Go Back

Mathayo Chapter 21

• 1. NA rĩrĩa maakuhĩhĩirie Jerusalemu, maakinya Bethifage, o kĩrĩma-inĩ kĩa Mĩtamaiyũ-rĩ, Jesu agĩtũma arutwo erĩ, akĩmera atĩrĩ,
• 2. Thiĩi mũtonye mũciĩ ũrĩa mũringaine naguo, na kahinda o kau nĩmũkuona ndigiri yohetwo, ĩĩ na njaũ yayo: ciohorei, mũndehere.
• 3. Na mũngĩũrio ũndũ nĩ mũndũ, ugai atĩrĩ, Mwathani nĩabatairio nĩcio; na nĩegũcirekia o rĩmwe.
• 4. Na rĩrĩ, gwekĩkire ũguo nĩ getha ciugo ihingio iria ciaaririo nĩ mũnabii, rĩrĩa oigire,
• 5. Ĩrai mwarĩ wa Sayuni, Atĩrĩrĩ, Mũthamaki waku nĩaroka kũrĩ wee, Nĩ mũhoreri, na nĩahaicĩte ndigiri, Agagĩikarĩra njaũ ya ndigiri.
• 6. Nao arutwo magĩgĩthiĩ, magĩĩka o ta ũrĩa merirũo nĩ Jesu,
• 7. makĩrehe ndigiri ĩo na njaũ yayo, magĩciigĩrĩra nguo ciao, nake agĩciikarĩra.
• 8. Na andũ arĩa aingĩ a kĩrĩndĩ kĩrĩa kĩarĩ ho makĩara nguo ciao njĩra-inĩ; angĩ magĩtua mathĩgĩ mĩtĩ-inĩ, makĩmaara njĩra-inĩ.
• 9. Na kĩrĩndĩ kĩrĩa kĩamũtongoretie, na kĩrĩa kĩamuumĩte thutha, gĩkĩanĩrĩra, gĩkiuga, Hosana, Mũrũ wa Daudi: Kũrathimwo-rĩ, nĩ ũrĩa ũgũũka na rĩĩtwa rĩa Mwathani: Hosana igũrũ o igũrũ.
• 10. Nake aakinya Jerusalemu, andũ a itũũra rĩu rĩothe makiumũrũrũka makĩũranagia, Nũ ũyũ?
• 11. Nakĩo kĩrĩndĩ gĩgĩcokia atĩrĩ, Ũyũ nĩwe Jesu, mũnabii wa Nazarethi, itũũra rĩa Galili.
• 12. Nake Jesu agĩtonya hekarũ ya Ngai, akĩrutũrũra arĩa othe maatũire mathogoranagĩra kũu hekarũ, akĩng’aũrania metha cia arĩa maakũũranagia mbia, o na itĩ cia arĩa mendagia ndutura;
• 13. agĩkĩmera, Ũhoro nĩwandĩkĩtwo, Nyũmba yakwa ĩgetagwo nyũmba ya kũhoyagĩrũo: no inyuĩ nĩmũtũmĩte ĩtuĩke ngurunga ya atunyani.
• 14. Na atumumu na ithua magĩthiĩ kũrĩ we hekarũ-inĩ: nake akĩmahonia.
• 15. No rĩrĩa athĩnjĩri-Ngai arĩa anene o na aandĩki-marũa monire ciĩko cia kũgegania iria ekire, o na ciana ikĩanĩrĩra hekarũ thĩinĩ, ikiugaga, Hosana, Mũrũ wa Daudi-rĩ, makĩrakara,
• 16. makĩmũũria atĩrĩ, Kaĩ ũtekũigua ũrĩa ciana ici ikuuga? Nake Jesu akĩmera atĩrĩ, Ĩĩ-ni, nĩngũigua: na inyuĩ-rĩ, kaĩ mũtarĩ mwathoma ciugo ici, atĩ, Tũnua-inĩ twa twana na ngenge nĩwatũmire hoime rũgooco rũrĩa rũiganĩru?
