1. Hĩndĩ ĩo ningĩ akĩ’hũndũra akĩnyumĩria njĩra ya kĩhingo-inĩ kĩa nyumĩrĩra ya handũ harĩa haamũre, o kĩu kĩrorete mwena wa irathĩro; nakĩo gĩgĩkorũo kĩrĩ kĩhinge.
2. Hĩndĩ ĩo Jehova agĩkĩnjĩra atĩrĩ, Kĩhingo gĩkĩ-rĩ, nĩgĩgũtũũra kĩhingĩtwo na gĩtigacoka kũhingũrũo, na gĩtirĩ mũndũ ũrĩcokaga gũgĩtonyera, nĩ gũkorũo Jehova, Ngai wa Isiraeli, nĩkĩo atonyeire, na tondũ ũcio gĩgũtũũra kĩhingĩtwo o ro ũguo.
3. Mũnene-rĩ, arĩikaraga ho akĩrĩa irio mbere ya Jehova; no arĩtonyaga na njĩra ya gĩthaku-inĩ gĩa kĩhingo, na ningĩ akiuma na nja-rĩ, ĩo nĩyo ariumagĩra.
4. Hĩndĩ ĩo ningĩ akĩndwara na njĩra ya kĩhingo-inĩ kĩa mwena wa gathigathini o kũu mbere ya nyũmba ĩo; na niĩ ngĩcũthĩrĩria, ngĩona riri wa Jehova ũiyũrĩte nyũmba ĩo ya Jehova, ngĩkĩĩgũithia, ngĩturumithia ũthiũ thĩ.
5. Nake Jehova akĩnjĩra atĩrĩ, Mũrũ wa mũndũ, maũndũ maya mothe-rĩ, macũranie wega na ngoro yaku, na ũmerorere na maitho maku, na ũmeiguĩre na matũ maku, o maũndũ mothe marĩa ngũkwĩra makoniĩ mĩtugo yothe ĩrĩa ĩtuĩtwo ya nyũmba ĩno ya Jehova, o na maathani mayo mothe; ũcũranie na ngoro yaku ũhoro o wothe wa arĩa matonyaga nyũmba ĩno, o na wa arĩa macokaga kuuma handũ harĩa haamũre.
6. Nao andũ acio aremu a nyũmba ya Isiraeli-rĩ, mere atĩrĩ, Mwathani Jehova oigĩte ũũ: Atĩrĩrĩ, inyuĩ andũ a nyũmba ya Isiraeli, rekei maũndũ manyu mothe marĩa mwaneka ma thahu mamũigane,
7. ma ũrĩa mwanatonyia andũ a kũngĩ handũ hakwa harĩa haamũre, o arĩa matarĩ aruu ngoro, o na kana mĩĩrĩ, maikare handũ hakwa hau haamũre, naho nĩho nyũmba yakwa, nĩguo mahathahie, o hĩndĩ ĩrĩa mũkũndutĩra irio, na maguta, o na thakame; nĩmwĩhĩtie kĩrĩkanĩro giitũ na inyuĩ na maũndũ manyu ma thahu.
8. Na inyuĩ mũtitũire mũikarĩtie wega indo ciakwa iria theru; no nĩ kũiga mũigĩte andũ acio ithenya rĩanyu a gũikaria handũ hau hakwa haamũre.
9. Mwathani Jehova oigĩte ũũ: Atĩrĩrĩ, gũtirĩ mũndũ wa kũngĩ, akĩrĩ mũndũ ũtarĩ mũruu ngoro kana akarua mwĩrĩ, ũgatonya handũ hau hakwa haamũre, o na angĩkorũo nĩ mũgeni o na ũrĩkũ ũrĩa ũrĩ thĩinĩ wa ciana cia Isiraeli.
10. Na rĩrĩ, Alawii arĩa manjehereire makandaihĩrĩria, rĩrĩa Aisiraeli metwarĩrĩirie na njĩra ciao, magathenga harĩ niĩ, makarũmĩrĩra mĩhianano yao ya kũhoyũo-rĩ, nĩmagacokererũo nĩ ũũru wao.
