1. NINGĨ Jehova agĩkĩarĩria Musa, na Haruni, akĩmera atĩrĩ,
2. Hĩndĩ ĩrĩa mũndũ akagĩa na handũ haimbu gĩkonde-inĩ kĩa mwĩrĩ wake, kana thundo, o na kana handũ heregethũku thĩinĩ wa mwĩrĩ wake, naho handũ hau honwo ta arĩ mangũ me mwĩrĩ-inĩ wake, hĩndĩ ĩo nĩagatwarũo kwĩ Haruni, mũthĩnjĩri-Ngai, kana harĩ ũmwe wa ariũ ake arĩa athĩnjĩri-Ngai;
3. nake mũthĩnjĩri-Ngai arore mũrimũ ũcio arũarĩte gĩkonde-inĩ kĩa mwĩrĩ wake; na angĩona guoya wa hau harũaru ũgarũrũkĩte ũkerũha, naguo mũrimũ ũkonwo ũrikĩire na thĩinĩ wa mwĩrĩ gũkĩra harĩa gĩkonde kĩaguo gĩakinya-rĩ, ũcio nĩ mũrimũ wa mangũ; nake mũthĩnjĩri-Ngai akĩmũbare, acoke atue ũhoro wake wa atĩ e na ng’ũki.
5. naguo mũthenya wa mũgwanja mũthĩnjĩri-Ngai agacoka amũbare, na atĩrĩrĩ, angĩona atĩ mũrimũ ũcio ũikarĩte o ro ũguo, na ndũgũthea gĩkonde-inĩ kĩa mwĩrĩ-rĩ, mũthĩnjĩri-Ngai amũhingĩre handũ mĩthenya ĩngĩ mũgwanja;
6. ningĩ mũthenya ũcio ũngĩ wa mũgwanja mũthĩnjĩri-Ngai abare mũndũ ũcio rĩngĩ; na atĩrĩrĩ, mũrimũ ũcio ũngĩgakorũo nĩũhũahũĩte, ũkaaga gũthea gĩkonde-inĩ kĩa mwĩrĩ, mũthĩnjĩri-Ngai agĩtue ũhoro wa atĩ mũndũ ũcio nĩ mũtheru; ĩo nĩ thundo ĩĩtuĩte, nake mũndũ ũcio agĩthambie nguo ciake na onwo atĩ ndarĩ na ng’ũki.
7. No rĩrĩ, thundo ĩo ĩngĩcoka gũthea mũno gĩkonde-inĩ kĩa mwĩrĩ, thutha wa aarĩkia kwĩonania he mũthĩnjĩri-Ngai agatuwo mũtheru, nĩacoke athiĩ akeyonanie he mũthĩnjĩri-Ngai rĩngĩ;
8. nake mũthĩnjĩri-Ngai amũbare, na atĩrĩrĩ, thundo ĩo ĩngĩkorũo ĩtheete gĩkonde-inĩ kĩa mwĩrĩ-rĩ, mũthĩnjĩri-Ngai agĩtue ũhoro wa atĩ mũndũ ũcio e na ng’ũki; mũrimũ ũcio nĩ wa mangũ.
9. Hĩndĩ ĩrĩa mũndũ ekũmenyũo atĩ e na mũrimũ ũcio wa mangũ-rĩ, nĩatwarũo he mũthĩnjĩri-Ngai;
10. nake mũthĩnjĩri-Ngai amũbare, na atĩrĩrĩ, hangĩkorũo he handũ haimbu herũhĩte gĩkonde-inĩ kĩa mwĩrĩ wake, na hakorũo nĩhagarũrĩte guoya waho ũkerũha, naho handũ hau haimbu hagĩe kĩronda nyama yaho yoneke ũimbo-inĩ ũcio-rĩ,
11. macio nĩ mangũ ma tene me gĩkonde-inĩ kĩa mwĩrĩ wake, nake mũthĩnjĩri-Ngai agĩtue ũhoro wa atĩ mũndũ ũcio e na ng’ũki; na ndakamũhingĩra handũ, nĩ gũkorũo e na ng’ũki.
