1. Na gũgĩkinya atĩrĩ, atĩ mwaka wa ikũmi na ũmwe, mweri wa ĩtatũ, o mũthenya wa mbere wa mweri ũcio-rĩ, ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
2. Mũrũ wa mũndũ, ĩra Firauni, mũthamaki wa Misiri, o na kĩrĩndĩ gĩake atĩrĩ, Nũ ũngĩ ũtariĩ tawe ũhoro-inĩ wa ũrĩa ũnenehete?
3. Atĩrĩrĩ, Mũashuri aatariĩ ta mũtarakwa wa Lebanoni wĩ honge njega na kĩĩruru kĩgitu, nakĩo kĩũga kĩaguo gĩkaraiha o nginya gacũmbĩrĩ kaguo gakahutia matu marĩa mathimbu,
4. naguo wakũrĩtio ũguo nĩ maĩ, na ukaraihio ũguo nĩ maĩ ma kũndũ kũriku. Njũĩ ciakuo nĩ kuunithio cioinithĩirio mĩgũnda yakuo yothe na ndwere ciothe, nayo mĩtaro ĩgatwarithagĩria mĩtĩ yothe ya gĩthaka maĩ.
5. Tondũ ũcio kĩũga kĩaguo gĩkĩraiha na igũrũ gũkĩra mĩtĩ ĩrĩa ĩngĩ yothe ya gĩthaka; nacio honge ciaguo ikĩongerereka, o nacio hwang’a ciaguo ikĩraiha nĩ ũndũ wa ũrĩa maĩ maaingĩhĩte magatũma ithundũke.
6. Nacio nyamũ ciothe cia rĩera-inĩ igĩaka tũnyũmba twacio hwang’a-inĩ ciaguo, o nacio nyamũ ciothe cia gĩthaka igĩciarĩra njaũ ciacio ruungu rũa honge ciaguo, o nacio ndũrĩrĩ ciothe iria nene igĩikara kĩĩruru-inĩ kĩaguo.
8.
Nayo mĩtarakwa ĩrĩa yarĩ mũgũnda wa Jehova ndĩigana kũũthiĩka, kana mĩthengera ĩkĩneneha ta ũrĩa honge ciaguo cianenehete, o na kana mĩraraciĩ ĩkĩneneha ta hwang’a ciaguo, o na kana mũtĩ o na ũrĩkũ wa mũgũnda wa Ngai ũkĩhaana taguo nĩ ũndũ wa gũthakara kwaguo.
9. Niĩ nĩ niĩ ndatũmire wagĩre ũguo nĩ ũndũ wa kũingĩhia honge ciaguo, o nginya mĩtĩ yothe ya Edeni, o ĩrĩa yarĩ mũgũnda wa Ngai, ĩkĩonwo ta ĩngĩũiguĩra ũiru.
11. niĩ o na niĩ nĩ kũrekereria ngaũrekereria ndĩũneane harĩ rũrĩrĩ rũĩ hinya kũrĩ ndũrĩrĩ iria ingĩ, naruo rũtirĩ hingo rũtakawĩka o ta ũrĩa kwagĩrĩire; amu-rĩ, ndĩũteete nĩ ũndũ wa waganu waguo.
12. Nao andũ a kũngĩ, a rũrĩrĩ rũĩ itua-nda, nĩo maũtemengete makaũtiga o ro ũguo; nacio hwang’a ciaguo ikagũa irĩma-inĩ o na cianda-inĩ ciothe, o nacio honge ciaguo ikoinangwo igũĩte mĩkuru-inĩ yothe ya bũrũri ũcio; nao andũ othe a thĩ magaikũrũka makoima kĩĩruru-inĩ kĩaguo, matigane naguo;
13. nacio nyamũ ciothe cia rĩera-inĩ igacoka gũtũũra mũgogo-inĩ ũcio mũbuthu, o nacio nyamũ ciothe cia gĩthaka ciikare honge-inĩ iria thamburĩku;
14. nĩ getha gũtikanagĩe mũtĩ ũngĩ o na ũmwe wa mĩtĩ ĩrĩa yothe ĩĩ gũkuhĩ na maĩ ũngĩĩtũũgĩria nĩ ũndũ wa kĩũga kĩaguo, o na kana ũraihie gacũmbĩrĩ kaguo kahutie matu marĩa mathimbu; o na kana ĩrĩa mĩtungu mũno ĩĩrũgamie na igũrũ, o ĩrĩa yothe ĩĩnyuithagia maĩ; nĩ gũkorũo nĩitirikĩtwo yothe na ĩkaneanwo ĩtemengerũo thĩ kũndũ kũrĩa kũriku, kũrĩa ciana cia andũ itũire iria ciikũrũkaga ikaharũke irima.
15. Mwathani Jehova oigĩte atĩrĩ, Mũthenya ũrĩa waikũrũkire ũgĩkinya kwa ngoma, nĩndatũmire kũgĩe kĩgirĩko, ngĩhumba maĩ macio me mũhuro wa thĩ nĩ ũndũ waguo, na ngĩrigĩrĩria njũĩ ciakuo, namo maĩ macio maiyũraga kuo makĩrigĩrĩrĩka; na ngĩtũma Lebanoni guothe gũthimbe nĩ ũndũ waguo, o nayo mĩtĩ yothe ya gĩthaka ĩkĩhoha nĩ ũndũ waguo.
16. Ngĩgĩtũma ndũrĩrĩ itebebe nĩ mũrurumo wa igũa rĩaguo, hĩndĩ ĩrĩa ndaũgũithirie thĩ ũgĩkinya kwa ngoma hamwe na arĩa maikũrũkaga maharũke kuo; o nayo mĩtĩ yothe ya Edeni, na ĩrĩa mĩega mũno gũkĩra ĩrĩa ĩngĩ ya kũu Lebanoni, o ĩrĩa yothe ĩnyuaga maĩ-rĩ, ĩgĩikara ta ĩhoreirio ngoro ĩrĩ thĩ kũndũ kũu kũriku.
17. O nayo ĩkĩharũrũkanĩra hamwe naguo kwa ngoma, ĩgĩkinya kũrĩa gũtũire andũ arĩa moragĩtwo na rũhiũ rũa njora; ĩĩ, ti-itherũ andũ acio nĩo maatũire mehokaine naguo, o acio maaikaraga kĩĩruru-inĩ kĩaguo thĩinĩ wa ndũrĩrĩ iria ingĩ.
18. Rĩu-rĩ, nĩ mũtĩ ũrĩkũ wĩ riri o na ũkaneneha ũguo tawe thĩinĩ wa mĩtĩ yothe ya Edeni? No rĩrĩ, nĩ kũharũrũkio ũkaharũrũkanĩrio na mĩtĩ ĩo ya Edeni thĩ kũndũ kũrĩa kũriku mũno, na ũkomage gatagatĩ-inĩ ka andũ arĩa matarĩ aruu, hamwe na arĩa moragĩtwo na rũhiũ rũa njora. Ũcio nĩwe Firauni na kĩrĩndĩ gĩake gĩothe; ũguo nĩguo Mwathani Jehova oigĩte.