1. Nake Jehova akĩarĩria Musa o kũu werũ-inĩ ũcio wa Sinai, mweri wa mbere wa mwaka wa ĩĩrĩ thutha wa moima bũrũri wa Misiri, akĩmwĩra ũũ:
2. Atĩrĩrĩ, ciana cia Isiraeli nĩikarĩa gĩathĩ kĩa Bathaka o ihinda rĩakĩo rĩrĩa rĩtuĩtwo rĩakinya.
3. Mũthenya wa ikũmi na ĩna wa mweri ũyũ hwaĩ-inĩ gũtanatuka nĩguo mũgakĩrĩa, o ihinda rĩakĩo rĩrĩa rĩtuĩtwo rĩakinya, na mũgakĩrĩa o ta ũrĩa irĩra cia watho wakĩo wothe wa kũrũmĩrĩrũo itariĩ, o na ta ũrĩa mĩtugo yacio yothe ĩrĩa ĩtuĩtwo ĩtariĩ.
4. Nake Musa agĩkĩarĩria ciana cia Isiraeli, agĩciĩra itabarĩre ũrĩi wa gĩathĩ kĩu kĩa Bathaka.
5. Nacio igĩkĩrĩĩra gĩathĩ kĩu kĩa Bathaka kũu werũ-inĩ ũcio wa Sinai, o mweri wa mbere, mũthenya wa ikũmi na ĩna wa mweri ũcio hwaĩ-inĩ gũtanatuka; o ta ũrĩa maũndũ mothe maatariĩ marĩa Jehova aathire Musa mekwo, ũguo noguo ciana cia Isiraeli ciekire.
6. Na rĩrĩ, nĩkwarĩ andũ amwe maagwatĩtio thahu nĩ kĩimba kĩa mũndũ, na tondũ ũcio matiigana kũhota kũrĩa gĩathĩ kĩa Bathaka mũthenya ũcio; nao magĩthiĩ makĩrũgama mbere ya Musa, o na mbere ya Haruni, mũthenya o ũcio,
7. makiuga atĩrĩ, Ithuĩ twĩ na thahu nĩ ũndũ wa kĩimba kĩa mũndũ; no rĩrĩ, nĩ kĩ gĩgũtũma tũgirio tũrute indo ciitũ cia kũrutĩrũo Jehova o ihinda rĩrĩa rĩtuĩtwo thĩinĩ wa ciana cia Isiraeli?
10. Aria na ciana cia Isiraeli ũciĩre ũũ: Mũndũ o na ũrĩkũ wanyu, kana wa njiaro cianyu, angĩkorũo e na thahu nĩ ũndũ wa kĩimba kĩa mũndũ, kana hihi akorũo nĩ gũthiĩ athiĩte rũgendo kũndũ kũraya, mũndũ ũcio o nake ndarĩ hingo atakarĩa gĩathĩ kĩu kĩa Bathaka ya Jehova.
11. Andũ ta acio nĩmakĩrĩage mũthenya wa ikũmi na ĩna wa mweri wa kerĩ o hwaĩ-inĩ gũtanatuka; nao makĩrĩage na mĩgate ĩtarĩ mĩimbie, na nyeni ndũrũ;
12. na matikanatigarie gacunjĩ o na kamwe karaare nginya rũcinĩ, kana moine ihĩndĩ o na rĩmwe rĩayo; magakĩrĩa o ta ũrĩa kĩrĩra kĩa watho wa kũrũmĩrĩrũo kĩa Bathaka gĩtariĩ.
13. No rĩrĩ, mũndũ ũrĩa ũgakorũo atarĩ na thahu, kana atathiĩte rũgendo, angĩaga kũrĩa gĩathĩ kĩu kĩa Bathaka-rĩ, mũndũ ũcio nĩakaingatwo athengio harĩ andũ ao, na acokererũo nĩ wĩhia ũcio wake nĩ ũndũ wa kwaga kũruta indo cia kũrutĩrũo Jehova, ihinda rĩacio rĩrĩa rĩtuĩtwo rĩakinya.
