Go Back
Johana Chapter 7
1 . NA thutha ũcio Jesu agĩikara o agĩceerangaga bũrũri wa Galili; amu ndangĩĩtĩkĩra gũceera Judea, nĩ gũkorũo Ayahudi nĩmendaga kũmũũraga.
2 .
Na atĩrĩrĩ, gĩathĩ kĩa Ayahudi, kĩrĩa gĩĩtagwo Gĩathĩ gĩa Gwaka Ithũnũ, gĩgĩtua gũkinya.
3 . Nao ariũ a nyina magĩkĩmwĩra atĩrĩ, Uma gũkũ ũthiĩ Judea, nĩguo arutwo aku o nao makone maũndũ maku marĩa wĩkaga.
4 . Tondũ gũtirĩ mũndũ wĩkaga ũndũ na hitho akĩendaga amenyekane we mwene. Korũo nĩwĩkaga maũndũ macio-rĩ, wĩonanie gwĩ kĩrĩndĩ.
5 . Amu-rĩ, o nao ariũ a nyina matiamwĩhokete.
6 . Nake Jesu agĩkĩmera atĩrĩ, Ihinda rĩakwa ti ikinyu; inyuĩ-rĩ, mũtirĩ ihinda rĩtamwagĩrĩire.
7 . Inyuĩ, kĩrĩndĩ gĩtingĩhota kũmũthũũra; ĩndĩ niĩ nĩgĩ’thũũrĩte, nĩ ũndũ nĩnyumbũraga ũhoro wakĩo, atĩ ciĩko ciakĩo nĩ njũru.
8 . Ambatai inyuĩ, mũthiĩ gĩathĩ; niĩ ndigũthiĩ gĩathĩ gĩkĩ rĩu; nĩ gũtuĩka hingo yakwa ndĩrĩ ĩrahinga
9 . Na aarĩkia kũmera ũguo, agĩikara o kũu Galili.
10 . No rĩrĩ, ariũ a nyina maarĩkia gũthiĩ kwambata gĩathĩ, agĩcoka akĩambata o nake, na ndaigana gũthiĩ akĩmenyagwo; aathiire ta egũthiĩ na hitho.
11 . Nao Ayahudi magĩkĩmũcaria kũu gĩathĩ-inĩ, makĩũragia, E ha?
12 . Na nĩkwang’ung’uanagwo mũno kĩrĩndĩ-inĩ nĩ ũndũ wake; andũ amwe makoiga, Nĩ mũndũ mwega; angĩ makoiga, Aca, tiguo, nĩ kũhĩtithia ekũhĩutithia kĩrĩndĩ.
13 . No gũtirĩ mũndũ waaragia ũhoro wake caũ, nĩ gwĩtigĩra Ayahudi.
14 . No rĩrĩ, gwakinya hingo ya gĩathĩ gatagatĩ, Jesu akĩambata agĩkinya hekarũ-inĩ, akĩgwata kũrutana.
15 . Nao Ayahudi magĩkĩgega, makĩũria atĩrĩ, Mũndũ ũyũ amenyeire marũa kũ, atakĩrĩ aarutwo?
16 . Nake Jesu agĩkĩmacokeria, akiuga atĩrĩrĩ, Ũhoro ũrĩa ndutanaga ti wakwa; nĩ wa ũrĩa wandekirie.
17 . Mũndũ enda gwĩkaga ũrĩa ũcio endaga, nĩarĩmenya ũhoro, kana nĩ wa Ngai, kana njaragia wa ngoro yakwa mwene.
18 . Ũrĩa waragia ũhoro wa ngoro yake mwene endete o egoocithie we mwene; ĩndĩ ũrĩa wendete kũgoocithia ũrĩa wamũrekirie, ũcio nĩ wa ma, na ndarĩ na wogomo ngoro-inĩ yake.
19 . Githĩ Musa ndaamũheire watho, na inyuĩ gũtirĩ ũiguaga watho ũcio? Mũkwenda kũnjũraga nĩ ũndũ kĩ?
20 . Nakĩo kĩrĩndĩ gĩgĩcokia atĩrĩ, Wĩ na ndaimono! nũ ũkwenda gũkũũraga?
21 . Nake Jesu agĩcokia akĩmera atĩrĩrĩ, Ndekire ũndũ ũmwe, na inyuothe mũgakĩgega.
22 .
Rĩu-rĩ, Musa aamũheire kĩrĩra kĩa irua (na ti atĩ rĩoimanire na Musa; rĩoimanire na athuri arĩa a mbere); na inyuĩ nĩmũruithagia mũndũ mũthenya wa thabatũ.
23 .
Akorũo mũndũ nĩaruithagio mũthenya wa thabatũ, nĩ getha watho wa Musa ndũkae kwĩhio-rĩ, kaĩ niĩ mũndakarĩire nĩ ũndũ ndatũmire mũndũ ahone guothe mũthenya wa thabatũ?
