1. Ningĩ ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
2. Mũrũ wa mũndũ, gwatania ndaĩ, na warĩrie andũ a nyũmba ya Isiraeli na ngerekano,
3. ũmere atĩrĩ, Mwathani Jehova oigĩte ũũ: Kwĩ hingo nderi ĩmwe nene yakinyire Lebanoni ĩĩ na mathagu manene maguucũkĩte mũno, na makaiyũrũo nĩ njoya cia rangi wa mĩthemba mĩingĩ, nayo ĩgĩkĩũmbũka ĩgĩtua kamũtĩ ka mũthia-inĩ wa mũtarakwa;
4. ĩgĩgĩtua kahonge ka mũthia-inĩ ga tũhonge twĩthĩ tũrĩa tũrĩ o igũrũ gacũmbĩrĩ-inĩ kaguo, ĩgĩgatwara bũrũri wonjorithagio indo; ĩgĩkaiga itũũra-inĩ rĩa onjorithia.
5. O na ningĩ ĩkĩoya mbeũ ya bũrũri ũcio, ĩkĩmĩhanda tĩri-inĩ mũnoru, hũgũrũrũ-inĩ cia maĩ maingĩ; o na ĩgĩkĩmĩhanda ĩmere o ta ĩrĩ mũtĩ wa mũthemba ũrĩa ũkoragwo hũgũrũrũ-inĩ cia rũũĩ.
6. Nayo ĩkĩmera ĩgĩtuĩka mũthabibu mũhambu mũno wa mũthemba mũkuhĩ, nacio honge ciaguo ikĩĩhũgũra harĩ yo, nayo mĩri yaguo ĩgĩtonya na thĩ ĩkĩrigia na mũhuro wayo. Naguo ũgĩgĩtuĩka mũthabibu mũgima, na ũkĩruta honge, na ũgĩthundũra tũhwang’a twĩ mathangũ.
7. O na ningĩ haarĩ nderi ĩngĩ nene ĩĩ na mathagu manene na njoya nyingĩ; na atĩrĩrĩ, mũthabibu ũcio ũrĩ o hau wahandirũo ũkĩhaca mĩri yaguo ĩũrorie harĩ yo, na ũkĩruta honge ũgĩciroria harĩ yo, nĩguo ĩũnyuithagie maĩ,
8. o na harĩa wahandirũo tĩri-inĩ ũrĩa mwega wĩ hũgũrũrũ-inĩ cia maĩ maingĩ, nĩ getha ũrute honge, na nĩ getha ũciare maciaro, na ũtuĩke mũthabibu mwega.
9. Wee kiuge atĩrĩ, Mwathani Jehova oigĩte ũũ: Anga nĩũgatũũra wĩ riri? Githĩ ti kũmunyũo ũkamunyũo mĩri yaguo, o na ũtemengwo maciaro maguo, nĩguo ũũme, na nĩguo mathangũ maguo marĩa ma mũmerano mome; naguo ũmunyanĩrio na mĩri yaguo hatarĩ hinya mũingĩ o na kana andũ aingĩ a kũũkũũra?
10. Na atĩrĩrĩ, o na watuĩka nĩwahandirũo-rĩ, anga nĩũgatũũra wĩ riri? Githĩ ti kũũma ũkoma biũ, hĩndĩ ĩrĩa ũkahutio nĩ rũhuho rũa mwena wa irathĩro? Ti-itherũ nĩ kũũma ũkoma ũrĩ o tĩri-inĩ harĩa wahandirũo.
11. O na ningĩ ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
12.
