Go Back

Mathayo Chapter 26

• 1. NA gũgĩkinya atĩrĩ, rĩrĩa Jesu aarĩkirie mohoro macio mothe, akĩĩra arutwo ake atĩrĩ,
• 2. Nĩmũũĩ atĩ mĩthenya ĩĩrĩ yathira gĩathĩ kĩa Bathaka nĩgĩgakinya, na Mũrũ wa Mũndũ nĩagakunyanĩrũo akaambwo mũtĩ igũrũ.
• 3. Hĩndĩ ĩo athĩnjĩri-Ngai arĩa anene na athuri a kĩrĩndĩ makĩũngana kũu nja kwa mũthĩnjĩri-Ngai ũrĩa mũnene, wetagwo Kaiafa;
• 4. magĩthiĩ ndundu nĩ getha manyitithie Jesu na wara, makamũũragithie.
• 5. No makiuga atĩrĩ, Ti hĩndĩ ya gĩathĩ, nĩ getha kĩrĩndĩ gĩtigathonje.
• 6. Na rĩrĩa Jesu aarĩ Bethania, gwa Simoni ũrĩa warĩ na mangũ,
• 7. mũtumia warĩ na cuba wa maguta me goro mũno agĩũka kũrĩ we, akĩmũitĩrĩria mũtwe o aikarĩte irio-inĩ.
• 8. No rĩrĩa arutwo monire ũguo, makĩrakara makĩũrania atĩrĩ, Ũitangi ũyũ nĩ wa kĩ?
• 9. Nĩ ũndũ maguta macio nĩmangĩahota kwendio mbia nyingĩ, iheo athĩni.
• 10. Nowe Jesu aamenya ũguo, akĩmoria atĩrĩ, Mũgũtanga mũtumia ũyũ nĩkĩ? Nĩ ũndũ nĩaanjĩka ũndũ mwega.
• 11. Nĩ gũkorũo arĩa athĩni, mũrĩ nao hingo ciothe; no niĩ-rĩ, mũtirĩ na niĩ hingo ciothe.
• 12. Nĩ ũndũ rĩrĩa aitĩrĩirie maguta macio mwĩrĩ wakwa, ekire ũũ nĩ getha a’thagathage ũrĩa ngathikwo.
• 13. Ngũmwĩra atĩrĩ na ma, Kũrĩa guothe Ũhoro-ũyũ-Mwega ũkahunjio thĩ yothe, ũguo naguo mũtumia ũyũ ekĩte nĩũkeranwo, nĩguo aririkanagwo.
• 14. Hĩndĩ ĩo ũmwe wa arĩa ikũmi na erĩ, wetagwo Judasi Mũisikariota, agĩthiĩ kũrĩ athĩnjĩri-Ngai arĩa anene,
• 15. akĩmoria atĩrĩ, Nĩ kĩ mũkũhe nĩ getha ndĩmũneane kũrĩ inyuĩ? Nao makĩmũgerera mbia cia betha mĩrongo ĩtatũ.
• 16. Na kuuma hĩndĩ ĩo nĩ gũcaria aacaragia hĩndĩ njagĩrĩru ya kũmũneana.
• 17. Na mũthenya ũrĩa wa kwambĩrĩria kũrĩa mĩgate ĩtarĩ mĩĩkĩre ndawa ya kũimbia, arutwo magĩũka kũrĩ Jesu makĩmũũria atĩrĩ, Nĩ na kũ ũkwenda tũgathondeke nĩguo ũkarĩĩre Bathaka kuo?
• 18. Nake akĩmera atĩrĩ, Tonyai itũũra, mũthiĩ kwĩ ng’ania mũkamwĩre atĩrĩ, Mũrutani ekuuga atĩrĩ, Ihinda rĩakwa nĩrĩkuhĩhĩirie: nĩndĩĩrĩĩra Bathaka nyũmba yaku hamwe na arutwo akwa.
• 19. Nao arutwo magĩĩka o ta ũrĩa Jesu aamaathire; magĩgĩthondeka Bathaka.
• 20. Na gwakinya hwaĩ-inĩ, agĩkorũo aikarĩte irio-inĩ hamwe na arutwo acio ikũmi na erĩ:
• 21. na makĩrĩa-rĩ, akĩmera, Ngũmwĩra atĩrĩ na ma, atĩ ũmwe wanyu nĩarĩngunyanĩra.