11. No rĩrĩ, o na kũngĩtuĩka nĩ ũguo-rĩ, nĩmarĩtungataga handũ-inĩ hakwa harĩa haamũre, matũũre maikaragia wega ihingo cia nyũmba ĩno, o na matungatage o ro ũguo kũu nyũmba ĩno thĩinĩ; acio nĩo marĩthinjaga magongona ma njino, o na magongona ma kũrutwo nĩ ũndũ wa andũ, na nĩo marĩrũgamaga mbere yao mamatungatĩre.
12. Nĩ ũndũ nĩo maamatungatagĩra marĩ mbere ya mĩhianano yao ya kũhoyũo, nao magĩtuĩka a kũhĩngithia andũ a nyũmba ya Isiraeli maagane na nĩ ũndũ ũcio nĩndĩmaambararĩirie guoko gwakwa ndĩmaherithie; ũguo nĩguo Mwathani Jehova oigĩte; nao nĩmagacokererũo nĩ ũũru wao.
13. Nao acio-rĩ, matigacoka gũ’thengerera atĩ nĩguo mandutĩre wĩra wa mũthĩnjĩri-Ngai, o na kana mathengerere kĩndũ o na kĩ kĩa indo ciakwa iria nyamũre, o icio theru mũno; no nĩmagacokererũo nĩ njono o ene, o na macokererũo nĩ maũndũ mao ma thahu marĩa maaneka.
14. Ĩndĩ nĩngamatua aikaria a gũtũũra maikaragia wega nyũmba yakwa, na marutage wĩra o ũrĩa ũrutagwo kuo, o na mekage o maũndũ mothe marĩa mangĩĩkagwo kuo.
15. No rĩrĩ, athĩnjĩri-Ngai Alawii a rũciaro rũa Zadoku, o acio maatũire maikaragia wega handũ hakwa harĩa haamũre hĩndĩ ĩrĩa ciana cia Isiraeli ciatwarĩrĩirio na njĩra ciacio cio nyene igathenga harĩ niĩ-rĩ, acio nĩo magathengerera harĩ niĩ mandungatĩre, na nĩo makarũgama mbere yakwa mandutagĩre maguta, o na thakame; ũguo nĩguo Mwathani Jehova oigĩte.
16. Ningĩ nĩo magatonya handũ hakwa harĩa haamũre, na mathengerere metha-inĩ yakwa, nĩguo mandungatagĩre, na matũũre marũmagia wega ũhoro ũcio wa kũndungatĩra.
17.
Na nĩgũgatuĩka atĩrĩ, atĩ hĩndĩ ĩrĩa magatonya na nja ya thĩinĩ magereire ihingo-inĩ ciayo-rĩ, magakorũo mehumbĩte nguo cia gatani; na matikanehumbe nguo cia guoya wa ng’ondu hĩndĩ ĩrĩa megũtungata matonyete na kũu ihingo-inĩ cia nja ĩo ya na thĩinĩ, o na kũu nyũmba-inĩ thĩinĩ.
18. Nĩmagekĩra ngũbia cia gatani mĩtwe, na meohe thuruarĩ cia gatani njohero-inĩ ciao; na matikanehotore na kĩndũ o na kĩ kĩrĩa kĩngĩtũma mathithine.
19. Na rĩrĩ, hĩndĩ ĩrĩa mekuumĩra na nja ĩrĩa ya nyumĩrĩra, o nja ya nyumĩrĩra ĩrĩa ĩikarĩtwo nĩ andũ-rĩ, nĩmakaamba kũruta nguo ciao icio matungataga nacio, maciige kũu tũnyũmba tũrĩa tũtheru thĩinĩ, macoke mehumbe nguo ingĩ, matikanaamũre andũ nĩ ũndũ wa nguo icio ciao.
