11. [Nĩ ũndũ-rĩ, Mũrũ wa Mũndũ okire kũhonokia kĩrĩa kĩũrĩte.]
12. Rĩu-rĩ, mũgwĩciria atĩa? Mũndũ angĩkorũo arĩ na mbũri igana, na ĩmwe yacio yũre, githĩ ndangĩtiga iria ingĩ mĩrongo kenda na kenda, athiĩ irĩma-inĩ agacarie ĩrĩa yũrĩte?
13. Na angĩmĩona-rĩ, ngũmwĩra atĩrĩ na ma, aamĩkenera kũrĩ ũrĩa angĩkenera icio ingĩ mĩrongo kenda na kenda itorĩte.
14. O ũguo nake Ithe wanyu, ũrĩa wĩ Igũrũ, ndendaga o na hanini kamwe ga twana tũu kore.
15.
Na mũrũ wa thoguo angĩkwĩhia-rĩ, thiĩ ũmuonie rĩĩhia rĩake mwĩ ndundu inyuerĩ: na angĩkũigua-rĩ, nĩmwacokanĩrĩra na mũrũ wa thoguo.
16. No rĩrĩ, angĩrega gũkũigua, thiĩ kũrĩ we mwĩ na mũndũ ũmwe, kana erĩ, nĩ getha ũhoro o wothe ũmenyeke wega nĩ ũndũ wa tũnua twa aira erĩ, kana atatũ.
17. Nake angĩrega kũigua acio, ĩra kanitha: nake angĩrega kũigua kanitha naguo, mũtue o ta mũrũrĩrĩ na ta mwĩtia mbia cia igoti.
20. Tondũ harĩa andũ erĩ kana atatũ monganĩte hamwe nĩ ũndũ wa rĩĩtwa rĩakwa, ngoragwo ndĩ o ho gatagatĩ-inĩ kao.
21.
Hĩndĩ ĩo Petero agĩũka kũrĩ we akĩmũũria atĩrĩ, Mwathani, mũrũ wa Awa angĩnjĩhia manjĩhia maigana, ngĩmuohagĩra? Nĩ maita mũgwanja?
22.
Jesu akĩmwĩra atĩrĩ, Ndigũkwĩra atĩ, No kinya maita mũgwanja; no rĩrĩ, Kaba mĩrongo mũgwanja maita mũgwanja.
23. Nĩ ũndũ ũcio ũthamaki wa Igũrũ nĩ wa kũhaananio na mũthamaki mũna ũrĩa wendaga kũheo ũhoro wa mbia ciake nĩ ngombo ciake.
24. Na aambĩrĩria kwĩrũo ũhoro ũcio, akĩreherũo ngombo ĩmwe yarĩ na thirĩ wake wa taranda
ngiri ikũmi.
25. Na tondũ nĩyaremetwo nĩ kũrĩha, mwathani wayo agĩathana atĩ yendio, yo nyene na mũtumia wayo, na ciana o na indo ciayo ciothe, nĩ getha thirĩ ũrĩhĩke.
26. Nĩ ũndũ ũcio ngombo ĩo ĩkĩĩgũithia thĩ ĩkĩmũthaitha, ĩkĩmwĩraga atĩrĩ, Mwathani, tiga gũ’thethũkĩra na nĩngakũrĩha wothe.
27. Na mwathani wa ngombo ĩo akĩringwo nĩ tha, akĩmĩohora, akĩmĩrekera thirĩ ũcio.
28. No rĩrĩ, ngombo ĩo ĩkiumagara, ĩkĩona ngombo ĩngĩ yarutaga wĩra nayo, na yarĩ na thirĩ wayo wa ciringi igana rĩmwe: nayo ĩkĩmĩkumbata, ĩkĩmĩnyita mũmero, ĩkĩmĩĩra atĩrĩ, Ndĩha thirĩ wakwa.
29. Nĩ ũndũ wa ũguo ngombo ĩo yarutaga wĩra nayo ĩkĩĩgũithia thĩ ĩkĩmĩthaitha, ĩkĩmĩĩraga, Tiga gũ’thethũkĩra na nĩngakũrĩha.