Go Back

Mariko Chapter 7

• 1. GŨGĨTUĨKA ningĩ nĩonganĩirũo nĩ Afarisai na aandĩki-marũa amwe, moimĩte Jerusalemu,
• 2. na makona atĩ arutwo ake amwe maarĩaga irio ciao na moko mathũku, nĩguo matarĩ mathambie.
• 3. Amu Afarisai, o na Ayahudi othe, matingĩrĩa irio mataambĩte gwĩthamba moko o wega, nĩ kũigua kĩrĩra gĩa athuri:
• 4. na moima kĩng’ang’a-inĩ, matingĩrĩa mataambĩte gwĩthamba: o na kwĩ maũndũ mangĩ maingĩ marutĩte tene-inĩ mekage, mathambia ma ikombe na tũnyũngũ o na nyũngũ cia mũthemba wa gĩcango.
• 5. Nao Afarisai acio na aandĩki-marũa makĩmũũria atĩrĩ, Arutwo aku matiganĩte na kĩrĩra gĩa athuri nĩkĩ, makarĩaga irio ciao na moko mathũku?
• 6. Nake akĩmera atĩrĩ, Isaia nĩaarathire ũhoro wanyu wega ma, hinga ici, ta harĩa haandĩkĩtwo atĩrĩ, Andũ aya mandĩaga na mĩromo, No ngoro ciao ii kũraya na niĩ.
• 7. No kaĩ maturagia ndu ma’hoyage tũhũ-ĩ, Maũndũ marĩa matũire marutanaga makĩrĩ o maathani ma andũ.
• 8. Mũtiganaga na rĩathani rĩa Ngai, mũkagwatagĩrĩra kĩrĩra kĩa andũ.
• 9. Agĩcoka akĩmera, Ti-itherũ nĩ wega ma-ĩ, mũkĩrega rĩathani rĩa Ngai, nĩguo mũtũũrie kĩrĩra kĩanyu-ĩ!
• 10. Amu Musa nĩoigire atĩrĩ, Tĩa thoguo na nyũkwa; na ningĩ akiuga, Mũndũ wa kũnyarara ithe kana nyina, arokua!
• 11. No inyuĩ muugaga, Mũndũ angĩĩra ithe kana nyina atĩrĩ, Kĩheo kĩrĩa ũngĩateithio nakĩo nĩ niĩ nĩ Korubani, nĩguo ta kuuga, nĩ kĩamũrĩre Ngai, nĩatige gũcoka gwĩtio;
• 12. mũkagiria acoke gũteithia ithe kana nyina
• 13. mũgakĩagia Ũhoro wa Ngai bata na kĩrĩra kĩanyu kĩrĩa mũtiganagĩra. Na nĩmwĩkaga maũndũ maingĩ matariĩ ta ũcio.
• 14. Agĩcoka agĩĩta kĩrĩndĩ gĩthengerere harĩ we, agĩkĩĩra atĩrĩrĩ, Thikĩrĩriai inyuothe, na mũigue:
• 15. gũtirĩ kĩndũ gĩtarĩ thĩinĩ wa mũndũ, kĩngĩhota kũmũgwatia thahu gĩgĩtonya thĩinĩ wake: maũndũ marĩa moimaga thĩinĩ wa mũndũ nĩmo magwatagia mũndũ thahu.
• 16. [Akorũo mũndũ e na matũ ma kũigua, nĩakĩigue.]
• 17. Ningĩ aarĩkia gũtonya nyũmba, aatigana na kĩrĩndĩ-rĩ, arutwo ake makĩmũũria ũhoro wa ngerekano ĩo
• 18. Nake akĩmera atĩrĩ, Githĩ inyuĩ na inyuĩ nĩmwagĩte ũũgĩ ũũ? Githĩ mũtikuona atĩ kĩndũ o gĩothe gĩtonyaga thĩinĩ wa mũndũ gĩtoima thĩinĩ wake gĩtingĩhota kũmũgwatia thahu:
• 19. nĩ gũkorũo gĩtithiaga ngoro yake, no nda yake, na gĩgacoka gĩgateo gĩthaka-inĩ? Akiuga ũguo, agĩtua mĩthemba yothe ya irio mĩtheru.
• 20. Agĩcoka akiuga, Kĩrĩa kiumaga thĩinĩ wa mũndũ, nĩkĩo kĩgwatagia mũndũ thahu.
• 21. Nĩ gũkorũo nĩ thĩinĩ, nĩ ngoro-inĩ cia andũ, kuumaga meciria moru, ũmaraya,
• 22. na ũici, na ũũragani, na ũtharia, na ũcumĩkĩri, na waganu, na ũhenania, na ũũra-thoni, na rũitho, na ũrumani, na mwĩtĩo, na ũrimũ:
• 23. maũũru macio mothe moimaga na thĩinĩ, makagwatia mũndũ thahu.
• 24. Akiuma kũu, agĩthiĩ bũrũri wa Turo na Sidoni. Agĩtonya mũciĩ ũmwe, na ndendaga mũndũ amenye: akĩrema kũhithĩka.
• 25. Kahinda o kanini mũtumia, kairĩtu gake kaarĩ na ngoma thũku, aaigua aagwetwo, agĩũka akĩmũgũĩra thĩ magũrũ-inĩ.
• 26. Na rĩrĩ, mũtumia ũcio aarĩ Mũyunani, na gũciarũo aarĩ Mũfenike wa Suriata. Akĩmũthaitha atũme ndaimono ĩo yume thĩinĩ wa mwarĩ.
• 27. Nake akĩmwĩra atĩrĩ, Reka ciana ciambe ihũne arĩ cio: amu ti wega kuoya mũgate wa ciana ũgaikĩrio ngui.
• 28. Nake agĩcokia ũhoro akĩmwĩra, Noguo Mwathani: ningĩ o na ngui ii ruungu rũa metha nĩirĩaga twenyũ tũrĩa tũrekagio nĩ ciana.
• 29. Nake akĩmwĩra atĩrĩ, Tondũ wa kiugo kĩu gĩaku, wĩthiĩre: ndaimono nĩĩrĩkĩtie kuuma thĩinĩ wa mwarĩguo.
• 30. Nake akĩinũka gwake, agĩkora kaana gakomete ũrĩrĩ, nayo ndaimono ĩrĩkĩtie kuuma.
• 31. Agĩcoka akiuma kũu bũrũri wa Turo, agĩtũrĩkĩria Sidoni, agĩkinya iria rĩa Galili, atuĩkanĩtie bũrũri wa Dekapoli gatagatĩ.
• 32. Makĩmũrehere mũndũ gĩtaigua, na warogoyaga; makĩmũthaitha amũigĩrĩre guoko.
• 33. Nake akĩmwamũrania na kĩrĩndĩ akĩmũtwara keheri-inĩ, agĩtonyia ciara matũ ma mũndũ ũcio, agĩtua mata, akĩmũhutia rũrĩmĩ;
• 34. akĩrora Igũrũ, akĩhũmũka, akĩmwĩra, Efatha, ũguo nĩ-rĩ, Hingũka.
• 35. Matũ make magĩkĩhingũka, naguo mũkiha wa rũrĩmĩ rũake ũkĩregera, akĩaria o wega.
• 36. Nake akĩmakaania matikere mũndũ; nao o aakĩria kũmakaania, noguo maakĩragia kũmemerekia ũhoro ũcio o mũno.
• 37. Na nĩmaagegete mũno mũno, makoiga atĩrĩ, Nĩekĩte maũndũ mothe wega: arĩa mataiguaga nĩatũmaga maigue, nao arĩa matahotaga kwaria agatũma maarie.

Home