Rĩu ta ũrĩa andũ a kĩruka gĩkĩ kĩremu atĩrĩ, Anga mũtiũĩ gĩtũmi kĩa maũndũ macio? Ningĩ mere ũũ: Atĩrĩrĩ, mũthamaki wa Babuloni oimagarire agĩkinya Jerusalemu, agĩtaha mũthamaki wakuo, o na anene akuo, akĩmatwara gwake o kũu Babuloni;
13. ningĩ akĩoya mũndũ ũmwe wa rũciaro rũa mũthamaki, akĩrĩkanĩra kĩrĩkanĩro nake, o na ningĩ akĩmũnyuithia muuma; ningĩ agĩcoka akĩrindũra andũ arĩa marĩ hinya a bũrũri ũcio,
14. nĩ getha ũthamaki ũcio ũnyihe, ndũkanacoke kwĩhanda guo wene, tiga o wĩhandire na ũndũ wa kũhingia maũndũ marĩa marĩkanĩirũo.
15. No rĩrĩ, nĩ kũrema aamũremire, nĩ ũndũ wa gũtũma arekio ake Misiri, nĩguo mamũhe mbarathi o na andũ aingĩ. Rĩu-rĩ, anga nĩagagĩikara agaacĩire? Githĩ mũndũ ũrĩa wĩkaga maũndũ ta macio nĩakehonokia? Githĩ aagĩthũkia kĩrĩkanĩro na acoke ehonokie?
16. Mwathani Jehova oigĩte atĩrĩ, O ta ũrĩa niĩ ndũũraga muoyo-rĩ, ti-itherũ handũ o ro hau mũthamaki ũcio wamũtuire mũthamaki aaikarĩte, nĩho agakuĩra me hamwe nake bũrũri-inĩ ũcio wa Babuloni, tondũ nĩaamenire muuma ũrĩa aanyuithirio nĩwe, na agĩthũkia kĩrĩkanĩro kĩrĩa maarĩkanĩire nake.
17. O nake Firauni arĩ hamwe na mbũtũ yake ya ita ĩrĩa ĩrĩ hinya, o na kĩrĩndĩ kĩingĩ, matirĩ ũndũ makamũguna naguo ita-inĩ, hĩndĩ ĩrĩa magaitithia ihumbu nene cia tĩri, na maake inyamũ ndaya na igũrũ cia mũtharĩko, nĩ getha manine andũ aingĩ.
18. Nĩ ũndũ nĩaamenire muuma ũrĩa aanyuithirio na ũndũ wa gũthũkia kĩrĩkanĩro kĩrĩa kĩarĩkanĩirũo; kuona atĩ nĩoigire na ma atĩ nĩekũhingia kĩrĩkanĩro kĩu, ningĩ agacoka gwĩka maũndũ macio mothe-rĩ, ndakahonoka o na atĩa.
19. Tondũ ũcio Mwathani Jehova oigĩte ũũ: O ta ũrĩa niĩ ndũũraga muoyo-rĩ, ti-itherũ nĩ muuma wakwa ndamũnyuithirie na akĩũmena, o na agĩthahia kĩrĩkanĩro kĩrĩa ndarĩkanĩire nake; niĩ o na niĩ nĩngatũma acokererũo nĩ maũndũ macio mothe.
20. Nĩ kwamba ngamwambĩra mũtego wakwa, na agwatio, na nĩngamũtwarithia Babuloni, nakuo kũu nĩkuo ngamũcirithĩria nĩ ũndũ wa ihĩtia rĩake rĩa kwagarara watho wakwa.
21. Nao andũ ake othe arĩa makora a mbũtũ-inĩ ciake ciothe cia ita, nĩ kũgũa makagũa moragĩtwo na hiũ cia njora, nao arĩa magatigara mahurunjĩrũo huho-inĩ ciothe; na inyuĩ nĩmũkamenya atĩ niĩ Jehova nĩ niĩ njarĩtie ũhoro ũcio.
22. Na atĩrĩrĩ, Mwathani Jehova oigĩte ũũ: Kũrĩ hingo ĩgoka ngetuĩra kamũtĩ ke mũthia-inĩ wa mũtarakwa o na niĩ, ndĩkahande; ngagĩtua kahonge ka mũthia-inĩ ga tũhonge twĩthĩ tũrĩa tũrĩ o igũrũ gacũmbĩrĩ-inĩ kaguo, njoke ndĩkahande kĩrĩma-inĩ kĩraya na igũrũ, gĩtũũgĩru mũno;