Go Back

Ezekieli Chapter 35

• 1. O NA ningĩ ndũmĩrĩri ya Jehova ĩkĩnginyĩrĩra ngĩĩrũo atĩrĩ,
• 2. Mũrũ wa mũndũ, ta ikara ũroretie ũthiũ waku kĩrĩma gĩa Seiru, ũkĩrathĩre ũhoro,
• 3. ũkĩĩre atĩrĩ, Mwathani Jehova oigĩte ũũ: Atĩrĩrĩ, wee kĩrĩma gĩkĩ gĩa Seiru, ndĩ wa kũhũrana nawe, na nĩngagũtambũrũkĩria guoko gwakwa, ngwanangithie ũtuĩke o ta ũndũ wa kũgegania.
• 4. Matũũra maku-rĩ, nĩngatũma makire ihooru, nawe nĩ kwanangwo ũkaanangwo biũ; na nĩũkamenya atĩ niĩ nĩ niĩ Jehova.
• 5. Nĩ ũndũ-rĩ, ũtũire ũtuĩte atĩ mũgĩe muku wa tene na tene na ciana cia Isiraeli, ũgacineana ininwo na hinya wa rũhiũ rũa njora rĩrĩa igwatĩtwo nĩ mũtino, o na rĩrĩa iherithĩtio iherithia rĩa kũrigĩrĩria;
• 6. tondũ ũcio Mwathani Jehova oigĩte atĩrĩ, O ta ũrĩa niĩ ndũũraga muoyo-rĩ, ngagũthagathagithia ũitwo thakame, nayo thakame ĩo ĩgũthingatage kũrĩa guothe ũrĩthiaga. Kuona atĩ ndũthũũrĩte ũhoro wa gũitithia thakame-rĩ, o nawe nĩũrĩthingatagwo nĩ thakame ĩo o kũrĩa guothe ũrĩthiaga.
• 7. Ũguo nĩguo ngatũma kĩrĩma gĩa Seiru gĩtuĩke o ta ũndũ wa kũgegania, na kĩanangwo biũ; na thĩinĩ wakĩo ’nine mũndũ o wothe ũrĩa ũgũtuĩkania kuo, agĩthiĩ na agĩcoka.
• 8. Nacio irĩma-inĩ ciaku ngakũiyũria andũ aku arĩa moragĩtwo; na ningĩ ithũngũri-inĩ ciaku, o na cianda-inĩ ciaku, o na tũrũũĩ-inĩ twaku tuothe-rĩ, nĩkuo gũkagũa arĩa moragĩtwo na rũhiũ rũa njora.
• 9. Na nĩngatũma ũtuĩke kũndũ gũtũire kwanangĩtwo tene na tene, namo matũũra maku matigacoka gũtũũrũo nĩ andũ o na rĩ; na inyuĩ nĩmũkamenya atĩ niĩ nĩ niĩ Jehova.
• 10. Nĩ gũkorũo wee uugĩte atĩrĩ, Ndũrĩrĩ ici cierĩ, o na mabũrũri maya merĩ, igũtuĩka ciakwa; nĩtũgũciĩgwatĩra ituĩke ciitũ; o na gwatuĩka atĩ Jehova nĩkuo aarĩ.
• 11. Tondũ ũcio Mwathani Jehova oigĩte atĩrĩ, O ta ũrĩa niĩ ndũũraga muoyo-rĩ, ti-itherũ nĩ gwĩka ngagwĩka maũndũ marĩa maringaine na marakara maku, o na ũiru waku ũrĩa ũmaiguĩrĩire nĩ ũndũ wa ũrĩa ũmathũũrĩte; na nĩngemenyithania o kũu thĩinĩ wao, kũringana na ũrĩa ngũcirithĩtie.
• 12. Nawe nĩũkamenya atĩ niĩ Jehova nĩnjiguĩte irumi ciaku ciothe iria ũrumĩte irĩma cia Isiraeli, ũkiuga atĩrĩ, Nĩcianangĩtwo, o na ikaneanwo harĩ ithuĩ tũcininũkie.
• 13. Na nĩmwĩĩ’neneheirie na tũnua twanyu, na mũkorerera ndeto cianyu cia kũnjũkĩrĩra; na maũndũ macio niĩ nĩndĩmeiguĩrĩire.
• 14. Mwathani Jehova oigĩte ũũ: Hĩndĩ ĩrĩa thĩ yothe ĩgakorũo icanjamũkĩte-rĩ, wee nĩ kwananga ngakwanangithia.
• 15. O ta ũrĩa wekeneire nĩ ũndũ wa ũgai wa nyũmba ya Isiraeli wona atĩ nĩwaanangĩkĩte-rĩ, ũguo noguo ngagwĩka o nawe. Atĩrĩrĩ, wee kĩrĩma gĩkĩ gĩa Seiru, nĩ kwanangwo ũkaanangwo mwĩ hamwe na Edomu guothe, o guothe biũ; nao nĩmakamenya atĩ niĩ nĩ niĩ Jehova.

Home