12. Na rĩrĩ, mũthĩnjĩri-Ngai angĩona mangũ macio ta mamuumĩrĩire magathea gĩkonde-inĩ kĩa mwĩrĩ, namo mangũ macio maiyũre gĩkonde-inĩ gĩothe kĩa mũndũ ũcio, marutĩtie kũrũara o mũtwe, nginya o magũrũ-rĩ,
13. mũthĩnjĩri-Ngai nĩamũbare wega; na atĩrĩrĩ, mangũ macio mangĩkorũo nĩmaiyũrĩte mwĩrĩ wake makamũhuba, nĩagatua ũhoro wa mũndũ ũcio wĩ na mũrimũ atĩ ndarĩ na ng’ũki; gĩkonde gĩake gĩothe nĩkĩerũhĩte; ũcio ndarĩ na ng’ũki.
14. No rĩrĩ, hĩndĩ ĩrĩa yothe angĩonwo na ironda, nĩagatuĩka e na ng’ũki.
15. Hĩndĩ ĩo mũthĩnjĩri-Ngai abare mwĩrĩ wake harĩa harĩ ironda, atue ũhoro wa atĩ mũndũ ũcio e na ng’ũki; nyama ĩo ya mwĩrĩ ti theru, nĩ mangũ e namo.
16. Ningĩ-rĩ, nyama ĩo ya mwĩrĩ ĩngĩcoka kũgarũrũka, ĩĩgarũre yerũhe, hĩndĩ ĩo mũndũ ũcio nĩacoke he mũthĩnjĩri-Ngai,
17. nake mũthĩnjĩri-Ngai amũbare; na atĩrĩrĩ, nyama ĩo ĩngĩkorũo ĩgarũrũkĩte ĩkerũha-rĩ, mũthĩnjĩri-Ngai nĩagatua ũhoro wa atĩ mũndũ ũcio ũrĩ na mũrimũ ndarĩ na ng’ũki; nĩ mũtheru.
18. Na rĩrĩ, hĩndĩ ĩrĩa mũndũ angĩrũara ihũha gĩkonde-inĩ kĩa mwĩrĩ wake na rĩhone,
19. ningĩ hau haarĩ ihũha hagĩe handũ haimbu herũ, kana heregethũke, hatukanĩtie gũtunĩha na kwerũha, nĩhakonio mũthĩnjĩri-Ngai;
20. nake mũthĩnjĩri-Ngai ahabare, na atĩrĩrĩ, mũrimũ wa handũ hau ũngĩonwo ũrikĩire na thĩinĩ gũkĩra gĩkonde kĩa mwĩrĩ, naguo guoya waho ũkorũo nĩũgarũrũkĩte ũkerũha, hĩndĩ ĩo mũthĩnjĩri-Ngai nĩagatua ũhoro wa atĩ mũndũ ũcio e na ng’ũki; ũcio nĩ mũrimũ wa mangũ, nĩ kũmuumĩrĩra ũmuumĩrĩire ihũha-inĩ rĩu.
21. No rĩrĩ, mũthĩnjĩri-Ngai angĩũbara, na one atĩ hatirĩ guoya mwerũ ho thĩinĩ, na haage kũrikĩra na thĩinĩ gũkĩra gĩkonde kĩa mwĩrĩ, no nĩ kũhũa hahũahũĩte, hĩndĩ ĩo mũthĩnjĩri-Ngai akamũhingĩra handũ mĩthenya mũgwanja;
22. naho hangĩgĩkĩria gũthea mũno gĩkonde-inĩ kĩa mwĩrĩ wake-rĩ, mũthĩnjĩri-Ngai nĩagatua ũhoro wa atĩ mũndũ ũcio e na ng’ũki; ũcio nĩ mũrimũ wa mangũ.
