6. Mũndũ mũrũme o wothe thĩinĩ wa athĩnjĩri-Ngai nĩakarĩaga nyama ciarĩo, irĩĩrũo handũ hatheru; igongona rĩu nĩ rĩamũre mũno mũno.
7. O ta ũrĩa igongona rĩa mehia rĩtariĩ-rĩ, ũguo noguo igongona rĩa ihĩtia rĩtariĩ o narĩo; magongona macio watho wamo no ũmwe; mũthĩnjĩri-Ngai ũrĩa ũkũhorohanĩria narĩo, nĩwe ũrĩrĩaga nyama ciarĩo.
8. Na rĩrĩ, mũthĩnjĩri-Ngai ũrĩa ũkahorohanĩria na ihaki rĩa njino rĩa mũndũ o na ũrĩkũ-rĩ, mũthĩnjĩri-Ngai ũcio nĩwe ũkarigia na rũũa rũa ihaki rĩu rĩa njino ahorohanĩirie narĩo.
9. Narĩo ihaki rĩa mũtu o rĩothe rĩrĩa rĩrugĩirũo ndumbĩrĩra-inĩ, o na kĩrĩa gĩothe gĩkarangĩtwo na rũgĩo kana na nyũngũ ya kĩgera, igatuĩka cia mũthĩnjĩri-Ngai ũrĩa ũhorohanĩirie.
10. Narĩo ihaki o rĩothe rĩa mũtu ũtukanĩtio na maguta, kana ũrĩa mũũmũ o ro ũguo mũtheri, ũcio wothe ũgatuĩka wa ariũ a Haruni othe, o mũndũ wao athiĩ na rũgai rũaguo o ta ũrĩa ũngĩ.
12. Angĩkorũo ekũruta nĩ ũndũ wa gũcokia ngatho-rĩ, nĩakarutanĩria igongona rĩu rĩa gũcokia ngatho na tũmĩgate tũtarĩ tũimbie tũkimanĩtio na maguta, na tũmĩgate tũngĩ twa mũthemba mũhũthũ tũhakĩtwo maguta tũtarĩ tũimbie, o na tũmĩgate twa mũtu ũrĩa mũhinyu mũno tũkimanĩtio na maguta, tũkahuhuiyo nĩmo mũno.
14. Na rĩrĩ, igongona-inĩ rĩu nĩarute o kĩndũ kĩmwe kĩmwe thĩinĩ wa indo icio ciothe irutĩtwo, nĩguo gĩtuĩke kĩa igongona rĩa kũiyũkio na igũrũ rĩrĩa rĩrutagĩrũo Jehova; nacio indo icio ituĩke cia mũthĩnjĩri-Ngai ũrĩa ũkũminjaminja thakame ya igongona rĩu rĩa ũiguano, athiĩ nacio.
15. Nacio nyama iria irutĩtwo ituĩke igongona rĩu rĩake rĩa ũiguano, nĩ ũndũ wa gũcokia ngatho, ikarĩo mũthenya o ro ũcio kĩndũ kĩu gĩake gĩkũrutwo; na ndakanatigie gĩcunjĩ o na kĩmwe gĩacio kĩraare nginya o rũcinĩ.
16. No rĩrĩ, kũngĩkorũo gĩtũmi kĩa ũndũ ũrĩa ũtũmĩte arute igongona nĩ mwĩhĩtwa ehĩtĩte, kana gũkorũo nĩ kĩndũ kĩrĩa ekũruta na kwĩendera-rĩ, nĩgĩkarĩo mũthenya o ro ũcio akaruta igongona rĩu rĩake, na kĩrĩa gĩtigaru gĩakĩo kĩrĩo rũciũ rũu rũngĩ;
17. no nyama cia igongona rĩu ingĩkorũo itigarĩte mũthenya wa ĩtatũ-rĩ, nĩigacinwo na mwaki.
18. Na rĩrĩ, nyama ya igongona rĩu rĩrutĩtwo rĩa ũiguano ĩngĩrĩo mũthenya wa ĩtatũ, rĩtigetĩkĩrĩka, kana mũndũ ũrĩa ũrĩrutĩte onwo ta arutĩte; rĩgatuĩka ũndũ wĩ thahu, nake mũndũ ũrĩa ũkarĩa nyama icio nĩwe ũgacokererũo nĩ wĩhia wake we mwene.
19. Nacio nyama iria ingĩhutania na kĩndũ o na kĩ kĩrĩ mũgiro itikarĩo; nĩ gũcinwo igacinwo na mwaki. Nyama cia magongona macio, mũndũ o wothe ũtarĩ thahu aahota gũcirĩa;
20. no rĩrĩ, mũndũ ũrĩa ũkarĩa nyama cia igongona rĩa indo icio irutĩtwo cia ũiguano o icio ikoniĩ Jehova, na akorũo arĩ na thahu, mũndũ ũcio nĩakaingatwo athengio kũrĩ andũ ao.
21. Hĩndĩ ĩrĩa mũndũ o na ũrĩkũ akahutia kĩndũ o na kĩ kĩĩ mũgiro-rĩ, o na kĩngĩtuĩka kiumĩte thĩinĩ wa mũndũ, kana ahutie nyamũ ĩrĩ mũgiro, kana kĩndũ o na kĩ kĩĩ mũgiro, nake mũndũ ũcio acoke arĩe nyama ya igongona rĩrĩa rĩrutĩtwo rĩa ũiguano rĩkoniĩ Jehova, nĩakaingatwo athengio kũrĩ andũ ao.
