1. Ningĩ Jehova akĩarĩria Musa na Haruni, akĩmera atĩrĩ,
2. Tarai ariũ a Kohathu thĩinĩ wa ciana cia Lawii, mũmenye ũrĩa maigana, mũmatare o ta ũrĩa mbarĩ ciao o na nyũmba cia maithe mao itariĩ,
3. o arĩa makinyĩtie mĩaka mĩrongo ĩtatũ o na magakĩria hau, o nginya arĩa makinyĩtie mĩaka mĩrongo ĩtano, nao nĩo megũtuĩka atungati hema-inĩ-ya-gũtũnganwo.
4. Na rĩrĩ, ũyũ nĩguo wĩra ũrĩa ũgũtuĩka wa ariũ acio a Kohathu hema-inĩ-ĩo-ya-gũtũnganwo ũkoniĩ indo iria nyamũre mũno;
5. hĩndĩ ĩrĩa hema ĩgwakũrũo andũ mathiĩ-rĩ, Haruni arĩtonyaga hema thĩinĩ, marĩ na ariũ ake, marute gĩtama gĩa kũhakania kĩrĩa kĩrĩ mbere ya gĩikaro kĩu, mahumbĩre ithandũkũ rĩa ũira nakĩo;
6. ningĩ igũrũ rĩakĩo maigĩrĩre gĩthii kĩa njũa cia pomboo, na macoke maare igũrũ rĩacio tama wa rangi wa bururu mũtheri. Thutha wa ũguo matonyie mĩtĩ ĩrĩa mĩraya yarĩo handũ hayo.
7. O narĩo igũrũ rĩa metha ya mĩgate ĩrĩa ĩigagwo mbere ya Jehova maare tama wa rangi wa bururu, na macoke maige igũrũ rĩayo thani, na iciko, na mbakũri, o na ikobo cia gũita kĩrĩa gĩgũitwo; ningĩ mĩgate ĩrĩa ĩigagwo mbere ya Jehova hĩndĩ ciothe ĩigĩrĩrũo igũrũ rĩa metha ĩo;
8. macoke maigĩrĩre igũrũ rĩacio tama wa rangi wa gakarakũ macihumbe naguo, ningĩ mahumbe tama ũcio na gĩthii kĩa njũa cia pomboo. Nayo mĩtĩ ĩrĩa mĩraya ya metha ĩo mamĩĩkĩre handũ hayo.
9. Ningĩ moe tama wa rangi wa bururu, mahumbĩre mũtĩ wa kũigĩrĩrũo matawa marĩa mamũrĩkaga, na matawa maguo, na mwĩhato waguo, na thani cia mũrarĩ wa ndambĩ ciaguo, o na indo ciaguo ciothe iria ciĩkagĩrũo maguta, o iria marutaga wĩra waguo nacio;
10. naguo mũtĩ ũcio o na indo ciaguo ciothe maũkũnje na gĩthii kĩa njũa cia pomboo, macoke maũigĩrĩre gĩkuui-inĩ ĩgũrũ.
11. Narĩo igũrũ rĩa kĩgongona gĩa thahabu maare tama wa rangi wa bururu, maũhumbe na gĩthii kĩa njũa cia pomboo, macoke mekĩre mĩtĩ ĩrĩa mĩraya kĩgongona-inĩ kĩu handũ hayo.
12. Ningĩ macoke moe indo ciothe iria irutagwo wĩra nacio, o iria irutagwo wĩra wa handũ harĩa haamũre nacio, maciĩkĩre tama-inĩ wa rangi wa bururu, macihumbe na gĩthii kĩa njũa cia pomboo maciigĩrĩre gĩkuui-inĩ igũrũ.
13. Thutha wa ũguo marute mũhu kĩgongona-inĩ, macoke maare tama wa rangi wa zambarau igũrũ rĩakĩo,
14. macoke maigĩrĩre indo ciakĩo ciothe igũrũ rĩakĩo, o iria marutaga wĩra nacio kĩgongona-inĩ kĩu; nacio nĩ ngĩo ciakĩo, na njibe ciakĩo cia mĩthece ĩtatũ, na ihakũri ciakĩo, o na mbakũri ciakĩo, naguo ũguo nĩ ta kuuga indo ciothe cia kĩgongona kĩu; macoke maare igũrũ rĩakĩo gĩthii kĩa njũa cia pomboo, ningĩ matonyie mĩtĩ ĩrĩa mĩraya yakĩo handũ hayo.
15. Na rĩrĩ, Haruni na ariũ ake maarĩkia wĩra wao wothe wa kũhumba handũ hau haamũre, o na kũhumba indo ciothe cia handũ hau haamũre, o hĩndĩ ĩrĩa andũ othe maagwata gũthiĩ moima kĩraaro-inĩ, hĩndĩ ĩo ariũ a Kohathu magakuhĩhĩria makuue mĩrigo ĩo; no indo icio nyamũre cio nyene matigacihutia nĩguo matigakue. Indo icio nĩcio irĩkuuagwo nĩ ariũ a Kohathu wĩra-inĩ ũcio wa hema-ya-gũtũnganwo.