23. No rĩrĩ, handũ hau heregethũku hangĩikara o ro ũguo handũ haho na haage gũthea-rĩ, kĩu nĩ kĩrema kĩa ihũha; na mũthĩnjĩri-Ngai nĩagatua ũhoro wa atĩ mũndũ ũcio ndarĩ na ng’ũki.
24. O na kana atĩrĩ, hĩndĩ ĩrĩa mũndũ angĩgĩa na ihĩa gĩkonde-inĩ kĩa mwĩrĩ wake acinĩtwo nĩ mwaki, narĩo ihĩa-inĩ rĩu hagĩe kĩronda, nyama yaho yoneke, naho heregethũke hatukanĩtie gũtunĩha na kwerũha, kana herũhe;
25. mũthĩnjĩri-Ngai nĩagakĩhabara, na atĩrĩrĩ, guoya wa handũ hau heregethũku ũngĩkorũo nĩũgarũrũkĩte ũkerũha, na hakonwo harikĩte na thĩinĩ wa mwĩrĩ gũkĩra harĩa gĩkonde gĩakinya-rĩ, nĩ mangũ, nĩ kuumĩrĩra moimĩrĩire mũndũ ũcio ihĩa-inĩ rĩu rĩake; nake mũthĩnjĩri-Ngai nĩagatua ũhoro wa atĩ mũndũ ũcio e na ng’ũki; ũcio nĩ mũrimũ wa mangũ.
26. No rĩrĩ, mũthĩnjĩri-Ngai angĩhabara, nake one atĩ guoya wa hau heregethũku ti mwerũ, na ti harikĩru na thĩinĩ gũkĩra gĩkonde, no hakorũo nĩhahũahũĩte, hĩndĩ ĩo mũthĩnjĩri-Ngai nĩamũhingĩre handũ mĩthenya mũgwanja;
27. ningĩ mũthĩnjĩri-Ngai ũcio acoke amũbare mũthenya wa mũgwanja; naguo mũrimũ ũngĩgagĩkorũo ũtheete mũno gĩkonde-inĩ kĩa mwĩrĩ-rĩ, mũthĩnjĩri-Ngai agĩtue ũhoro wa atĩ mũndũ ũcio e na ng’ũki; ũcio nĩ mũrimũ wa mangũ.
28. Na kũngĩkorũo hau heregethũku hegũikara o ro ũguo handũ haho, haage gũthea gĩkonde-inĩ kĩa mwĩrĩ, no hakorũo hahũahũĩte, ũcio nĩ ũimbo wa ihĩa, na mũthĩnjĩri-Ngai nĩagatua ũhoro wa atĩ mũndũ ũcio ndarĩ na ng’ũki; nĩ ũndũ kĩu no kĩrema kĩa ihĩa.
29. Na rĩrĩ, hĩndĩ ĩrĩa mũndũ mũrũme kana mũndũ-wa-nja angĩrũara mũrimũ mũtwe, kana nderu-inĩ,
30. mũthĩnjĩri-Ngai nĩabare mũrimũ ũcio; na atĩrĩrĩ, ũngĩkorũo ũkuonwo ũrikĩire na thĩinĩ wa mwĩrĩ wake gũkĩra gĩkonde, na hagĩe rũcuĩrĩ rũceke rũa guoya wa ngoikoni ho thĩinĩ, mũthĩnjĩri-Ngai nĩagatua ũhoro wa atĩ e na ng’ũki; ũcio nĩ mũthemba wa thundo njũru, nayo nĩyo mangũ ma mũtwe, kana ma nderu-inĩ.
