3. Mũngĩrũmĩrĩra irĩra cia watho wakwa wa kũrũmĩrĩrũo, na mũmenyagĩrĩre maathani makwa, na mwĩkage o ta ũrĩa matariĩ-rĩ,
4. nĩngamuuragĩria mbura imera ciayo ciakinya, nayo thĩ nĩĩrĩciaraga irio ciayo na ciongererekage, o nayo mĩtĩ ya mĩgũnda yanyu ĩciarage maciaro mayo.
5. Nacio irio cianyu nĩmũrĩcihuhagĩra kĩhuhĩro-inĩ igakinyĩrĩra o hĩndĩ ya magetha ma thabibu, namo magetha ma thabibu magakinyĩrĩra o hĩndĩ ya mahanda; nacio irio cianyu mũcirĩage o nginya mũkahũna, na mũtũũre bũrũri wanyu mũtarĩ na ũgwati.
14. No rĩrĩ, mũngĩkaaga kũnjigua, na mwage gwĩka maũndũ macio mothe ndĩmwathĩte,
15. ningĩ mũrege irĩra cia watho wakwa wa kũrũmĩrĩrũo, nacio ngoro cianyu ithũũre matuĩro makwa ma cira, mwage gwĩka maũndũ mothe marĩa ndĩmwathĩte, no makĩria mũthũkie kĩrĩkanĩro gĩakwa-rĩ,
16. niĩ o na niĩ nĩngamwĩka ũndũ ũyũ: nĩ gũtũma ngatũma mũgwatwo nĩ kĩmako mũno, naguo ũguo nĩ ta kuuga ndĩmũrehithĩrie ndwari njũru cia kũnina andũ, na mũrimũ wa kũhiũha mwĩrĩ, o maũndũ ma kũmũte maitho, na ma gũtũma ngoro cianyu ciũrũo nĩ hinya; ningĩ mbeũ cianyu mũcihandage o tũhũ, nĩ gũkorũo nĩikarĩagwo nĩ thũ cianyu.
17. Na nĩngaheta ũthiũ wakwa ndĩmũũkĩrĩre, o nginya mũhootwo nĩ thũ cianyu, na mwathagwo nĩ andũ arĩa mamũthũũrĩte; ningĩ mũkora o na hĩndĩ ĩrĩa hatarĩ mũndũ ũmũteng’eretie.
18. Na rĩrĩ, mũngĩkorũo o na mwekwo maũndũ macio mũtikanjigua-rĩ, nĩngakĩrĩrĩria kũmũhũra o maita mũgwanja nĩ ũndũ wa mehia manyu.
19. Hinya wanyu ũrĩa ũtũmaga mwĩtĩe nĩngaũnina biũ; namo matũ manyu ndũme matuĩke o ta kĩgera, o nayo thĩ yanyu ĩtuĩke o ta gĩcango;
20. naguo hinya wanyu mũkarutaga o wĩra wa tũhũ naguo, nĩ gũkorũo bũrũri wanyu ndũrĩ kĩndũ ũkagethwo, kana mĩtĩ ya bũrũri wanyu ĩciare maciaro mayo.
21. Ningĩ o na hĩndĩ ĩo mũngĩthiĩ na mĩthiĩre o ya kũnjũkĩrĩra mũ’neme, na mwage kũnjigua-rĩ, nĩngamũrehithĩrie ndwari ingĩ njũru maita mangĩ mũgwanja, kũringana na mehia manyu,
22. ndehithie nyamũ cia gĩthaka thĩinĩ wanyu, imũtunye ciana cianyu, na inine ũhiũ wanyu, na imũng’ũrie mũnyihe mũno mũgĩtarũo; nakuo kũu njĩra-inĩ cia kwanyu gũkire ihooru.
23. Na rĩrĩ, mũngĩkorũo o na mwekwo maũndũ macio no mũkarega kũrũithĩrio ũũru wanyu nĩ niĩ, na mũkĩrĩrĩrie gũthiĩ na mĩthiĩre ya kũnjũkĩrĩra mũ’neme-rĩ,
24. niĩ o na niĩ nĩngathiaga na mĩthiĩre ya kũmũũkĩrĩra ndĩmũrege, na niĩ ndĩmũhũre maita mũgwanja nĩ ũndũ wa mehia manyu,
25. ningĩ ndĩmũrehithĩrie rũhiũ rũa njora, rũrĩa rũkarĩhanĩria kĩrĩkanĩro kĩrĩa kĩarĩkanĩirũo. Mũgacokanĩrĩrio matũũra-inĩ manyu thĩinĩ, na ndĩmũrehithĩrie mũthiro, na mũrekererio mũneanwo moko-inĩ ma thũ cianyu.
26. Hĩndĩ ĩrĩa ngamũtunya mwĩhoko wanyu wa irio-rĩ, andũ-a-nja ikũmi makarugagĩra mĩgate riiko rĩmwe, na macoke kũmũrehere mĩgate ĩo yanyu ĩthimĩtwo na ratiri; na inyuĩ mũmĩrĩage na mũtihũne.
27. Na rĩrĩ, mũngĩkorũo o na mwekwo maũndũ macio mothe mũtikanjigua, no nĩ gũthiĩ mũrĩthiaga na mĩthiĩre ya kũnjũkĩrĩra, mũ’neme-rĩ,
28. niĩ o na niĩ ndĩrĩthiaga na mĩthiĩre ya kũmũũkĩrĩra inyuĩ, ndĩmũrege, ndĩ mũthũgũtu; njoke ndĩmũhũre maita mũgwanja nĩ ũndũ wa mehia manyu,
29. o nginya mũrĩe nyama cia mĩĩrĩ ya ariũ anyu, o na ya airĩtu anyu.
