Go Back

Mathayo Chapter 15

• 1. THUTHA ũcio Afarisai amwe na aandĩki-marũa amwe magĩũka kũrĩ Jesu moimĩte Jerusalemu, makĩmũũria atĩrĩ,
• 2. Arutwo aku mathahagia kĩrĩra gĩa athuri nĩ ũndũ kĩ? Amu matiĩthambaga moko rĩrĩa mekũrĩa irio.
• 3. Nake akĩmacokeria akĩmera atĩrĩ, O na inyuĩ mũthahagia rĩathani rĩrĩa Ngai aathanĩte, nĩ ũndũ wa kĩrĩra kĩanyu, nĩkĩ?
• 4. Tondũ Ngai nĩoigire, Tĩa thoguo na nyũkwa: o na ningĩ akiuga ũũ: Ũrĩa wa kũnyarara ithe kana nyina, arokua!
• 5. No inyuĩ muugaga, O mũndũ ũrĩa ũngĩĩra ithe kana nyina atĩrĩ, Kĩheo kĩrĩa ũngĩateithio nakĩo nĩ niĩ nĩ kĩamũrĩre Ngai,
• 6. ũcio ndabatiĩ nĩ gũtĩa ithe. Na nĩmũrarĩtie Ũhoro wa Ngai nĩ ũndũ wa kĩrĩra kĩanyu.
• 7. Hinga ici! Isaia nĩaarathire wega ũhoro wanyu, rĩrĩa oigire,
• 8. Andũ aya mandĩaga na mĩromo, No ngoro ciao irĩ kũraya na niĩ.
• 9. No kaĩ maturagia ndu ma’hoyage tũhũ, Morutani marĩa matũire marutanaga makĩrĩ o maathani ma andũ.
• 10. Nake agĩgĩĩta kĩrĩndĩ gĩũke harĩ we agĩkĩĩra, Iguai na mũmenye:
• 11. ti kĩrĩa gĩtonyaga na kanua ka mũndũ kĩmwĩkagĩra thahu; no kĩrĩa kiumaga kanua nĩkĩo kĩmwĩkagĩra thahu.
• 12. Hĩndĩ ĩo arutwo ake magĩũka kũrĩ we makĩmũũria atĩrĩ, Nĩũũĩ atĩ Afarisai nĩmaaiguire ũũru rĩrĩa maaiguire ciugo icio?
• 13. Nowe akĩmacokeria akĩmera, O kĩndũ kĩrĩa gĩothe gĩtahandĩtwo nĩ Awa ũrĩa wĩ Igũrũ, nĩgĩkamunyũo.
• 14. Matigei: nĩo atongoria atumumu; na mũtumumu angĩtongoria mũtumumu ũngĩ, maagũa irima o erĩ.
• 15. Na Petero akĩmũcokeria akĩmwĩra, Tũtaũrĩre ngerekano ĩo.
• 16. Nake akĩmũũria atĩrĩ, Githĩ inyuĩ o na inyuĩ mũtirĩ mũramenya o na rĩu?
• 17. Kaĩ mũtoĩ atĩ kĩndũ kĩrĩa gĩothe gĩtonyaga na kanua gĩthiaga nda, gĩgateo gĩthaka-inĩ?
• 18. No maũndũ marĩa moimaga kanua, macio makoragwo moimĩte ngoro; namo nĩmo mekagĩra mũndũ thahu.
• 19. Nĩ ũndũ ngoro-inĩ nĩkuo kuumaga meciria moru, na ũũragani, na ũtharia, na ũmaraya, na ũici, na kũiganĩrĩra igenyo, na ũrumani:
• 20. namo nĩmo mekagĩra mũndũ thahu: no rĩrĩ, kũrĩa irio na moko matathambĩtio, gũtiĩkagĩra mũndũ thahu.
• 21. Nake Jesu akiuma hau, akĩĩeherera agĩthiĩ ndere cia Turo na Sidoni.
• 22. Na rĩrĩ, mũtumia Mũkanaani akiuma ndere-inĩ icio, akĩanĩrĩra akiuga atĩrĩ, Njiguĩra tha, Mwathani, wee Mũrũ wa Daudi; mwarĩ wakwa nĩanyitĩtwo nĩ ndaimono ũũru.