31. Ningĩ mũthĩnjĩri-Ngai angĩbara thundo ĩo na one atĩ mũrimũ wayo ũkuonwo ũtarikĩire na thĩinĩ wa mwĩrĩ gũkĩra gĩkonde, na haage guoya mũirũ thĩinĩ waguo, hĩndĩ ĩo mũthĩnjĩri-Ngai ahingĩre mũndũ ũcio wĩ na mũrimũ wa thundo ĩo njũru handũ mĩthenya mũgwanja;
32. na mũthenya ũcio wa mũgwanja mũthĩnjĩri-Ngai akabara mũrimũ ũcio; na atĩrĩrĩ, mũrimũ ũcio wa thundo ĩo njũru ũngĩkorũo ndũtheete, na hakorũo hatirĩ guoya wa ngoikoni ho thĩinĩ, naguo mũrimũ ũcio wa thundo ĩo wonwo atĩ ndũrikĩire na thĩinĩ gũkĩra gĩkonde,
33. hĩndĩ ĩo mũndũ ũcio nĩ kwenjwo akenjwo, no ndakenjwo hau thundo-inĩ, nake mũthĩnjĩri-Ngai akahingĩra mũndũ ũcio wĩ na mũrimũ wa thundo ĩo handũ mĩthenya ĩngĩ mũgwanja;
34. ningĩ mũthenya wa mũgwanja mũthĩnjĩri-Ngai akabara mũrimũ ũcio wa thundo ĩo njũru, na atĩrĩrĩ, mũrimũ ũcio wa thundo ĩo ũngĩkorũo ndũtheete gĩkonde-inĩ kĩa mwĩrĩ, na wonwo ndũrikĩire na thĩinĩ wa mwĩrĩ wake gũkĩra gĩkonde, hĩndĩ ĩo mũthĩnjĩri-Ngai agĩtue ũhoro wa atĩ mũndũ ũcio ndarĩ na ng’ũki; nake athambie nguo ciake, onwo atĩ ndarĩ na ng’ũki.
35. No rĩrĩ, mũrimũ ũcio wa thundo ũngĩgacoka gũthea gĩkonde-inĩ kĩa mwĩrĩ wake thutha wa aarĩkia gũtherio agathirũo nĩ ng’ũki-rĩ,
36. mũthĩnjĩri-Ngai nĩagacoka amũbare rĩngĩ, na atĩrĩrĩ, angĩona atĩ mũrimũ ũcio nĩũtheete gĩkonde-inĩ kĩa mwĩrĩ, mũthĩnjĩri-Ngai ndakanatindĩrĩre agĩcaria guoya ũcio wa ngoikoni; mũndũ ũcio e na ng’ũki.
37. No rĩrĩ, mũthĩnjĩri-Ngai angĩona mũrimũ ũcio ũikarĩte handũ haguo o ro ũguo na ndũtheete, na hakorũo hamerete guoya mũirũ ho, hĩndĩ ĩo mũrimũ ũcio nĩ mũhonu, na mũndũ ũcio ndarĩ na ng’ũki, nake mũthĩnjĩri-Ngai agĩtue ũhoro wa atĩ ndarĩ na ng’ũki.
38. Na rĩrĩ, hĩndĩ ĩrĩa mũndũ mũrũme kana mũndũ-wa-nja angĩgĩa na kũndũ kweregethũku mwĩrĩ wake, naguo ũguo nĩ ta kuuga magĩe kũndũ kweregethũku kwerũ,
39. hĩndĩ ĩo mũthĩnjĩri-Ngai nĩabare; na atĩrĩrĩ, kũndũ kũu kweregethũku me nakuo ikonde-inĩ cia mĩĩrĩ yao kũngĩkorũo ti kwerũ mũno-rĩ, nĩ ũhere, nĩ kũmuumĩrĩra ũmuumĩrĩire gĩkonde-inĩ kĩa mwĩrĩ wake; mũndũ ũcio ndarĩ na ng’ũki.
40. Na rĩrĩ, njuĩrĩ ya mũtwe wa mũndũ ĩngĩmunyũka, ũcio nĩ kĩhara e nakĩo; no rĩrĩ, o na atariĩ ũguo-rĩ, ndarĩ na ng’ũki.
41. Na njuĩrĩ yake ĩngĩmunyũka ĩmũrutĩtie na thiithi, ũcio nĩ kĩhara gĩa thiithi e nakĩo; no rĩrĩ, o na atariĩ ũguo-rĩ, ndarĩ na ng’ũki.
