Go Back

Luka Chapter 8

• 1. NA gũgĩkinya atĩrĩ, ihinda inyinyi rĩathira, atĩ nĩaathiangaga, akĩhunguraga matũũra o na mĩciĩ, akahunjagia Ũhoro-ũrĩa-Mwega wa ũthamaki wa Ngai, akĩũheanaga kũrĩ andũ. Nao arĩa ikũmi na erĩ maarĩ hamwe nake,
• 2. o na andũ-a-nja amwe arĩa moimĩtwo nĩ ngoma njũru, na arĩa maahonetio mĩrimũ yao: ũmwe nĩ Mariamu ũrĩa wetagwo Mũmagidali, nĩwe ũrĩa woimirũo nĩ ndaimono mũgwanja.
• 3. Na arĩa angĩ nĩ aa Joana, mũtumia wa Husa, ũrĩa warĩ mũrori wa indo cia Herode, na Susana, na angĩ aingĩ arĩa maamũtungatagĩra na indo ciao.
• 4. Na rĩrĩ, rĩrĩa andũ aingĩ monganĩte, o na andũ moimĩte matũũra-inĩ mothe mokire harĩ we, agĩcoka akĩmagerekanĩria ũhoro akĩmera atĩrĩ:
• 5. Mũhuri nĩoimagarire, agĩthiĩ kũhura mbeũ ciake: na rĩrĩa aacihuraga, imwe ikĩgũa thĩ mũkĩra-inĩ wa njĩra; nacio ikĩrangwo na makinya ma andũ, nacio nyoni cia rĩera-inĩ igĩcirĩa.
• 6. Nacio imwe ingĩ ikĩgũa thĩ rũnyanjara-inĩ; nacio, o ciamera, ikĩhoha tondũ hatiarĩ na kĩmeru.
• 7. Nacio imwe ingĩ ikĩgũa thĩ mĩigua-inĩ, nayo mĩigua ĩgĩkũranĩra hamwe nacio, ĩgĩcithararia.
• 8. Nacio imwe ingĩ ikĩgũa thĩ tĩri-inĩ ũrĩa mũnoru, nacio igĩkũra igĩciara, o ĩmwe maita igana. Na aarĩkia kuuga maũndũ macio, akĩanĩrĩra akiuga atĩrĩ, Ũrĩa wĩ na matũ ma kũigua, nĩakĩigue.
• 9. Nao arutwo ake makĩmũũria gĩtũmi kĩa ngerekano ĩo.
• 10. Nake akĩmera atĩrĩ, Nĩ inyuĩ mwĩtĩkĩrĩtio kũmenya maũndũ marĩa ma hitho ma ũthamaki wa Ngai: no andũ arĩa angĩ marutagwo na ngerekano; nĩ getha makĩrora, maage kuona, na makĩigua, maage kũmenya.
• 11. Na rĩrĩ, ngerekano ĩo ĩtariĩ ũũ: Mbeũ icio, nĩcio Ũhoro wa Ngai.
• 12. Nao arĩa marĩ mũkĩra-inĩ wa njĩra, nĩo arĩa maiguaga Ũhoro, na hĩndĩ ĩo mũcukani agoka, akaruta Ũhoro ũcio uume ngoro-inĩ ciao, matikawĩtĩkie mahonoke.
• 13. Nao arĩa marĩ rũnyanjara-inĩ, nĩo arĩa maiguaga Ũhoro makaũgwata makenete; nao matirĩ na mĩri, no metĩkagia kahinda kanini, na hĩndĩ ya magerio makaũtirika.
• 14. Nacio mbeũ iria ciagũire mĩigua-inĩ, nĩcio arĩa maiguaga Ũhoro, na magĩthiaga-rĩ, magatharario nĩ mĩhang’o, o na ũtonga, o na mĩago ya muoyo ũyũ, na makaaga gũciara maciaro marĩa mega
• 15. Nacio iria irĩ tĩri-inĩ ũrĩa mũnoru nĩcio arĩa maiguaga Ũhoro na ngoro thingu na njega, makaũikaria ndũkore, na magaciaraga maciaro magĩkiragĩrĩria.
• 16. Na rĩrĩ, gũtirĩ mũndũ ũngĩgwatia tawa acoke aũkunĩkĩrie na nyũngũ, kana aũige ruungu rũa ũrĩrĩ; no nĩaũigaga igũrũ, o handũ haguo, nĩ getha andũ arĩa matonyaga nyũmba mone ũtheri.
• 17. Nĩ gũkorũo gũtirĩ ũndũ mũrinde ũtakonanio wega; kana ũhoro mũhithe ũtakamenyeka na uumĩrio.
• 18. Nĩ ũndũ ũcio wĩmenyagĩrĩrei ũrĩa mũiguaga: nĩ gũkorũo o mũndũ ũrĩa ũgakorũo arĩ na indo, nĩwe ũkaheo ingĩ; na ũrĩa ũgakorũo atarĩ nacio, nĩagatunyũo o na kĩrĩa ekwĩĩra arĩ nakĩo.