22. Ningĩ Jehova akĩarĩria Musa, akĩmwĩra atĩrĩ,
23. Aria na ciana cia Isiraeli, ũciĩre ũũ: Mũtikanarĩe maguta o na me ma ndegwa, kana ma ng’ondu, kana ma mbũri.
24. Maguta ma nyamũ ĩrĩa ĩkuĩte o ro ũguo, na ma nyamũ ĩrĩa ĩtinangĩtio nĩ nyamũ cia gĩthaka, macio-rĩ, mwahota kũruta wĩra namo wa mũthemba ũngĩ o na ũrĩkũ ũrĩa mũngĩenda; no kũrĩa mũtikanamarĩe o na atĩa.
25. Nĩ gũkorũo mũndũ o wothe ũrĩa ũkarĩa maguta ma nyamũ ya ihaki rĩa gũcinwo na mwaki, marĩa marutĩirũo Jehova nĩ andũ, mũndũ ũcio ũmarĩĩte-rĩ, nĩakaingatwo athengio kũrĩ andũ ao.
26. Na rĩrĩ, kũndũ o na kũrĩkũ kũrĩa mũtũũrĩte-rĩ, mũtikanarĩe thakame ya mũthemba o na ũrĩkũ, o na ĩrĩ ya nyamũ ĩrĩa ĩthiaga na mathagu, kana ya nyamũ ĩrĩa ĩthiaga na magũrũ.
27. Mũndũ o na ũrĩkũ angĩkarĩa thakame-rĩ, mũndũ ũcio nĩakaingatwo athengio kũrĩ andũ ao.
28. Nake Jehova akĩarĩria Musa, akĩmwĩra atĩrĩ,
29. Aria na ciana cia Isiraeli, ũciĩre ũũ: Mũndũ ũrĩa ũkũrutĩra Jehova igongona rĩa ũiguano-rĩ, nĩoe we mwene indo iria ikũrutwo thĩinĩ wa igongona rĩu rĩake rĩa ũiguano;
30. indo iria ekũrutĩra Jehova cia gũtuĩka ihaki rĩa gũcinwo na mwaki nĩacitware na moko make we mwene, atware maguta, hamwe na gĩthũri, nĩ getha gĩthũri kĩu gĩthũngũthio, gĩtuĩke igongona rĩa gũthũngũthĩrio mbere ya Jehova.
31. Nake mũthĩnjĩri-Ngai acinĩre maguta macio kĩgongona-inĩ no gĩthũri gĩtuĩke kĩa Haruni na ariũ ake.
32. Nakĩo kĩero kĩa ũrĩo mũkahe mũthĩnjĩri-Ngai, gĩtuĩke igongona rĩa kũiyũkio na igũrũ riumĩte magongona-inĩ manyu ma ũiguano.
33. Thĩinĩ wa ariũ a Haruni-rĩ, ũrĩa ũhorohanĩirie na thakame ya magongona macio ma ũiguano, o na maguta mamo, nĩwe ũkarigia na kĩero kĩu kĩa ũrĩo gĩtuĩke igai rĩake.
34. Nĩ gũkorũo gĩthũri kĩrĩa gĩthũngũthĩtio, o na kĩero kĩrĩa kĩiyũkĩtio na igũrũ, icio nĩcio indo iria njoete he ciana cia Isiraeli ciumĩte magongona-inĩ ma cio ma ũiguano, na ndĩciheete Haruni mũthĩnjĩri-Ngai, na ariũ ake, ituĩke indo ciumĩte he ciana cia Isiraeli iria maagĩrĩirũo nĩ kũheagwo tene na tene.
35. Icunjĩ icio ciumĩte mahaki-inĩ ma gũcinwo marĩa marutĩirũo Jehova-rĩ, nĩcio igai rĩa Haruni, nĩ ũndũ wa ũrĩa aaitĩriirio maguta, o na rĩa ariũ ake nĩ ũndũ wa ũrĩa o nao maaitĩrĩirio maguta, kuuma o mũthenya ũrĩa Musa aamatwarire mbere ya Jehova matuĩke ndungata ciake cia kũmũrutagĩra wĩra wa mũthĩnjĩri-Ngai,
36. o icunjĩ icio Jehova aathanire akiuga maheagwo nĩ ciana cia Isiraeli, mũthenya o ro ũcio aamaitĩriirie maguta. Rĩu nĩrĩo igai rĩao rĩrĩa maagĩrĩirũo nĩ kũheagwo tene na tene njiaro-inĩ ciao ciothe.
37. Ũcio nĩguo watho wa ihaki rĩa njino, na wa ihaki rĩa mũtu, na wa igongona rĩa mehia, na wa igongona rĩa ihĩtia, na wa kwamũra andũ matuwo atheru, o na wa indo iria irutagwo cia igongona rĩa ũiguano;
38. o watho ũrĩa Jehova aathanire akĩĩra Musa kĩrĩma-inĩ gĩa Sinai, mũthenya ũrĩa aathire ciana cia Isiraeli o kũu werũ-inĩ wa Sinai, agĩciĩra irutagĩre Jehova indo ciacio.