30. Namo matĩri manyu ma kũndũ gũtũũgĩru ndĩmaanangithie biũ, na ndemenge mĩhianano yanyu ya kũhoya riũa; o nacio ciimba cianyu ndĩciikie ciimba-inĩ cia mĩhianano ĩo yanyu; nayo ngoro yakwa ĩmũthũũre mũno.
31. Namo matũũra manyu nĩngatũma matuĩke maganjo, o naho handũ hanyu harĩa haamũre ndũme hakire ihooru, o naguo mũcingũ wa indo cianyu iria irĩ mũtararĩko mwega ndigetĩkĩra kũũigua.
32. Naguo bũrũri wanyu nĩngatũma ũkire ihooru; o nacio thũ cianyu iria itũũraga kuo nĩikagega nĩ ũndũ waguo.
33. Na nĩngamũharaganĩria ndũrĩrĩ-inĩ, na njoke njomorithie hiũ cia njora imuume thutha; o naguo bũrũri wanyu ũkire ihooru, namo matũũra manyu matuĩke maganjo.
34. Hĩndĩ ĩo nĩguo bũrũri wanyu ũgakenera thabatũ ciaguo, o hĩndĩ ĩo yothe ũgakoragwo ũkirĩte ihooru, na inyuĩ mũkorũo mwĩ bũrũri wa thũ cianyu; ihinda o ro rĩu-rĩ, nĩrĩo bũrũri wanyu ũkahurũka ũruĩre, ũkenere thabatũ ciaguo.
36. Naho ha ũhoro wa andũ anyu arĩa matigarĩte, nĩngatũma maringĩke ngoro-inĩ ciao thĩinĩ marĩ o kũu bũrũri wa thũ ciao: naguo mũbarabario wa ithangũ rĩũmũ rĩhurutĩtwo nĩ rũhuho nĩũgatũma more, nao more o ta ũrĩa mũndũ oragĩra rũhiũ rũa njora, na magũe o hĩndĩ ĩrĩa hatarĩ mũndũ ũmateng’eretie.
37. Nao nĩmakahĩnganaga o mũndũ na mũndũ ũrĩa ũngĩ, o ta ũrĩa andũ mekaga makĩũrĩra rũhiũ rũa njora, o na hatarĩ mũndũ ũteng’eranĩtie; na mũtikagĩa na hinya o na ũrĩkũ wa gwĩtiiria thũ cianyu.
39. Nao andũ anyu arĩa magatigara mahwererekere mathirĩre o kũu bũrũri wa thũ cianyu nĩ ũndũ wa ũũru wao, o na ningĩ tondũ wa ũũru wa maithe mao, mahwererekere mathire.
40. Hĩndĩ ĩo nĩmakoimbũra ũũru wao, o na ũũru wa maithe mao, wa ũrĩa maagararire mawatho makwa, o na moimbũre atĩ, tondũ wa ũrĩa o ene maathiaga na mĩthiĩre ya kũnjũkĩrĩra ma’neme,
41. niĩ o na niĩ nĩndacokire gũthiĩ na mĩthiĩre ya kũmokĩrĩra ngĩmarega, ngĩmatwarithia bũrũri wa thũ ciao Na rĩrĩ, kũngĩkorũo ngoro ciao, iria ciikarĩte ta itaruĩte, nĩikenyihia hĩndĩ ĩo, nao makirĩrĩrie ihũra rĩu rĩa ũũru wao,
42. niĩ na niĩ nĩngaririkana kĩrĩkanĩro kĩrĩa ndarĩkanĩire na Jakubu; o na kĩrĩkanĩro kĩrĩa ndarĩkanĩire na Isaaka, o na kĩrĩkanĩro kĩrĩa ndarĩkanĩire na Iburahimu, nĩngakĩririkana; na ndirikane bũrũri ũcio wao.
43. Bũrũri ũcio nĩũgathamwo nĩo, naguo ũcoke gũkenera thabatũ ciaguo, o ihinda rĩrĩa ũgaikara wagĩte gũtũũrũo nĩo; nao makirĩrĩrie ihũra rĩa ũũru wao; naguo ũhoro ũcio ũkoneka nĩ ũndũ wa ũrĩa maaregire matuĩro makwa ma cira, nacio ngoro ciao igĩthũũra mũno irĩra cia watho wakwa wa kũrũmĩrĩrũo.
44. No rĩrĩ, o na harĩa maũndũ macio mothe matariĩ ũguo-rĩ, hĩndĩ ĩo magakorũo matũũrĩte bũrũri wa thũ ciao ndikamarega kana ndĩmathũũre o mũno atĩ nĩguo ndĩmaninũkĩrĩrie biũ, ’thũkie kĩrĩkanĩro giitũ nao; nĩ gũkorũo niĩ nĩ niĩ Jehova Ngai wao;
45. no rĩrĩ, tondũ wa kwenda kũhonokia andũ acio nĩngaririkana kĩrĩkanĩro kĩrĩa ndarĩkanĩire na maithe mao, arĩa ndarutire bũrũri wa Misiri, makĩonagwo nĩ andũ a ndũrĩrĩ, nĩ getha nduĩke Ngai wao; niĩ nĩ niĩ Jehova.
46. Icio nĩcio irĩra cia watho wa kũrũmĩrĩrũo, o na matuĩro ma cira, o na mawatho, marĩa Jehova we mwene aarĩkanĩire na ciana cia Isiraeli kĩrĩma-inĩ gĩa Sinai, akĩĩra Musa amamenyithanie.