1. ATĨRĨRĨ, mwaka wa kerĩ ĩrĩa Dario aakorirũo athamakĩte, o mweri wa ĩnana wa mwaka ũcio-rĩ, ndũmĩrĩri ya Jehova ĩgĩkinyĩrĩra Zekaria, ũrĩa mũnabii, mũrũ wa Berekia wa Ido, akĩĩrũo atĩrĩ,
3. Tondũ ũcio ũmere atĩrĩ, Jehova Mũnene wa Ita ekuuga ũũ: Njokererai, na niĩ nĩngũmũcokerera; ũguo nĩguo Jehova Mũnene wa Ita ekuuga.
4. Tigai gũikara ta maithe manyu, o acio maahunjagĩrio ũhoro nĩ anabii a tene, makamera atĩrĩ, Jehova Mũnene wa Ita ekuuga ũũ: Garũrũkai, mũtigane na mĩthiĩre yanyu ĩrĩa ĩtaagĩrĩire, o na ciĩko cianyu iria itaagĩrĩire; no matiigana gũthikĩrĩria ũhoro ũcio, o na kana makĩnjigua; ũguo nĩguo Jehova ekuuga.
5. Rĩu-rĩ, maithe macio manyu makĩrĩ ha? Ningĩ-rĩ, githĩ anabii megũtũũra marĩ o ho nginya tene?
6. No rĩrĩ, ciugo ciakwa, na irĩra cia watho wakwa wa kũrũmĩrĩrũo, iria ndaheire anabii ndungata ciakwa-rĩ, githĩ itiahingĩirio maithe manyu? Nao magĩgĩĩcokia ngoro ndundu, makiuga atĩrĩ, Ti-itherũ o ta ũrĩa Jehova Mũnene wa Ita aacirĩire gũtwĩka, kũringana na mĩthiĩre iitũ o na ciĩko ciitũ-rĩ, ũguo noguo atwĩkĩte.
7. Na atĩrĩrĩ, mũthenya wa mĩrongo ĩĩrĩ na ĩna wa mweri wa ikũmi na ũmwe, na nĩguo mweri wa Shebati, o mwaka wa kerĩ ĩrĩa Dario aakorirũo athamakĩte-rĩ, ndũmĩrĩri ya Jehova ĩgĩkinyĩrĩra Zekaria ũrĩa mũnabii, mũrũ wa Berekia wa Ido; nake agĩkiuga atĩrĩ,
8.
Nĩ kũrota ndĩrarotire ũtukũ, ndĩrona mũndũ ũhaicĩte mbarathi ndune, nake akarũgama handũ kĩanda mĩhandathi-inĩ, na akoimwo thutha nĩ mbarathi ingĩ, imwe ndune, na ingĩ irĩ kĩbĩndu, o na ingĩ njerũ.
11. Hĩndĩ ĩo andũ acio maragĩcokeria mũraika wa Jehova ũcio ũrarũngiĩ mĩhandathi-inĩ ĩo ũhoro, maramwĩra atĩrĩ, Nĩtũcangĩte gũkũ thĩ guothe; na atĩrĩ, thĩ yothe ĩkirĩte o ro ũguo ĩrĩ na thayũ, ĩĩgangarĩtwo.
12. Ningĩ mũraika ũcio wa Jehova aracokia ũhoro aroria ũũ: Ĩ Jehova Mũnene wa Ita, nĩ nginya hĩndĩ ĩ ũgũtũũra ũregete kũiguanĩra tha gũkũ Jerusalemu, o na mĩciĩ ĩrĩa ĩngĩ ya Judea, kũrĩa ũtũire ũthũgũtanĩire mĩaka ĩo mĩrongo mũgwanja?
13. Nake Jehova aracokeria mũraika ũcio tũraaranagĩria ũhoro nake, aramũhe ndeto njega cia kũhorerania.
14. Tondũ ũcio mũraika ũcio tũraaranagĩria nake aranjĩra atĩrĩ, No nginya wanĩrĩre uuge ũũ: Jehova Mũnene wa Ita ekuuga atĩrĩ, Nĩ’thitĩte ngoro na ngaigua kĩgoru mũno nĩ ũndũ wa Jerusalemu o na Zayuni,
16. Tondũ ũcio Jehova ekuuga atĩrĩ, Nĩ’hũgũkĩire Jerusalemu ndĩrĩiguĩre tha; na nyũmba yakwa nĩĩgũcoka gwakwo thĩinĩ warĩo, o na rũrigi rũa gũthima naruo rũtambũrũkio mĩako-inĩ ya Jerusalemu. Ũguo nĩguo Jehova Mũnene wa Ita ekuuga.
17. Ningĩ ũcoke wanĩrĩre uuge atĩrĩ, Jehova Mũnene wa Ita ekuuga ũũ: Matũũra-inĩ makwa nĩkũrĩcoka kũgaacĩrũo mũno, nake Jehova acoke ahorerie Zayuni, na acoke ethurĩre Jerusalemu rĩtuĩke rĩake.
18. Ningĩ ndĩratiira maitho, ndĩrona hĩa inya,
19. ndĩracoka ndĩroria mũraika ũcio tũraaranagĩria nake atĩrĩ, Ici nacio nĩ cia kĩ? Nake aranjokeria atĩrĩ, Ici nĩcio hĩa iria iharaganĩtie Juda na Isiraeli na Jerusalemu.
20. Nake Jehova aranyonia aturi ana,
21. na niĩ ndĩrakĩũria atĩrĩ, Aya nao moka gwĩka atĩa? Nake aranjokeria ũhoro, aroiga atĩrĩ, Ici nĩcio hĩa iria ciaharaganirie Juda, nĩguo mũndũ o na ũmwe ndakanacoke kwambararia kĩongo; no rĩrĩ, aya mokĩte gũcitua nda na magũithie hĩa icio cia ndũrĩrĩ, o ndũrĩrĩ iria ciaambararirie hĩa ciacio nĩ getha itharĩke bũrũri wa Juda na iharaganie andũ aguo.