• 19. Nao nyina na ariũ a nyina magĩũka harĩ we, makĩremwo nĩ gũkinya hakuhĩ nake nĩ ũndũ wa kĩrĩndĩ kĩrĩa kĩarĩ ho.
• 20. Nake akĩĩrũo atĩrĩ, Nyũkwa na ariũ a nyũkwa nĩmarũgamĩte nja makĩenda kuonana nawe.
• 21. Nowe agĩcokia akĩmera atĩrĩ, Maitũ na ariũ a maitũ, nĩo andũ aya maiguaga Ũhoro wa Ngai, makawĩkaga.
• 22. Na gũgĩkinya atĩrĩ, mũthenya ũmwe wa matukũ macio nĩaahaicire marikabu we mwene, me na arutwo ake; akĩmera, Nĩtũringei mũrĩmo ũrĩa ũngĩ wa iria: magĩkĩohora marikabu magĩthiĩ.
• 23. Na magĩthiaga-rĩ, akĩhĩtwo nĩ toro: na gũgĩũka kĩhuhũkanio kĩa rũhuho o kũu iria-inĩ; nayo marikabu ĩo yarĩ hakuhĩ kũiyũra maĩ, nao maarĩ ũgwati-inĩ mũno.
• 24. Nao arutwo magĩũka harĩ we, makĩmũũkĩria makĩmwĩra atĩrĩ, Mũnene witũ Mũnene witũ, nĩtũkũũra. Nake agĩũkĩra, agĩkaania rũhuho o na maĩ macio maahũranaga, nacio cierĩ igĩtuĩka, gũgĩkĩhorera.
• 25. Nake akĩmoria atĩrĩ, Kaĩ gwĩtĩkia kwanyu kwĩ ha? Nao magĩĩtigĩra, makĩgega, makĩũrania atĩrĩ, Hĩ! Kaĩ mũndũ ũyũ akĩrĩ ũ, ũyũ wathaga rũhuho o na maĩ, nacio ikamũigua?
• 26. Magĩgĩkinya bũrũri wa Agerasi, ũrĩa ũringanĩte na Galili.
• 27. Nake oima marikabu akinyĩte thĩ, agĩtũngwo nĩ mũndũ woimĩte itũũra-inĩ, na aarĩ na ndaimono; na hĩndĩ ndaya nĩaaikarĩte ateguĩkaga nguo, na ndaatũũraga nyũmba; no gũtũũra aatũire mbĩrĩra-inĩ.
• 28. Nake ona Jesu, agĩkaya akĩĩgũithia thĩ mbere yake, akĩanĩrĩra na mũgambo mũnene akĩmũũria atĩrĩ, Twĩ na ũhoro ũrĩkũ ithuĩ nawe, Jesu, Mũrũ wa Ngai ũrĩa wĩ Igũrũ mũno? Ndagũthaitha ndũka’nyarire.
• 29. Nĩ gũkorũo nĩaathĩte ngoma ĩo thũku atĩ yume thĩinĩ wa mũndũ ũcio. Nĩ ũndũ kaingĩ nĩaagwatagwo nĩyo: na nĩaarangagĩrũo, akĩohagwo na mĩnyororo o na bĩngũ cia magũrũ; nake agatuaga igera iria ohetwo nacio, agatwarũo nĩ ndaimono ĩo mawerũ-inĩ.
• 30. Nake Jesu akĩmũũria atĩrĩ, Wĩtagwo atĩa? Nake akĩmũcokeria atĩrĩ, Njĩtagwo Legioni ; nĩ gũkorũo nĩaagwatĩtwo nĩ ndaimono nyingĩ.
• 31. Nacio igĩthaitha Jesu atĩ ndagaciathe ciume mũndũ ũcio itonye irima rĩrĩa rĩtarĩ gĩturi.
• 32. Na rĩrĩ, o kũu nĩkwarĩ rũũru rũa ngũrũe nyingĩ rũarĩithagio kĩrĩma-inĩ; nacio ndaimono ikĩmũthaitha aciĩtĩkĩrie igatonye ngũrũe icio. Nake agĩciĩtĩkĩria.
• 33. Nacio ndaimono igĩkiuma mũndũ ũcio, igĩtonya ngũrũe: naruo rũũru rũkĩharũrũka handũ haarĩ kĩgaragaro, rũkĩgũa iria-inĩ rũgĩitwo nĩ maĩ.
• 34. Nao arĩithi acio mona ũrĩa gwekirũo, makĩũra, makĩheana ũhoro ũcio itũũra-inĩ, o na mĩgũnda-inĩ.
• 35. Nao andũ magĩkiuma kwao makone ũndũ ũcio; magĩkinya harĩ Jesu, magĩkora mũndũ ũcio woimĩtwo nĩ ndaimono aikaire thĩ magũrũ-inĩ ma Jesu, eguĩkĩte nguo, na agacoka kũũhĩga: magĩgĩĩtigĩra mũno.