20. O na ningĩ matikanenjwo mĩtwe, o na kana mareke njuĩrĩ yao ya mĩtwe ĩraihe; no nĩ kũrenga makarenga njuĩrĩ yao ya mĩtwe.
21. Ningĩ mũthĩnjĩri-Ngai o na ũrĩkũ ndakanakunde ndibei hĩndĩ ĩrĩa megũtonya na kũu nja ĩo ya na thĩinĩ.
22. O na kana mahikie aka a ndigwa, o na kana ũrĩa ũteetwo nĩ mũrũme, no mahikagie airĩtu gathirange a mbeũ ya nyũmba ya Isiraeli, o na kana mũka wa ndigwa ũrĩa ũngĩkorũo aarĩ wa mũthĩnjĩri-Ngai ũngĩ mbere ĩo;
23. Nao nĩo marĩrutaga andũ akwa gũthurania maũndũ marĩa maamũre na marĩa matarĩ maamũre, o na gũkũũrana indo iria ciamũrĩirũo wĩra mũtheru na iria itarĩ nyamũre.
24. Na rĩrĩ, hangĩoneka maũndũ megũkararanĩrio-rĩ, nĩo makarũgama matuithanie cira ũcio, na matue ituĩro rĩringaine na ũrĩa matua makwa ma cira matariĩ; na makamenyagĩrĩra maathani makwa, o na irĩra cia watho wakwa wa kũrũmĩrĩrũo ciathĩ-inĩ ciakwa iria njathane o nacio thabatũ ciakwa maciamũrage, macitue theru.
25. Na matikanathengerere kĩimba megwatie thahu nakĩo; tiga o ithe wa mũndũ, o na kana nyina wa mũndũ, o na kana kĩhĩĩ kĩa mũndũ, o na kana mwarĩ wa mũndũ, o na kana mũrũ wa nyina na mũndũ, o na kana mwarĩ wa nyina ũrĩa ũtarĩ aagĩa mũrũme; acio no-o mangĩĩgwatio thahu nao.
26. Na thutha wa aarĩkia gũtherio, makamũtarĩra matukũ mũgwanja eikarie o ro ũguo.
27. Na rĩrĩ, mũthenya ũrĩa agacoka gũtonya handũ harĩa haamũre, o nja ĩo ya na thĩinĩ, nĩguo atungate handũ-inĩ hau haamũre-rĩ, nĩakaruta igongona rĩake rĩa mehia; ũguo nĩguo Mwathani Jehova oigĩte.
28. Nao nĩmakagĩa na igai rĩao kĩũmbe, tondũ niĩ nĩ niĩ igai rĩao; mũtikanamaoaĩre kĩndũ o na kĩ gĩa gũtuĩka kĩao thĩinĩ wa Isiraeli, tondũ niĩ nĩ niĩ nduĩkĩte ta kĩndũ kĩao.
29. Nĩ kũrĩa makarĩaga mũtu ũrĩa ũrutagwo wa magongona, o na marĩage magongona ma mehia, o na ma mahĩtia; o nacio indo ciothe iria ciamũrĩirũo Jehova thĩinĩ wa Isiraeli-rĩ, igatuĩka ciao.
30. Na rĩrĩ, kĩndũ kĩa mbere kĩa marigithathi, o na irio cia mũro wa mbere, o na kĩndũ o gĩothe gĩa kũrutĩrũo Ngai kĩa indo ciothe, o na kĩa mũthemba o wothe ũrĩa mũrutaga-rĩ, igatuĩka cia athĩnjĩri-Ngai; ningĩ mũheage athĩnjĩri-Ngai kĩmere kĩanyu kĩa mbere kĩa ngano, nĩ getha mũrathimĩrũo nyũmba cianyu.
31. Athĩnjĩri-Ngai matikarĩa nyamũ o na ĩrĩkũ ĩrĩa ĩyũragĩte, o na kana kĩrembuĩ kĩa nyamũ, o na kĩngĩkorũo nĩ kĩa nyamũ ĩrĩa yũmbũkaga, o na kana kĩa nyamũ ya gĩthaka.