1. NINGĨ Jehova akĩarĩria Musa thutha wa ariũ arĩa erĩ a Haruni maarĩkia gũkua, nao nĩo arĩa maathengereire Jehova, makĩrũgama mbere yake magĩgĩkua;
2. Jehova agĩkĩĩra Musa atĩrĩ, Arĩria Haruni, mũrũ wa nyũkwa, ũmwĩre ndakanatonyage handũ harĩa hatheru o mahinda mothe, o hau thĩinĩ wa gĩtama gĩa kũhakania, arũgame mbere ya gĩikaro-gĩa-tha kĩrĩa kĩrĩ igũrũ rĩa ithandũkũ rĩa Ngai, nĩ getha ndakanakue; nĩ gũkorũo nĩho ndĩyumagĩria ngonwo ndĩ thĩinĩ wa itu rĩrĩa rĩrĩ igũrũ rĩa gĩikaro-kĩu-gĩa-tha.
3. Nacio indo ici nĩcio Haruni akaamba kũruta atanatonya handũ hau hatheru, nĩ ndegwa ĩtarĩ ngũrũ ya igongona rĩa mehia, na ndũrũme ya ihaki rĩa njino.
4. Nake arĩĩhumbaga kanjũ ũrĩa mũtheru wa gatani, na agekĩra thuruarĩ cia gatani mwĩrĩ, na akehotora mũcibi ũrĩa wa gatani, o na akeĩkĩra kĩremba kĩrĩa gĩa gatani; icio nĩcio nguo iria nyamũre; na akaamba gwĩthamba mwĩrĩ na maĩ, acoke aciĩhumbe.
5. Ningĩ oe thenge igĩrĩ iria irehetwo nĩ kĩrĩndĩ gĩa ciana cia Isiraeli, cia igongona rĩa mehia, na ndũrũme ĩmwe ya ihaki rĩa njino.
6. Nake Haruni agĩtware ndegwa ya igongona rĩa mehia, o ro ĩo ĩmũkoniĩ we mwene, ehoroherie we mwene, o na andũ a nyũmba yake.
7. Ningĩ acoke oe thenge icio cierĩ, aciige mbere ya Jehova o hau mũromo-inĩ wa hema-ya-gũtũnganwo.
8. Nake Haruni acukĩre thenge icio cierĩ mĩtĩ; mũtĩ; ũmwe ũtuĩke wa Jehova, naguo ũcio ũngĩ ũtuĩke wa mbũri ya kĩrekio, ĩrĩa ĩĩtagwo ya Azazeli.
10. No rĩrĩ, thenge ĩo ĩngĩ ĩgũĩrĩirũo nĩ mũtĩ ĩtuike ya Azazeli, ĩigwo mbere ya Jehova ĩrĩ muoyo, ĩtuwo horohio, na ĩcoke ĩrekio ĩĩthiĩre werũ-inĩ ĩtuĩke ya Azazeli.
11. Nake Haruni agĩtwaratware ndegwa ĩo ya igongona rĩa mehia, o ĩo imũkoniĩ we mwene, acoke ehoroherie nayo we mwene, o na andũ a nyũmba yake, agĩthĩnje ndegwa ĩo ya igongona rĩa mehia ĩmũkoniĩ we mwene;
12. acoke oe rũgĩo rũiyũrĩte makara ma mwaki marutĩtwo kĩgongona-inĩ kĩrĩa kĩrĩ mbere ya Jehova, na aiyũrie hĩ ciake ũbumba ũrĩa ũnungaga wega ũhũrahũrĩtwo ũkahinya mũno, nacio indo icio agĩcitonyie na kũu thĩinĩ wa gĩtama gĩa kũhakania;
13. naguo ũbumba ũcio awĩkĩre mwaki-inĩ o hau mbere ya Jehova, nĩ getha ndogo ya ũbumba ũcio ĩhumbe gĩikaro-gĩa-tha kĩu kĩrĩ igũrũ rĩa ithandũkũ-rĩa-ũira, nĩ getha ndagakue;
14. ningĩ acoke oe thakame ĩmwe ya ndegwa ĩo amĩminjaminje na kĩara gĩake igũrũ rĩa gĩikaro-gĩa-tha mwena wa irathĩro; naho hau thĩ mbere ya gĩikaro-gĩa-tha aminjaminje thakame ĩo maita mũgwanja na kĩara gĩake.
15. Ningĩ acoke athĩnje thenge ya igongona rĩa mehia, o ĩo ĩkoniĩ andũ acio angĩ, nayo thakame yayo amĩtware na thĩinĩ wa gĩtama kĩu gĩa kũhakania, agĩĩke thakame ĩo yayo o ta ũrĩa ekire thakame ya ndegwa, akĩmĩminjaminje igũrũ rĩa gĩikaro-gĩa-tha, o na mbere ya gĩikaro-kĩu-gĩa-tha hau thĩ;
16. akĩhoroherie handũ hau hatheru, nĩ ũndũ wa mathahu ma ciana cia Isiraeli, o na ũndũ wa ũhoro wacio wa kwagarara watho, naguo ũguo nĩ ta kuuga mehia ma cio mothe; ningĩ acoke eke hema-ya-gũtũnganwo o ta ũguo, o ĩo ĩtũũranagia nacio ĩrigicĩirio nĩ maũndũ ma cio ma thahu.
