1. NINGĨ ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
2. Mũrũ wa mũndũ, aria na ciana cia andũ anyu, ũciĩre atĩrĩ, Ingĩkarehithĩrie bũrũri o na ũrĩkũ rũhiũ rũa njora, nao andũ a bũrũri ũcio makorũo menyitĩire mũndũ ũmwe wao, makamũtua mũrangĩri wao-rĩ,
3. angĩgĩcoka one rũhiũ rũa njora rũgĩũka gũkora bũrũri ũcio, na ahuhe coro ere andũ aguo memenyerere-rĩ,
4. hĩndĩ ĩo mũndũ o wothe ũrĩa ũkaigua mũgambo wa coro na ndemenyerere, angĩgakorũo nĩ rũhiũ rũa njora, naruo rũmweherie, nĩagacokererũo nĩ thakame yake we mwene.
5. Nĩ gũkorũo nĩaaiguire mũgambo wa coro, na akĩaga kwĩmenyerera; ũcio nĩagacokererũo nĩ thakame yake we mwene; tondũ korũo nĩemenyereire-rĩ, nĩangĩahonokirie muoyo wake.
6. No rĩrĩ, mũrangĩri ũcio angĩkona rũhiũ rũu rũa njora rũgĩũka, na aage kũhuha coro nĩguo andũ merũo memenyerere, naruo rũhiũ rũu rũa njora rũũke na rũeherie mũndũ o na ũrĩkũ thĩinĩ wao; ũcio nĩakeherio nĩ ũndũ wa waganu wake, no gĩkuũ gĩake gĩgacokererio mũrangĩri wa bũrũri ũcio.
7. Ũguo noguo wee, mũrũ wa mũndũ, ngũtuĩte mũrangĩri wa nyũmba ya Isiraeli. Tondũ ũcio igua ũhoro ũrĩa ũkuuma kanua gakwa, ũmahe ũhoro uumĩte harĩ niĩ wa atĩ memenyerere.
9. No rĩrĩ, ũngĩĩra mũndũ ũcio mwaganu emenyerere atigane na mĩthiĩre ĩo yake, nake aage kũgarũrũka atigane na mĩthiĩre ĩo yake-rĩ, nĩagakua nĩ ũndũ wa waganu wake, no wee nĩwahonokia muoyo waku.
10. Nawe mũrũ wa mũndũ, ĩra nyũmba ya Isiraeli atĩrĩ, Inyuĩ mũkĩaria muugaga ũũ: Ithuĩ ti-itherũ nĩtũcokereirũo nĩ ũhoro witũ wa kwagarara watho, o na tũgacokererũo nĩ mehia maitũ, na tũkahwererekera tũgathira nĩ ũndũ wamo. Rĩu-rĩ, tũngĩgĩtũũra muoyo atĩa?
11. Kĩmere atĩrĩ, Mwathani Jehova oigĩte ũũ: O ta ũrĩa niĩ ndũũraga muoyo-rĩ, ndikenaga nĩ ũndũ wa gĩkuũ kĩa mũndũ mwaganu; no rĩrĩ, nĩ kaba mũndũ ũcio mwaganu agarũrũke atigane na mĩthiĩre ĩo yake nĩguo atũũre muoyo. Garũrũkai, mũgarũrũke mũtigane na mĩthiĩre yanyu ya ũũru, nĩ ũndũ-rĩ, kaĩ mũngĩgĩkua nĩ ũndũ kĩ, inyuĩ andũ a nyũmba ya Isiraeli?
12. Wee nawe, wee mũrũ wa mũndũ, ĩra ciana cia andũ anyu atĩrĩ, Ũthingu wa mũndũ ũrĩa mũthingu ndũkamũhonokia mũthenya ũrĩa akaagarara watho; naguo waganu wa mũndũ ũrĩa mwaganu-rĩ, ndũkamũhĩngithia mũthenya ũrĩa akagarũrũka atige waganu ũcio wake; o nake mũndũ ũrĩa mũthingu ndakagunwo nĩ ũthingu ũcio wake ũtũme atũũre muoyo mũthenya ũrĩa angĩĩhia.
13. Hĩndĩ ĩrĩa ngera mũndũ mũthingu atĩ ti-itherũ nĩegũtũũra muoyo-rĩ, angĩgatũũra ehokete ũthingu ũcio wake, acoke eke ũũru, hatirĩ ũndũ o na ũmwe wa ciĩko ciake cia ũthingu ũngĩcoka kũririkanwo, no nĩ gũkua agakua nĩ ũndũ wa ũũru wake ũcio ekĩte.
14. O na ningĩ hĩndĩ ĩrĩa ingĩĩra mũndũ mwaganu ũũ: Wee ti-itherũ nĩũgũkua, angĩgarũrũka atige mehia make, eke maũndũ marĩa maagĩrĩire na ma ma,
15. nake ũcio mwaganu acokie kĩndũ kĩrĩa gĩa kũya gũkũũrũo-rĩ, na acokie kĩndũ kĩrĩa aatunyanire, na athiage na mĩthiĩre ĩringaine na irĩra cia watho wa kũrũmĩrĩrũo wa muoyo ategwĩka ũndũ mũũru-rĩ, ti-itherũ nĩagatũũra muoyo, na ndakue.
16. Gũtirĩ ũndũ o na ũmwe wa mehia make marĩa ehĩtie ũgacoka kũririkanwo ũhoro-inĩ wake, nĩ gũkorũo nĩekĩte maũndũ marĩa maagĩrĩire na ma ma, na ndarĩ hingo atagatũũra muoyo.
17. No rĩrĩ, ciana cia andũ anyu ciugaga atĩrĩ, Matuĩro ma Mwathani matithiĩte ũndũ ũmwe. No ha ũhoro wacio-rĩ, nĩ matuĩro ma cio matathiĩte ũndũ ũmwe.
