo mũtwe, thũ ciake nĩcio rĩu irĩĩrĩire, nĩ gũkorũo Jehova nĩamwĩkĩrĩte ihooru nĩ ũndũ wa ũrĩa mehia make maingĩhĩte; twana twake nĩ tũtahe tũgatindĩkwo nĩ thũ.
• 6. Mwarĩ ũyũ, ti Zayuni, nĩ mũthire nĩ riri wake wothe: anene a gwake mahaanĩte ta ngondi ciũrĩirũo nĩ nyeki, mathiĩte o makĩhinyaraga matindĩkĩtwo nĩ arĩa marathingatanire nao.
• 7. Matukũ maya ma thĩna wake o na ma kũnyarirĩka gwake Jerusalemu no aririkaine maũndũ mothe marĩa maamũkenagia, marĩa aatũire namo o kuuma matukũ marĩa ma tene. Rĩrĩa andũ ake maagũire moko-inĩ ma mũmuku-rĩ, na ndateithio nũ kana ũ, hĩndĩ ĩo acio amuku makĩmuona, magĩitĩka kũmũthekerera nĩ ũndũ wa mũrindũko wake.
• 8. Jerusalemu we nĩahĩtĩtie ũũru mũno, na tondũ ũcio agatuĩka ta megirĩrio: arĩa othe maramũtĩĩte rĩu nĩ kũrurũka mamũrurũkĩte, nĩ ũndũ nĩmamuonete e njaga; no gũcaya acayaga, agakĩhutata.
• 9. Gĩko gĩake nĩkĩregwatĩrĩire marinda-inĩ make; mũrigĩrĩrio wake, ndarakorirũo aririkanaga ũhoro waguo: nĩkĩo kũharũrũka kũu aharũrũkĩte kũrĩ gwa kũgegania ũũ ndakĩrĩ na wa kũmũkiria maithori: Ĩ Jehova-ĩ, rora ũrĩa ’thĩnĩte, amu thũ nĩĩĩimbĩtie mũno!
• 10. Mũmuku we nĩatambũrũkĩtie guoko akanyita indo ciake ciothe iria iramũkenagia: nĩeoneire ũrĩa arĩa acenji metonyetie handũ harĩa hake haamũre, o ro arĩa wee waathanire ũhoro wao ũkiuga atĩ matikanatonye kĩũngano-inĩ gĩaku.
• 11. Andũ ake othe no gũcaya macayaga magĩcaragĩrĩria gĩa kũrĩa; marutĩte indo ciao iria iramakenagia nĩ getha mone irio cia kũriũkia ngoro ciao: Jehova, ta rora, wone; amu ndĩ mũtuĩku ta wa magigi:
• 12. Nĩ inyuĩ inyuothe ahĩtũki! anga ũhoro ũyũ mũkuona ta mũtarĩ ũndũ naguo? rorai, muone kana kũrĩ o kĩeha kĩngĩ kĩiganaine na kĩeha gĩakwa, gĩkĩ niĩ njĩkĩrĩtwo, gĩkĩ ndeheirũo nĩ Jehova mũthenya wakinya wa marakara make marĩa mahiũ.
• 13. Andũmĩire mwaki uumĩte igũrũ ũkandonya mahĩndĩ thĩinĩ, naguo ũkamahoota; nĩ kwamba aambĩire mathagiro makwa wabu ya kũmatega, o na kũ’hĩta aka’hĩtĩrĩria; atũmĩte ndĩĩtindagie o nyiki na ’hwererekeire mũthenya ũgathũa.
• 14. Icoki rĩrĩa rĩa mehia makwa, guoko gwake nĩkuo kũnjohereire; mo nĩmethaĩkanĩtie, makanyambatĩrĩra ngingo-inĩ yakwa; nĩ kũ’nina a’ninĩte hinya: Mwathani nĩa’neanĩte moko-inĩ ma arĩa itangĩhota gwĩtiirĩrĩria.
• 15. Ihoti ciakwa ciothe iria ii thĩinĩ wakwa, Mwathani nĩacirarĩtie; etĩire ũũngano gĩathĩ nĩ ũndũ wakwa, nĩ getha aanake akwa mamemendwo: Mwathani nĩakĩrangĩrĩirie mwarĩ ũyũ, ti Juda, o mũirĩtu ũyũ gathirange, ta ekũmũrangĩrĩria ihihĩro-inĩ rĩa ndibei.
• 16. Tondũ wa maũndũ macio njikaire o ngĩrĩraga; riitho rĩakwa, o riitho rĩrĩ rĩakwa-ni, rĩikaire o rĩkĩnyũrũrũkagia maĩ, nĩ gũkorũo mũngiria ũrĩa ũngĩa’nogora ngoro anjikarĩte haraya: ciana ciakwa itigĩtwo o ciiki, nĩ tondũ thũ nĩyo ĩhootanĩte.
• 17. Zayuni aikaire o ro aarĩte moko; gũtingĩoneka mũndũ o na ũmwe wa kũmũkiria; Jehova nĩaathanĩte ũhoro wa Jakubu, atĩ arĩa mamũthiũrũrũkĩirie no matuĩke amuku ake: harĩ o, Jerusalemu no ta megirĩrio.
• 18. Jehova nĩ wa kĩhooto, amu niĩ nĩ’nemete watho wake. Nĩ inyuĩ, iruka ici ciothe, ndamũthaitha, thikĩrĩriai na mwĩrorere kĩeha gĩkĩ gĩakwa! airĩtu akwa o na aanake akwa nĩ atahe magathiĩ!
• 19. Ndetire arĩa twendaine, nao makĩ’henia: athĩnjĩri-Ngai a gwakwa o na athuri akuo nĩmaatumbũkire marĩ o thĩinĩ wa itũũra, o magĩĩcaragĩria irio cia kũriũkia ngoro ciao.
• 20. Jehova, kĩndore! amu ndĩ hatĩka-inĩ; nĩ kũgariũkwo ndĩragariũkwo nĩ mara; ngoro yakwa nĩ gwĩthiora irethiora thĩinĩ wakwa; amu kũrema kũrĩa ndĩraremete kũrarĩ kũũru mũno: mĩena-inĩ nĩ njomo ĩninanagĩra ciana, na mũciĩ no ta gũkirĩte gĩkuũ.
• 21. Nĩkũiguĩtwo ũrĩa njayaga, gũkaaga mũndũ o na ũrĩkũ wa kũngiria; thũ ciakwa ciothe nĩikĩiguĩte ũũru ũrĩa nyonete, igakena nĩ ũndũ nĩwĩkĩte ũguo. Wee-rĩ, nĩũgakinyia mũthenya ũrĩa wanĩrĩire, nacio no ikahaanana na niĩ.
• 22. Ũũru wacio wothe ta nĩũkinye mbere-inĩ yaku; nawe gĩciĩke o ta ũguo na niĩ ũnjĩkĩte nĩ ũndũ wa mahĩtia makwa mothe, amu-rĩ, mĩcayo yakwa nĩ mĩingĩ mũno, nayo ngoro yakwa nĩĩthirĩtwo nĩ hinya.

Home