• 23. Nowe ndaigana kũmũcokeria o na kiugo kĩmwe. Nao arutwo ake magĩũka makĩmũthaitha, makĩmwĩra atĩrĩ, Mwĩre athiĩ, tondũ nĩarakaya agĩtũrũmagĩrĩra.
• 24. Nake agĩcokia akiuga, Ndiatũmirũo kũrĩ andũ angĩ, tiga o mbũri iria ciũrĩte cia nyũmba ya Isiraeli.
• 25. Nowe mũtumia ũcio agĩũka harĩ we akĩmũturĩria ndu, akĩmwĩra atĩrĩ, Mwathani, ndeithia.
• 26. Nake agĩcokia akiuga atĩrĩ, Ti wega kuoya mũgate wa ciana, ũgaikĩrio ngui.
• 27. Nowe mũtumia ũcio akiuga atĩrĩ, Noguo Mwathani: no rĩrĩ, o na ngui nĩirĩaga twenyũ tũrĩa tũgũaga thĩ, tuumĩte metha-inĩ ya ene cio.
• 28. Hĩndĩ ĩo Jesu akĩmũcokeria akĩmwĩra atĩrĩ, Mũtumia ũyũ, kaĩ gwĩtĩkia gwaku nĩ kũnene-ĩ: ĩkwo o ũguo ũkwenda. Nake mwarĩ akĩhonio o ro thaa ĩo.
• 29. Nake Jesu akiuma hau, agĩkinya gũkuhĩ na iria rĩrĩa rĩa Galili; akĩambata kĩrĩma-inĩ agĩikara thĩ ho.
• 30. Na kĩrĩndĩ kĩingĩ gĩgĩũka kũrĩ we, kĩrehete andũ arĩa maathuaga, na atumumu, na arĩa mataahotaga kwaria, na cionje, na angĩ aingĩ, gĩkĩmaiga magũrũ-inĩ make; nake akĩmahonia,
• 31. o nginya atĩrĩ, kĩrĩndĩ kĩona andũ mataahotaga kwaria makĩaria wega, na cionje ihonete, na ithua igĩĩtwara wega, na atumumu makĩona-rĩ, gĩgĩkĩgega, gĩkĩgooca Ngai wa Isiraeli.
• 32. Nake Jesu agĩĩta arutwo ake moke harĩ we, akĩmera atĩrĩ, Nĩngũiguĩra kĩrĩndĩ tha, nĩ ũndũ rĩu nĩgĩikarĩte na niĩ mĩthenya ĩtatũ, na gĩtirĩ na gĩa kũrĩa: na ndikwenda gũkĩĩra gĩthiĩ o ũguo kĩhũtiĩ, andũ matikae hihi kũgũa njĩra.
• 33. Nao arutwo ake makĩmũũria atĩrĩ, Tũkũruta kũ, o gũkũ werũ-inĩ, mĩgate ya kũigana ya kũhũnia kĩrĩndĩ kĩigana ũũ?
• 34. Nake Jesu akĩmoria atĩrĩ, Mũrĩ na mĩgate ĩigana? Makĩmwĩra, Nĩ mũgwanja, na tũũngũyũ tũnini tũtarĩ tũingĩ.
• 35. Nake akĩĩra kĩrĩndĩ gĩikare thĩ;
• 36. akĩoya mĩgate ĩo mũgwanja, o na tũũngũyũ; na aarĩkia gũcokia ngatho, akĩmĩenyũranga, akĩmĩnengera arutwo ake; nao arutwo makĩnengera kĩrĩndĩ.
• 37. Nao andũ othe makĩrĩa, makĩhũna: magĩcoka makĩoya cienyũ iria ciatigarire, makĩiyũria mbawa mũgwanja.
• 38. Nao andũ arĩa maarĩire maarĩ arũme ngiri inya, hatatarĩtwo andũ-a-nja na ciana.
• 39. Nake akiugĩra kĩrĩndĩ ũhoro, agĩtonya marikabu, agĩthiĩ agĩkinya hari-inĩ cia Magadani.

Home