17. Na rĩrĩ, gũtikanakorũo mũndũ o na ũrĩkũ hema-inĩ-ya-gũtũnganwo thĩinĩ hĩndĩ ĩrĩa egũtonya handũ hau hatheru, ahorohanĩrie, o nginya rĩrĩa arĩcoka kuuma nja, na akorũo ehoroheirie we mwene, na akahoroheria andũ othe a nyũmba yake, o na kĩrĩndĩ gĩothe gĩa Isiraeli.
18. Ningĩ thutha wa ũguo oime hau athiĩ kĩgongona-inĩ kĩrĩa kĩrĩ mbere ya Jehova, akĩhoroherie, akĩoe thakame ya ndegwa, o na thakame ya thenge ĩo, aciĩkĩre hĩa-inĩ cia kĩgongona kĩu mbarĩ ciothe,
19. na acoke aminjaminje thakame ĩo ĩmwe igũrũ rĩakĩo na kĩara gĩake maita mũgwanja, agĩtherie, akĩamũre kĩehererio mathahu ma ciana cia Isiraeli.
20. Na rĩrĩ, Haruni aarĩkia kũhoroheria handũ hau hatheru, na hema-ya-gũtũnganwo, o na kĩgongona kĩu, akĩrehithie thenge ĩrĩa ĩrĩ muoyo,
21. ningĩ Haruni aigĩrĩre moko make merĩ mũtwe wa thenge ĩo ĩrĩ muoyo, acoke oimbũrĩre waganu wothe wa ciana cia Isiraeli hau ĩrĩ, o na ũhoro wacio wothe wa kwagarara watho, naguo ũguo nĩ ta kuuga mehia ma cio mothe, akĩmĩcokererie maũndũ macio o igũrũ rĩa mũtwe wayo, acoke amĩnengere mũndũ ũrĩa ũrũgamĩte ho ũrĩa ũthurĩirũo wĩra ũcio, amĩtware, akamĩrekerie werũ-inĩ ĩĩthiĩre;
23. Ningĩ Haruni acoke atonye hema-inĩ-ya-gũtũnganwo, arute nguo icio cia gatani, o icio ehumbĩte agĩtonya handũ hau hatheru, acitige ho;
24. nake ethambĩre na maĩ handũ haamũre, acoke ehumbe nguo ciake, oime akarute ihaki rĩake rĩa njino, o na ihaki rĩa njino rĩa andũ acio angĩ, ehoroherie we mwene, na ahoroherie andũ acio angĩ.
25. Namo maguta ma igongona rĩa mehia amacinĩre kĩgongona-inĩ.
26. Nake mũndũ ũrĩa ũgũtwara mbũri ĩo ya Azazeli, akamĩrekie ĩĩthiĩre, acoke athambie nguo ciake, na ethambe mwĩrĩ na maĩ, na thutha wa ũguo acoke atonye kĩraaro-inĩ.
27. Nayo ndegwa ĩo ya igongona rĩa mehia, hamwe na thenge ya igongona rĩa mehia, iria thakame yacio yatonyirio handũ harĩa hatheru ĩhorohanĩrie, itwarũo na kũu gĩthaka-inĩ, mbarĩ ĩrĩa ĩngĩ ya kĩraaro, nacio njũa ciacio icinwo na mwaki, hamwe na nyama ciacio, na tatha, o na mai ma cio.
28. O nake mũndũ ũrĩa ũgũcicina athambie nguo ciake, na ethambe mwĩrĩ na maĩ, na thutha wa ũguo acoke atonye kĩraaro-inĩ.
29. Naguo ũndũ ũyũ ũtuĩke kĩrĩra kĩa watho wa kũrũmĩrĩrũo nĩ inyuĩ tene na tene, atĩ mweri wa mũgwanja, o mũthenya wa ikũmi waguo, mwĩhingage kũrĩa irio, na mũtikanarutage wĩra o na ũrĩkũ, mũndũ ũrĩa ũciarĩirũo bũrũri wanyu, kana mũgeni ũrĩa ũtũũranĩtie na inyuĩ;
31. Mũthenya ũcio nĩguo thabatũ yanyu ya kũhurũka o kũhurũka ki, na ya kwĩhingaga kũrĩa irio; kĩu nĩkĩo kĩrĩra kĩa watho wa kũrũmĩrĩrũo tene na tene.
32. Nake mũthĩnjĩri-Ngai ũrĩa ũgaitĩrĩrio maguta, o ũcio ũkaamũrũo atherio atuĩke mũthĩnjĩri-Ngai ithenya rĩa ithe, nĩwe ũkahorohanĩria, na nĩwe ũkehumbaga nguo icio cia gatani, o icio ituĩtwo nyamũre;
33. na ahorohagĩrie handũ hau haamũre hatheru, na ahorohagĩrie hema-ya-gũtũnganwo, na kĩgongona, na ahorohagĩrie athĩnjĩri-Ngai, o na andũ arĩa othe monganĩte.
34. Naguo ũndũ ũcio ũtuĩke kĩrĩra kĩa watho wa kũrũmĩrĩrũo nĩ inyuĩ tene na tene, nĩguo ciana cia Isiraeli ihorohagĩrio o mwaka ihinda rĩmwe nĩ ũndũ wa mehia ma cio mothe. Nake Musa agĩĩka o ta ũguo aathĩtwo nĩ Jehova.