• 22. Nao makĩigua kĩeha kĩnene, na magĩitĩka kũmũũria o mũndũ atĩrĩ, Nĩ niĩ, Mwathani?
• 23. Nake agĩcokia akĩmera atĩrĩ, Ũrĩa waikanĩria guoko na niĩ thani-inĩ, nĩwe ũrĩngunyanĩra.
• 24. Mũrũ wa Mũndũ nĩegũthiĩ o ta ũrĩa ũhoro wake wandĩkĩtwo: no mũndũ ũrĩa ũgũkunyanĩra Mũrũ wa Mũndũ, kaĩ ũcio arĩ na haaro-ĩ! Wega wa mũndũ ũcio no atangĩaciarirũo.
• 25. Nake Judasi, ũrĩa wamũkunyanĩire, agĩcokia ũhoro akĩmũũria atĩrĩ, Nĩ niĩ, Rabii? Nake Jesu akĩmũcokeria, Nĩwoiga.
• 26. Na o makĩrĩaga-rĩ, Jesu akĩoya mũgate, akĩrathima, akĩwenyũranga; akĩũne arutwo akiuga, Kai, mũrĩe; ũyũ nĩguo mwĩrĩ wakwa.
• 27. Agĩcoka akĩoya gĩkombe, agĩcokeria Ngai ngatho, akĩmane, akĩmera, Nyuanĩrai inyuothe;
• 28. nĩ gũkorũo ino nĩyo thakame yakwa ya kĩrĩkanĩro ĩrĩa ĩitĩirũo andũ aingĩ, ya gũtũma mehia mohanĩrũo.
• 29. No ngũmwĩra atĩrĩ, gwata rĩu ndigacoka kũnyua ya maciaro maya ma mũthabibu, nginya mũthenya ũrĩa ngamĩnyuanĩra na inyuĩ ĩĩ njerũ ũthamaki-inĩ wa Awa.
• 30. Na maarĩkia kũina rũĩmbo makiumagara, magĩthiĩ kĩrĩma-inĩ kĩa Mĩtamaiyũ.
• 31. Hĩndĩ ĩo Jesu akĩmera atĩrĩ, Inyuothe nĩmũkũhĩngithio nĩ ũndũ wakwa ũtukũ ũyũ: nĩ gũkorũo ũhoro nĩwandĩkĩtwo atĩrĩ, Nĩngaringa mũrĩithi, nacio mbũri cia rũũru rũake ihurunjũke.
• 32. No rĩrĩ, ndarĩkia kũriũkio, nĩngamũtongoria gũthiĩ Galili
• 33. Nowe Petero agĩcokia akĩmwĩra atĩrĩ, O na othe mangĩhĩngithio nĩ ũndũ waku, ndihĩngithio niĩ.
• 34. Nake Jesu akĩmwĩra, Ngũkwĩra atĩrĩ na ma, atĩ ũtukũ o ũyũ, ngũkũ ĩtanagamba, nĩũrĩngaana gatatũ.
• 35. Nake Petero akĩmwĩra atĩrĩ, O na kũngĩtuĩka atĩ ndirĩ hingo itarĩkuanĩra nawe, niĩ ndigũkaana o na atĩa. O nao arutwo othe makiuga o ro ũguo.
• 36. Hĩndĩ ĩo Jesu agĩkinya nao handũ hetagwo Gethisemane, akĩĩra arutwo ake, Ikarai thĩ haha mũira wa ’thiĩ harĩa ngahoe.
• 37. Agĩtwara Petero na ariũ arĩa erĩ a Zebedi, agĩitĩka kũigua kĩeha, na gũtubunyĩka.
• 38. Na hĩndĩ ĩo akĩmera atĩrĩ, Ngoro yakwa nĩĩkũigua kĩeha mũno, o ta ingĩkua: ikarai haha, na mwĩhũge hamwe na niĩ.
• 39. Agĩthiathia hanini, agĩturumithia ũthiũ thĩ, akĩhoya akiuga, Awa, akorũo kwahoteka, gĩkombe gĩkĩ nĩgĩthengere; ĩndĩ ti ũrĩa ngwenda niĩ, no ũrĩa ũkwenda wee.
