1. NAKE Jehova akĩarĩria Musa na Haruni, akĩmera atĩrĩ,
2. Arĩriai ciana cia Isiraeli, mũciĩre ũũ: Mũndũ o na ũrĩkũ angĩkorũo mwĩrĩ wake nĩũkuura nĩ ũndũ wa mũthiori-rĩ, nĩarĩonagwo e na thahu nĩ ũndũ wa kuura kũu.
3. Naguo ũhoro wake nĩ atĩ nĩarĩonagwo e na thahu matukũ mothe marĩa arĩkoragwo e na mũrimũ ũcio, o na mahinda marĩa mwĩrĩ wake ũrĩkoragwo ũkiura, kana mahinda marĩa ũtekuura, mũndũ ũcio arĩikaraga o arĩ na thahu.
4. Ũrĩrĩ o wothe ũrĩa mũndũ ũcio ũkuura agakomera nĩakaũgwatia thahu, o nakĩo kĩndũ o gĩothe kĩrĩa agaikarĩra nĩagakĩgwatia thahu.
5. Nake mũndũ o wothe ũrĩa ũkahutia ũrĩrĩ wake nĩagathambia nguo ciake, nake we mwene ethambe na maĩ, na atinde e na thahu nginya o hwaĩ-inĩ.
6. Nake mũndũ ũrĩa ũgaikarĩra kĩndũ o na kĩ kĩrĩa gĩaikarĩirũo nĩ mũndũ ũcio ũkuura-rĩ, nĩagathambia nguo ciake, nake we mwene ethambe na maĩ na atinde e na thahu nginya o hwaĩ-inĩ.
7. Ningĩ mũndũ ũrĩa ũkahutia mwĩrĩ wa mũndũ ũcio ũkuura nĩagathambia nguo ciake, na ethambe na maĩ, na atinde e na thahu nginya o hwaĩ-inĩ.
8. Na rĩrĩ, mũndũ ũcio ũkuura angĩtuĩra mũndũ ũtarĩ na thahu mata-rĩ, ũcio ũtuĩrĩirũo mata nĩagathambia nguo ciake, na ethambe na maĩ, na atinde e na thahu nginya o hwaĩ-inĩ.
9. Narĩo itandĩko o na rĩrĩkũ rĩrĩa mũndũ ũcio ũkuura akahaica aikarĩre, nĩrĩkonagwo rĩĩ na thahu.
10. Nake mũndũ o na ũrĩkũ ũrĩa ũkahutia kĩndũ o na kĩ kĩrĩa aaikarĩire kĩrĩ mũhuro wake nĩagatinda agwatĩtwo nĩ thahu nginya o hwaĩ-inĩ; nake mũndũ ũrĩa ũgakuua indo icio nĩagathambia nguo ciake, na ethambe na maĩ, nake atinde e na thahu nginya o hwaĩ-inĩ.
11. O nake mũndũ o wothe ũrĩa mũndũ ũcio ũkuura akahutia ataambĩte gwĩthamba moko na maĩ, nĩagathambia nguo ciake, na ethambe na maĩ, nake atinde e na thahu nginya o hwaĩ-inĩ.
12. Na rĩrĩ, kĩndũ kĩa rĩũmba kĩrĩa mũndũ ũcio ũkuura akahutia, nĩgĩkoragwo; o nayo mbakũri, kana kĩndũ o na kĩ kĩa mũtĩ, nĩgĩgathambio na maĩ.
13. Nake mũndũ ũcio ũkuura rĩrĩa angĩkorũo ahonete kuura kũu-rĩ, nĩagetarĩra matukũ mũgwanja ma gwĩtheria, athambie nguo ciake, na acoke ethambĩre mwĩrĩ na maĩ handũ megũtherera, na nĩegũthera.
14. Naguo mũthenya wa ĩnana akoya ndirahũgĩ igĩrĩ, kana ndutura igĩrĩ itarĩ ngũrũ, athiĩ o mbere ya Jehova mũromo-inĩ wa hema-ya-gũtũnganwo, acinengere mũthĩnjĩri-Ngai;
15. nake mũthĩnjĩri-Ngai acirute igongona, ĩmwe ĩtuĩke ya igongona rĩa mehia, nayo ĩrĩa ĩngĩ ĩtuĩke ya ihaki rĩa njino, mũthĩnjĩri-Ngai akĩmũhoroherie kuura kũu gwake mbere ya Jehova.
16. Na rĩrĩ, mũndũ o na ũrĩkũ angiumwo nĩ hinya wa arũme-rĩ, no mũhaka ethambe mwĩrĩ wothe na maĩ, nake atinde e na thahu nginya o hwaĩ-inĩ.
17. Nayo nguo ĩrĩa yothe, kana rũũa ruothe, harĩa hangĩkorũo hagĩĩte hinya ũcio wa arũme, no mũhaka hathambio na maĩ, nayo nguo ĩo ĩtinde ĩrĩ na thahu nginya o hwaĩ-inĩ.