18. Hĩndĩ ĩrĩa mũndũ mũthingu angĩgarũrũka atigane na ũthingu wake, eke maũndũ ma waganu, nĩagakua nĩ ũndũ wamo.
19. No rĩrĩ, hĩndĩ ĩrĩa mũndũ mwaganu angĩgarũrũka atigane na waganu wake, eke maũndũ marĩa maagĩrĩire na ma ma, nĩ gũtũũra agatũũra muoyo nĩ ũndũ wamo.
20. No inyuĩ muugaga atĩrĩ o na rĩu, Matuĩro ma Mwathani matithiĩte ũndũ ũmwe. Atĩrĩrĩ, inyuĩ nyũmba ya Isiraeli, ngamũcirithia o mũndũ ta ũrĩa mĩthiĩre yake ĩtariĩ.
21.
Na gũgĩkinya atĩrĩ, atĩ mwaka wa ikũmi na ĩĩrĩ ĩrĩa twakorirũo tũninĩte gwata hĩndĩ ĩrĩa twarindũrirũo, o mweri wa ikũmi, na mũthenya wa ĩtano wa mweri ũcio-rĩ, mũndũ ũmwe agĩũka kũrĩ niĩ orĩte akoima Jerusalemu, agĩkĩnjĩra atĩrĩ, Itũũra nĩ ihũre.
22. Na niĩ ngĩgĩkorũo nĩndaigĩrĩirũo guoko kwa Jehova hwaĩ-inĩ wa mũthenya ũrĩa warĩ mbere ya ũcio worĩte atanoka; nake akĩndumũra kanua, hĩndĩ ĩrĩa mũndũ ũcio aakinyire harĩ niĩ rũcinĩ. Kanua gakwa gagĩgĩtumũka, na ndiigana gũcoka kũremwo nĩ kwaria.
23. Nayo ndũmĩrĩri ya Jehova ĩkĩnginyĩrĩra, ngĩĩrũo atĩrĩ,
24. Mũrũ wa mũndũ, andũ arĩa matũũrĩte kũndũ kũrĩa gũkirĩte ihooru, o kũu bũrũri wa Isiraeli, maaragia makoiga atĩrĩ, Iburahimu aarĩ o mũndũ ũmwe, nake nĩaagaĩirũo bũrũri ũyũ; no rĩrĩ, ithuĩ tũrĩ aingĩ, na tũheetwo bũrũri ũyũ ũtuĩke igai riitũ.
25. Tondũ ũcio mere atĩrĩ, Mwathani Jehova oigĩte ũũ: Mũrĩanagĩria nyama na thakame yayo, namo maitho manyu mũkamainamũrĩra mĩhianano yanyu ya kũhoyũo, na mũgaita thakame; na githĩ inyuĩ mwagĩtũũra mwĩgwatĩire bũrũri ũcio ũtũũre wĩ wanyu?
26. Mũtũũraga mwĩhokete rũhiũ rũanyu rũa njora, na mũgeka maũndũ me thahu, na mũndũ o mũndũ wanyu agathũkia mũka wa mũndũ ũrĩa ũngĩ; na githĩ mwagĩtũũra mwĩgwatĩire bũrũri ũcio ũtũũre wĩ wanyu?
27. No nginya ũmere ũũ: Atĩrĩrĩ, Mwathani Jehova oigĩte ũũ: O ta ũrĩa niĩ ndũũraga muoyo-rĩ, ti-itherũ andũ arĩa marĩ kũndũ kũrĩa gũkirĩte ihooru nĩ kũgũa makagũa moragĩtwo na rũhiũ rũa njora, o nake mũndũ ũrĩa wĩ werũ-inĩ ndĩmũrĩĩkithie nyamũ cia gĩthaka, o nao arĩa marĩ ihingo-inĩ iria njirige wega, o na ngurunga-inĩ, makue nĩ mũthiro.
28. Naguo bũrũri ũcio ndũme wanangĩke na ũtuĩke ta ũndũ wa kũgegania, o naguo ũkaru wa hinya waguo wage o kwaga; nacio irĩma cia Isiraeli cianangĩke, o nginya kwage mũndũ o na ũmwe ũngĩtuĩkania kuo.
29. Hĩndĩ ĩo nĩguo makamenya atĩ niĩ nĩ niĩ Jehova, o hĩndĩ ĩrĩa ngakorũo nyanangithĩtie bũrũri ũcio, o na ngatũma ũtuĩke ta ũndũ wa kũgegania, nĩ ũndũ wa maũndũ mao mothe ma thahu marĩa maaneka.
30. Naho ha ũhoro waku, wee mũrũ wa mũndũ-rĩ, ciana cia andũ anyu ciaragia ũhoro waku irĩ thingo-inĩ, na irĩ hingĩro-inĩ cia mĩromo ya nyũmba, igakĩaranĩria o mũndũ na mũndũ ũrĩa ũngĩ, o na nĩũndũ na mũrũ wa ithe, ikoiga atĩrĩ, Ndagũthaitha ta ũka ũigue ũrĩa ndũmĩrĩri ĩno yumĩte kwĩ Jehova ĩtariĩ.
31. Nacio igagĩũka harĩ wee o ta ũrĩa andũ mahũthĩire gwĩka igagĩikara mbere yaku o ta irĩ andũ akwa, nacio igakĩigua ndũmĩrĩri ciaku, no iticiĩkaga o ta ũrĩa itariĩ; nĩ ũndũ cionanagia wendo mũingĩ na tũnua twacio, no ngoro-inĩ ciacio-rĩ, ihang’anagia na maũndũ ma kwĩguna cio nyene.