• 40. Agĩcoka harĩ arutwo, akĩmakora makomete, akĩũria Petero atĩrĩ, Nĩ atĩa, githĩ mũtinahota gũikara thaa ĩmwe mwĩhũgĩte hamwe na niĩ?
• 41. Wĩhũgagei na mũhoyage, mũtigakinye magerio-inĩ: ti-itherũ ngoro nĩyenda, no mwĩrĩ ndũrĩ hinya.
• 42. Agĩcoka agĩthiĩ rĩa kerĩ, akĩhoya akiuga atĩrĩ, Awa, angĩkorũo gĩkĩ gĩtingĩhota gũthenga itakĩnyuĩrĩire-rĩ, kũroekwo o ũrĩa ũkwenda.
• 43. Agĩcoka rĩngĩ, akĩmakora makomete, tondũ nĩmaahĩtĩtwo nĩ toro.
• 44. Akĩmatiga rĩngĩ, agĩthiĩ akĩhoya rĩa gatatũ, akiuga rĩngĩ ciugo o icio.
• 45. Hĩndĩ ĩo agĩcoka harĩ arutwo akĩmera atĩrĩ, Komai rĩu, mũkĩhurũke: atĩrĩrĩ, hingo nĩ nginyu, na Mũrũ wa Mũndũ nĩekũneanwo moko-inĩ ma andũ ehia.
• 46. Ũkĩrai, tũthiĩ: onei, ũrĩa ũkũngunyanĩra arĩ hakuhĩ.
• 47. Na rĩrĩ, o akĩaragia, Judasi agĩũka, ũrĩa wa arĩa ikũmi na erĩ, magĩũka na andũ gĩkundi kĩnene marĩ na hiũ na ndotono, moimĩte kũrĩ athĩnjĩri-Ngai arĩa anene, na athuri a kĩrĩndĩ.
• 48. Na rĩrĩ, ũcio wamũkunyanĩire nĩaamaheete kĩmenyithia akamera, Ũrĩa ndĩrĩmumunya, ũcio nĩwe: mũmũnyite.
• 49. Agĩthiĩ o rĩmwe kũrĩ Jesu, akĩmũũria atĩrĩ, Ũkĩrĩ mũhoro, Rabii? Akĩmũmumunya.
• 50. Nake Jesu akĩmwĩra, Mũrata wakwa, ĩka ũrĩa wakũrehe. Nao magĩũka kũrĩ Jesu makĩmũtwarĩrĩra moko makĩmũnyita.
• 51. Na rĩrĩ, mũndũ ũmwe wa arĩa maarĩ na Jesu agĩtambũrũkia guoko, agĩcomora rũhiũ rũake, agĩtema ngombo ya mũthĩnjĩri-Ngai ũrĩa mũnene, akĩmĩtinia gũtũ.
• 52. Hĩndĩ ĩo Jesu akĩmwĩra, Cokia rũhiũ rũaku handũ haruo: nĩ gũkorũo andũ arĩa othe moyaga rũhiũ nĩmakaninwo na rũhiũ.
• 53. Kana ũgwĩciria atĩ ndingĩhota kũhoya Awa, nake andũmĩre o rĩu araika aingĩ gũkĩra mbũtũ ikũmi na igĩrĩ?
• 54. No rĩrĩ, kũngĩgĩĩkwo ũguo, gwakĩhingio atĩa ũrĩa Maandĩko moigire, atĩ maũndũ maya no mũhaka makinye?
• 55. O thaa ĩo Jesu akĩũria kĩrĩndĩ kĩu atĩrĩ, Anga mũgĩũkĩte na hiũ na ndotono mũnyite, ta ndĩ mũtunyani? Ndatindaga o mũthenya hekarũ-inĩ ngĩrutanaga, na mũti’nyite.
• 56. Ĩndĩ ũũ wothe wekĩka nĩ getha maũndũ marĩa maandĩkĩtwo nĩ anabii mahingio. Hĩndĩ ĩo arutwo othe magĩkĩmũtiga makĩũra.
• 57. Nao acio maanyitĩte Jesu makĩmũtwara gwa Kaiafa, mũthĩnjĩri-Ngai ũrĩa mũnene, kũrĩa aandĩki-marũa na athuri monganĩte.
