1. Na rĩrĩ, airĩtu a Zelofehadi, mũrũ wa Heferi wa Gileadi, ũrĩa warĩ mũrũ wa Makiru wa Manase, o airĩtu acio a nyũmba cia Manase, mũrũ wa Jusufu, magĩkuhĩhĩria Musa. Nao airĩtu acio metagwo Mahala, na Noa, na Hogila, na Milika, o na Tiriza.
2. Magĩgĩthiĩ makĩrũgama mbere ya Musa, na Eleazaru, mũthĩnjĩri-Ngai, o na mbere ya atongoria a kĩrĩndĩ kĩu gĩothe, mũromo-inĩ wa hema-ya-gũtũnganwo, makiuga atĩrĩ,
3. Ithe witũ nĩaakuĩrĩire werũ-inĩ, na ndaarĩ thiritũ-inĩ ya arĩa mokĩrĩire Jehova a thiritũ ya Kora, no aakuire nĩ ũndũ wa mehia make o ro ũguo; nake agĩkorũo atarĩ na ihĩĩ ciake.
4. Rĩu-rĩ, nĩ kĩ gĩgũgĩtũma rĩĩtwa rĩa ithe witũ rĩeherio mbarĩ-inĩ yao, nĩ ũndũ atĩ ndaarĩ na kĩhĩĩ? O na ithuĩ tũheanĩriei igai hamwe na agendi a ithe witũ.
5. Musa agĩgĩtwarĩra Jehova ũhoro ũcio wao.
6. Nake Jehova agĩkĩarĩria Musa, akĩmwĩra atĩrĩ,
7. Airĩtu acio a Zelofehadi mekwaria kĩhooto; ti-itherũ nĩ wega ũmaheanĩrie igai rĩao hamwe na agendi a ithe wao, narĩo igai rĩa ithe wao ũreke marĩgwate.
8. Ningĩ warie na ciana cia Isiraeli, ũciĩre atĩrĩ, Mũndũ o na ũrĩkũ angĩkua, na ndatige mũriũ-rĩ, rekagai igai rĩake rĩgwatwo nĩ mwarĩ.
9. Na angĩkorũo atarĩ na mũirĩtu, igai rĩake nĩrĩheagwo ariũ a nyina kana a ithe.
10. Na angĩkorũo atarĩ na ariũ a ithe, nĩrĩheagwo agendi a ithe.
11. Nake ithe angĩkorũo atarĩ na agendi ake, igai rĩake nĩrĩheagwo mũndũ wa nyũmba yao ũrĩa me rũrĩra, nake mũndũ ũcio agwate igai rĩu; naguo ũndũ ũcio ũtuĩke kĩrĩra kĩa watho wa kũrũmĩrĩrũo cira-inĩ nĩ ciana cia Isiraeli, o ta ũrĩa Jehova aathire Musa gwĩkagwo.
12. Ningĩ Jehova akĩĩra Musa atĩrĩ, Ũkĩra wambate kĩrĩma-inĩ gĩkĩ kĩa Abarimu, wone bũrũri ũrĩa ’heete ciana cia Isiraeli.
13. Na wawona-rĩ, thutha wa ũguo ũcoke ũturanĩrũo na andũ anyu arĩa maanakua, o ta ũrĩa Haruni, mũrũ wa nyũkwa nake aaturanĩirũo
14. nĩ gũkorũo nĩmwanemeire werũ wa Zini, mũkĩrega kũigua ũhoro wakwa kĩrĩndĩ kĩagĩa na ngarari, mũkĩaga kũndĩithia muonanie harĩ kĩrĩndĩ kĩu atĩ ndĩ mũtheru, kĩĩ maĩ-inĩ macio. (Namo maĩ macio nĩ ma Meriba, o kũu Kadeshi, werũ-inĩ ũcio wa Zini.)
15. Nake Musa akĩarĩria Jehova, akiuga atĩrĩ,
16. Jehova, ũrĩa Ngai wa maroho ma andũ othe, nĩagĩthure mũndũ, amũtue mũrori wa kĩrĩndĩ gĩkĩ,
17. athiage agĩtongoretie gĩkiumagara na gĩkĩĩnũka, o na agĩtongoragie gĩgĩthiĩ, na gĩgĩcoka; nĩ getha kĩrĩndĩ gĩkĩ kĩa Jehova gĩtigatuĩke ta mbũri itarĩ na mũrĩithi.
18. Nake Jehova agĩkĩĩra Musa atĩrĩ, Wĩyoere Joshua wa Nuni, mũndũ ũiyũrĩtwo nĩ roho wa Ngai, na ũmũigĩrĩre moko mũtwe,
19. ũmũige mbere ya Eleazaru, mũthĩnjĩri-Ngai, o na mbere ya kĩrĩndĩ gĩothe, ũmũtue mũrori wakĩo, andũ othe marĩ ho makĩonaga.
21. Nake arũgamage mbere ya Eleazaru, mũthĩnjĩri-Ngai, nĩguo amũũragĩrie maũndũ na ũndũ wa cira ũrĩa ũgũtuĩruo mbere ya Jehova nĩ Urimu; na rĩrĩ, Joshua we mwene, na ciana cia Isiraeli irĩ hamwe nake, o kĩrĩndĩ kĩu gĩothe gĩkoimagaraga na ũndũ wa uuge wa Eleazaru, na kĩinũkage na ũndũ wa uuge wake o ro ũguo.
22. Nake Musa agĩĩka o ta ũguo Jehova aamwathire eke; agĩkĩoya Joshua, akĩmũiga mbere ya Eleazaru, mũthĩnjĩri-Ngai, o na mbere ya kĩrĩndĩ kĩu gĩothe;
23. agĩkĩmũigĩrĩra moko mũtwe, akĩmũtua mũrori wakĩo, o ta ũrĩa Jehova erire Musa gwĩkwo.