• 17. Nake agĩtigana nao, akiuma itũũra rĩu agĩthiĩ Bethania, akĩraara kuo.
• 18. Na rũcinĩ, rĩrĩa aacokaga itũũra-inĩ, akĩigua ahũtiĩ.
• 19. Na ona mũkũyũ njĩra-inĩ, agĩthiĩ harĩ guo, na ndaigana kuona kĩndũ tiga o mathangũ matheri; nake akĩwĩra atĩrĩ, Maciaro maroaga gũcoka gũciarũo nĩwe nginya tene. Na kahinda o kau mũkũyũ ũcio ũgĩitĩka kũhoha.
• 20. Na rĩrĩa arutwo ake monire ũguo, makĩgega, makĩũrania, Mũkũyũ ũyũ wahoha o rĩmwe, atĩa?
• 21. Nake Jesu agĩcoka akĩmera, Ngũmwĩra atĩrĩ na ma, Mũngĩkorũo mwĩtĩkĩtie mũkaaga gũthangania-rĩ, to ũhoro ũcio wĩkĩtwo mũkũyũ mũgeka, no rĩrĩ, o na mũngĩkera kĩrĩma gĩkĩ, Ũrogũũka ũikio iria-inĩ, ũguo nĩũgekĩka.
• 22. O na maũndũ marĩa mothe mũkahoya mwĩtĩkĩtie, nĩmũkamona.
• 23. Na rĩrĩa aatonyire hekarũ thĩinĩ, athĩnjĩri-Ngai arĩa anene magĩũka kũrĩ we akĩrutana, makĩmũũria atĩrĩ, Wĩkaga maũndũ maya na wathani ũrĩkũ? Naguo wathani ũcio-rĩ, waheirũo nũ?
• 24. Nake Jesu akĩmacokeria akĩmera atĩrĩ, Na niĩ-rĩ, nĩngũmũũria kiugo kĩmwe, na mwanjokeria-rĩ, o na niĩ nĩngũcoka ndĩmwĩre wathani ũrĩa njĩkaga maũndũ maya naguo.
• 25. Atĩrĩrĩi, ũbatithania wa Johana woimire kũ? Woimire Igũrũ, kana woimire kũrĩ andũ? Nao magĩciira makĩĩrana atĩrĩ, Tũngiuga atĩ, Woimire Igũrũ, aatũũria, Akorũo nĩguo-rĩ, nĩ kĩ kĩagiririe mwĩtĩkie ũhoro wake?
• 26. No rĩrĩ, tũngiuga atĩ, Woimire kũrĩ andũ, nĩtũgwĩtigĩra kĩrĩndĩ; nĩ gũkorũo andũ othe nĩmoigaga atĩ Johana aarĩ mũnabii.
• 27. Nao magĩcokeria Jesu makiuga, Tũtiũĩ ithuĩ. Nake akĩmera, O na niĩ ndimwĩra wathani ũrĩa njĩkaga maũndũ macio naguo.
• 28. Ĩndĩ-rĩ, mũgwĩciria atĩa? Kwarĩ na mũndũ warĩ na ariũ erĩ; nake agĩthiĩ kũrĩ ũrĩa wa mbere akĩmwĩra atĩrĩ, Mũriũ, thiĩ ũkarute wĩra ũmũthĩ mũgũnda ũrĩa wa mĩthabibu.
• 29. Nake agĩcokia akĩmwĩra, Ndikwenda: no thutha wa ũguo akĩhera, agĩthiĩ.
• 30. Ningĩ ithe agĩcoka agĩthiĩ kũrĩ ũrĩa wa kerĩ, akĩmwĩra o ro ũguo. Nake agĩcokia akĩmwĩra, Nĩngũthiĩ, mũthuri: na ndathiĩ.