• 58. Nowe Petero akĩmũrũmĩrĩra arĩ haraya, o nginya nja ya mũthĩnjĩri-Ngai ũcio mũnene, agĩtonya, agĩikarania na makanga, amenye ũrĩa ũhoro ũrĩthira.
• 59. Na rĩrĩ, athĩnjĩri-Ngai arĩa anene na kĩama gĩothe magĩcarĩria Jesu ũira wa maheni nĩ getha mamũũragithie;
• 60. nao matiigana kuona, o na gwatuĩka nĩgwokire aira aingĩ a maheni. No thutha ũcio gũgĩũka andũ erĩ,
• 61. makiuga atĩrĩ, Mũndũ ũyũ nĩoigire ũũ, Ndahota gũtharia hekarũ ya Ngai, ndĩmĩake rĩngĩ na mĩthenya ĩtatũ.
• 62. Nake mũthĩnjĩri-Ngai ũrĩa mũnene akĩrũgama akĩmũũria atĩrĩ, Kaĩ ũtarĩ ũndũ ũgũtũcokeria? Nĩ atĩa ũhoro ũyũ andũ aya maragũthitaka naguo?
• 63. Nowe Jesu agĩkira ki. Nake mũthĩnjĩri-Ngai ũrĩa mũnene akĩmwĩra atĩrĩ, Ndakwĩhĩtithia na Ngai ũrĩa ũrĩ muoyo, nĩguo ũtwĩre kana wee nĩwe Kristo, Mũrũ wa Ngai.
• 64. Nake Jesu akĩmwĩra atĩrĩ, Wee nĩwoiga: no rĩrĩ, ngũmwĩra atĩ kuuma rĩu nĩmũkona Mũrũ wa Mũndũ aikarĩte guoko-inĩ kwa ũrĩo kwa Ũhoti, agĩũka arĩ matu-inĩ ma igũrũ.
• 65. Hĩndĩ ĩo mũthĩnjĩri-Ngai ũcio mũnene agĩtembũra nguo ciake, akiuga, Nĩaaruma Ngai: tũgũcoka kwenda aira angĩ a kĩ? Atĩrĩrĩ, rĩu nĩmwakĩĩiguĩra akĩruma Ngai:
• 66. mũgwĩciria atĩa? Nao makĩmũcokeria makiuga atĩrĩ, Nĩaagĩrĩirũo nĩ kũũragwo.
• 67. Hĩndĩ ĩo makĩmũtuĩra mata ũthiũ, na makĩmũringa na ngundi: na amwe makĩmũgũtha na hĩ
• 68. makĩmwĩraga, Ta ragũra, Kristo ũyũ, uuge nũ wakũgũtha!
• 69. Nake Petero nĩ gũikara aaikaire kũu nja; na mũirĩtu ũmwe wa wĩra akĩmũkora akĩmwĩra atĩrĩ, Wee nawe uuma hamwe na Jesu, mũndũ ũcio wa Galili.
• 70. Nake agĩkaana mbere yao othe akiuga, Ũguo ũkuuga niĩ ndiũĩ.
• 71. Na rĩrĩa aathiire kĩhingo-inĩ, mũirĩtu ũngĩ akĩmuona, akĩĩra arĩa maarĩ ho atĩrĩ, O na mũndũ ũyũ nake oima hamwe na Mũnazari ũcio Jesu.
• 72. Nake agĩkaana rĩngĩ na mwĩhĩtwa, akiuga, Mũndũ ũcio ndimũũĩ.
• 73. Na kahinda kanini gaathira, arĩa maarũngiĩ ho magĩũka makĩĩra Petero atĩrĩ, Ti-itherũ o nawe wĩ wao; nĩ ũndũ mwarĩrie waku nĩũgũkuumbũra.
• 74. Hĩndĩ ĩo agĩitĩka kwĩgirithia na kwĩhĩta, akiugaga atĩrĩ, Mũndũ ũcio ndimũũĩ. Na kahinda o kau ngũkũ ĩkĩgamba.
• 75. Nake Petero akĩririkana ũhoro ũrĩa Jesu aramwĩrire ũũ, Ngũkũ ĩtanagamba, ũrĩkorũo ũngaanĩte gatatũ. Agĩkiumagara, akĩrĩra mũno.

Home