1. Ningĩ mweri wa mũgwanja, o mũthenya wa mbere waguo-rĩ, nĩmũkagĩa na ũũngano mwamũre ũkoniĩ andũ othe, na mũtikaruta wĩra o na ũrĩkũ wa ndũire; ũcio nĩguo ũgatuĩka mũthenya wanyu wa kũhuhaga tũrumbeta.
2. Nĩmũkaruta ihaki rĩa njino rĩa gũtũma mũtararĩko ũrĩa ũnungaga wega ũiguwo nĩ Jehova; narĩo nĩ ndegwa ĩmwe ĩtarĩ ngũrũ, na ndũrũme ĩmwe, o na tũtũrũme mũgwanja twa mwaka ũmwe, tũtarĩ na kaũũgũ;
3. na mũcirutanagĩrie na ihaki rĩacio rĩa mũtu, o mũtu ũrĩa mwega mũhinyu mũno, ũtukanĩtio na maguta, nacio icunjĩ ithatũ cia ikũmi cia eba ng’ima irutagwo nĩ ũndũ wa ndegwa ĩo, o nacio icunjĩ igĩrĩ cia ikũmi nĩ ũndũ wa ndũrũme ĩo,
4. o nakĩo gĩcunjĩ kĩmwe gĩa ikũmi kĩrutagwo nĩ ũndũ wa gatũrũme o gatũrũme ga tũu mũgwanja;
5. o na mũrute thenge ĩmwe ya gũtuĩka igongona rĩa mehia, nĩguo mũhoroherio nayo;
6. nacio icio ciothe irutanagĩrio hamwe na ihaki rĩa njino rĩa karũgamo ka mweri, o na ihaki rĩayo rĩa mũtu, o na ihaki rĩa njino rĩa gũtũũra rĩrutagwo hingo ciothe, hamwe na ihaki rĩarĩo rĩa mũtu, o na indo iria irutagwo cia kũnyuwo cia igongona ciamo, o ta ũrĩa mũtugo ũrĩa ũtuĩtwo wa kũrũmĩrĩrũo wa mahaki macio ũtariĩ, nĩ getha indo icio ciothe itũmage mũtararĩko ũrĩa ũnungaga wega ũiguwo, na ituĩke ihaki rĩa gũcinwo na mwaki rĩrĩa rĩrutĩirũo Jehova.
7. Ningĩ mũthenya wa ikũmi wa mweri ũcio wa mũgwanja, nĩmũkagĩa na ũũngano mwamũre ũkoniĩ andũ othe; na mwĩhingage kũrĩa irio, na mũtikarute wĩra o na ũrĩkũ wa ndũire;
8. no rĩrĩ, nĩmũkarutĩra Jehova ihaki rĩa njino rĩa mũtararĩko ũrĩa ũnungaga wega; narĩo nĩ ndegwa ĩmwe ĩtarĩ ngũrũ, na ndũrũme ĩmwe, o na tũtũrũme mũgwanja twa mwaka ũmwe; na mũmenyerere atĩ nyamũ icio itikanakorũo irĩ na kaũũgũ;
9. na mũrute ihaki rĩacio rĩa mũtu, o mũtu ũrĩa mwega mũhinyu mũno ũtukanĩtio na maguta; nacio icunjĩ ithatũ cia ikũmi cia eba ng’ima irutwo nĩ ũndũ wa ndegwa ĩmwe, o nacio icunjĩ igĩrĩ cia ikũmi nĩ ũndũ wa ndũrũme ĩmwe,
10. o nakĩo gĩcunjĩ kĩmwe gĩa ĩkũmi kĩrutwo nĩ ũndũ wa gatũrũme o gatũrũme ga tũu mũgwanja;
11. na thenge ĩmwe ĩrutwo ĩtuĩke ya igongona rĩa mehia; nacio icio ciothe irutanĩrio hamwe na igongona rĩa mehia rĩa horohio, o na ihaki rĩa njino rĩu rĩa gũtũũra rĩrutagwo hingo ciothe, hamwe na ihaki rĩarĩo rĩa mũtu o na indo iria irutagwo cia kũnyuwo cia igongona ciamo.
