3. Mwĩgerero wa ngoro yaku nĩguo ũtũmĩte wĩhenie, wee ũtũire ngurunga-inĩ cia mahiga, naguo ũtũũro waku ũgakorũo wĩ kũndũ gũtũũgĩru. Ningĩ wĩũragia na ngoro atĩrĩ, Nũ ũngĩkĩhota kũndungumania na thĩ?
4. O na ũngĩkorũo nĩũũmbũkĩte na igũrũ ta ndiyũ, na ũkaara gĩtara gĩaku o kũu njata irĩ-rĩ, ndirĩ hingo itagakũharũrũkia na thĩ, ngũrute kuo; ũguo nĩguo Jehova ekuuga.
5. Aici mangĩgũtharĩkĩra, o na kana atunyani magũkore ũtukũ-rĩ, kaĩ wakĩng’ũrio-ĩ! Githĩ matingĩkĩiya indo o nginya maiganie? Ningĩ agethi thabibu mangĩũka harĩ wee-rĩ, matingĩtigia tũthabibu o na twa gũkahaarũo?
6. Kaĩ maũndũ ma Esau nĩ matuĩrie-ĩ! O nayo mĩthithũ yake ya hitho kaĩ nĩ miumbũrie-ĩ!
7. Andũ othe arĩa mũrarĩ ngwatanĩro nao-rĩ, makũingatĩte magagũkinyia mũhaka-inĩ wa bũrũri ta mũndũ ũikĩtio na kĩano; ningĩ arĩa mũraiguaine nao-rĩ, nĩo makũhenetie, o nginya magakũhoota; o na ningĩ arĩa mũrarĩanagĩra irio nao-rĩ, nĩo makwenjeire irima, magũtege. Kaĩ ũhoro ũcio wĩ hinya ũkĩmenyeka-ĩ!
8. Ningĩ Jehova ekuuga atĩrĩ, Githĩ mũthenya ũcio ndigakĩũraga andũ arĩa ogĩ a Edomu, na njeherie ũhoro wa gũkuũkĩrũo nĩ maũndũ, ũthire kĩrĩma-inĩ kĩa Esau?
10. Nĩ gũkorũo maũndũ ma ũhinya marĩa mekirũo mũrũ wa nyũkwa Jakubu nĩmo megũtũũra magũconorithĩtie, ũhubwo nĩ thoni, ũikare wĩ mũng’ũrie mĩndĩ na mĩndĩ.
11. Mũthenya ũrĩa wamwĩthambire ũkimũtirika, o mũthenya ũcio ageni maatahaga andũ ake a ita, nao amaitha magĩtonya ihingo-inĩ ciake thĩinĩ, magĩcukĩra Jerusalemu mĩtĩ-rĩ, hĩndĩ ĩo wee o nawe nĩweturanĩire na andũ acio.
12. Na arĩ korũo ndwerahire rĩrĩa mũrũ wa nyũkwa aarindũrirũo, kana ũgĩkenerera ariũ a Juda rĩrĩa maaninagwo, o na kana ũkĩmetĩĩra rĩrĩa maathĩnĩkaga!
13. Na arĩ korũo ndwatonyire kĩhingo-inĩ thĩinĩ kĩa andũ akwa mũthenya ũrĩa maakorereirũo nĩ ũũnũhani, kana ũkĩĩraha wona ũrĩa maanyamarĩkĩte mũthenya ũcio monũhirũo, o na kana ũgĩthara indo ciao mũthenya ũcio wao wa ũũnũhani!
14.
Ningĩ na arĩ korũo ndwarũgamire macemanio-inĩ ma njĩra nĩ getha ũng’ũrie andũ ake rĩrĩa meyũragĩra, o na kana ũkĩneana andũ ake arĩa maatigarire mũthenya ũcio wa thĩna!
15. Amu mũthenya ũrĩa Jehova acituĩrĩire ũkiriĩ gũkinyĩrĩra ndũrĩrĩ ciothe; nawe o ta ũrĩa waneka-rĩ, ũguo noguo o nawe ũgekwo. Ngero ciaku iria wanagerana-rĩ, nocio igagũcokerera kĩongo-inĩ gĩaku wee mwene.
16. Tondũ rĩrĩ, o ta ũrĩa mwanyuĩrĩire kĩrĩma-inĩ gĩakwa kĩrĩa kĩamũre-rĩ, ũguo noguo ndũrĩrĩ ciothe ikanyua ihũhũte, na ininũkio ituĩke o ta itarĩ cioneka.
17. No rĩrĩ, kĩrĩma-inĩ gĩa Zayuni nĩhakoneka arĩa makahonoka, nakĩo kĩrĩma kĩu gĩtũũre gĩĩ kĩamũre; ningĩ andũ a nyũmba ya Jakubu matũũre megwatĩire indo ciao ene.
18. Ningĩ nyũmba ĩo ya Jakubu nĩĩgatuĩka ta mwaki, nayo nyũmba ya Jusufu ĩtuĩke ta rũrĩrĩmbĩ rũa mwaki; na nyũmba ya Esau ĩgatuĩka ta maragara ma mahuti, naguo mwaki ũcio ũrĩrĩmbũke mũno thĩinĩ wamo, ũmaninũkie biũ; na gũtirĩ mũndũ o na ũmwe wa nyũmba ya Esau ũgatigara, tondũ ũguo noguo Jehova oigĩte.
19. Nao andũ a bũrũri wa Gũthini nĩmagatunya Esau kĩrĩma gĩake, nao arĩa matũũraga bũrũri ũrĩa mũgũu megwatĩre bũrũri wa Afilisiti, ningĩ megwatĩre ithaka cia Efiraimu na cia kũu Samaria. Ningĩ Abenjamini megwatĩre bũrũri wa Gileadi.
20. Na rĩrĩ, ciana cia Isiraeli iria ciatahirũo mbũtũ nene ikegwatĩra bũrũri wa Akanaani o nginya itũũra rĩa Zarefathu; ningĩ andũ arĩa maatahirũo Jerusalemu makĩrindũrũo magĩtwarũo Sefaradi-rĩ, nĩo makegwatĩra matũũra mothe ma bũrũri wa Gũthini.
21. Ningĩ andũ a kũhonokania makaambata kĩrĩma-inĩ kĩu gĩa Zayuni, nĩ getha matuĩre arĩa a kĩrĩma kĩa Esau. Naguo ũthamaki nĩũgatuĩka wa Jehova.