42. No hangĩkorũo harĩ handũ harũarĩte hatukanĩtie gũtunĩha na kwerũha thĩinĩ wa kĩhara kĩu kĩa mũtwe, kana kĩu gĩa thiithi, ũcio nĩ mũrimũ wa mangũ ũmuumĩrĩire kĩhara-inĩ kĩa mũtwe, kana kĩhara-inĩ gĩa thiithi.
43. Hĩndĩ ĩo mũthĩnjĩri-Ngai nĩakĩmũbare, na atĩrĩrĩ, ũimbo wa mũrimũ ũcio ũngĩkorũo ũtukanĩte gũtunĩha na kwerũha kĩhara-inĩ kĩa mũtwe wake, kana gĩa thiithi, o ta ũrĩa mangũ monagwo matariĩ marĩ gĩkonde-inĩ kĩa mwĩrĩ wa mũndũ,
44. mũndũ ũcio nĩ kũgwatwo agwatĩtwo nĩ mangũ, na arĩ na ng’ũki; nake mũthĩnjĩri-Ngai agĩtue ũhoro wa atĩ e na ng’ũki; mũrimũ wa mũndũ ũcio wĩ mũtwe.
45. Nake mũndũ ũrĩa ũrũarĩte mangũ akehumbaga nguo ndembũkangu, na njuĩrĩ ya mũtwe wake ĩikarage ĩrĩ nguũrie, na ehumbage kĩromo kĩa mwena wa igũrũ, akaanagĩrĩra ũũ: Ndĩ na ng’ũki! Ndĩ na ng’ũki!
46. Namo matukũ mothe marĩa mũndũ ũcio agaikara arĩ o na mũrimũ ũcio nĩakonagwo arĩ na ng’ũki; ti-itherũ e na ng’ũki, na akeikaragia wiki; ũtũũro wake ũkagĩa na kũu gĩthaka-inĩ mbarĩ ĩrĩa ĩngĩ ya hau kĩraaro-inĩ.
47. O nayo nguo ĩrĩa ĩĩ mũrimũ wa mangũ, o na ĩngĩkorũo nĩ nguo ya guoya wa ng’ondu, kana ya gatani;
48. o na kũngĩkorũo wĩ thĩinĩ wa ndigi cia mũrũgamo, kana thĩinĩ wa ndigi cia mũkĩgiĩ cia nguo ya gatani kana ya guoya; o na kũngĩkorũo nĩ rũũa, kana kĩndũ o na kĩ gĩthondeketwo na rũũa-rĩ,
49. handũ harĩa mũrimũ ũcio ũrĩ, o na arĩ nguo-inĩ, kana rũũa-inĩ, kana ndigi-inĩ cia mũrũgamo, kana ndigi-inĩ cia mũkĩgiĩ, kana kĩndũ o na kĩ kĩrĩa gĩthondeketwo na rũũa; handũ harĩa hangĩgĩa rangi ta wa nyeki nduru, kana hatunĩhe, mũrimũ ũcio nĩ wa mangũ; nĩwonio mũthĩnjĩri-Ngai,
50. nake mũthĩnjĩri-Ngai abare mũrimũ ũcio, na acoke ahingĩre kĩrĩa kĩĩ na mũrimũ ũcio handũ mĩthenya mũgwanja;
51. ningĩ mũthenya wa mũgwanja agacoka abare mũrimũ ũcio; na rĩrĩ, kũngĩkorũo mũrimũ ũcio nĩũtheete nguo-inĩ ĩo, ndigi-inĩ ciayo cia mũrũgamo, kana ndigi-inĩ ciayo cia mũkĩgiĩ, kana rũũa-inĩ o na rũĩ rũa kũrutĩrũo wĩra o na ũrĩkũ-rĩ, mũrimũ ũcio nĩ wa mangũ ma mũthemba ũrĩa ũtheaga mũno; icio ii na ng’ũki.