12. Ningĩ mũthenya wa ikũmi na ĩtano wa mweri wa mũgwanja nĩmũkagĩa na ũũngano mwamũre ũkoniĩ andũ othe, na mũtikaruta wĩra o na ũrĩkũ wa ndũire, na mũgĩthondekere Jehova gĩathĩ mĩthenya mũgwanja;
13. na mũrute ihaki rĩa njino rĩa indo iria irutagwo cia gũcinwo na mwaki, rĩa gũtũma mũtararĩko ũrĩa ũnungaga wega ũiguwo nĩ Jehova; narĩo rĩtuĩke ndegwa ikũmi na ithatũ itarĩ ngũrũ, na ndũrũme igĩrĩ, o na tũtũrũme ikũmi na tũna twa mwaka ũmwe; nacio indo icio ciothe ĩkorũo itarĩ na kaũũgũ;
14. na mũrute ihaki rĩacio rĩa mũtu, o mũtu ũrĩa mwega mũhinyu mũno, ũtukanĩtio na maguta, nacio icunjĩ ithatũ cia ikũmi cia eba ng’ima irutwo nĩ ũndũ wa ndegwa o ndegwa ya icio ikũmi na ithatũ, o nacio icunjĩ igĩrĩ cia ikũmi nĩ ũndũ wa ndũrũme o ndũrũme ya icio cierĩ,
15. nakĩo gĩcunjĩ kĩmwe gĩa ikũmi kĩrutwo nĩ ũndũ wa gatũrũme o gatũrũme ga tũu ikũmi na tũna;
16. o na thenge ĩmwe ĩtuĩke igongona rĩa mehia; nacio icio ciothe irutanĩrio hamwe na ihaki rĩa njino rĩu rĩa gũtũũra rĩrutagwo hingo ciothe, hamwe na ihaki rĩarĩo rĩa mũtu, o na indo iria irutagwo cia kũnyuwo cia igongona ciamo.
17. O naguo mũthenya wa kerĩ wa gĩathĩ kĩu mũrute ndegwa ĩkũmi na igĩrĩ itarĩ ngũrũ, na ndũrũme igĩrĩ, o na tũtũrũme ikũmi na tũna twa mwaka ũmwe tũtarĩ na kaũũgũ;
18. hamwe na ihaki rĩacio rĩa mũtu, na indo iria irutagwo cia kũnyuwo cia igongona ciacio, nĩ ũndũ wa ndegwa icio, o na ũndũ wa ndũrũme icio, o na ũndũ wa tũtũrũme tũu, o ta ũrĩa nyamũ icio ciigana igĩtarũo, o na ta ũrĩa mũtugo ũrĩa ũtuĩtwo wa kũrũmĩrĩrũo ũtariĩ;
19. ningĩ mũrute thenge ĩmwe ĩtuĩke ya igongona rĩa mehia; nacio icio ciothe irutanĩrio hamwe na igongona rĩu rĩa gũtũũra rĩrutagwo hingo ciothe, hamwe na ihaki rĩarĩo rĩa mũtu, o na indo iria irutagwo cia kũnyuwo cia igongona ciamo.
20. Naguo mũthenya wa ĩtatũ kũrutwo ndegwa ikũmi na ĩmwe, na ndũrũme igĩrĩ, o na tũtũrũme ikũmi na tũna twa mwaka ũmwe, tũtarĩ na kaũũgũ,
21. hamwe na ihaki rĩacio rĩa mũtu, o na indo iria irutagwo cia kũnyuwo cia igongona ciacio, nĩ ũndũ wa ndegwa icio, o na ũndũ wa ndũrũme icio, o na ũndũ wa tũtũrũme tũu, o ta ũrĩa indo icio ciothe ciigana igĩtarũo, o ta ũrĩa mũtugo ũrĩa ũtuĩtwo wa kũrũmĩrĩrũo ũtariĩ;
22. na mũrute thenge ĩmwe ĩtuĩke ya igongona rĩa mehia; nacio icio ciothe irutanĩrio hamwe na ihaki rĩa njino rĩu rĩa gũtũũra rĩrutagwo hingo ciothe, hamwe na ihaki rĩarĩo rĩa mũtu, o na indo iria irutagwo cia kũnyuwo cia igongona ciarĩo.
23. Naguo mũthenya wa ĩna kũrutwo ndegwa ikũmi, na ndũrũme igĩrĩ, na tũtũrũme ikũmi na tũna twa mwaka ũmwe, tũtarĩ na kaũũgũ;
24. o na mũrute ihaki rĩacio rĩa mũtu, o na indo iria irutagwo cia kũnyuwo cia igongona ciacio, nĩ ũndũ wa ndegwa icio, o na ũndũ wa ndũrũme icio, o na ũndũ wa tũtũrũme tũu, o ta ũrĩa nyamũ icio ciothe ciigana igĩtarũo, o ta ũrĩa mũtugo ũrĩa ũtuĩtwo wa kũrũmĩrĩrũo ũtariĩ;
25. na mũrute thenge ĩmwe ĩtuĩke ya igongona rĩa mehia; nacio icio ciothe irutanĩrio hamwe na ihaki rĩa njino rĩu rĩa gũtũũra rĩrutagwo hingo ciothe; o na ihaki rĩarĩo rĩa mũtu, o na indo iria irutagwo cia kũnyuwo cia igongona ciarĩo.
