3. Nĩ ũndũ-rĩ, kĩoneki gĩkĩ nĩ kĩa ihinda rĩrĩa gĩathĩrĩirio, narĩo ihinda rĩu rĩĩhikĩte rĩkinye, naguo ũhoro wakĩo ndũrĩ nganja o na kĩngĩonwo ta gĩgũikara mũno gĩgĩkahingio-rĩ, wee gĩta o gũkirĩrĩria ũgĩetereire, nĩ ũndũ ti-itherũ gĩtirĩ hingo gĩtakahingio, na gĩtigatĩrio.
4.
Atĩrĩrĩ, ngoro ya ũrĩa mũũru nĩ ta gũtua ĩtuĩte mĩkwa, na ti njerekereru thĩinĩ wake; no mũndũ ũrĩa mũthingu agatũũrio muoyo nĩ ũndũ wa gwĩtĩkia gwake.
5. Ti-itherũ ndibei nĩĩtũmaga mũndũ aheneke na atuĩke mwĩtĩi ũtangĩkindĩria mũciĩ, na ũtangĩiganwo nĩ indo iria eriragĩria; ahaanaga o ta kũndũ kwa ngoma kũrĩa gũtangĩiyũra andũ arĩa makuaga, na ndahũnaga o ta ũrĩa gĩkuũ gĩtahũnaga; tondũ acokagĩrĩria ndũrĩrĩ ciothe harĩ we, we mwene, o na akeyũnganĩria andũ a iruka ciothe.
6. Githĩ andũ acio othe matigakĩaria ũhoro wake na ngerekano, na mamuune thimo ya kĩnyararano, moige atĩrĩ, Hĩ! Kaĩ mũndũ ũrĩa wĩingĩhagĩria indo iria itarĩ ciake, na ningĩ agetitikithia mũrigo wa indo cia ngwatio cia mathirĩ-rĩ, e na haaro-ĩ! Egũtũũra ekaga ũguo nginya hĩndĩ ĩ?
7. Akũrandũri-rĩ, githĩ matikaarahũka o narua, o na maarahũre akũnyariri, nawe ũgĩcumwo nĩo?
8. Tondũ nĩũtahĩte ndũrĩrĩ nyingĩ-rĩ, matigari mothe ma ndũrĩrĩ icio nĩmagagũtaha o nawe, nĩ ũndũ wa thakame ya andũ ĩrĩa ĩitĩtwo, o na ũndũ wa maũndũ ma ũhinya marĩa mekĩtwo mabũrũri-inĩ, o na matũũra-inĩ, o na magekwo andũ othe arĩa matũũraga kuo.
10. Wee-rĩ, nĩ maũndũ ma gũconorithia nyũmba yaku wee mwene wĩrehereire, nĩ ũndũ wa ũrĩa ũninithĩtie ndũrĩrĩ nyingĩ, namo mehia marĩa wĩhanĩtie nĩ ma kũũnũhithia muoyo waku wee mwene.
11. Nĩ ũndũ ihiga rĩkaanĩrĩra riumbũre ũhoro ũcio rĩrĩ o rũthingo-inĩ, o naguo mũratho wamũkĩrie ũhoro ũcio ũrĩ o hau wakanĩirio na mĩtĩ ĩrĩa ĩngĩ.
12. Hĩ! Kaĩ mũndũ ũrĩa wakithagia itũũra agĩitithagia thakame, o na akarugũria gĩtũũro kĩu agĩĩkanaga ũũru, arĩ na haaro-ĩ!
13. Atĩrĩrĩ, githĩ ũhoro ũyũ nduumĩte he Jehova Mũnene wa Ita, wa atĩ andũ marutage wĩra wa kũya kũmundio mwaki, o nacio ndũrĩrĩ ciĩnogie cione o maũndũ ma tũhũ?
14.
Nĩ gũkorũo thĩ nĩĩkaiyũrũo nĩ ũhoro wa kũmenya riri wa Jehova, o ta ũrĩa maĩ maiyũraga iria-inĩ makarĩhuba.
15. Hĩ! Kaĩ mũndũ ũrĩa ũguthũkagĩra mũndũ ũrĩa ũngĩ na mathũgũta ta ekũmũnyuithia marũrũ o nginya arĩwo, nĩ getha eyonere ũrĩa amũconorithĩtie, arĩ na haaro-ĩ!
16. Wee-rĩ, ũiyũrĩtwo nĩ ũhoro wa gũconorithio ithenya rĩa riri wa ũrĩa wendete gwĩkĩrĩrũo; gĩkunde o nawe, ũcoke waũrũo nguo ũconorithio, tondũ gĩkombe kĩrĩa gĩĩ guoko kwa ũrĩo kwa Jehova nĩkĩhũgũrĩtwo gĩkerekerio harĩ wee, naguo riri waku wa ũrĩa wendete gwĩkĩrĩrũo nĩũgaconorithio iconorithia inene mũno.
17. Nĩ ũndũ-rĩ, maũndũ marĩa mekĩtwo Lebanoni ma ũhinya nĩmagagũcokerera makũhube, na ũguoyohio nĩ ũndũ wa ũrĩa waninithirie nyamũ o nacio; o na ũndũ wa thakame ya andũ ĩrĩa wanaitithia, o na ũndũ wa maũndũ ma ũhinya marĩa waneka mabũrũri-inĩ, o na matũũra-inĩ, o na ũgĩĩka arĩa othe mamatũũraga.
18. Mũhianano wa gwacũhio-rĩ, wĩ kĩguni gĩa kĩ, atĩ mũũthondeki enogie akĩwacũhia? O naguo mũhianano wa gũtwekio wĩ bata ũrĩkũ, o ũrĩa ũtũmaga andũ maheneke, atĩ mũũturi awĩhoke, na athondeke mĩhianano ĩtaaragia?
19. Hĩ! Kaĩ mũndũ ũrĩ a wĩraga mũtĩ atĩrĩ, Ũkĩra! o na akera ihiga rĩtaaragia atĩrĩ, Arahũka, arĩ na haaro-ĩ! Anga indo ta icio ciarutana maũndũ? Atĩrĩrĩ, nĩ kũhumbwo ihumbĩtwo igũrũ guothe na thahabu, o na betha, na itirĩ mĩhũmũ ya muoyo thĩinĩ wacio o na hanini.
20. No rĩrĩ, Jehova arĩ hekarũ-inĩ yake nyamũre; thĩ yothe nĩĩĩkirĩre ki ĩrĩ mbere yake.