1. Nake Jehova agĩkĩĩra Haruni atĩrĩ, Wee mwene mwĩ na ariũ aku, o na andũ a nyũmba ya thoguo, nĩ inyuĩ mũgacokagĩrĩrũo nĩ ũũru ũrĩa ũngĩoneka ũkoniĩ handũ hau haamũre; ningĩ wee mwene mũrĩ na ariũ aku, no inyuĩ mũrĩcokagĩrĩrũo nĩ ũũru wanyu ũrĩa ũngĩoneka ũkoniĩ ũhoro wanyu wa ũrĩa mũtuĩkĩte athĩnjĩri-Ngai.
2. O nao ariũ a ithe wanyu, acio a mũhĩrĩga wa Lawii, o acio a mũhĩrĩga wa a thoguo, ũmokokie o nao, nĩ getha meturanĩre nawe, magũtungatagĩre; no wee mwene, na ariũ aku me hamwe nawe, mũtungatage hau mbere ya hema-ya-ũira.
3. Nao magũtungatagĩre wee mwene, o na mamenyagĩrĩre Hema-ya-gũtũnganwo; no matigakuhĩhĩria indo cia handũ hau haamũre, kana makuhĩhĩrie kĩgongona, nĩ getha matigakue o ene, o na kana inyuĩ mũkue.
4. Nao megũturanĩrũo nawe, nĩguo wĩra wao ũtuĩke wa kũmenyagĩrĩra hema-ya-gũtũnganwo, nĩguo marutage wĩra wothe wa Hema ĩo, na mũtikanakuhĩhĩrio nĩ mũndũ wa mũhĩrĩga ũngĩ o na hanini.
5. Naguo wĩra wanyu ũtuĩke wa kũmenyagĩrĩra maũndũ mothe ma handũ hau haamũre, o na kũmenyagĩrĩra kĩgongona kĩa ho; nĩ getha hatikanacoke kũgĩa marakara makinyĩre ciana cia Isiraeli.
6. Na atĩrĩrĩ, niĩ nĩ niĩ ndĩyoeire ariũ a ithe wanyu, acio Alawii, maamũrũo thĩinĩ wa ciana cia Isiraeli, matuĩke ta marĩ kĩheo kĩrĩa mũheetwo, kĩamũrĩirũo Jehova, nĩguo matuĩke ndungata cia kũruta mawĩra ma hema-ya-gũtũnganwo.
7. Ningĩ wee nawe, na ariũ aku me hamwe nawe, mũikarage mũrũmĩtie ũhoro ũcio wanyu wa gũtuĩka athĩnjĩri-Ngai wĩra-inĩ wothe wa kĩgongona, o na wa na kũu mbarĩ ĩrĩa ĩngĩ ya gĩtama gĩa kũhakania, mũgĩtungatage ho; ũhoro ũcio wa gũtuĩka athĩnjĩri-Ngai nĩndaaiũhe ũtuĩke ta arĩ kĩheo ndĩmũheete, na mũndũ ũrĩa ũtaamũrĩirũo wĩra ũcio angĩũkuhĩhĩria nĩ kũũragwo akoragwo.
8. NINGI Jehova akĩarĩria Haruni, akiuga ũũ: Atĩrĩrĩ, nĩngũheete wĩra wa kũmenyerera magongona ma indo iria njiyũkagĩrio na igũrũ, nacio nĩ indo ciothe iria ciana cia Isiraeli inyamũragĩra; indo icio-rĩ, ngũheete wee mwene o na ariũ aku, nĩ ũndũ nĩmũitĩrĩirio maguta, naguo ũndũ ũcio ũtuĩke nĩguo mwagĩrĩirũo nĩ gwĩkagwo hĩndĩ ciothe tene na tene.
9. Na rĩrĩ, thĩinĩ wa indo iria nyamũre mũno iria itarĩ cia gũcinwo na mwaki-rĩ, iria igatuĩka ciaku thĩinĩ wa indo ciacio ciothe iria ikandutagĩra, nĩ mahaki ma cio mothe ma mũtu, na magongona ma cio mothe ma mehia, o na magongona ma cio mothe ma mithitia, indo icio ciothe ikarutaga-rĩ, ĩkaamũrũo ituĩke igai rĩrĩa wamũrĩirũo wee mwene o na ariũ aku.
10. Indo icio nĩũgacirĩaga ũcituĩte indo nyamũre mũno; na rĩrĩ, mũndũ mũrũme o wothe thĩinĩ wanyu, nĩagacirĩaga, na nĩikonagwo irĩ nyamũre nĩwe.
