1. Ningĩ Jehova akĩarĩria Musa o kũu werũ-inĩ wa Moabi, gũkuhĩ na Jorodani o kũu Jeriko, akĩmwĩra atĩrĩ,
2. Athana, wĩre ciana cia Isiraeli ihe Alawii matũũra ma gũtũũra kũu mabũrũri-inĩ marĩa magayanĩtio matuĩke ma cio, na mũmahe ithaka irigicĩirie matũũra macio mbarĩ ciothe.
3. Namo matũũra macio matuĩke mao ma gũtũũra; nacio ithaka icio ituĩke cia kũrĩithagia ng’ombe ciao, na indo ciao, o na ũhiũ wao wa mĩthemba yothe.
4. Nacio ithaka icio cia matũũra marĩa mũkahe Alawii, ikarigicĩria matũũra macio na mbarĩ ciothe, na ikinye mĩena-inĩ yacio ithimĩtwo mĩkono ngiri ĩmwe kuuma njirigo-inĩ cia matũũra macio.
5. Naho harĩa yakinya na kũu nja ya itũũra, mũkurure mũhari mũrũngarũ wa mĩkono ngiri igĩrĩ mwena wa irathĩro, o naguo mwena wa gũthini mũkurure mũhari mũrũngarũ wa mĩkono ngiri igĩrĩ; o naguo mwena wa ithũĩro mũkurure mũhari mũrũngarũ wa mĩkono ngiri igĩrĩ; o naguo mwena wa gathigathini mũkurure mũhari mũrũngarũ wa mĩkono ngiri igĩrĩ; narĩo itũũra rĩgĩe gatagatĩ-inĩ ga ithaka icio. Naguo ũndũ ũcio ũtuĩke wa gũtũma matũũra mao magĩe na ithaka imarigicĩirie mbarĩ ciothe.
6. Namo matũũra marĩa mũkahe Alawii-rĩ, matuĩke matũũra matandatũ ma kũũrĩrũo, o marĩa mũkaamũra mũheane nĩ getha mũndũ ũrĩa ũũragĩte mũndũ agateng’era kuo; ningĩ mũmahe matũũra mangĩ mĩrongo ĩna na merĩ muongerere macio.
7. Matũũra mothe marĩa mũkahe Alawii-rĩ, magatuĩka mĩrongo ĩna na manana; na mũmaheanĩrie hamwe na ithaka icio ciamo imarigicĩirie.
8. Naho ha ũhoro wa matũũra macio mũkaheana, thĩinĩ wa marĩa makegwatĩrũo nĩ ciana cia Isiraeli matuĩke ma cio-rĩ, nĩmũkaruta maingĩ harĩ arĩa mamaingĩhĩtie; na mũrute manyinyi harĩ arĩa mamanyihĩtie; mũhĩrĩga o mũhĩrĩga ũkĩhe Alawii matũũra mamwe ma guo, o ta ũrĩa ũhoro wa igai rĩaguo rĩrĩa rĩũgũĩrĩire ũtariĩ.
9. Ningĩ Jehova akĩarĩria Musa, akĩmwĩra atĩrĩ,
10. Aria na ciana cia Isiraeli ũciĩre ũũ: Hĩndĩ ĩrĩa mũkaringa Jorodani mũkinye bũrũri wa Kanaani,
11. nĩmũgethurĩra matũũra mamwe matuĩke matũũra ma kũũrĩrũo; nĩ getha mũndũ o wothe ũrĩa ũũragĩte mũndũ o na ũrĩkũ, atacirĩire gwĩka ũndũ ũcio, orĩre kuo.
13. Namo matũũra manyu marĩa mũkaruta ma kũũrĩrũo magatuĩka matandatũ.
14. Mũkaheana matũũra matatũ mũrĩmo ũyũ wa Jorodani, namo matũũra mangĩ matatũ o kũu bũrũri wa Kanaani, namo nĩmo magatuĩka matũũra ma kũũrĩrũo.
15. Matũũra macio matandatũ-rĩ, nĩ ma kũũrĩrũo, nĩ ũndũ wa ciana cia Isiraeli, o na mũndũ wa kũngĩ, o na mũndũ ũrĩa ũcigeneire, nĩ getha mũndũ o wothe ũrĩa ũũragĩte mũndũ o na ũrĩkũ, atacirĩire gwĩka ũndũ ucio, oragĩre kuo.
16. No rĩrĩ, mũndũ angĩgũtha ũrĩa ũngĩ na mũnyamũ wa kĩgera, nake ũcio wagũthwo akue-rĩ, mũmũgũthi nĩ mũũragani; na mũũragani ũcio ndarĩ hingo atakoragwo.
18. Kana hihi angĩoya mũtĩ wa mbaara, ũrĩa ũngĩhota kũũraga mũndũ, amũgũthe naguo, nake mũndũ ũcio akue, mũmũgũthi nĩ mũũragani; na mũũragani ũcio ndarĩ hingo atakoragwo.
19. Mwĩrĩhĩria wa thakame ĩo ĩitĩtwo, we mwene nĩwe ũkoraga mũũragani ũcio; o hĩndĩ ĩrĩa angĩcemania nake-rĩ, noguo angĩmũũraga.
20. Ningĩ angĩmũtheca nĩ ũndũ wa gĩthũũro kĩrĩa amũthũũrĩte, kana amũikie mũtĩ, amuohetie njĩra-inĩ, mũndũ ũcio akue,
21. kana ningĩ me na muku angĩmũgũtha na guoko nake akue, ndarĩ hingo atakoragwo; ũcio mũgũthani nĩ mũũragani; nake mwĩrĩhĩria thakame ĩo ĩitĩtwo we mwene nĩwe ũkoraga mũũragani ũcio hĩndĩ ĩrĩa angĩcemania nake.
22. No rĩrĩ, angĩmũtheca na mbũkĩrĩra o ro ũguo matarĩ na ũthũ, kana amũikie mũtĩ atamuohetie njĩra-inĩ,
23. kana amũikie ihiga o na rĩrĩkũ rĩrĩa rĩngĩhota kũũraga mũndũ atekũmuona, na tondũ wa ũhoro ũcio akue, na akorũo ndoima mũmuku wake, kana akamũcarĩria kĩrĩi,
24. hĩndĩ ĩo andũ monganĩte magĩtue cira ũkoniĩ mũgũthani ũcio na mwĩrĩhĩria thakame ĩo ĩitĩtwo, o ta ũrĩa ũhoro wa macira macio ũtariĩ;
29. Namo maũndũ maya nĩmo magatuĩka kĩrĩra kĩa watho wa kũrũmĩrĩrũo nĩ inyuĩ cira-inĩ njiaro-inĩ cianyu ciothe, o kũndũ kũrĩa guothe mũrĩtũũraga.
30. Mũndũ o wothe ũrĩa ũkoraga mũndũ o na ũrĩkũ angiumbũrũo nĩ aira-rĩ, nĩ kũũragwo akoragwo; no rĩrĩ, ũira wa mũndũ ũmwe wiki ndũngĩigana wa gũtũma mũndũ oragwo.
31. O na ningĩ atĩrĩ, mũtikanaamũkĩre indo cia gũkũũra muoyo wa mũũragani, ũrĩa wonetwo atĩ nĩaagĩrĩirũo nĩ kũũragwo; no rĩrĩ, mũndũ ũcio ndarĩ hingo atakoragwo.