1. Na rĩrĩ, mũndũ o na ũrĩkũ e mũira wa ũndũ ũrĩa onete, kana akamenya ũhoro waguo, angĩĩhia nĩ ũndũ wa kwaga kuumbũra hĩndĩ ĩrĩa ehĩtithĩtio aarie ũhoro-wa-ma-rĩ, nĩagacokererũo nĩ ũũru ũcio ekĩte;
2. kana mũndũ o na ũrĩkũ angĩhutia kĩndũ o na kĩ kĩĩ mũgiro, o na kũngĩtuĩka nĩ kĩimba kĩa nyamũ ĩrĩ mũgiro, kana kĩimba kĩa nyamũ ĩrĩ mũgiro ya ũhiũ, kana kĩimba kĩa nyamũ ĩrĩ mũgiro ya iria ithiaga ikurumĩte thĩ, naguo ũndũ ũcio ũikare ũhithĩtwo, akaaga kũũmenya, nake agwatwo nĩ thahu-rĩ, hĩndĩ ĩo nĩakonwo e mũhĩtia;
3. kana angĩhutia kĩndũ kĩĩ mũgiro kĩa mũthemba o na ũrĩkũ kiumĩte thĩinĩ wa mũndũ, na ũndũ ũcio ũikare ũhithĩtwo, aage kũũmenya, hĩndĩ ĩrĩa akaũmenya-rĩ, nĩakonwo e mũhĩtia;
4. o na kana mũndũ o na ũrĩkũ angĩĩhia, aarie ũhoro na kanua gake atawĩcirĩtie wega, o na angĩkorũo nĩ wa gwĩka ũũru, kana wega, naguo ũndũ ũcio aarĩtie akĩĩhĩta, ũngĩkorũo nĩ wa mũthemba o na ũrĩkũ, nake aage kũũrũmbũiya, aikare ta atekũũmenya-rĩ, hĩndĩ ĩrĩa akaũmenya, nĩakonwo e mũhĩtia maũndũ-inĩ macio;
5. na nĩgũgakinya atĩrĩ, atĩ hĩndĩ ĩrĩa akonwo e mũhĩtia ũndũ-inĩ ũmwe wa maũndũ macio, nĩakoimbũra ũndũ ũrĩa ahĩtĩtie;
6. nake atwarĩre Jehova kĩndũ gĩake kĩa igongona rĩa ihĩtia nĩ ũndũ wa ihĩtia rĩu ahĩtĩtie, nakĩo gĩtuĩke kagondu karutĩtwo rũũru, o na ge kamwatĩ kana kaharika, gatuĩke ka igongona rĩa mehia; nake mũthĩnjĩri-Ngai amũhoroherie nĩ ũndũ wa ihĩtia rĩu rĩake.
7. Na rĩrĩ, angĩkorũo ndangĩona kagondu ga kũruta-rĩ, nĩarutĩre Jehova ndirahũgĩ igĩrĩ, kana ndutura igĩrĩ itarĩ ngũrũ, ituĩke kĩndũ kĩa igongona rĩa ihĩtia rĩu ahĩtĩtie; kamwe gatuĩke ka igongona rĩa mehia, nako karĩa kangĩ gatuĩke ka ihaki rĩa njino.
8. Agĩtũtwarĩre mũthĩnjĩri-Ngai, nake aambe arute kau ka igongona rĩa mehia, agathiore mũtwe gatinĩke ngingo, na ndagagateithũrane;
9. acoke akĩminjaminje thakame ya igongona rĩu rĩa mehia mwena-inĩ wa kĩgongona nayo thakame ĩrĩa ndigaru amĩite thĩ hau kĩgongona-inĩ rĩu nĩrĩo igongona rĩa mehia.
10. Nako karĩa kangĩ ga kerĩ akarute gatuĩke ihaki rĩa njino, o ta ũrĩa mũtugo wa ihaki rĩu ũtariĩ, nake mũthĩnjĩri-Ngai akĩmũhoroherie wĩhia ũcio ehĩtie, na nĩakoherũo.
