Go Back

Ezekieli Chapter 32

• 1. Na gũgĩkinya atĩrĩ, atĩ mwaka wa ikũmi na ĩĩrĩ, o mweri wa ikũmi na ĩĩrĩ, na mũthenya wa mbere wa mweri ũcio-rĩ, ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
• 2. Mũrũ wa mũndũ, itĩkana na macakaya ũcakaĩre Firauni, mũthamaki wa Misiri, ũmwĩre atĩrĩ, Wee nĩwe ũgerekanĩtio na nyanake ya mũrũthi ndũrĩrĩ-inĩ iria ingĩ; ĩndĩ-rĩ, o na rĩu ũtariĩ ta kĩng’ang’i kĩrĩa gĩtũire maria-inĩ thĩinĩ; na nĩwaambataga ũkoimĩra kũu njũĩ-inĩ ciaku na hinya, na ũkoinjuga maĩ na magũrũ maku, o na ũkanungia maĩ wa njũĩ ciacio.
• 3. Mwathani Jehova oigĩte atĩrĩ, Ngagũtambũrũkĩria rũtego rũakwa rũa ndigi he gĩkundi kĩnene kĩa andũ, nao makwambatie thĩ ũgwatĩtio na rũtego rũu rũakwa.
• 4. Na niĩ ngũtige wĩ thĩ nyũmũ o ro ũguo, ngũikĩtie werũ-inĩ, na ndũme ũũmbĩrĩrũo nĩ nyamũ ciothe cia rĩera-inĩ, nawe nĩwe ngagĩtũma ũrĩo ũhũnie nyamũ ciothe cia gĩthaka cia gũkũ thĩ.
• 5. Ningĩ njaraganie nyama cia mwĩrĩ waku irĩma-inĩ, nacio igunyũ ciacio ciitĩke ciiyũre cianda-inĩ.
• 6. O naguo bũrũri ũrĩa ũtubagĩra ndĩũiyũrie thakame yaku, o nginya irĩma-inĩ ciaguo, nayo mĩkuru ĩiyũre thakame ĩo yaku.
• 7. Ningĩ rĩrĩa ngakũhoria nduma-rĩ, nĩ kũhumba ngahumba matu-inĩ, o nacio njata ciakuo ndũme igĩe nduma; narĩo riũa ndĩrĩhumbe na itu, o naguo mweri wage gũcoka kwara.
• 8. Ningĩ ’thiĩkĩrĩrie motheri marĩa maaraga igũrũ ndũme matuĩke nduma theri ĩkũhumbe, naguo bũrũri waku ndĩũiyũrie nduma; ũguo nĩguo Mwathani Jehova oigĩte.
• 9. O na ningĩ nĩngatũma ngoro cia andũ a ndũrĩrĩ nyingĩ ithite hĩndĩ ĩrĩa ngaheana ũhoro wa kũninwo gwaku ndũrĩrĩ-inĩ, o kũu mabũrũri-inĩ marĩa ũtoĩ.
• 10. Ĩĩ, ti-itherũ nĩngatũma ndũrĩrĩ nyingĩ imakio nĩwe, nao athamaki a cio metigĩre mũno nĩ ũndũ waku, hĩndĩ ĩrĩa ngamahiũrĩria rũhiũ rũakwa rũa njora; na rĩrĩ, mũthenya ũrĩa ũkagũa-rĩ, makainainaga mategũtigithĩria, mũndũ o mũndũ ainaine nĩ ũndũ wa guoya wa ndagakue o nake.
• 11. Amu Mwathani Jehova oigĩte ũũ: Nĩũgacomorithĩrio rũhiũ rũa njora rũa mũthamaki wa Babuloni,
• 12. na njũragithie kĩrĩndĩ gĩaku na hiũ cia njora cia andũ njamba, nao othe nĩo andũ a ndũrĩrĩ iria ingĩ irĩ itua-nda, nao matahe indo cia Misiri iria itũmaga metĩe, na maninũkie kĩrĩndĩ gĩothe gĩakuo.
