1. Nĩndeoneire Mwathani arũngiĩ kĩgongona-inĩ: nake akiuga atĩrĩ, Gũtha mĩtwe ya itugĩ, mĩgamba yenyenye: ũmĩũrage ĩtuĩke ithendũ igũĩre andũ othe ciongo; na matigari mao nĩndĩrĩmoragithia na njomo: na gũtirĩ o na ũmwe ũkahota kũũra, gũtikĩrĩ o na ũmwe ũkahonoka.
2. O na mangĩkenja moimĩranie na kwa ngoma, guoko gwakwa no kũmarute kuo; ningĩ o na mangĩkahaica o nginya Igũrũ, kũu nakuo no ndĩmarute ndĩmaharũrũkie na thĩ.
3. Ningĩ o na mangĩkorũo mehithĩte kĩrĩma-inĩ gĩa Karimeli igũrũ, no ngamatuĩria ndĩmarute kuo; na mangĩkorũo meĩ’hithĩte magatonya iria rĩrĩa inene o nginya rũrĩra rũarĩo, kũu nĩngaatha ndamathia, ĩmarũme.
4. Ningĩ o na kũngĩtuĩka nĩ gwa thũ ciao matwarĩtwo marĩ atahe, kũu nĩngaatha njomo, ĩmorage: nĩ gũikia ndĩrĩmaikagia maitho na ũũru, thengia wega.
5. Nĩ gũkorũo Mwathani, o we Jehova mwene mbũtũ cia ita-rĩ, nĩwe ũhutagia bũrũri, ũgatwekũka, arĩa othe maũtũire magaitĩka kũgirĩka; naguo nĩ kũimbatara ũkaimbatara ũrĩ wothe o ta Rũũĩ rũrĩa; na ũcoke ũhũcũke, o ta Rũũĩ rũu rũa Misiri;
6. we nĩwe wakĩrĩire ciũmba ciake cia ngoroba o kũrĩa igũrũ, naguo mũtambũrũko ũcio wake agaaka gĩtina kĩaguo thĩ; o we ũrĩa wĩtaga maĩ ma iria rĩrĩa inene akamaitũrũra thĩ; Jehova nĩrĩo rĩĩtwa rĩake.
7. Atĩrĩrĩi, githĩ harĩ niĩ mũtihaanaine o na ciana cia Kushi, inyuĩ ciana ici cia Isiraeli? nĩguo Jehova ekuuga. Anga to niĩ ndakĩrutire Aisiraeli bũrũri wa Misiri ngĩmaambatia moime kuo, nao Afilisiti ngĩmaruta Kafitori, na Asuriata ngĩmaruta Kiri?
8. Atĩrĩ, maitho ma Mwathani Jehova nĩmacũthagĩrĩria ũthamaki ũrĩa wothe wĩhagia, na nĩngaũnina ũthenge biũ gũkũ thĩ; tiga atĩ mbarĩ ya Jakubu yo ndikamanina o kũmanina; ũguo nĩguo Jehova ekuuga.
9. Tondũ rĩrĩ, nĩngaathana, ’thũngũthithie mbarĩ ya Isiraeli nĩ kũmahurunjĩra ndũrĩrĩ-inĩ ciothe, o ta ũrĩa gũthũngũthagio na gĩtarũrũ, no rĩrĩ, gũtirĩ kahĩndĩ o na kamwe gakagũa thĩ.
10. Arĩa othe mehagia a kĩrĩndĩ kĩu gĩakwa nĩ gũkua magakua na njomo, o acio moigaga atĩ, Ũũru ũcio ndũrĩ hingo ũgatũkinyĩrĩra ithuĩ, na kana ũtũhĩte na mbere.
11.
Mũthenya ũcio-rĩ, nĩngatiira gĩthũnũ kĩa Daudi o na tondũ kĩgũĩte, na ndĩgĩthinge mĩanya; njũkĩrie muomokanĩro ũcio wakĩo, ndĩgĩake o ta ũrĩa gĩatariĩ tene;
12. nĩ getha kĩrĩndĩ gĩkegwatĩre matigari ma Edomu, o na ndũrĩrĩ iria ciothe cianetanio na rĩĩtwa rĩakwa; ũguo nĩguo Jehova ekuuga, o we mwĩki ũguo.
13. Jehova nĩ ũũ ekuuga: Atĩrĩrĩi, matukũ nĩmaroka rĩrĩa mwenji-hianyũ agakinyagĩrĩra mũgethi, na mũhihi wa thabibu akinyagĩrĩre mũhuri wa mbeũ; na irĩma-inĩ nĩgũgataataga ndibei ya mũhihano, ithũngũri ciothe igĩtwekũke.
14. Na nĩngagarũra gũtahwo gwa kĩrĩndĩ gĩakwa gĩa Isiraeli, nao macoke maake matũũra marĩa manyarirĩkĩte, mamatũũre; ningĩ marĩme mĩgũnda ya mĩthabibu, na manyuage ndibei yayo; o na methondekere mĩgũnda ya matunda, na marĩage maciaro mayo.
15. Na nĩngamahanda bũrũri-inĩ wao ene, na matigacoka kuomborũo rĩngĩ bũrũri-inĩ wao ũcio ndamaheire; ũguo nĩguo Jehova, Ngai waku, ekuuga.