52. Nake nĩ gũcina agacina nguo ĩo, o na ĩngĩtuĩka nĩ ndigi-inĩ ciayo cia mũrũgamo kana ndigi cia mũkĩgiĩ igwatĩtwo nĩguo, cia nguo ya guoya wa ng’ondu, kana ya gatani, kana kĩndũ o na kĩ kĩa rũũa, kĩrĩa kĩngĩkorũo kĩgwatĩtwo nĩ mũrimũ ũcio; nĩ gũkorũo mangũ macio nĩ ma mũthemba ũrĩa ũtheaga mũno, nguo ĩo nĩ gũcinwo ĩgacinwo na mwaki.
53. Nake mũthĩnjĩri-Ngai angĩkabara one atĩ mũrimũ ndũtheete nguo-inĩ ĩo, o na kũngĩkorũo nĩ ndigi-inĩ cia mũrũgamo, kana ndigi-inĩ cia mũkĩgiĩ, kana ũgathea kĩndũ-inĩ kĩu gĩthondeketwo na rũũa;
55. na rĩrĩ, kĩndũ kĩu kĩgwatĩtwo nĩ mũrimũ ũcio kĩarĩkia gũthambio-rĩ, mũthĩnjĩri-Ngai akĩbare rĩngĩ; na atĩrĩrĩ, handũ harĩa mũrimũ ũraarĩ hangĩkorũo hatigarũrũkĩte ũrĩa harahaanaga, o na harĩa mũrimũ ũcio ũtatheete-rĩ, nguo ĩo ĩĩ na ng’ũki; hĩndĩ ĩo no mũhaka kĩndũ kĩu gĩcinwo na mwaki; mũrimũ ũcio nĩ wa mũthemba ũrĩa ũtheaga mũno, o na kũngĩtuĩka kũndũ kũrĩa kũmunyũku nĩ kwa mwena wa thĩinĩ, kana kwa na igũrũ.
56. Na rĩrĩ, mũthĩnjĩri-Ngai angĩbara, nake one atĩ mũrimũ ũcio nĩ kũhũa ũhũĩte warĩkia gũthambio, hĩndĩ ĩo nĩagatembũra hau ũrarĩ, hehere nguo-inĩ ĩo, kana rũũa-inĩ rũu, kana ndigi-inĩ cia mũrũgamo, kana ndigi-inĩ cia mũkĩgiĩ;
57. no ũngĩkorũo nĩũgũcoka kuoneka rĩngĩ nguo-inĩ ĩo, o na gwatuĩka nĩ ndigi-inĩ cia mũrũgamo, kana ndigi-inĩ cia mũkĩgiĩ, kana thĩinĩ wa kĩndũ o na kĩ kĩa rũũa, mũrimũ ũcio nĩ kũrurumũka ũrurumũkĩte, na no mũhaka kĩndũ kĩu kĩĩ naguo gĩcinwo na mwaki.
58. No rĩrĩ, nguo ĩo, o na ĩngĩkorũo nĩ ndigi-inĩ ciayo cia mũrũgamo, kana ndigi-inĩ ciayo cia mũkĩgiĩ, kana kĩndũ o na kĩ kĩa rũũa, o ĩo ĩthambĩtio-rĩ, mũrimũ ũcio ũngĩkorũo nĩuumĩte thĩinĩ wa indo icio, ũgathira, hĩndĩ ĩo nguo ĩo nĩĩgathambio ihinda rĩa kerĩ, nayo nĩĩkonagwo ĩtarĩ na ng’ũki.
59. Watho wa mũrimũ wa mangũ nĩguo ũcio, rĩrĩa ũngĩkorũo ũgwatĩte nguo-inĩ ya guoya wa ng’ondu kana ya gatani, o na ũngĩkorũo wĩ ndigi-inĩ ciayo cia mũrũgamo, kana cia mũkĩgiĩ, kana ũkorũo ũrĩ thĩinĩ wa kĩndũ o na kĩ kĩa rũũa; nĩ getha indo icio igĩtuwo atĩ itirĩ na ng’ũki, kana ituwo atĩ irĩ na ng’ũki.