18. Ningĩ mũndũ mũrũme angĩkorũo makomanĩtie na mũndũ-wa-nja akoimwo nĩ hinya wa arũme, no mũhaka acio erĩ methambe na maĩ, nao matinde me na thahu nginya o hwaĩ-inĩ.
19. Ningĩ mũndũ-wa-nja angĩkorũo nĩekuura, na gũkorũo nĩ thakame ya ihinda rĩake rĩa mweri-rĩ, agaikara e mũgiro mĩthenya mũgwanja; na mũndũ o wothe ũrĩa ũkamũhutia agatinda e na thahu nginya o hwaĩ-inĩ.
20. Nakĩo kĩndũ o gĩothe kĩrĩa agakomera ihinda rĩu e mũgiro nĩgĩkagwatwo nĩ thahu, o nakĩo kĩndũ o gĩothe kĩrĩa agaikarĩra nĩgĩkagwatwo nĩ thahu.
21. Nake mũndũ o wothe ũrĩa ũkahutia ũrĩrĩ wake nĩagathambia nguo ciake, na ethambe na maĩ, na atinde e na thahu nginya o hwaĩ-inĩ.
22. Nake mũndũ o wothe ũrĩa ũkahutia kĩndũ o na kĩ kĩrĩa mũndũ-wa-nja ũcio agaikarĩra, nĩagathambia nguo ciake, na ethambe na maĩ, na atinde e na thahu nginya o hwaĩ-inĩ.
23. Na rĩrĩ, kĩndũ o na kĩ kĩrĩa kĩrĩ ũrĩrĩ wake igũrũ, kana kĩrĩa gĩothe aikaragĩra-rĩ, mũndũ o wothe ũrĩa ũgakĩhutia agatinda e na thahu nginya o hwaĩ-inĩ.
24. Na mũndũ mũrũme o na ũrĩkũ angĩgakoma nake, na ahutio nĩ kĩndũ kĩu gĩtũmaga mũndũ-wa-nja ũcio aikare e mũgiro, mũndũ mũrũme ũcio agaikara mĩthenya mũgwanja arĩ o na thahu, o nakĩo gĩtanda kĩrĩa mũndũ mũrũme ũcio agakomera nĩgĩkagwatwo nĩ thahu.
25. Na rĩrĩ, mũndũ-wa-nja angiura thakame matukũ maingĩ matarĩ ma ihinda rĩake rĩa mweri, kana oire thakame aagararie ihinda rĩake rĩa mweri, matukũ macio mothe ekuura thakame ĩo agaikara o ta ũrĩa aikaraga ihinda rĩake rĩa mweri, akĩonagwo atĩ e mũgiro.
26. Ũrĩrĩ o wothe ũrĩa mũndũ-wa-nja ũcio agakomera matukũ macio mothe ekuura ũkonagwo ũtariĩ o ta ũrĩrĩ ũrĩa akomagĩra hĩndĩ yake ya mweri; nakĩo kĩrĩa gĩothe agaikaragĩra nĩgĩkonagwo kĩĩ na thahu o ta ũguo, o ta ũrĩa kũhaanaga ihinda rĩake rĩa mweri.
27. Nake mũndũ o wothe ũrĩa ũkahutia indo icio nĩakagwatwo nĩ thahu, na athambie nguo ciake, o na ethambe na maĩ, na atinde e na thahu nginya o hwaĩ-inĩ.
28. No rĩrĩ, mũndũ-wa-nja ũcio rĩrĩa agathirũo nĩ kuura kũu-rĩ, agetarĩra matukũ mũgwanja ma gwĩtheria, na thutha wa ũguo nĩakonagwo e mũtheru.
29. Mũthenya wa ĩnana agakĩoya ndirahũgĩ igĩrĩ, kana ndutura igĩrĩ itarĩ ngũrũ, acitwarĩre mũthĩnjĩri-Ngai, o hau mũromo-inĩ wa hema-ya-gũtũnganwo.
30. Nake mũthĩnjĩri-Ngai arute ĩmwe ĩtuĩke ya igongona rĩa mehia, nayo ĩrĩa ĩngĩ ĩtuĩke ya ihaki rĩa njino; mũthĩnjĩri-Ngai akĩmũhoroherie mbere ya Jehova nĩ ũndũ wa kuura kũu gwake kũrĩa gwatũmĩte agĩe mũgiro.
32. Ũcio nĩguo watho wa mũndũ ũrĩa ũkuura nĩ ũndũ wa mũthiori, na wa ũrĩa ũkũgwatwo nĩ thahu nĩ ũndũ wa kuumwo nĩ hinya wa arũme;
33. na wa mũndũ-wa-nja o wothe ũrĩa ũthũkĩte nĩ ũndũ wa ũhoro wake wa ihinda rĩa mweri, na wa mũndũ o wothe ũrĩa ũkuura, o na angĩtuĩka nĩ mũndũ mũrũme, o na kana mũndũ-wa-nja, o na wa mũndũ mũrũme ũrĩa ũngĩkoma na mũndũ-wa-nja hĩndĩ ĩrĩa e mũgiro.