11. No rĩrĩ, angĩkorũo ndangĩona ndirahũgĩ igĩrĩ cia kũruta, kana ndutura igĩrĩ itarĩ ngũrũ, ndarĩ hingo atagatwara kĩndũ gĩake gĩa kũruta nĩ ũndũ wa wĩhia ũrĩa ehĩtie, nakĩo gĩtuĩke gĩcunjĩ gĩa ikũmi kĩa eba ng’ima ya mũtu mũhinyu mũno, ũtuĩke igongona rĩa mehia; na ndakanawĩkĩre maguta kana ubani igũrũ rĩaguo, nĩ gũkorũo rĩu nĩrĩo igongona rĩa mehia.
12. Nake akĩũtwarĩre mũthĩnjĩri-Ngai, nake mũthĩnjĩri-Ngai awĩrũmĩre rũhĩ rũgima rũtuĩke ũndũ wa gũtũma andũ maririkanwo nĩ Jehova, acoke aũcinĩre kĩgongona-inĩ, o ta ũrĩa nyamũ cia mahaki ma gũcinwo na mwaki marĩa marutagĩrũo Jehova macinagwo; rĩu nĩrĩo igongona rĩa mehia.
13. Nake mũthĩnjĩri-Ngai ahoroherie mũndũ ũcio rĩĩhia rĩu ehĩtie rĩkoniĩ ũndũ o na ũrĩkũ wa maũndũ macio, na nĩakoherũo; namo matigari matuĩke ma mũthĩnjĩri-Ngai, o ta ũrĩa gwĩkagwo ihaki-inĩ rĩa mũtu.
14. Ningĩ Jehova akĩarĩria Musa, akĩmwĩra atĩrĩ,
15. Mũndũ o na ũrĩkũ angĩhĩtia ihĩtia, ehie wĩhia ũkoniĩ indo iria nyamũrĩre Jehova atekũmenya atĩ ũguo areka nĩ ũũru-rĩ, nĩatwarĩre Jehova kĩndũ kĩa igongona rĩa ihĩtia, nakĩo gĩtuĩke ndũrũme ĩtarĩ na kaũũgũ ĩrutĩtwo rũũru-inĩ, o ta ũrĩa wee ũgatua thogora wayo ĩkĩgũrũo na cekeri cia betha, kũringana na cekeri ya handũ harĩa haamũre, ĩgĩtuĩke ya igongona rĩa ihĩtia;
16. ningĩ arĩhe irĩhi nĩ ũndũ wa ihĩtia rĩu ahĩtĩtie rĩkoniĩ indo iria nyamũre, o na ongerere gĩcunjĩ gĩa gatano gĩacio, acinengere mũthĩnjĩri-Ngai; nake mũthĩnjĩri-Ngai amũhoroherie na ndũrũme ĩo ya igongona rĩa ihĩtia, na nĩakoherũo.
17. No rĩrĩ, mũndũ o na ũrĩkũ angĩĩhia, eke ũndũ o na ũrĩkũ wa maũndũ marĩa Jehova aathanĩte matikanekwo, o na angĩtuĩka ndamenyete atĩ nĩ ũũru areka, ndarĩ hingo atarĩ o mũhĩtia, na nĩagacokererũo nĩ ũũru ũcio wake.
18. Mũndũ ũcio nĩagĩtwarĩre mũthĩnjĩri-Ngai ndũrũme ĩtarĩ na kaũũgũ, ĩrutĩtwo rũũru-inĩ, o ta ũrĩa wee ũgatua thogora wayo ĩkĩgũrũo, ĩtuĩke igongona rĩa ihĩtia, nake mũthĩnjĩri-Ngai amũhoroherie nĩ ũndũ wa ũndũ ũcio ahĩtĩtie atacirĩire, o na atekũmenya atĩ ũrĩa ekĩte nĩ ũũru, na nĩakoherũo.