• 13. O nacio nyamũ cia gĩthaka ciakuo ciothe nĩngacinina ciume hũgũrũrũ-inĩ cia maĩ macio maingĩ, nacio hũgũrũrũ icio itigacoka kũrangwo na kũgũrũ kwa mũndũ o na ũrĩkũ, o na kana itobokero-inĩ rĩacio riunjugwo nĩ ihũngũ rĩa nyamũ o na ĩrĩkũ, o rĩ, o rĩ.
• 14. Hĩndĩ ĩo nĩguo ngatũma maĩ makuo mathire muunju, na ndũme njũĩ ciakuo itherere, inyĩrĩrĩkĩte o ta maguta; ũguo nĩguo Mwathani Jehova oigĩte.
• 15. Na rĩrĩ, hĩndĩ ĩrĩa ngatũma bũrũri wa Misiri wanangĩke na ũkire ihooru, ũtuĩke bũrũri ũthirĩrĩkĩire indo ciaguo iria ciaiyũrĩte kuo, o na ’hũre andũ othe arĩa maũtũũraga-rĩ, hĩndĩ ĩo nĩmakamenya atĩ niĩ nĩ niĩ Jehova.
• 16. Ningĩ macakaya marĩa magacakayanĩra namo nĩmo macio, o marĩa airĩtu a ndũrĩrĩ iria ingĩ magacakayanĩra namo; ĩĩ, ti-itherũ, magacakaĩra Misiri, o na kĩrĩndĩ gĩakuo gĩothe, na macakaya macio; ũguo nĩguo Mwathani Jehova oigĩte.
• 17. Ningĩ gũgĩkinya atĩrĩ, atĩ mwaka ũcio wa ikũmi na ĩĩrĩ, mũthenya wa ikũmi na ĩtano wa mweri ũcio-rĩ, ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
• 18. Mũrũ wa mũndũ, itĩka gũcakaĩra kĩrĩndĩ kĩa andũ a Misiri, na ũmarũndĩthie thĩ, Misiri kuo kwene, o na airĩtu a ndũrĩrĩ iria irĩ igweta, ũmaharũrũkie thĩ kũndũ kũrĩa kũriku hamwe na arĩa maikũrũkaga maharũke irima.
• 19. Wee-rĩ, nũ ũkĩrĩtie riri? No kĩharũrũke, ũgakomio hamwe na arĩa mataruĩte.
• 20. Nao andũ acio makaharũkanĩra maikare hamwe na arĩa angĩ moragĩtwo na rũhiũ rũa njora, tondũ rũhiũ rũa njora nĩrũtuĩrĩirũo wĩra waruo. Mũtwarei hamwe na kĩrĩndĩ gĩake gĩothe.
• 21. Na rĩrĩ, andũ arĩa marĩ hinya thĩinĩ wa njamba-rĩ, makamwarĩria marĩ o kũu kwa ngoma, hamwe na arĩa mamũteithagia; nĩmaikũrũkĩte magakoma kuo makirĩte ki, o acio matarĩ aruu, moragĩtwo na rũhiũ rũa njora.
• 22. Kũu nĩkuo Mũashuri arĩ, na mbũtũ yake yothe ya ita, arigicĩirio nĩ mbĩrĩra cia andũ ake othe arĩa maagũire moragĩtwo na rũhiũ rũa njora;
• 23. nacio mbĩrĩra icio ciao cienjetwo kũndũ kũrĩa kũriku mũno irima-inĩ rĩu, nĩguo mbũtũ yake ya ita ĩrigicĩrie mbĩrĩra yake we mwene; no othe nĩ arĩa maaguoyohanagia bũrũri wa arĩa marĩ muoyo, nao nĩ orage, na makagũa maninĩtwo na rũhiũ rũa njora.
