2. Ũkĩra ũrĩhĩrie ciana cia Isiraeli harĩ Amidiani; na thutha wa ũguo, ũturanĩrũo na andũ anyu arĩa maanakua.
3. Musa agĩkĩarĩria andũ, akĩmera atĩrĩ, Thiĩi mwĩre andũ amwe anyu meohe indo ciao cia ita, mathiĩ ita, makahũrane na Amidiani, nĩguo mũrĩhirie Jehova rĩĩrĩhĩria rĩake harĩ o.
4. Mĩhĩrĩga-inĩ yothe ya Isiraeli-rĩ, o mũhĩrĩga-inĩ ũmwe rutagai andũ ngiri mũmatware ita-inĩ.
5. Tondũ ũcio hagĩkĩrutwo andũ ngiri ĩmwe ĩmwe o mũhĩrĩga-inĩ, hagĩkĩgĩa andũ ngiri ikũmi na igĩrĩ meyohete indo ciao cia mbaara mathiĩ ita-inĩ.
6. Musa agĩgĩtwara andũ ngiri ĩmwe ĩmwe a mũhĩrĩga o mũhĩrĩga ita-inĩ; magĩgĩthiĩ na Finehasi wa Eleazaru, mũthĩnjĩri-Ngai, akuuĩte indo cia handũ harĩa haamũre na moko, o na tũrumbeta twa kũhuhwo na mũgambo mũnene.
7. Magĩkĩhũrana na Amidiani, o ta ũrĩa Jehova aathĩte Musa gwĩkwo; magĩkĩũraga arũme othe.
8. Na makĩũraganĩria athamaki a Amidiani hamwe na andũ arĩa angĩ moragirũo; na nĩ Evi, na Rekemu, na Zuru, na Huru, na Reba, athamaki arĩa atano a Midiani; o nake Balaamu mũrũ wa Beori makĩmũũraga na rũhiũ rũa njora.
9. Nacio ciana cia Isiraeli igĩtaha andũ-a-nja a Amidiani, na ciana ciao, na ũhiũ wao wothe wa ng’ombe, o na wa mbũri, o na indo iria ingĩ ciao ciothe magĩcitaha.
10. Na magĩcina na mwaki matũũra mao mothe marĩa maatũũraga, o na kũndũ guothe kũrĩa maaikaraga maambĩte hema ciao.
11. Magĩgĩthiĩ na indo ciothe iria maatahĩte, o na iria maatunyanĩte, andũ, o na ũhiũ.
12. Nao andũ acio maatahĩte na indo icio maatunyanĩte, o na icio maatahĩte, magĩcitwarĩra Musa, na Eleazaru, mũthĩnjĩri-Ngai, o na kĩrĩndĩ gĩothe gĩa ciana cia Isiraeli, magĩcikinyia o kĩraaro-inĩ kũu werũ-inĩ wa Moabi ũrĩa wĩ gũkuhĩ na Jorodani, o kũu Jeriko.
13. Na rĩrĩ, Musa, na Eleazaru, mũthĩnjĩri-Ngai, o na anene othe a kĩrĩndĩ kĩu, makiumagara makamatũnge hau kĩraaro-inĩ.
14. Musa agĩkĩrakarĩra anene a mbũtũ cia ita arĩa moimĩte wĩra-inĩ ũcio wa ita, o arĩa maathaga andũ ngiri o ngiri, o na arĩa maathaga igana igana.
16. Atĩrĩrĩ, aya nĩo maahĩtithirie ciana cia Isiraeli ikĩagarara watho wa Jehova ũhoro-inĩ wa Peori, nĩ ũndũ wa ũrĩa ciataarĩtwo nĩ Balaamu, nakĩo kĩrĩndĩ gĩkĩ kĩa Jehova gĩkĩgwatwo nĩ mũthiro.
17. Tondũ ũcio rĩu ũragai twana tuothe twa tũhĩĩ, o na andũ-a-nja othe arĩa monanĩtwo nao nĩ arũme na ũndũ wa gũkomwo nao.
18. No rĩrĩ, twana tuothe twa tũirĩtu tũrĩa tũtonanĩte na arũme na ũndũ wa gũkomwo natuo-rĩ, tũu rekei tũtũũre muoyo, tũtuĩke twanyu inyuene.
