1. Na gũgĩkinya atĩrĩ, atĩ mwaka wa ikũmi na ũmwe, o mũthenya wa mbere wa mweri-rĩ, ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
2. Mũrũ wa mũndũ, tondũ wa ũrĩa Turo rĩoigire, Aha! na rĩgĩkenerera Jerusalemu, na rĩkiuga atĩrĩ, Itũũra rĩrĩa rĩatariĩ ta kĩhingo gĩa gũtonyagĩrũo nĩ ndũrĩrĩ ciothe nĩ rĩtorie, nacio ikagarũrũka ikeroria kũrĩ niĩ; rĩu niĩ na niĩ-rĩ, nĩ kuongerereka ngongerereka nyingĩhe, tondũ itũũra rĩu nĩ kwanangwo rĩanangĩtwo;
3. tondũ ũcio Mwathani Jehova oigĩte ũũ: Atĩrĩrĩ, wee Turo, ndĩ wa kũhũrana nawe, na nĩngatũma ndũrĩrĩ nyingĩ ciũke igũtharĩkĩre, o ta ũrĩa iria rĩambararagia makũmbĩ marĩo na igũrũ.
4. Nacio nĩigatharia thingo cia Turo, o na imomore mĩthiringo yarĩo ya nyũmba ndaya na igũrũ; o naguo tĩri warĩo nĩngaũharahara ndĩũrute kuo, ndĩrĩtige rĩtariĩ ta rũaro rũtheri rũa ihiga.
6. Nao airĩtu arĩo arĩa magakorũo me mũgũnda nĩ kũũragwo makoragwo na hiũ cia njora; nao andũ akuo nĩmakamenya atĩ niĩ nĩ niĩ Jehova.
7. Amu Mwathani Jehova oigĩte ũũ: Atĩrĩrĩ, Nebukadirezaru, mũthamaki wa Babuloni, ũcio mũthamaki wa athamaki, nĩwe ngatwarithia Turo akarĩtharĩke, oimĩte na mwena wa gathigathini, e na mbarathi, na ngari cia ita, o na andũ arĩa mathiaga mahaicĩte mbarathi, na mbũtũ nene, o na andũ aingĩ mũno.
8. Na orage airĩtu aku arĩa magakorũo me mũgũnda na hiũ cia njora; na aakithie inyamũ ndaya na igũrũ cia mũtharĩko ikũrigicĩrie, na aitithie kĩhumbu kĩnene gĩa tĩri rũirigo-inĩ rũaku, nao andũ ake megitĩre na ndarĩ.
9. O na ningĩ nĩakaiga ngari ciake cia kũmomora rũirigo o kũu rũirigo-inĩ rũaku, o na atharie na mathanwa mĩthiringo yaku ya nyũmba ndaya na igũrũ.
10. Na rĩrĩ, tondũ wa ũrĩa mbarathi ciake ciingĩhĩte-rĩ, nĩũgathikwo nĩ mbĩĩri yacio; o nacio thingo ciaku cienyenyio nĩ mũrurumo wa arĩa mathiaga mahaicĩte mbarathi, o na wa makari, o na ngari cia ita, o hĩndĩ ĩrĩa agatonya ihingo-inĩ ciaku, ta ũrĩa gũtonyagwo itũũra rĩatharũrio rũthingo rũgĩe mĩanya.
11. Akarangithia njĩra ciaku ciothe na mahũngũ ma mbarathi ciake, na orage andũ aku na hiũ cia njora, o nacio itugĩ cia hinya waku igũithio thĩ tĩri-inĩ.
12. Nĩmagagũtunya ũtonga waku, na matahe thũgũrĩ waku mathiĩ naguo; na mamomore thingo ciaku igũe thĩ, o nacio nyũmba ciaku iria njega macitharie; namo mahiga ma mĩako yaku, na mbaũ ciaku, o na rũkũngũ rũaku, maciikie maĩ-inĩ thĩinĩ.
13.
Na nĩngatũma kayũ ka nyĩmbo ciaku gathire, o naguo mũgambo wa inanda ciaku nene cia mũgeto ndũkanacoke kũiguwo o na rĩ.
14. Na niĩ ngagũtua o rũaro rũtheri rũa ihiga, na ũtuĩke o handũ ha gũtambũrũkagĩrio mĩtego ya kũgwatia ciũngũyũ; na ndũgacoka gwakwo o na rĩ, nĩ gũkorũo niĩ Jehova, nĩ niĩ njarĩtie ũhoro ũcio; ũguo nĩguo Mwathani Jehova oigĩte.
15. Ningĩ Mwathani Jehova ekũũria Turo atĩrĩ, Anga ithama itigathingitha nĩ ũndũ wa mũrurumo wa kũgũa gwaku, rĩrĩa arĩa magurarĩte magakorũo magĩcaya, o hĩndĩ ĩrĩa gũkoraganwo thĩinĩ waku?
16.
Hĩndĩ ĩo anene othe a matũũra marĩa marĩ hũgũrũrũ-inĩ cia iria nĩmakoima itĩ-inĩ ciao cia ũnene, na marute nguo ciao iria ndaya, na mecume nguo ciao iria itirihĩtwo wega; nao mahubwo nĩ kĩinaino, na maikare thĩ tĩri-inĩ; na maikare makĩinainaga mategũtithĩria, na magegeare nĩwe.
17. Nao nĩmagaitĩka gũgũcakaĩra, makwĩre atĩrĩ, Hĩ! Kaĩ wee watũũrĩtwo nĩ andũ arĩa mathiaga iria-inĩ, o wee itũũra rĩĩ igweta, wĩ mũnine-ĩ! O wee gĩtũũro kĩrĩa gĩakĩtwo hũgũrũrũ-inĩ cia iria! Wĩ mũnine wee mwene o na andũ arĩa matũire thĩinĩ waku, na nĩo maatũmaga andũ arĩa matũire hũgũrũrũ-inĩ cia iria magwatwo nĩ icanjama!
19. Nĩ ũndũ Mwathani Jehova oigĩte atĩrĩ, Hĩndĩ ĩrĩa ngakwanangithia, na ndũme ũtuĩke ta matũũra marĩa makirĩte ihooru, o hĩndĩ ĩrĩa ngakũrikia kũndũ kũriku, ũhumbwo nĩ maĩ maingĩ-rĩ,
20. hĩndĩ ĩo nĩguo ngagũikũrũkia irima-inĩ hamwe na arĩa maikũrũkaga kuo, ũkinye harĩ andũ arĩa a tene, na ndũme ũtũũre ituri-inĩ iria irĩ mũhuro wa thĩ, o kũndũ kũrĩa gũtũire gũkirĩte ihooru kuuma o tene, mwĩ hamwe na arĩa maikũrũkaga kũu irima-inĩ rĩu, nĩ getha ndũkanacoke gũtũũrũo, kana riri waku ũcoke kuoneka bũrũri-inĩ wa arĩa marĩ muoyo.
21. Nĩngatũma ũtuĩke ũndũ wa kũmakania, nawe ndũgacoka kuonwo o na rĩ; o na ũngĩgacario, ndũrĩ hingo ũgacoka kuoneka rĩngĩ o na atĩa; ũguo nĩguo Mwathani Jehova oigĩte.