16. Na rĩrĩ, Eleazaru wa Haruni, mũthĩnjĩri-Ngai, nĩwe ũrĩmenyagĩrĩra maguta marĩa mamũrĩkaga, na ũbumba ũrĩa ũnungaga wega, na mũtu ũrĩa ũrutagwo hĩndĩ ciothe, o na maguta marĩa maitanagĩrĩrio, ningĩ nĩwe ũrĩmenyagĩrĩra wega gĩikaro kĩu, na indo ciothe iria irĩ thĩinĩ wakĩo, na handũ hau haamũre, na indo ciothe ciaho.
17. Nake Jehova akĩarĩria Musa na Haruni, akĩmera atĩrĩ,
18. Menyererai mũtikanareke hagĩe kaũndũ ga kũninithia mũhĩrĩga wa mbarĩ ya Kohathu wehere harĩ Alawii;
19. no rĩrĩ, mekagei ũũ: nĩguo matũũre muoyo matigakue hĩndĩ ĩrĩa megũkuhĩhĩria indo icio nyamũre mũno; Haruni na ariũ ake nĩo marĩtonyaga Hema ĩo thĩinĩ, makamathurĩre mũndũ o mũndũ wĩra wake, o na mũrigo wake ũrĩa egũkuua;
20. no rĩrĩ, o ene matigatonya thĩinĩ kuona handũ hau haamũre o na hanini, nĩguo matigakue.
21. Ningĩ Jehova akĩarĩria Musa, akĩmwĩra atĩrĩ,
22. Tara ariũ a Gerishoni o nao, ũmenye ũrĩa maigana, ũmatare o ta ũrĩa nyũmba cia maithe mao itariĩ, o na ta ũrĩa mbarĩ ciao itariĩ
23. na rĩrĩ, arĩa ũgũtara nĩ arĩa makinyĩtie mĩaka mĩrongo ĩtatũ o na magakĩria hau, o nginya arĩa makinyĩtie mĩaka mĩrongo ĩtano; nao nĩo megũtuĩka atungati hema-inĩ-ĩo-ya-gũtũnganwo.
24. Ũyũ nĩguo wĩra wa mbarĩ cia Agerishoni ũrĩa ũkoniĩ ũtungati wao, o na ũkuui mĩrigo
25. nĩo marĩkuuaga matama marĩa macunjuragio ma gĩikaro, na hema-ya-gũtũnganwo, na kĩandarũa kĩrĩa kĩmĩhumbagĩra, o na gĩthii kĩa njũa cia pomboo kĩrĩa kĩaragwo igũrũ rĩakĩo, o na gĩtama kĩrĩa gĩa kweheheragio kĩa mũromo-inĩ wa hema-ya-gũtũ-nganwo;
26. o na makuuage matama marĩa macunjuragio ma kũiriga nja ya gĩikaro kĩu mĩena yothe, o na tama wa kweheheragio ũrĩa ũcunjuragio mũromo-inĩ wa nja ya gĩikaro kĩu hau kĩgongona kĩrĩ; ningĩ marĩkuuaga mĩhĩndo, o na indo ciothe iria irutagwo wĩra ũcio nacio, ningĩ mawĩra mothe marĩa makoniĩ indo icio-rĩ, no-o marĩmarutaga.
27. Naguo wĩra o wothe ũrĩa Agerishoni marĩrutaga, o na ũngĩtuĩka nĩ wa gũkuua mĩrigo kana o mawĩra mothe marĩa marĩruta-rĩ, Haruni na ariũ ake nĩo marĩathanaga maũndũ-inĩ macio mothe; inyuĩ nĩ inyuĩ mũrĩonanagĩrĩria mũrigo ũrĩa mũndũ o mũndũ egũkuua.
28. Ũcio nĩguo wĩra ũrĩa ũrĩrutagwo nĩ mbarĩ cia ariũ a Agerishoni hema-inĩ-ya-gũtũnganwo; nake Ithamaru wa Haruni mũthĩnjĩri-Ngai, nĩwe ũrĩmaroraga makĩruta mawĩra mao.
29. Naho ha ũhoro wa ariũ a Merari, ũmatare o ta ũrĩa mbarĩ ciao, o na nyũmba cia maithe mao, itariĩ;
30. nao arĩa ũgũtara nĩ arĩa makinyĩtie mĩaka mĩrongo ĩtatũ, o na magakĩria hau, o nginya arĩa makinyĩtie mĩaka mĩrongo ĩtano, nao nĩo megũtuĩka atungati hema-inĩ-ya-gũtũnganwo.