19. Na mwambe mũthiĩ mũgaikare mĩthenya mũgwanja na kũu gĩthaka-inĩ mbarĩ ĩrĩa ĩngĩ ya kĩraaro, na rĩrĩ, mũndũ o wothe ũrĩa ũũragĩte mũndũ, na ũrĩa wothe ũhutĩtie kĩimba, wĩtheriei mũthenya wa ĩtatũ o na wa mũgwanja, inyuene, o na andũ arĩa mũtahĩte.
20. Ningĩ mũtherie nguo cianyu ciothe, o na indo cianyu iria ciothe ithondeketwo na rũũa, o na iria ciothe ithondeketwo na ngore cia mbũri, o na indo ciothe cia mĩtĩ.
21. Nake Eleazaru, mũthĩnjĩri-Ngai, agĩkĩĩra andũ a ita, o acio maathiĩte ita-inĩ atĩrĩ, Ũhoro ũcio nĩguo kĩrĩra kĩa watho ũrĩa Jehova aathire Musa ũrũmagĩrĩrũo;
22. no rĩrĩ, thahabu, na betha, na gĩcango, na kĩgera, o na kĩgera kĩa ibaba na kĩa mbũrũmbũrũ,
23. kĩndũ o gĩothe kĩrĩa kĩngĩhota gwĩtiiria mwaki-rĩ, mũkĩhĩtũkithagĩrie mwaki-inĩ gĩthahũke, no ningĩ gĩtikanaage gũtherio na maĩ marĩa maamũrĩtwo ma gũthahũrana; nacio indo ciothe iria itangĩĩtiiria mwaki, ihĩtũkĩrio maĩ-inĩ itoboketio.
24. Ningĩ mũthenya wa mũgwanja mũthambie nguo cianyu mũgĩthahũke, na thutha wa ũguo mũtonye kĩraaro-inĩ.
25. Nake Jehova akĩarĩria Musa, akĩmwĩra atĩrĩ,
26. Tarai indo iria ciatahirũo mũmenye ũrĩa ciigana, mũtare andũ o na ũhiũ, mwĩ na Eleazaru, mũthĩnjĩri-Ngai, o na anene a nyũmba cia maithe ma kĩrĩndĩ gĩkĩ;
27. nacio indo icio itahĩtwo ũcigayũkanie ikundi igĩrĩ; ũgayanĩrie andũ arĩa ogĩ na mbaara o acio maathiĩte ita-inĩ, na kĩrĩndĩ kĩu kĩngĩ gĩothe;
28. ningĩ ũhothithie andũ acio maathiĩte ita-inĩ mũhothi nĩ ũndũ wa Jehova; woyage kĩndũ kĩmwe kĩmwe thĩinĩ wa indo magana matano, thĩinĩ wa andũ, na thĩinĩ wa ng’ombe, na thĩinĩ wa ndigiri, o na thĩinĩ wa mbũri;
29. indo icio-rĩ, ũcioe ciumĩte gĩkundi-inĩ kĩu kĩao, ũcihe Eleazaru, mũthĩnjĩri-Ngai, ituĩke cia Jehova cia igongona rĩa kũiyũkio na igũrũ.
30. Naho ha ũhoro wa gĩkundi kĩrĩa gĩkũgaĩrũo ciana cia Isiraeli woyage kĩndũ kĩmwe kĩmwe thĩinĩ wa indo mĩrongo ĩtano, thĩinĩ wa andũ, na thĩinĩ wa ng’ombe, na thĩinĩ wa ndigiri, o na thĩinĩ wa mbũri, naguo ũguo nĩ ta kuuga thĩinĩ wa ũhiũ wothe, ũcihe Alawii arĩa matũũraga maikarĩtie wega gĩikaro kĩu kĩa Jehova.
31. Nao Musa na Eleazaru, mũthĩnjĩri-Ngai, magĩgĩĩka o ta ũguo Jehova aathire Musa gwĩkwo.
32. Na rĩrĩ, indo iria ciatahirũo, thengia iria andũ arĩa maathiĩte ita-inĩ metharĩire magĩthiĩ nacio, ciarĩ mbũri ngiri magana matandatũ ma mĩrongo mũgwanja na ithano,
33. na ng’ombe ngiri mĩrongo mũgwanja na igĩrĩ,
34. na ndigiri ngiri mĩrongo ĩtandatũ na ĩmwe,
35. nao andũ-a-nja arĩa matonanĩte na arũme na ũndũ wa gũkomwo nao, othe hamwe, maarĩ ngiri mĩrongo ĩtatũ na igĩrĩ.
