Go Back

Mathayo Chapter 16

• 1. NA rĩrĩ, Afarisai na Asadukai magĩũka makĩmũgeria, makĩmũhoya atĩ aringe kĩama kiumĩte Igũrũ makĩone.
• 2. Nake akĩmacokeria akĩmera atĩrĩ, Gwatua gũtuka, muugaga, Kaĩ nĩgũkaara-ĩ; nĩ ũndũ igũrũ nĩ gũtune.
• 3. Ningĩ rũcinĩ muugaga, Kaĩ ũmũthĩ nĩgũgũthũka-ĩ, nĩ ũndũ igũrũ nĩ gũtune na gũgathimba. Nĩmũũĩ gũkũũrana ũrĩa igũrũ gũtariĩ; no rĩrĩ, imenyithia cia mahinda maya tũrĩ, mũtihotaga gũcikũũrana.
• 4. Rũciaro rũrũ rũaganu na rũa ũtharia rũĩtagia kĩama; na gũtirĩ kĩama rũkaringĩrũo tiga kĩama kĩrĩa kĩa Jona. Nake agĩtigana nao, agĩĩthiĩra.
• 5. Nao arutwo ake maakinya mũrĩmo ũrĩa ũngĩ, magĩkorũo mariganĩirũo nĩ gũkuua mĩgate.
• 6. Nake Jesu akĩmera atĩrĩ, Kwĩmenyerera wĩmenyererei ndawa ya kũimbia mũgate ĩrĩa ya Afarisai na Asadukai.
• 7. Nao magĩtarania makiuga atĩrĩ, Nĩ ũndũ tũtinoka na mĩgate.
• 8. Nake Jesu aamenya, akĩmoria atĩrĩ, Inyuĩ, mwĩtĩkĩtie o hanini, nĩ kĩ gĩgũtũma mũtaranie atĩ nĩ ũndũ mũtirĩ na mĩgate?
• 9. Kaĩ mũtarĩ mũrakuũka, kana mũkaririkana ũhoro wa mĩgate ĩrĩa ĩtano ya andũ ngiri ithano, na nĩ ciondo ciigana mwoire?
• 10. O na kana mĩgate ĩrĩa mũgwanja ya andũ ngiri inya, na nĩ mbawa ciigana mwoire?
• 11. Nĩ kĩ gĩkũgiria mũmenye atĩ ndikũmwaragĩria ũhoro wa mĩgate? Ĩndĩ mwĩmenyagĩrĩre ndawa ya kũimbia mũgate ĩrĩa ya Afarisai na Asadukai.
• 12. Hĩndĩ ĩo magĩkĩmenya atĩ ndaamerire memenyagĩrĩre ndawa ya kũimbia mũgate, no atĩ memenyagĩrĩre ũrutani ũrĩa wa Afarisai na Asadukai.
• 13. Na rĩrĩa Jesu aakinyire hari-inĩ cia Kaisarea-kwa-Filipu, akĩũria arutwo ake atĩrĩ, Andũ moigaga atĩ Mũrũ wa Mũndũ nũ?
• 14. Nao makiuga atĩrĩ, Amwe moigaga atĩ nĩwe Johana Mũbatithania; na amwe makoiga nĩwe Elija: na angĩ makoiga nĩwe Jeremia, kana ũmwe wa anabii.
• 15. Nake akĩmoria, Inyuĩ na inyuĩ muugaga nĩ niĩ ũ?
• 16. Nake Simoni Petero akĩmũcokeria akĩmwĩra atĩrĩ, Wee, nĩwe Kristo, Mũrũ wa Ngai ũrĩa wĩ muoyo.
• 17. Nake Jesu akĩmũcokeria akĩmwĩra, Gũkena-rĩ, nĩwe Simoni, mũrũ wa Jona: nĩ ũndũ ti mũndũ wĩ mwĩrĩ na thakame ũkũguũrĩirie ũguo, no nĩ Awa ũrĩa wĩ Igũrũ.
• 18. Na niĩ ngũkwĩra atĩrĩ, Wee nĩwe Petero, o na igũrũ rĩa ndũmba ya ihiga rĩrĩ nĩngaaka kanitha wakwa: o na ihingo cia kwa-ngoma itikaũtoria.
• 19. Nĩngakũhe ihingũro cia ũthamaki wa Igũrũ: na kĩrĩa o gĩothe ũkoha gũkũ thĩ nĩgĩkohwo Igũrũ: na kĩrĩa o gĩothe ũkohora gũkũ thĩ, nĩgĩkohorũo Igũrũ.
• 20. Hĩndĩ ĩo agĩkaania arutwo ake matikae kwĩra mũndũ o na ũmwe atĩ nĩwe Kristo.
• 21. Gwata hĩndĩ ĩo Jesu agĩitĩka kũmenyithia arutwo ake atĩ no kinya athiĩ Jerusalemu, na athĩnio na maũndũ maingĩ moru nĩ athuri, na athĩnjĩri-Ngai arĩa anene, na aandĩki-marũa, na oragwo, na mũthenya wa gatatũ nĩakariũkio.
• 22. Nake Petero akĩmũhira ndundu, agĩitĩka kũmũkaania, akĩmwĩra atĩrĩ, Ũroaga gwĩkwo ũguo, Mwathani: maũndũ macio matikanagũkore, o rĩ o rĩ.
• 23. Nake Jesu akĩĩhũgũrĩra Petero akĩmwĩra atĩrĩ, Coka na thutha wakwa, Shaitani: wee ũrĩ mũ’hĩngithia, nĩ ũndũ ndwĩciragia maũndũ marĩa ma Ngai, tiga ma andũ.
• 24. Hĩndĩ ĩo Jesu akĩĩra arutwo ake atĩrĩ, Mũndũ o wothe angĩenda kũnyuma thutha, nĩerege, oe mũtĩ wake wa kwambĩrũo, anũmagĩrĩre.
• 25. Nĩ ũndũ mũndũ ũrĩa wendaga gũtũũria muoyo wake, ũcio nĩ kũũrũo akorũo nĩguo; na ũrĩa ũkorũo nĩ muoyo wake nĩ ũndũ wakwa, ũcio nĩakaũtũũria.
• 26. Nĩ ũndũ-rĩ, mũndũ eguna na kĩ, o na angĩĩgwatĩra thĩ yothe, na orũo nĩ muoyo wake? Kana nĩ kĩ mũndũ angĩruta akũũre muoyo wake nakĩo?
• 27. Tondũ rĩrĩ, Mũrũ wa Mũndũ ndarĩ hingo atagoka e na riri wa Ithe, hamwe na araika ake; na hĩndĩ ĩo nĩagatuĩra o mũndũ o ũrĩa ũringaine na ciĩko iria aaneka.
• 28. Ngũmwĩra atĩrĩ na ma, Atĩ andũ aya marũngiĩ haha, nĩharĩ amwe ao matagacama gĩkuũ o na atĩa, mataambĩte kuona Mũrũ wa Mũndũ agĩũka e na ũthamaki wake.

Home