2. Aria na ciana cia Isiraeli ũciĩre ũũ: Mũndũ-wa-nja angĩgĩa ihu aciare mwana wa kahĩĩ-rĩ, agaikara mĩthenya mũgwanja arĩ mũgiro; aikare e mũgiro o ta ũrĩa aikaraga e mũgiro ihinda rĩake rĩa mweri.
3. Na mũthenya wa ĩnana wakinya kahĩĩ kau karuĩthio.
4. Ningĩ mũtumia ũcio acoke aikare matukũ mangĩ mĩrongo ĩtatũ na matatũ nĩguo athirũo nĩ thahu wa thakame yake, athere; na ihinda-inĩ rĩu ndakanahutie kĩndũ kĩamũre, kana atonye handũ harĩa haamũre, o nginya rĩrĩa matukũ make ma gũtherio makahinga.
5. No rĩrĩ, angĩciara mwana wa kairĩtu-rĩ, agaikara arĩ mũgiro ciumia igĩrĩ o ta ũrĩa aikaraga e mũgiro ihinda rĩake rĩa mweri; agĩcoke aikare matukũ mangĩ mĩrongo ĩtandatũ na matandatũ nĩguo athirũo nĩ thahu wa thakame yake, athere.
6. Na hĩndĩ ĩrĩa matukũ make ma gũtherio makahinga, ma kahĩĩ, kana ma kairĩtu, agagĩtwara gatũrũme ka mwaka ũmwe, gagatuĩke ihaki rĩa njino, na ndutura ĩtarĩ ngũrũ, kana ndirahũgĩ, ĩtuĩke igongona rĩa mehia, acitware mũromo-inĩ wa hema-ya-gũtũnganwo, harĩ mũthĩnjĩri-Ngai;
7. nake mũthĩnjĩri-Ngai akĩrutĩre igongona hau mbere ya Jehova, amũhoroherie; nake nĩagatherio riurĩro rĩa thakame yake. Ũcio nĩguo watho wa mũndũ-wa-nja ũrĩa ũkuohoka, o na angĩkorũo nĩ kahĩĩ kana kairĩtu ohokete.