• 36. Na andũ arĩa monire ũhoro ũcio makĩmera ũrĩa mũndũ ũcio watũire agwatĩtwo nĩ ndaimono aahonirio.
• 37. Nao andũ othe a bũrũri wa Agerasi, na ng’ongo cia kũu, makĩmũthaitha atĩ oime kũu kwao; nĩ ũndũ nĩmaagwatĩtwo nĩ guoya mũnene: nake akĩhaica marikabu, agĩcoka na kũrĩa oimĩte.
• 38. No rĩrĩ, mũndũ ũcio woimirũo nĩ ndaimono akĩmũthaitha atĩ areke maikare nake: nowe Jesu akĩmwĩra athiĩ akiuga atĩrĩ
• 39. Inũka kwanyu mũciĩ, wĩrane maũndũ macio manene Ngai agwĩkĩte. Nake agĩĩthiĩra, akĩheana itũũra-inĩ rĩothe ũhoro wa maũndũ macio manene Jesu aamwĩkĩte.
• 40. Na rĩrĩa Jesu aacokire, kĩrĩndĩ gĩkĩmũkũngũĩra; nĩ gũkorũo andũ othe nĩmaamwetereire.
• 41. Na rĩrĩ, gũgĩũka mũndũ wetagwo Jairu ũrĩa warĩ mũnene wa thunagogi: nake akĩĩgũithia magũrũ-inĩ ma Jesu, akĩmũthaitha athiĩ gwake mũciĩ;
• 42. nĩ ũndũ aarĩ na mwarĩwe wa mũmwe, wahingĩtie ta mĩaka ikũmi na ĩĩrĩ, nake nĩaakiriĩ gũkua. Nake Jesu agĩthiĩ-rĩ, andũ nĩmaamũhatĩkaga.
• 43. Na mũtumia watũire oiraga thakame mĩaka ikũmi na ĩĩrĩ, waninĩte indo ciake ciothe akĩenda athondekwo nĩ athondekani, na ndaahotire kũhonio nĩo, o na ũmwe-rĩ,
• 44. agĩũka na thutha wake, akĩhutia ciohe cia ndigi cia nguo yake: na kahinda o kau riurĩro rĩu rĩa thakame yake rĩgĩtuma.
• 45. Nake Jesu akĩũria atĩrĩ, Nũ wa’hutia? Nao othe maakaana, Petero na arĩa maarĩ nake makĩmwĩra atĩrĩ, Mũnene witũ, kaĩ kĩrĩndĩ gĩtegũkũhatĩka, na gĩgakuhihinya?
• 46. Nowe Jesu akiuga atĩrĩ, Aca; nĩharĩ mũndũ ũmwe wa’hutia: nĩ gũkorũo nĩndaigua nyumĩtwo nĩ hinya.
• 47. Nake mũtumia ũcio ona atĩ ndangĩhithĩka, agĩũka akĩinainaga, akĩĩgũithia thĩ o hau mbere yake, akiumbũra, andũ othe marĩ ho, ũndũ ũrĩa watũma amũhutie, o na ũrĩa aahonirio kahinda o kau.
• 48. Nake Jesu akĩmwĩra atĩrĩ, Mwarĩ ũyũ, gwĩtĩkia gwaku nĩkuo gwatũma ũhone; thiĩ na ũhoro.
• 49. Na rĩrĩ, o akĩaragia, hagĩkinya mũndũ woimĩte kwa mũnene ũcio wa thunagogi, akiuga atĩrĩ, Mwarĩguo nĩarĩkĩtie gũkua; tiga gũtanga Mũrutani.
• 50. Nowe Jesu aaigua ũguo, agĩcokia ũhoro, akĩĩra mũnene ũcio, Tiga gwĩtigĩra, no wĩtĩkie, nake nĩekuhonio.
• 51. Na aakinya nyũmba, ndetĩkĩririe mũndũ atonye no hamwe nake, tiga Petero na Johana na Jakubu, o na ithe wa kairĩtu kau na nyina.
• 52. Na andũ othe nĩ kũrĩra maarĩraga, magĩĩtugutanagia. Nake akĩmera atĩrĩ, Tigai kũrĩra, nĩ ũndũ ti mũkuũ no gũkoma akomete toro.
• 53. Nao makĩmũthekerera, tondũ nĩmoĩ atĩ nĩ mũkuũ.
• 54. Nowe akĩmũnyita guoko, akĩanĩrĩra akiuga atĩrĩ, Kairĩtu gaka, ũkĩra.
• 55. Naguo roho wako ũgĩgacoka, nako gagĩũkĩra o rĩmwe; nake akiuga atĩ kaheo gĩa kũrĩa.
• 56. Nao aciari ako makĩgega mũno: nowe Jesu akĩmaatha atĩ matikere mũndũ ũndũ ũcio wĩkĩtwo.

Home