26. O naguo mũthenya wa ĩtano kũrutwo ndegwa kenda, na ndũrũme igĩrĩ, na tũtũrũme ikũmi na tũna twa mwaka ũmwe, tũtarĩ na kaũũgũ;
27. na ihaki rĩacio rĩa mũtu, o na indo iria irutagwo cia kũnyuwo cia igongona ciacio, nĩ ũndũ wa ndegwa icio, o na ũndũ wa ndũrũme icio, o na ũndũ wa tũtũrũme tũu, o ta ũrĩa ciigana igĩtarũo, o ta ũrĩa mũtugo ũrĩa ũtuĩtwo wa kũrũmĩrĩrũo ũtariĩ;
28. o na mũrute thenge ĩmwe ĩtuĩke ya igongona rĩa mehia; nacio icio ciothe irutanĩrio hamwe na ihaki rĩa njino rĩu rĩa gũtũũra rĩrutagwo hingo ciothe, o na ihaki rĩarĩo rĩa mũtu, o na indo iria irutagwo cia kũnyuwo cia igongona ciarĩo.
29. Naguo mũthenya wa ĩtandatũ kũrutwo ndegwa inyanya, na ndũrũme igĩrĩ, na tũtũrũme ikũmi na tũna twa mwaka ũmwe, tũtarĩ na kaũũgũ;
30. na ihaki rĩacio rĩa mũtu, o na indo iria irutagwo cia kũnyuwo cia igongona ciacio, nĩ ũndũ wa ndegwa icio, o na ũndũ wa ndũrũme icio, o na ũndũ wa tũtũrũme tũu, o ta ũrĩa nyamũ icio ciigana igĩtarũo, o ta ũrĩa mũtugo ũrĩa ũtuĩtwo wa kũrũmĩrĩrũo ũtariĩ;
31. na mũrute thenge ĩmwe ĩtuĩke ya igongona rĩa mehia; nacio icio ciothe irutanĩrio hamwe na ihaki rĩa njino rĩu rĩa gũtũũra rĩrutagwo hingo ciothe, o na ihaki rĩarĩo rĩa mũtu, o na indo iria irutagwo cia kũnyuwo cia igongona ciarĩo.
32. O naguo mũthenya wa mũgwanja kũrutwo ndegwa mũgwanja, na ndũrũme igĩrĩ, o na tũtũrũme ikũmi na tũna twa mwaka ũmwe, tũtarĩ na kaũũgũ;
33. o na ihaki rĩacio rĩa mũtu, o na indo iria irutagwo cia kũnyuwo cia igongona ciacio, nĩ ũndũ wa ndegwa icio, na ũndũ wa ndũrũme icio, o na ũndũ wa tũtũrũme tũu; o ta ũrĩa icio ciothe ciigana igĩtarũo, o ta ũrĩa mũtugo ũrĩa ũtuĩtwo wa kũrũmĩrĩrũo ũtariĩ;
34. na mũrute thenge ĩmwe ĩtuĩke ya igongona rĩa mehia; nacio icio ciothe irutanĩrio hamwe na ihaki rĩa njino rĩa gũtũũra rĩrutagwo hingo ciothe, o na ihaki rĩarĩo rĩa mũtu, o na rĩa indo iria irutagwo cia kũnyuwo cia igongona ciarĩo.
35. Naguo mũthenya wa ĩnana nĩmũkagĩa na gĩtũngano kĩamũre gĩkoniĩ andũ othe na mũtikarute wĩra o na ũrĩkũ wa ndũire;
36. no rĩrĩ, nĩmũkaruta ihaki rĩa njino rĩa indo iria irutĩtwo na ũndũ wa gũcinwo na mwaki, rĩa gũtũma mũtararĩko ũrĩa ũnungaga wega ũiguwo nĩ Jehova; narĩo nĩ ndegwa ĩmwe, na ndũrũme, o na tũtũrũme mũgwanja twa mwaka ũmwe tũtarĩ na kaũũgũ;
37. o na ihaki rĩacio rĩa mũtu, o na rĩa indo iria irutagwo cia kũnyuwo cia igongona cia ndegwa ĩo, o na ndũrũme ĩo, o na tũtũrũme tũu, o ta ũrĩa nyamũ icio ciigana igĩtarũo, o ta ũrĩa mũtugo ũrĩa ũtuĩtwo wa kũrũmĩrĩrũo ũtariĩ;
38. na mũrute thenge ĩmwe ĩtuĩke ya igongona rĩa mehia; nacio icio ciothe irutanĩrio hamwe na ihaki rĩa njino rĩu rĩa gũtũũra rĩrutagwo hingo ciothe, hamwe na ihaki rĩarĩo rĩa mũtu, o na indo iria irutagwo cia kũnyuwo cia igongona ciarĩo.
39. Magongona macio nĩmo mũrĩrutagĩra Jehova ciathĩ-inĩ cianyu iria ciathanĩtwo makĩria ma marĩa mũrĩrutaga makoniĩ mĩĩhĩtwa yanyu ĩrĩa mũkehĩtaga, o na indo iria mũkarutaga na kwĩendera, ma mĩthemba ya mahaki manyu ma njino, o na mahaki manyu ma mũtu, o na ma indo iria irutagwo cia kũnyuwo cia igongona, o na magongona manyu ma ũiguano.
40. Nake Musa agĩkĩhe ciana cia Isiraeli ũhoro ũcio wothe aathĩtwo nĩ Jehova.