1. Na gũgĩkinya atĩrĩ, atĩ mũthenya wa ĩnana, Musa agĩĩta Haruni na ariũ ake, o na athuri a Isiraeli;
2. agĩkĩĩra Haruni atĩrĩ, Wĩyoere njaũ ya ndegwa ĩtuĩke igongona rĩa mehia, o na ndũrũme ĩtuĩke ihaki rĩa njino, nacio ikorũo itarĩ na kaũũgũ, ũcirutĩre mbere ya Jehova.
3. Nacio ciana cia Isiraeli ũciarĩrie, ũciĩre atĩrĩ, Wĩyoerei thenge, ĩtuĩke igongona rĩa mehia; ningĩ muoe njaũ na gatũrũme, nacio cierĩ ikorũo irĩ cia mwaka ũmwe, na itarĩ na kaũũgũ, ituĩke ihaki rĩa njino;
4. ningĩ muoe ndegwa na ndũrũme ituĩke cia magongona ma ũiguano, cia kũrutĩrũo igongona mbere ya Jehova; na muoe mũtu ũkimanĩtio na maguta wa gũtuĩka ihaki rĩa mũtu; nĩ gũkorũo ũmũthĩ Jehova nĩekũmuumĩrĩra, mũmuone.
5. Magĩgĩtwara indo icio Musa aathanĩte itwarũo mbere ya hema-ya-gũtũnganwo; nakĩo kĩrĩndĩ kĩu gĩothe gĩgĩkungutĩria gĩkĩrũgama mbere ya Jehova.
6. Nake Musa akiuga atĩrĩ, Ũyũ nĩguo ũndũ ũrĩa Jehova aathanĩte mwĩke; na riri wa Jehova nĩũkũmuumĩrĩra, mũwone.
7. Musa agĩkĩĩra Haruni atĩrĩ, Thiathia kĩgongona-inĩ, ũrute igongona rĩaku rĩa mehia, o na ihaki rĩaku rĩa njino, wĩhoroherie wee mwene, o na ũhoroherie andũ; ũcoke ũrute indo iria andũ marutĩte, ũmahoroherie; o ta ũrĩa Jehova aathanĩte gwĩkwo.
8. Haruni agĩgĩthengerera kĩgongona-inĩ, agĩgĩthĩnja njaũ ĩo ya igongona rĩa mehia, o ĩo yamũkoniĩ we mwene.
9. Nao ariũ a Haruni makĩmũtwaratwarĩra thakame yayo, nake agĩtobokia kĩara gĩake thakame-inĩ ĩo, akĩmĩĩkĩra hĩa-inĩ cia kĩgongona, ningĩ agĩita thakame ĩmwe hau thĩ kĩgongona-inĩ;
10. no rĩrĩ, maguta, na higo, o na habaya ũrĩa uumĩte ini-inĩ, cia igongona rĩu rĩa mehia, agĩcicinĩra kĩgongona-inĩ igũrũ; o ta ũrĩa Jehova aathĩte Musa gwĩkwo.
11. Nacio nyama, o na rũũa, agĩcicinĩra na kũu gĩthaka-inĩ mbarĩ ĩrĩa ĩngĩ ya hau kĩraaro-inĩ.
12. Agĩcoka agĩthĩnja nyamũ ya ihaki rĩa njino, nao ariũ a Haruni makĩmũtwarĩra thakame yayo, akĩmĩminjaminjĩria kĩgongona mbarĩ ciothe.
13. Magĩkĩmũnengereria nyama cia ihaki rĩa njino, o gĩcunjĩ kĩmwe kĩmwe, o na mũtwe; agĩcicinĩra kĩgongona-inĩ igũrũ.
14. Nake agĩkĩamba gũthambia nyama cia nda na mathagiro, agĩcoka agĩcicinĩra o hau kĩgongona-inĩ, igũrũ rĩa ihaki rĩa njino.
15. Ningĩ indo iria andũ maarutĩte agĩcitwaratwara ho, agĩkĩnyita mbũri ya igongona rĩa mehia ĩrĩa yakoniĩ andũ acio, akĩmĩthĩnja, akĩmĩruta ĩtuĩke horohio ya mehia, o ta ũrĩa ekire ĩo ya mbere.
16. Agĩcoka akĩoya nyamũ ya ihaki rĩa njino, akĩmĩtwaratwara, akĩmĩruta o ta ũrĩa mĩtugo ĩrĩa yatuĩtwo ya kũrũmagĩrĩrũo ĩtariĩ.
18. Ningĩ agĩthĩnja ndegwa na ndũrũme cia magongona ma ũiguano, o icio ciarĩ cia kũrutwo nĩ ũndũ wa andũ; nao ariũ a Haruni makĩmũtwarĩra thakame yacio, nake akĩmĩminjaminjĩria kĩgongona mbarĩ ciothe;
19. ningĩ makĩmũtwarĩra maguta ma ndegwa ĩo, o na ma ndũrũme ĩo ma gĩthita kĩayo, na rũambũ rũrĩa rũhumbagĩra nyama cia nda, na higo, o na habaya wa ini-inĩ;
21. nacio ithũri icio hamwe na kĩero kĩa ũrĩo, Haruni agĩcithũngũthia ituĩke igongona rĩa gũthũngũthĩrio mbere ya Jehova, o ta ũrĩa Musa aathanire gwĩkwo.
22. Ningĩ Haruni agĩkĩambararia moko amaroretie kũrĩ andũ, agĩkĩmarathima; agĩcoka agĩikũrũka akiuma hau aarutĩire igongona rĩa mehia, na ihaki rĩa njino, o na indo cia magongona ma ũiguano.
23. Ningĩ Musa na Haruni magĩtonya hema-inĩ-ya-gũtũnganwo, magĩcoka makiuma, makĩrathima andũ; naguo riri wa Jehova ũkiumĩrĩra andũ acio othe makiwĩonera.
24. Hagĩgĩcoka hakiumĩra mwaki uumĩte mbere ya Jehova, ũgĩcina ihaki rĩu rĩa njino, na maguta, o icio ciarĩ kĩgongona-inĩ igũrũ; na rĩrĩa andũ othe maawonire, makĩanĩrĩra na mũgambo mũnene, magĩkĩĩgũithia magĩturumithia mothiũ mao thĩ.