• 31. Acio erĩ-rĩ, nĩ ũrĩkũ wao wekire ũrĩa ithe endaga? Nao makiuga, Nĩ ũcio wa mbere. Nake Jesu akĩmera, Ngũmwĩra atĩrĩ na ma, atĩ etia mbia cia igoti na aka a maraya nĩmatonyaga ũthamaki-inĩ wa Ngai mbere yanyu.
• 32. Nĩ ũndũ Johana nĩokire kũrĩ inyuĩ na njĩra ya ũthingu, na mũtiigana kũmwĩtĩkia: no etia mbia cia igoti na aka a maraya-rĩ, acio nĩmaamwĩtĩkirie: na inyuĩ mwona ũguo-rĩ, mũtiigana gũcoka kũhera, mũmwĩtĩkie.
• 33. Ta iguai ngerekano ĩngĩ: Kwarĩ mũndũ mwene mũciĩ wahandire mũgũnda wa mĩthabibu, akĩũiriga, na akĩenja ihihĩro rĩa thabibu o kũu thĩinĩ, na agĩaka rũtara, akĩũkomborithia arĩmi agĩthiĩ bũrũri ũngĩ.
• 34. Na hingo ya kũgetha maciaro yakuhĩhĩria, akĩrekeria arĩmi acio ngombo ciake, ikaneo maciaro make.
• 35. Na arĩmi acio makĩnyita ngombo ciake, makĩhũra ĩmwe, na ĩngĩ makĩmĩũraga, o na ĩngĩ makĩmĩhũra na mahiga.
• 36. Ningĩ agĩcoka akĩrekia ngombo ingĩ nyingĩ kũrĩ icio cia mbere: nao magĩciĩka o ũguo.
• 37. Thutha wa ũguo akĩmarekeria mũriũ, akiuga, Nĩmagaconokera mũrũ wakwa.
• 38. No arĩmi acio mona mũriũ, makĩĩrana atĩrĩ, Ũyũ nĩwe ũkegaĩrũo mũgũnda. Rekei tũmũũrage, tũkegwatĩre igai rĩake.
• 39. Magĩkĩmũnyita, makĩmwagararia rũgiri rũa mũgũnda, makĩmũũraga.
• 40. Rĩu-rĩ, rĩrĩa mwathani wa mũgũnda agacoka-rĩ, agagĩĩka arĩmi acio atĩa?
• 41. Nao andũ makĩmũcokeria atĩrĩ, Nĩ kũnina akamanina ũũru, andũ acio oru, na akomborithie arĩmi angĩ mũgũnda ũcio, arĩa marĩmũneaga maciaro hĩndĩ yamo yakinya.
• 42. Nake Jesu akĩmoria atĩrĩ, Kaĩ mũtarĩ mwathoma Maandĩko-inĩ ũũ: Ihiga rĩrĩa rĩaregirũo nĩ aaki Nĩrĩo rĩtuĩkĩte o rĩrĩa inene rĩa koine: Ũndũ ũcio woimire kwĩ Mwathani, Na nĩũtũgegagia tũkĩwona?
• 43. Nĩ ũndũ ũcio ngũmwĩra atĩrĩ, Ũthamaki wa Ngai nĩũkarutwo kũrĩ inyuĩ, ũheo rũrĩrĩ rũrĩa rũgaciaraga maciaro maguo.
• 44. Na mũndũ ũrĩa ũkagũĩra ihiga rĩu nĩagathuthĩka: no ũrĩa ũkagũĩrũo nĩrĩo, rĩkamũharagania ta rũkũngũ.
• 45. Na rĩrĩa athĩnjĩri-Ngai arĩa anene na Afarisai maaiguire ngerekano ciake, makĩmenya atĩ nĩ ũhoro wao aaragia.
• 46. Na rĩrĩa maacaragia ũrĩa mangĩmũnyita, magĩĩtigĩra kĩrĩndĩ, nĩ ũndũ andũ akĩo moigaga atĩ nĩ mũnabii.

Home