Go Back

Ezekieli Chapter 9

• 1. Hĩndĩ ĩo agĩkĩanĩrĩra o matũ-inĩ makwa na mũgambo mũnene, akiuga atĩrĩ, Thengererai hakuhĩ, inyuĩ mũrangagĩra itũũra, o mũndũ wanyu oke agwete rũhiũ rũake rũa kũninana naruo.
• 2. Na atĩrĩrĩ, andũ atandatũ magĩgĩũka moimĩte na njĩra ya kĩhingo-inĩ kĩrĩa kĩa na igũrũ, kĩrorete mwena wa gathigathini, mũndũ o mũndũ wao agwete rũhiũ rũake rũa mbaara, ningĩ makĩrehane na mũndũ ũngĩ ũmwe wĩ thĩinĩ wao, ehumbĩte nguo cia gatani, na eohete rũhĩa rũa rangi rũa mwandĩki-marũa njohero yake. Nao magĩgĩtonya thĩinĩ, makĩrũgama mwena-inĩ wa kĩgongona gĩa gĩcango.
• 3. Naguo riri wa Ngai wa Isiraeli ũgĩkorũo wambatĩte na igũrũ uumĩte Akerubi-inĩ, harĩa warĩ, ũgĩthiĩ hingĩro-inĩ ya nyũmba ĩo; nake agĩcoka agĩĩta mũndũ ũcio wehumbĩte nguo cia gatani, o ũcio warĩ na rũhĩa rũa rangi rũa mwandĩki-marũa njohero-inĩ yake.
• 4. Nake Jehova akĩmwĩra atĩrĩ, Thiĩ ũtuĩkanie itũũra, ũgere o gatagatĩ ka Jerusalemu, wĩkĩre rũũri mathiithi ma andũ arĩa megũcakaya na makarĩrĩra maũndũ mothe ma thahu marĩa mekagwo gũkũ thĩinĩ warĩo.
• 5. Naho ha ũhoro wa andũ arĩa angĩ-rĩ, ngĩigua akĩmera atĩrĩ, Na inyuĩ thiĩi mũtuĩkanie kũndũ guothe itũũra-inĩ rĩrĩ mũmuumĩte thutha, mũkahũrane; menyai mũreke maitho manyu macayanĩre, o na kana mũiguanĩre tha;
• 6. ũragai, o kũũraga biũ, athuri, na aanake, na airĩtu, na twana tũnini, o na andũ-a-nja; no rĩrĩ, mũtigathengerere mũndũ o na ũrĩkũ ũrĩa wĩkĩrĩtwo rũũri rũu; na mwambĩrĩrie o handũ haha hakwa haamũre. Nao magĩkĩambĩrĩria harĩ athuri acio maarĩ o hau mbere ya nyũmba ĩo.
• 7. Nake agĩcoka akĩmera atĩrĩ, Ĩkĩrai nyũmba ĩno thahu, mũiyũrie nja ciayo andũ arĩa moragĩtwo; na mũcoke muume gũkũ, mũthiĩ. Nao magĩkiumagara, makĩhũrana kũu itũũra-inĩ.
• 8. Na gũgĩkinya atĩrĩ, atĩ rĩrĩa maahũranaga, niĩ ngĩtigwo kuo, ngĩkĩĩgũithia ndurumithĩtie ũthiũ thĩ, ngĩanĩrĩra, ngiuga atĩrĩ, Hĩ, Mwathani Jehova! Anga nĩũkũninithia matigari mothe ma Isiraeli ũgĩitĩra Jerusalemu mathũgũta maku?
• 9. Hĩndĩ ĩo nake akĩnjĩra atĩrĩ, Waganu wa nyũmba ya Isiraeli na Juda nĩũnenehete mũno, naguo bũrũri nĩũiyũrĩtio thakame, o naguo ũhoro wa kũhotomia cira ũkaiyũra itũũra-inĩ; nĩ gũkorũo andũ arĩo moigaga atĩrĩ, Jehova nĩathengete bũrũri ũyũ; na Jehova ndonaga.
• 10. O naho ha ũhoro wakwa-rĩ, riitho rĩakwa rĩtigacayanĩra, o na kana njiguanĩre tha, no nĩ gũtũma ngatũma macokererũo nĩ ũũru wa mĩthiĩre yao.
• 11. Na atĩrĩrĩ, mũndũ ũcio wehumbĩte nguo cia gatani, o ũcio weohete na rũhĩa rũa rangi njohero yake akĩrehe ũhoro wa ũrĩa gwĩkĩtwo, akiuga atĩrĩ, Nĩnjĩkĩte o ta ũrĩa wanjathire ngeke.

Home