14. Na rĩrĩ, mũgeni angĩkorũo atũũranĩtie na inyuĩ nake atuĩke nĩekũrĩa Bathaka ya Jehova, no mũhaka amĩrĩe o ta ũrĩa kĩrĩra kĩa watho wa kũrũmĩrĩrũo kĩa Bathaka gĩtariĩ, o na ta ũrĩa mũtugo wayo ũrĩa ũtuĩtwo ũtariĩ; ũguo noguo akamĩrĩa. Mũkagĩa na kĩrĩra o ro kĩmwe kĩa watho wa kũrũmĩrĩrũo gĩa gwathaga mũgeni, o na gĩa gwathaga mũndũ ũrĩa ũciarĩirũo bũrũri wanyu.
15. Na rĩrĩ, mũthenya o ro ũcio gĩikaro gĩaakirũo-rĩ, itu rĩgĩkĩhumba gĩikaro kĩu, o kĩu kĩa hema-ya-ũira; na hwaĩ-inĩ-rĩ, rĩgĩikara igũrũ rĩa gĩikaro kĩu, rĩkonagwo rĩhaana ta mwaki o nginya rũcinĩ.
16. Ũguo nĩguo gwacokire gũikara hĩndĩ ciothe, itu rĩgakĩhumbaga, na ũtukũ rĩkonagwo rĩhaana ta mwaki.
17. Na rĩrĩ, hĩndĩ ĩrĩa yothe itu rĩu rĩeyoya na igũrũ, rĩehera hema-inĩ ĩo, ciana cia Isiraeli igakĩgwata rũgendo; na rĩrĩ, o handũ harĩa itu rĩu rĩrĩrũgama, ciana cia Isiraeli ikaamba hema ciacio ho.
18. O ta ũrĩa ciaathagwo nĩ Jehova-rĩ, ũguo noguo ciagwataga rũgendo; ningĩ o ta ũrĩa ciaathagwo nĩ Jehova, ũguo noguo ciaambaga hema ciacio; na rĩrĩ, hĩndĩ ĩrĩa yothe itu rĩu rĩaikara rĩrĩ igũrũ rĩa gĩikaro kĩu, nacio igagĩikara itekwambũra hema ciacio.
19. Na rĩrĩa itu rĩu rĩaikara rĩrĩ igũrũ rĩa gĩikaro kĩu matukũ maingĩ, ciana cia Isiraeli igatũũra, cietereire o nginya rĩrĩa igaathwo nĩ Jehova, igagĩtiga gũthiĩ rũgendo.
20. Na rĩrĩ, hĩndĩ ĩmwe na ĩmwe itu rĩu rĩaikaraga o matukũ manyinyi rĩrĩ igũrũ rĩa gĩikaro kĩu, namo matukũ macio igaikara itekwambũra hema ciacio o ta ũrĩa igwathwo nĩ Jehova, ningĩ o ta ũrĩa ciaathagwo nĩ Jehova-rĩ, ũguo noguo ciacokaga kũgwata rũgendo.
21. Ningĩ-rĩ, hĩndĩ ĩmwe na imwe itu rĩu rĩaikaraga ho o kuuma hwaĩ-inĩ nginya rũcinĩ, na rĩrĩa rĩaroka kwĩyoya na igũrũ rĩkehera, ciana cia Isiraeli ikagwata rũgendo; kana rĩngĩrũmanĩria gũikara ho ũtukũ na mũthenya, o hĩndĩ ĩrĩa rĩkeyoya na igũrũ rĩehere, noguo ikagwata rũgendo.
22. O na rĩngĩtuĩka rĩgũikara mĩthenya ĩĩrĩ, kana mweri, kana mwaka, rĩrĩ igũrũ rĩa gĩikaro kĩu rĩtũire ho-rĩ, ũguo noguo ciana cia Isiraeli ciaikaraga itekwambũra hema ciacio, na itithiĩ rũgendo; no rĩrĩ, o hĩndĩ ĩrĩa rĩeyoya na igũrũ, ikagwata rũgendo.
23. O ta ũrĩa igwathwo nĩ Jehova-rĩ, ũguo noguo ciaambaga hema ciacio; ningĩ o ta ũrĩa igwathwo nĩ Jehova noguo ciagwataga rũgendo; nacio ciaikaraga cietereire o ũrĩa irĩathwo nĩ Jehova o ta ũrĩa watho wa Jehova ũrĩa aathaga Musa watariĩ.