Go Back

Johana Chapter 21

• 1. THUTHA ũcio Jesu nĩeonithirie arutwo ake rĩngĩ iria-inĩ rĩa Tiberia; na ũrĩa eonithanirie nĩ ũũ:
• 2. Simoni Petero, na Toma ũrĩa wetagwo Wa-mahatha, na Nathanaeli wa na kũrĩa Kana ya Galili, na ariũ a Zebedi, o na arutwo angĩ ake erĩ, andũ acio maarĩ hamwe.
• 3. Nake Simoni Petero akĩmera atĩrĩ, Niĩ ndathiĩ gũtega ciũngũyũ. Makĩmwĩra, O na ithuĩ nĩtũgũthiĩ nawe. Magĩkiumagara magĩtonya marikabu; na ũtukũ ũcio matiigana kũgwatia kĩndũ.
• 4. Na rũcinĩ gũgĩkĩa Jesu agĩkorũo arũngiĩ rũtere-inĩ rũa iria; nao arutwo matiamenyaga nĩwe Jesu.
• 5. Nake Jesu agĩkĩmoria atĩrĩ, Ciana, mwĩ na kanyamũ ga kũrĩa? Makĩmũcokeria, Aca, tũtirĩ.
• 6. Akĩmera, Ikiai rũgara mwena wa ũrĩo wa marikabu, na nĩmũkuona. Magĩgĩikia, na hĩndĩ ĩo rũkĩrema kũgucĩka nĩ ũrĩa ciũngũyũ ciingĩhĩte.
• 7. Tondũ ũcio mũrutwo ũrĩa wendetwo nĩ Jesu akĩĩra Petero atĩrĩ, Nĩ Mwathani. Simoni Petero aakĩigua atĩ nĩ Mwathani, akĩĩoha nguo yake (tondũ aarĩ ũtheri), akĩrũũga maĩ-inĩ.
• 8. Nao arutwo arĩa angĩ magĩũka na macua ĩrĩa nyinyi (tondũ matiarĩ haraya na rũtere, no ta itĩĩna rĩa makinya igana), magĩũka makĩgucagia rũgara rũiyũire ciũngũyũ.
• 9. Maakĩrĩkia kuumĩra rũtere-inĩ, makĩona mwaki wa makara wakĩtio ho, na ciũngũyũ ii njĩkĩre riiko, o na mũgate.
• 10. Nake Jesu akĩmera, Rehei ciũngũyũ imwe icio mwanyita.
• 11. Nake Simoni Petero agĩkĩhaica macua akĩgucia rũgara akĩruumĩria rũtere rũiyũire ciũngũyũ iria nene, igana rĩa mĩrongo ĩtano na ciũngũyũ ithatũ; ningĩ o na harĩa ciarĩ nyingĩ ũũ, rũgara rũtiigana gũtuĩka.
• 12. Nake Jesu akĩmera, Ũkai mwĩgagũre. Nao arutwo gũtirĩ wetire kũmũũria, Nĩwe ũ? nĩ kũmenya nĩwe Mwathani.
• 13. Nake Jesu agĩthiĩ, akĩoya mũgate, akĩmahe, o na ciũngũyũ nacio.
• 14. Rĩu nĩrĩo rĩa gatatũ Jesu eonithirie arutwo ake, arĩkĩtie kũriũka akoima kwĩ arĩa akuũ.
• 15. Ningĩ maakĩrĩkia kwĩgagũra, Jesu akĩũria Simoni Petero atĩrĩ, Simoni wa Jona, wee-rĩ, nĩũnyendete kũrĩ aya angĩ? Akĩmwĩra, Ĩĩ-ni, Mwathani, wee nĩũũĩ nĩngwendete. Nake akĩmwĩra atĩrĩrĩ, Heaga tũgondu twakwa gĩa kũrĩa.
• 16. Akĩmũũria rĩngĩ hingo ya kerĩ, atĩrĩ, Simoni wa Jona, nĩũnyendete? Akĩmwĩra, Ĩĩ-ni, Mwathani, wee nĩũũĩ nĩngwendete. Nake akĩmwĩra atĩrĩrĩ, Rĩithagia ng’ondu ciakwa.
• 17. Agĩcoka akĩmũũria hingo ya gatatũ, atĩrĩ, Simoni wa Jona, nĩũnyendete? Nake Petero akĩigua ũũru nĩ ũndũ aamũũria hingo ya gatatũ, Nĩũnyendete? Agĩkĩmwĩra atĩrĩ, Mwathani, wee nĩũũĩ maũndũ mothe - no ũkuona atĩ nĩngwendete. Nake Jesu akĩmwĩra atĩrĩrĩ, Heaga ng’ondu ciakwa gĩa kũrĩa.
• 18. Ndakwĩra atĩrĩ, o ma, ma, Rĩrĩa warĩ mũnyinyi, nĩweohaga, ũgetwara o handũ wendaga gũthiĩ; rĩrĩa ũgakũra-rĩ, ũgatambũrũkia moko, mũndũ ũngĩ akuohe, agũtware handũ ũtangĩenda gũthiĩ.
• 19. Na rĩrĩ, oigire ũguo akĩorota gũkua kũrĩa ũcio agakua agoocithie Ngai nakuo. Na aarĩkia kuuga ũguo agĩcoka akĩmwĩra, Nũmĩrĩra.
• 20. Nake Petero, aahũgũka, akĩona mũrutwo ũrĩa wendetwo nĩ Jesu amoimĩte thutha; na nĩ ũrĩa wecokirie na thutha etiirĩte hakuhĩ na gĩthũri kĩa Jesu rĩrĩa maarĩaga irio cia hwaĩ-inĩ, akĩmũũria, Mwathani, ũcio ũgũgũkunyanĩra nũ?
• 21. Petero aamuona, agĩkĩũria Jesu atĩrĩ, Mwathani, mũndũ ũyũ nake, atĩa?
• 22. Jesu akĩmwĩra atĩrĩrĩ, Ndenda aikare mũira wa ngoka, ũcio ũkĩrĩ ũhoro waku? Wee nũmĩrĩra.
• 23. Tondũ ũcio kiugo kĩu gĩkĩhunja kũrĩ ariũ a Ithe witũ, gũkĩĩrũo atĩ mũrutwo ũcio ndagakua; ĩndĩ Jesu ndaigana kũmwĩra ndagakua, nĩ kũmwĩra aamwĩrire atĩrĩ, Ndenda aikare mũira wa ngoka-rĩ, ũcio ũkĩrĩ ũhoro waku?
• 24. Ũcio nĩwe mũrutwo ũrĩa ũheanĩte ũira wa maũndũ maya, na nowe wamaandĩkire; naguo ũira wake, ithuĩ nĩtũũĩ no wa ma.
• 25. O na kwĩ maũndũ mangĩ maingĩ Jesu ekire, namo mangĩandĩkwo ũmwe ũmwe mathire, ngwĩgereria atĩ o na thĩ yothe arĩ yo ndĩngĩiganĩra mabuku marĩa mangĩandĩkwo.

Home