2. Ta rekia andũ magathigane bũrũri wa Kanaani, o bũrũri ũcio ngũhe ciana cia Isiraeli, ũrekie mũndũ ũmwe ũmwe wa mũhĩrĩga o mũhĩrĩga, thĩinĩ wa mĩhĩrĩga ya maithe mao; na andũ acio o mũndũ akorũo arĩ mũtongoria thĩinĩ wao.
3. Musa agĩkĩmarekia, makiuma werũ-inĩ ũcio wa Parani, o ta ũrĩa Jehova aathanĩte gwĩkwo; nao andũ acio othe maarĩ anene thĩinĩ wa ciana cia Isiraeli.
4. Namo marĩĩtwa mao nĩmo maya: mũhĩrĩga-inĩ wa Reubeni, nĩ Shamua wa Zakuru.
5. Mũhĩrĩga-inĩ wa Simeoni, nĩ Shafati wa Hori.
6. Mũhĩrĩga-inĩ wa Juda, nĩ Kalebu wa Jefune.
7. Mũhĩrĩga-inĩ wa Isakaru, nĩ Igali wa Josefu.
8. Mũhĩrĩga-inĩ wa Efiraimu, nĩ Hoshea wa Nuni.
9. Mũhĩrĩga-inĩ wa Benjamini, nĩ Paliti wa Rafu.
10. Mũhĩrĩga-inĩ wa Zebuluni, nĩ Gadieli wa Sodi.
11. Mũhĩrĩga-inĩ wa Jusufu, naguo ũguo nĩ ta kuuga mũhĩrĩga wa Manase, nĩ Gadi wa Susi.
12. Mũhĩrĩga-inĩ wa Dani, nĩ Amieli wa Gemali.
13. Mũhĩrĩga-inĩ wa Asheri, nĩ Sethuri wa Mikaeli.
14. Mũhĩrĩga-inĩ wa Nafitali, nĩ Nahabi wa Vofisi.
15. Mũhĩrĩga-inĩ wa Gadi, nĩ Geueli wa Maki.
16. Macio nĩmo marĩĩtwa ma andũ arĩa maarekirio nĩ Musa magathigane bũrũri ũcio. Nake Hoshea wa Nuni, aatuĩtwo Joshua nĩ Musa.
17. Musa agĩkĩmarekia magathigane bũrũri ũcio wa Kanaani agĩkĩmera atĩrĩ, Ambatĩrai mwena ũyũ wa Gũthini, mũgere kũu kwĩ irĩma,
18. mũtuĩrie bũrũri ũcio, muone ũrĩa ũtariĩ, na mũmenye ũhoro wa andũ arĩa maũtũũraga, kana me na hinya, kana matirĩ na hinya, ningĩ mũmenye kana nĩ anyinyi, kana nĩ aingĩ
19. na mũmenye ũrĩa bũrũri ũcio matũire ũtariĩ, kana nĩ mwega, kana nĩ mũũru; na mũtuĩrie ũrĩa matũũra marĩa maĩkaraga matariĩ, mũmenye kana nĩ kwamba maambaga hema ta marĩ andũ a rũgendo, kana hihi maikaraga mĩciĩ ĩrĩ njirigo nũmu
20. ningĩ mũtuĩrie ũrĩa bũrũri ũcio ũtariĩ, kana nĩ mũnoru, kana nĩ mũhĩnju, na mũmenye kana nĩũrĩ mĩtĩ mĩingĩ, kana ndũrĩ. Wĩũmĩrĩriei mũno, na mũtũrehere maciaro mamwe ma bũrũri ũcio. Na rĩrĩ, hĩndĩ ĩo nĩguo mĩthabibu yaitĩkaga kwĩrua.
21. Magĩkĩambata, magĩthigana bũrũri ũcio, maambĩrĩirie werũ-inĩ wa Zini, magĩkinya Rehobu, o kũu ihungurĩro-inĩ rĩa Hamathu.
22. Magĩkĩambatha njĩra ya mwena wa Gũthini, makĩgera Hebironi na rĩrĩ, Ahimani, na Sheshai, na Talimai, arĩa maarĩ ciana cia Anaki, magĩkorũo nĩo maatũũrĩte kuo. (Na rĩrĩ, itũũra rĩu rĩa Hebironi rĩaakĩtwo na hagathira mĩaka mũgwanja itũũra rĩa Zoani rĩa Misiri rĩgĩcoka gwakwo.)
23. Magĩgĩkinya kĩanda gĩa Eshikoli, magĩgĩtua rũhonge rũa mũthabibu, rũĩ na kĩmanjika kĩmwe gĩa thabibu, rũgĩkuuanĩrũo na mũtĩ nĩ andũ erĩ ao, na magĩtwara makomamanga mamwe, o na ngũyũ.
24. Naho handũ hau hagĩtuwo kĩanda gĩa Eshikoli, nĩ ũndũ wa kĩmanjika kĩu gĩa thabibu gĩatuirũo gĩgĩthiĩ na ciana icio cia Isiraeli.
26. Magĩgĩkinya kwĩ Musa, na Haruni, o na kĩrĩndĩ gĩothe gĩa ciana cia Isiraeli, o kũu Kadeshi werũ-inĩ wa Parani nao magĩgĩcokeria Musa, na Haruni, o na kĩrĩndĩ gĩothe gĩa ciana cia Isiraeli, ũhoro wa ũrĩa monete, magĩkimonia maciaro macio ma bũrũri ũcio.
27. Magĩkĩmũhe ũhoro makiuga atĩrĩ, Nĩtwakinyire bũrũri ũcio watũtũmire, na ti-itherũ wĩ bũthi wa iria, na ũũkĩ, namo maya nĩmo maciaro maguo.
28. No rĩrĩ, andũ arĩa matũũraga bũrũri ũcio me na hinya mũno, na matũũra mao mairigĩtwo na hinya, na nĩ manene mũno o na ningĩ nĩtwonire ciana cia Anaki kuo.
29. Aamaleki matũũraga bũrũri wa mwena wa Gũthini, o nao Ahiti, na Ajebusi, na Aamori, matũũraga irĩma-inĩ nao Akanaani matũũraga rũgiki-inĩ rũa iria, o na hũgũrũrũ-inĩ cia Jorodani.
30. Na rĩrĩ, Kaiebu agĩkiria andũ acio maarũgamĩte mbere ya Musa, akiuga atĩrĩ, Rekei twambate o ro rĩu, tũthiĩ tũkegwatĩre bũrũri ũcio; nĩ gũkorũo gũtirĩ hingo tũngĩaga kũũtoria.
31. No rĩrĩ, andũ acio maambatanĩtie nake makiuga atĩrĩ, Aca, tũtingĩhota kwambata tũkahũrane na andũ acio nĩ ũndũ nĩmatũkĩrĩtie hinya.
32. Magĩgĩtwara ũhoro mũũru wa ũrĩa bũrũri ũcio maathiganĩire ciana cia Isiraeli ũtariĩ, makiuga atĩrĩ, Bũrũri ũcio tũcangĩte tũkĩũthigana-rĩ, nĩ bũrũri ũkũrĩa andũ akuo ũkamanina biũ; na andũ arĩa othe tuonete kuo nĩ andũ me ciũga ndaya mũno.
33. Ningĩ nĩtuonete kuo andũ maigana marimũ, ariũ a Anaki, a kĩruka kĩa Anefili na ithuĩ tũkĩĩona ithuene-rĩ, tweonaga tũnaana ta ndahi; o nao magĩtuona-rĩ, ũguo noguo monaga tũtariĩ.