11. Ningĩ indo iria ciana cia Isiraeli ikarutaga cia magongona ma kũiyũkio na igũrũ, ma iheo ciacio, o na iria ciothe ikarutaga cia magongona ma gũthũngũthio, icio rũngũheete wee mwene o na ariũ aku, o na aarĩ aku arĩa marĩ hamwe nawe; naguo ũndĩi ũcio ũtuĩke nĩguo mwagĩrĩirũo nĩ gwĩkagwo tene na tene. Mũndũ o wothe ũrĩa ũtagwatĩtwo nĩ thahu thĩinĩ wa nyũmba yaku nĩagacirĩaga.
12. Na rĩrĩ, maguta mothe marĩa mega mũno, na magetha mothe marĩa mega mũno ma thabibu, o na ma irio cia mĩgũnda, maciaro ma mbere ma cio marĩa irĩheaga Jehova-rĩ, macio mothe nĩngũheete.
13. Maciaro mothe ma mbere marĩa makaamba kwĩrua thĩinĩ wa bũrũri wacio, o marĩa igatwaragĩra Jehova, magatuĩka maku; mũndũ o wothe wa nyũmba yaku ũrĩa ũtagwatĩtwo nĩ thahu nĩakamarĩaga.
15. Marigithathi mothe thĩinĩ wa andũ othe, o na thĩinĩ wa nyamũ ciothe, marĩa andũ makarutĩra Jehova, magatuĩka maku; no rĩrĩ, irigithathi rĩa gũciarũo nĩ mũndũ, ndũrĩ hingo ũtakarĩkũũrithia, o namo marigithathi ma nyamũ iria irĩ mũgiro nĩ gũkũũra ũkamakũũrithia.
16. Naguo ũkũũri wa marigithathi ma andũ-rĩ, nĩmakũũragwo me ma mweri ũmwe, o ta ũrĩa ũrĩtuaga, na ũtuage atĩ nĩ cekeri ithano, o ta ũrĩa cekeri ya handũ harĩa haamũre ĩigana ĩgĩtarũo (nayo ĩiganaine na gera mĩrongo ĩĩrĩ).
17. No rĩrĩ, gategwa ka irigithathi, kana kagondu ka irigithathi, o na kana kori ka irigithathi, tũu ndũkanatũkũũrithie tũu nĩ twamũre; thakame yatuo ũkamĩminjaminjĩria kĩgongona, o namo maguta matuo ũmacinage, nĩguo matuĩke kĩndũ kĩrĩa kĩrutĩirũo Jehova kĩa ihaki rĩa gũcinwo na mwaki, nĩ getha mũtararĩko ũrĩa ũnungaga wega ũiguwo nĩwe.
18. Nacio nyama ciatuo igatuĩka ciaku, o ta ũrĩa gĩthũri kĩrĩa gĩa gũthũngũthio, o na kũgũrũ kwa ũrĩo, irĩ ciaku.
19. Indo ciothe iria nyamũre cia magongona ma kũiyũkio na igũrũ iria ciana cia Isiraeli irĩrutagĩra Jehova, nĩngũheete wee mwene, na ariũ aku, o na aarĩ aku me hamwe nawe; naguo ũndũ ũcio ũtuĩke nĩguo mwagĩrĩirũo nĩ gwĩkagwo tene na tene; ningĩ ũhoro ũcio nĩ wa kĩrĩĩnĩro kĩrĩa kĩrĩkanagĩrũo na cumbĩ mbere ya Jehova gĩtangĩgarũrĩka, nĩ ũndũ waku, o na ũndũ wa rũciaro rũaku tene na tene.
20. Nake Jehova akĩĩra Haruni atĩrĩ, Wee ndũkagwata igai rĩa gĩthaka kũu bũrũri wacio, kana ũgwate gĩcunjĩ kĩaguo o na atĩa; niĩ nĩ niĩ gĩcunjĩ gĩaku, o na igai rĩaku thĩinĩ wa ciana cia Isiraeli.
21. O naho ha ũhoro wa ciana cia Lawii-rĩ, nĩndĩciheete gĩcunjĩ gĩa ĩkũmi kĩrĩa ciana cia Isiraeli irutagĩra Jehova kĩa indo ciacio ciothe gĩtuĩke igai rĩacio, nĩ ũndũ wa wĩra ũrĩa irutaga, o wĩra ũcio ũrutagwo hau hema-inĩ-ya-gũtũnganwo.
22. Na rĩrĩ, gwata rĩu, ciana cia Isiraeli itigacoka gũkuhĩhĩria hema-ya-gũtũnganwo, nĩ getha itigatuĩke atĩ nĩciĩhĩtie, nacio ikue.