• 24. Nake Mũelamu nĩkuo arĩ, nakĩo kĩrĩndĩ gĩake gĩothe kĩrigicĩirie mbĩrĩra yake; andũ akĩo othe nĩ orage, na makagũa maninĩtwo na rũhiũ rũa njora, makaharũka matarĩ aruu magakinya o thĩ kũndũ kũrĩa kũriku mũno; nĩo maaguoyohanagia me bũrũri wa arĩa marĩ muoyo, na rĩu maconorithanĩirio hamwe na arĩa maikũrũkaga maharũke irima.
• 25. Nĩ kwara aarĩirũo ũrĩrĩ o kũu gatagatĩ-inĩ ka andũ arĩa moragĩtwo, hamwe na kĩrĩndĩ gĩake gĩothe, akarigicĩrio mĩena yothe nĩ mbĩrĩra; nao othe nĩo arĩa mataarĩ aruu, na makĩũragwo na rũhiũ rũa njora, tondũ nĩo maaguoyohanagia bũrũri wa arĩa marĩ muoyo, na rĩu maconorithanĩirio hamwe na arĩa maikũrũkaga maharũke irima; nake we mwene akaigwo gatagatĩ-inĩ ka andũ acio moragĩtwo.
• 26. Ningĩ kũu nokuo Mesheki na Tubali marĩ, o na kĩrĩndĩ kĩao gĩothe, marigicĩirio nĩ mbĩrĩra ciao na ndwere ciothe; nao othe nĩo arĩa mataarĩ aruu, na makĩũragwo na rũhiũ rũa njora, tondũ nĩo maaguoyohanagia bũrũri wa arĩa marĩ muoyo.
• 27. Githĩ to magakomio hamwe na njamba cia arĩa magũaga moragĩtwo a andũ arĩa matarĩ aruu, o acio maikũrũkĩte kwa ngoma hamwe na indo ciao cia mbaara, na makaiga hiũ ciao cia njora mĩtwe-inĩ yao, naguo waganu wao ũkamacokerera marĩ o mahĩndĩ matheri? Tondũ nĩmaaguoyohagia njamba iria ciatũire bũrũri wa arĩa marĩ muoyo.
• 28. No rĩrĩ, wee nĩ kuunangwo ũkoinangwo ũrĩ thĩinĩ wa acio matarĩ aruu, ũkomio hamwe na acio angĩ moragĩtwo na rũhiũ rũa njora.
• 29. Ningĩ Aedomu o nao nĩkuo marĩ, nao athamaki ao, o na atongoria ao othe, o acio othe akaru, makometio hamwe na arĩa moragĩtwo na rũhiũ rũa njora, nao magakoma hamwe na arĩa mataarĩ aruu, o na hamwe na arĩa maikũrũkaga maharũke irima.
• 30. O na ningĩ kũu nokuo anene othe a mwena wa gathigathini marĩ, o na Azidoni othe, arĩa maharũkanĩire irima hamwe na arĩa moragĩtwo; nĩ aconorithie o na harĩa maaguoyohanagia na ũkaru wao, nao magakomio thĩ matarĩ aruu, me hamwe na arĩa moragĩtwo na rũhiũ rũa njora, ningĩ magaconorithanĩrio hamwe na arĩa othe maikũrũkaga maharũke irima.
• 31. Nake Firauni nĩakamona, na aikare ta ahoreirio ngoro nĩ ũndũ wa kĩrĩndĩ gĩake gĩothe; o Firauni we mwene, na mbũtũ yake yothe ya ita, ĩrĩa yoragirũo na rũhiũ rũa njora; ũguo nĩguo Mwathani Jehova oigĩte.
• 32. Nĩ gũkorũo nĩ niĩ njiguithanĩtie guoya bũrũri wa arĩa marĩ muoyo; nake nĩagakomio gatagatĩ-inĩ ga acio mataarĩ aruu, o hamwe na acio othe moragĩtwo na rũhiũ rũa njora, o Firauni we mwene, o na kĩrĩndĩ gĩake gĩothe; ũguo nĩguo Mwathani Jehova oigĩte.

Home