2. Atha ciana cia Isiraeli ũciĩre ikũrehere maguta makembe wega ma ndamaiyũ hũre na mũũthĩ nĩ ũndũ wa ũtheri nĩ getha maakagio, hagĩe tawa ũgwakana hĩndĩ ciothe.
3. Na rĩrĩ, na kũu mwena wa na nja wa gĩtama kĩrĩa gĩa kũhakania gĩa ithandũkũ rĩa ũira, o kũu hema-inĩ-ya-gũtũnganwo thĩinĩ, nĩkuo Haruni agatabarĩra ũndũ ũcio nĩ getha wĩkĩkage mbere ya Jehova kuuma o hwaĩ-inĩ nginya o rũcinĩ hĩndĩ ciothe; naguo ũndũ ũcio ũtuĩke kĩrĩra kĩa watho wa kũrũmĩrĩrũo tene na tene njiaro-inĩ cianyu ciothe.
4. Nake agathondekaga matawa macio wega marĩ igũrũ rĩa mũtĩ ũrĩa wa thahabu therie mũno, o ũcio ũigagĩrĩrũo matawa mbere ya Jehova, hĩndĩ ciothe.
5. NINGĨ ũcoke woe mũtu ũrĩa mũhinyu mũno, ũũthondeke mĩgate ikũmi na ĩĩrĩ; o mũgate ũmwe ũthondekwo na icunjĩ igĩrĩ cia ikũmi cia eba ng’ima ya mũtu ũcio.
6. Ũgĩcoke ũmĩare mĩhari ĩĩrĩ, o ĩtandatũ mũhari ũmwe, igũrũ rĩa metha ĩrĩa ya thahabu therie mũno, mbere ya Jehova.
7. Narĩo igũrũ rĩa mĩhari ĩo, o mũhari, wĩkĩre ubani ũrĩa mwega mũno wa gũtũma andũ maririkanwo nĩ Jehova ũhoro-inĩ ũcio wa mĩgate ĩo, naguo ũtuĩke ihaki rĩrĩa rĩrutagĩrũo Jehova na ũndũ wa gũcinwo na mwaki.
8. Nayo mĩgate ĩo yaragwo wega mbere ya Jehova o mũthenya wa thabatũ hĩndĩ ciothe; naho ha ũhoro wa ciana cia Isiraeli, ũhoro ũcio wonanagie atĩ he kĩrĩkanĩro gĩa tene na tene.
9. Nayo mĩgate ĩo ĩcokage gũtuĩka ya Haruni na ariũ ake, nao mamĩrĩagĩre handũ hatheru, nĩ gũkorũo ĩo nĩ mĩamũre mũno harĩ we thĩinĩ wa indo iria irutagĩrũo Jehova na ũndũ wa gũcinwo na mwaki; naguo ũndũ ũcio ũtuĩke kĩrĩra kĩa watho wa kũrũmĩrĩrũo tene na tene.
10. NA RĨRĨ, mũrũ wa mũtumia Mũisiraeli, no ithe aarĩ Mumisiri-rĩ, agĩgĩthiĩ gũceerera ciana cia Isiraeli; nake mũrũ wa mũtumia ũcio Mũisiraeli makĩũgitanĩra na Mũisiraeli ũmwe o kũu kĩraaro-inĩ;
11. mũrũ wa mũtumia ũcio Mũisiraeli agĩcambia Rĩĩtwa rĩa Ngai ũũru, akĩmũruma; nao andũ magĩkĩmũtwara kwĩ Musa. Nake nyina wa mũndũ ũcio etagwo Shelomithu, mwarĩ wa Dibiri, wa mũhĩrĩga wa Dani.
12. Nao makĩmũrangithĩria nĩ getha maambe matuĩrie ũhoro na kanua ka Jehova wa ũrĩa mekũmwĩka.
13. Nake Jehova akĩarĩria Musa, akĩmwĩra atĩrĩ,
14. Mũndũ ũcio ũrumĩte Ngai mũrutithie atwarũo na kũu gĩthaka-inĩ mbarĩ ĩrĩa ĩngĩ ya kĩraaro, nao andũ othe arĩa maamũiguire akĩaria mamũigĩrĩre moko mũtwe, nakĩo kĩrĩndĩ gĩothe gĩcoke kĩmũũrage na ũndũ wa kũmũhũra na mahiga nyuguto.
15. Nawe ũcoke warĩrie ciana cia Isiraeli ũciĩre atĩrĩ, Mũndũ o wothe ũrĩa ũkaruma Ngai wake nĩagacokererũo nĩ wĩhia ũcio wake.
16. O nake mũndũ ũrĩa ũgacambia rĩĩtwa rĩa Jehova, ndarĩ hingo atakoragwo; no mũhaka kĩrĩndĩ gĩothe kĩmũhũre na mahiga nyuguto akue; na rĩrĩ, o na mũndũ wa kũngĩ-rĩ, no kũũragwo akoragwo, o ta mũndũ ũrĩa ũciarĩirũo bũrũri wanyu, angĩcambia rĩĩtwa rĩa Jehova.
17. Ningĩ mũndũ o wothe ũrĩa ũkagũtha mũndũ o na ũrĩkũ akue-rĩ, ndarĩ hingo atakoragwo;
22. Mũrĩgĩaga na cira wa mũthemba o ro ũmwe, ũkoniĩ mũndũ wa kũngĩ, o na mũndũ ũrĩa ũciarĩirũo bũrũri wanyu; nĩ gũkorũo niĩ nĩ niĩ Jehova Ngai wanyu.
23. Nake Musa agĩkĩhe ciana cia Isiraeli ũhoro ũcio, igĩkĩruta mũndũ ũcio warumĩte Ngai, ikĩmũtwara na kũu gĩthaka-inĩ mbarĩ ĩrĩa ĩngĩ ya kĩraaro, ĩkĩmũũraga na ũndũ wa kũmũhũra na mahiga nyuguto. Ciana cia Isiraeli igĩgĩĩka o ta ũrĩa Jehova aathire Musa gwĩkwo.