23. No rĩrĩ, Alawii nĩo marĩrutaga wĩra wa hema-ya-gũtũnganwo, na nĩo marĩcokagĩrĩrũo nĩ ũũru ũrĩa ũngĩoneka ho; naguo ũhoro ũcio ũtuĩke kĩrĩra kĩa watho wa kũrũmĩrĩrũo njiaro-inĩ cianyu ciothe tene na tene; nao Alawii acio matikagwata igai rĩa gĩthaka o na atĩa thĩinĩ wa ciana cia Isiraeli.
24. Nĩ gũkorũo gĩcunjĩ kĩu gĩa ikũmi ciana cia Isiraeli irutagĩra Jehova gĩtuĩke indo ciacio iria imũrutagĩra cia igongona rĩa kũiyũkio na igũrũ, nĩkĩo ’heete Alawii gĩtuĩke igai rĩao; ũndũ ũcio nĩguo ũtũmĩte ndĩmere atĩ thĩinĩ wa ciana cia Isiraeli matikagwata igai rĩa gĩthaka o na atĩa.
25. Ningĩ Jehova akĩarĩria Musa, akĩmwĩra atĩrĩ,
26. O na ningĩ arĩria Alawii, ũmere ũũ: Hĩndĩ ĩrĩa mũkuoya gĩcunjĩ kĩu gĩa ikũmi kĩa indo cia ciana cia Isiraeli, o iria irutagĩra Jehova, icio ndĩmũheete ituĩke igai rĩanyu-rĩ, nĩmũgacoka mũrutĩre Jehova indo imwe ciacio ituĩke igongona rĩa kũiyũkio na igũrũ, nacio ituĩke gĩcunjĩ gĩa ĩkũmi kiumĩte harĩ gĩcunjĩ o ro kĩu gĩacio gĩa ikũmi.
27. Na rĩrĩ, ha ũhoro wanyu-rĩ, indo icio mũkarutĩra Jehova ituĩke cia igongona rĩa kũiyũkio na igũrũ-rĩ, ikonagwo ta arĩ ngano yanyu ĩrutĩtwo kĩhuhĩro-inĩ, kana ndibei yanyu ĩrĩa njega ĩrutĩtwo kĩhihĩro-inĩ.
28. Ũguo noguo na inyuĩ mũkarutagĩra Jehova igongona rĩa kũiyũkio na igũrũ riumĩte gĩcunjĩ-inĩ kĩu gĩa ĩkũmi kĩa indo iria mũkaiyũkagia harĩ ciana cia Isiraeli; na gĩcunjĩ kĩu gĩacio mũrutagĩra Jehova gĩa kũiyũkio na igũrũ kĩheo Haruni, ũcio mũthĩnjĩri-Ngai.
29. Na rĩrĩ, thĩinĩ wa iheo cianyu ciothe iria mũkaheagwo, no mũhaka mũkarutĩra Jehova igongona rĩa kũiyũkio na igũrũ thĩinĩ wacio ciothe, nacio indo icio mũkaruta, igatuĩka nĩ iria njega mũno cia kwamũrĩrũo Jehova.
30. Tondũ ũcio nĩũkera ciana cia Lawii ũũ: Atĩrĩrĩ, rĩrĩa mũkarutĩra Jehova indo icio njega mũno cia kũiyũkio na igũrũ ciumĩte gĩcunjĩ-inĩ kĩu-rĩ, icio njega mũno irutagwo nĩ Alawii ikonagwo ta arĩ uumithio wao wa kĩhuhĩro-inĩ, o na ta arĩ uumithio wao wa kĩhihĩro-inĩ gĩa thabibu.
31. Na nĩmũkarĩagĩra indo icio o kũndũ guothe kũrĩa mũgakoragwo mũrĩ, inyuene, o na andũ a nyũmba cianyu; nĩ gũkorũo indo icio nĩcio mũcara wanyu ũrĩa mũkaheagwo nĩ ũndũ wa wĩra wanyu ũcio mũrutaga hema-inĩ-ya-gũtũnganwo.
32. Na rĩrĩ, mũtikonwo ta mwĩhĩtie nĩ ũndũ wa ũhoro ũcio, mũngĩkorũo nĩmũrĩkĩtie kũiyũkia na igũrũ indo icio njega mũno; no indo icio theru ciamũrĩirũo Jehova cia ciana cia Isiraeli mũtikanacithahie, mũcithũkie, nĩ getha mũtigakue.