Go Back

Zakaria Chapter 11

• 1. Atĩrĩrĩ, wee Lebanoni, hingũrĩra mwaki mĩrango yaku, nĩguo ũrĩe mĩtarakwa yaku, ũmĩnine.
• 2. O nawe mũthengera-rĩ, rĩra na kĩgi ũkĩanũkaga nĩ ũndũ mũtarakwa nĩ mũgũu, nayo mĩtĩ ĩrĩa ĩrarĩ mĩega mũno nĩ mĩanange. Atĩrĩrĩ, inyuĩ mĩgandi ya Bashani, o na inyuĩ rĩrai na kĩgi mũkĩanũkaga, nĩ ũndũ mũtitũ ũrĩa mũturu nĩ muunange ũkagũa thĩ.
• 3. Ta iguai ũrĩa arĩithi mararĩra na kĩgi, nĩ ũndũ riri wao wa ũrĩa mekĩrĩirũo nĩ mwanangĩku! Ta iguai mũgambo wa ngatia nyanake ikĩruma, nĩ gũkorũo ithaka iria nduru cia Jorodani nĩ nyanangĩku.
• 4. Atĩrĩrĩ, Jehova Ngai wakwa aanjĩrire ũũ: Rĩithia rũũru rũa mbũri cia gũthĩnjwo,
• 5. iria ciũragagwo nĩ arĩa macigũraga, na magacoka kwĩona ta matarĩ ũũru mekĩte; o nao arĩa maciendagia makoiga atĩrĩ, Jehova arogathwo, nĩ ũndũ ndĩ mũtongu; nao arĩithi a cio maticiiguagĩra tha.
• 6. Nĩ ũndũ niĩ ndigacoka kũiguĩra andũ arĩa matũũraga bũrũri ũyũ tha o na hanini; ũguo nĩguo Jehova ekuuga. No rĩrĩ, nĩ kũrekereria ngamarekereria, o mũndũ ndĩmũneane moko-inĩ ma mũndũ ũrĩa ũngĩ, o na moko-inĩ ma mũthamaki wake; nao nĩmakahũra bũrũri ũcio, na ndikamahonokia atĩ nĩguo ndĩmarute moko-inĩ ma andũ ao.
• 7. Tondũ ũcio ngĩgĩtuĩka mũrĩithi wa rũũru rũu rũa mbũri cia gũthĩnjwo, ngĩrĩithia rũũru rũu rũa mbũri, o iria hinyaru mũno; ningĩ ngĩcoka ngĩĩyoera thanju igĩrĩ, rũmwe rũacio ngĩrũtua Ũtugi, naruo rũrĩa rũngĩ ngĩrũtua Ũiguano; ũguo noguo ndagĩtuĩkire mũrĩithi wa rũũru rũu rũa mbũri.
• 8. Na rĩrĩ, ngĩingata arĩithi arĩa atatũ o mweri ũmwe. No rĩrĩ, ngoro yakwa nĩyaiguithirio ũũru nĩcio, o nacio ngoro ciacio igĩgĩ’thũũra niĩ.
• 9. Hĩndĩ ĩo ngĩkiuga atĩrĩ, Ndigacoka kũmũrĩithia; ĩrĩa ĩgũkua nĩĩkue, na ĩrĩa ya kũninwo ndĩkanacoke kuonwo, nĩĩninwo; nacio iria ndigaru-rĩ, nĩirĩane, o ĩmwe ĩrĩe nyama cia ĩrĩa ĩngĩ.
• 10. Ngĩgĩcoka ngĩoya rũthanju rũakwa rũu rũtuĩtwo Ũtugi, ngĩruunania icunjĩ igĩrĩ, nĩ getha ’thũkie kĩrĩkanĩro kĩrĩa ndarĩkanĩire na mĩhĩrĩga ĩo yothe,
• 11. nakĩo gĩgĩthũkio mũthenya o ro ũcio. Hĩndĩ ĩo mbũri icio hinyaru cia rũũru rũu, icio cianjiguaga, igĩkĩmenya atĩ ũndũ ũcio wĩkĩkĩte na ũndũ wa ũhoro wa Jehova.
• 12. Niĩ na niĩ ngĩciĩra atĩrĩ, Mũngĩkorũo nĩmũkuona arĩ wega-rĩ, kĩ’hei mũcara wakwa; na kũngĩkorũo ti ũguo mũgĩtige. Tondũ ũcio magĩ’thimĩra mbia mĩrongo ĩtatũ ituĩke mũcara wakwa.
• 13. Nake Jehova akĩnjĩra atĩrĩ, Ciikĩrie mũũmbi. Anga ici nĩcio kĩndũ kĩrĩa kĩega mangereire gĩa thogora? Niĩ na niĩ ngĩcoka ngĩoya mbia icio mĩrongo ĩtatũ ngĩciikĩria mũũmbi, o kũu nyũmba ya Jehova thĩinĩ.
• 14. Hĩndĩ ĩo ngĩcoka ngiunania rũthanju rũu rũngĩ icunjĩ igĩrĩ, o rũu rũĩtagwo Ũiguano, nĩ getha njĩhie ũiguano ũrĩa wa Juda na Isiraeli.
• 15. Nake Jehova agĩcoka akĩnjĩra atĩrĩ, Ta coka wĩyoere indo cia mũrĩithi mũkĩgu.
• 16. Nĩ ũndũ-rĩ, ti-itherũ nĩngaarahũra mũrĩithi oke bũrũri ũyũ, nake ndagathiaga kũrora mbũri iria nine, o na kana acarie iria hurunjũku, o na kana ohe iria nyunĩku nĩguo ihone; o na kana arĩithie iria ng’ima, no rĩrĩ, nĩ kũrĩa arĩrĩaga nyama cia iria noru, na atihangithie mahũngũ macio namo.
• 17. Hĩ! Kaĩ ragaĩ ũcio wa mũrĩithi ũtirikaga rũũru wĩ na haaro-ĩ! Rũhiũ rũa njora rũkamũguraria o guoko, na rũmũthece riitho rĩake rĩa ũrĩo; guoko gwake nĩgũkonja o kuonja kũũme biũ, o narĩo riitho rĩake rĩa ũrĩo rĩcingimane o gũcingimana.

Home