31. Naguo ũyũ nĩguo watho wa mĩrigo ĩrĩa andũ acio marĩkuuaga wĩra-inĩ wothe ũrĩa marĩrutaga hema-inĩ-ya-gũtũnganwo; marĩkuuaga mbaũ cia gĩikaro, na mĩgamba yakĩo, o na itugĩ ciakĩo hamwe na makinya ma cio;
32. na itugĩ iria ciirigĩte nja yakĩo, hamwe na makinya ma cio, na higĩ ciacio ciothe; na marĩrutaga wĩra wothe ũrĩa ũkoniĩ indo icio; na mũkĩonia mũndũ o mũndũ mũrigo wake-rĩ, mũtarage indo icio mũgĩcigwetaga marĩĩtwa.
33. Ũcio nĩguo wĩra ũrĩa mbarĩ cia ariũ a Merari marĩrutaga o ta ũrĩa mawĩra mao mothe matariĩ kũu hema-inĩ-ya-gũtũnganwo, na marĩroragwo nĩ Ithamaru wa Haruni, mũthĩnjĩri-Ngai, makĩmaruta.
34. Musa na Haruni o na anene a kĩrĩndĩ kĩu, magĩgĩtara ariũ a Kohathu o ta ũrĩa mbarĩ ciao, o na nyũmba cia maithe mao, ciatariĩ,
35. marutĩtie arĩa maakinyĩtie mĩaka mĩrongo ĩtatũ, na magakĩria hau, o nginya arĩa maakinyĩtie mĩaka mĩrongo ĩtano, o arĩa maarĩ a gũtungata wĩra-inĩ ũcio wa hema-ya-gũtũnganwo,
36. nao arĩa maatarirũo o ta ũrĩa mbarĩ ciao ciatariĩ, maarĩ ngiri igĩrĩ, na magana mũgwanja ma mĩrongo ĩtano.
37. Acio nĩo andũ arĩa maatarirũo thĩinĩ wa mbarĩ cia Akohathu nĩ Musa na Haruni, o ta ũrĩa Jehova aathĩte Musa eke; nao othe maarĩ a gũtungata wĩra-inĩ ũcio wa hema-ya-gũtũnganwo.
38. Nao arĩa maatarirũo thĩinĩ wa ariũ a Gerishoni, o ta ũrĩa mbarĩ ciao, o na nyũmba cia maithe mao, ciatariĩ,
39. marutĩtie arĩa maakinyĩtie mĩaka mĩrongo ĩtatũ na magakĩria hau, o nginya arĩa maakinyĩtie mĩaka mĩrongo ĩtano, o arĩa maarĩ a gũtungata wĩra-inĩ ũcio wa hema-ya-gũtũnganwo-rĩ,
40. acio othe maatarirũo o ta ũrĩa mbarĩ ciao, o na nyũmba cia maithe mao, ciatariĩ-rĩ, maarĩ ngiri igĩrĩ na magana matandatũ ma mĩrongo ĩtatũ.
41. Acio nĩo andũ arĩa maatarirũo thĩinĩ wa mbarĩ cia ariũ a Gerishoni nĩ Musa na Haruni, o ta ũrĩa Jehova aathĩte Musa eke, nao othe maarĩ a gũtungata wĩra-inĩ ũcio wa hema-ya-gũtũnganwo.
42. Nao arĩa maatarirũo a mbarĩ cia ariũ a Merari o ta ũrĩa mbarĩ ciao, o na nyũmba cia maithe mao ciatariĩ,
43. marutĩtie arĩa maakinyĩtie mĩaka mĩrongo ĩtatũ na magakĩria hau, o nginya arĩa maakinyĩtie mĩaka mĩrongo ĩtano, o arĩa maarĩ a gũtungata wĩra-inĩ ũcio wa hema-ya-gũtũnganwo-rĩ,
44. acio othe maatarirũo thĩinĩ wao o ta ũrĩa mbarĩ ciao ciatariĩ, maarĩ ngiri ithatũ na magana merĩ.
45. Acio nĩo andũ arĩa maatarirũo a mbarĩ cia ariũ a Merari, o arĩa Musa na Haruni maatarire, o ta ũrĩa Jehova aathĩte Musa eke.
46. Nao acio othe maatarirũo thĩinĩ wa Alawii, o arĩa Musa na Haruni, o na atongoria, a Isiraeli maatarire, o ta ũrĩa mbarĩ ciao, o na nyũmba cia maithe mao, ciatariĩ,
47. marutĩtie arĩa maakinyĩtie mĩaka mĩrongo ĩtatũ, o na magakĩria hau, o nginya arĩa maakinyĩtie mĩaka mĩrongo ĩtano, o arĩa maarĩ a gũtungata mawĩra-inĩ macio, o na a gũkuuaga mĩrigo hema-inĩ-ya-gũtũnganwo,
48. acio othe maatarirũo thĩinĩ wao-rĩ, maarĩ ngiri inyanya, na magana matano ma mĩrongo ĩnana.
49. Andũ acio maatarirũo nĩ Musa, o ta ũrĩa Jehova aamwathĩte eke, mũndũ o mũndũ agĩtarũo o ta ũrĩa wĩra wake watariĩ, o na ta ũrĩa mũrigo wake watariĩ. Ũguo nĩguo maatarirũo, o ta ũrĩa Jehova aathĩte Musa gwĩkwo.