36. Na rĩrĩ, gĩkundi kĩa ng’ondu kĩrĩa kĩagaĩirũo arĩa maathiĩte ita-inĩ kĩarĩ ng’ondu ngiri magana matatũ ma mĩrongo ĩtatũ na mũgwanja, na magana matano;
37. nacio ng’ondu iria ciahotheirũo Jehova ciarĩ magana matandatũ ma mĩrongo mũgwanja na ithano.
39. O nacio ndigiri ciarĩ ngiri mĩrongo ĩtatũ na magana matano; nakĩo gĩkundi gĩacio kĩrĩa kĩahotheirũo Jehova kĩarĩ ndigiri mĩrongo ĩtandatũ na ĩmwe.
40. Nao andũ maarĩ ngiri ikũmi na ithathatũ; nakĩo gĩkundi kĩao kĩrĩa kĩahotheirũo Jehova kĩarĩ andũ mĩrongo ĩtatũ na erĩ.
41. Nake Musa agĩkĩnengera Eleazaru, mũthĩnjĩri-Ngai, indo icio ciahotheirũo Jehova ituĩke cia igongona rĩa kũiyũkio na igũrũ, o ta ũrĩa Jehova aamwathire gwĩkwo.
42. Na rĩrĩ, thĩinĩ wa gĩkundi kĩrĩa kĩarĩ gĩa ciana cia Isiraeli, kĩrĩa Musa aathengirie harĩ andũ arĩa maathiĩte ita-inĩ-rĩ,
43. (na gĩkundi kĩu gĩa kĩrĩndĩ kĩu kĩngĩ-rĩ, kĩarĩ ng’ondu ngiri magana matatũ ma mĩrongo ĩtatũ na mũgwanja, na magana matano,
44. na ng’ombe ngiri mĩrongo ĩtatũ na ithathatũ,
45. na ndigiri ngiri mĩrongo ĩtatũ na magana matano,
46. na andũ ngiri ikũmi na ithathatũ,)
47. thĩinĩ wa gĩkundi kĩu gĩa ciana cia Isiraeli-rĩ, Musa akĩoya kĩndũ kĩmwe kĩmwe thĩinĩ wa indo mĩrongo ĩtano, thĩinĩ wa andũ, na thĩinĩ wa ũhiũ, agĩgĩcihe Alawii, arĩa maatũire maikaragia gĩikaro kĩu kĩa Jehova; o ta ũrĩa Jehova aathire Musa gwĩkwo.
48. Nao atongoria arĩa maathaga andũ acio ngiri nyingĩ a mbũtũ cia ita, o acio maathaga ngiri o ngiri, o na arĩa maathaga igana o igana, magĩkuhĩhĩria Musa;
49. magĩkĩmwĩra atĩrĩ, Ithuĩ ndungata ciaku nĩtũtarĩte andũ arĩa maarĩ ita-inĩ, o arĩa twaroraga, tũkona ũrĩa maigana, na rĩrĩ, hatirĩ mũndũ o na ũmwe witũ ũtarĩ ho.
50. Tondũ ũcio indo cia kũrutĩrũo Jehova iria mũndũ o mũndũ eyoeire-rĩ, nĩcio ici twaruta cia gũtũhoroheria mbere ya Jehova, nacio nĩ indo cia thahabu, na irengeri cia magũrũ, na ituro cia moko, na icũhĩ cia ciara, na icũhĩ cia matũ, o na mĩgathĩ ya ngingo.
51. Nao Musa na Eleazaru, mũthĩnjĩri-Ngai, magĩkĩoya thahabu icio ciao, o indo icio ciothe cia goro ithondeketwo wega.
52. Nacio thahabu icio ciothe ciarutirũo cia igongona rĩa kũiyũkio na igũrũ o icio maarutĩire Jehova, o icio cia anene arĩa maathaga andũ ngiri o ngiri, o na anene arĩa maathaga andũ igana igana, ciarĩ cekeri ngiri ikũmi na ithathatũ, na magana mũgwanja ma mĩrongo ĩtano.
53. (Tondũ andũ a ita nĩmetharĩire indo, o mũndũ ciake we mwene.)
54. Nao Musa na Eleazaru, mũthĩnjĩri-Ngai, magĩkĩoya thahabu cia anene acio maathaga andũ ngiri o ngiri, o na igana igana, magĩcitwara hema-inĩ-ya-gũtũnganwo, ituĩke ũndũ wa gũtũma ciana cia Isiraeli iririkanwo nĩ Jehova.