24 . Tigagai gũtua cira na mĩhaanĩre; tuagai ituĩro rĩa kĩhooto.
25 . Tondũ ũcio andũ amwe a kũu Jerusalemu makiuga atĩrĩ, Ũyũ githĩ tiwe mekwenda kũũraga?
26 . Na no ekwaria hatarĩ hitho, na matigũkĩmũũria. Nĩkũngĩgĩkorũo hihi anene nĩmarĩkĩtie kũmenya atĩ ũyũ nowe Kristo?
27 . No kaĩ mũndũ ũyũ nĩtũũĩ kũrĩa oimire; ĩndĩ Kristo-rĩ, rĩrĩa agoka, gũtirĩ mũndũ ũgakorũo oĩ kũrĩa oimĩte.
28 . Tondũ ũcio, Jesu akĩanĩrĩra e kũu hekarũ-inĩ akĩrutana, akiuga atĩrĩ, Nĩmũnjũĩ, o na kũrĩa ndoimire nakuo nĩmũũĩ; na ndiũkĩte ndĩĩtũmĩte, ĩndĩ-rĩ, ũrĩa wandekirie nĩ wa ma, na ũcio mũtimũũĩ.
29 . Niĩ nĩndĩmũũĩ; amu rĩ, nyumĩte kũrĩ we, na nĩwe wandekirie.
30 . Tondũ ũcio magĩkiuga mamũnyite; na gũtirĩ mũndũ wamũtwarĩrĩire guoko, nĩ ũndũ ihinda rĩake rĩtiarĩ ikinyu.
31 . No rĩrĩ, kĩrĩndĩ-inĩ kĩu andũ aingĩ makĩgwata kũmwĩhoka, na acio moigire atĩrĩ, Rĩrĩa Kristo agoka rĩ, anga nĩageka ciama nyingĩ gũkĩra iria mũndũ ũyũ ekĩte?
32 . Nao Afarisai nĩmaaiguire kĩrĩndĩ gĩkĩng’ung’uanĩra ũhoro wake ũguo, nao athĩnjĩri Ngai arĩa anene, na Afarisai, makĩrekia makanga makamũnyite.
33 . Hĩndĩ ĩo Jesu agĩkiuga atĩrĩrĩ, Ndigairie ihinda inyinyi rĩa gũikara na inyuĩ, njoke thiĩ kwĩ ũrĩa wandekirie.
34 . Mũkanjaria, mũnjage; na kũu ndĩ, mũtingĩhota gũkinya.
35 . Nao Ayahudi magĩkĩũrania atĩrĩ, Nĩ na kũ mũndũ ũyũ agathiĩ atĩ tũmwage? Anga agathiĩ kwĩ arĩa matũire manyaganĩire kwa Ayunani, akarute Ayunani ũhoro?
36 . Nĩ atĩa kiugo kĩu oiga, atĩ, Mũkanjaria, mũnjage; na kũu ndĩ, mũtingĩhota gũkinya?
37 .
Na rĩrĩ, mũthenya wa kũrĩkĩrĩria, nĩguo mũthenya ũrĩa mũnene wa gĩathĩ kĩu, Jesu nĩaarũgamire, akĩanĩrĩra, akiuga atĩrĩrĩ, Mũndũ ũnyotiĩ-rĩ, nĩoke kũrĩ niĩ, anyue.
38 . Ũrĩa wĩĩ’hokete niĩ, nda-inĩ yake nĩkũriumaga njũĩ cia maĩ me muoyo, o ta ũrĩa Maandĩko moigĩte.
39 . Na oiga ũguo, nĩ Roho aagwetaga, ũrĩa acio mamwĩhokete makaheo; nĩ gũkorũo Roho hĩndĩ ĩo ndaakinyĩte kũrutwo, tondũ Jesu ndaakinyĩte kũgoocithio.
40 . Andũ amwe, maaigua ũhoro ũcio, magĩkiuga atĩrĩ, Ti-itherũ ũyũ nowe mũnabii ũrĩa.
41 . Angĩ makiuga, Ũyũ nĩwe Kristo. Angĩ nao makiuga atĩrĩ, Atĩ atĩa, kaĩ Kristo akĩrĩ wa kuuma Galili?
42 .
Githĩ Maandĩko matiugĩte atĩ Kristo agoka arĩ wa rũciaro rũa Daudi, na oime Bethilehemu, mũciĩ ũrĩa Daudi aatũire?
43 . Kĩrĩndĩ gĩgĩkĩamũkana nĩ ũndũ wake.
44 . Na amwe nĩmendaga kũmũnyita; no gũtirĩ mũndũ wakĩmũtwarĩrĩire moko.
45 . Tondũ wa ũguo rĩ, makanga magĩcoka kũrĩ athĩnjĩri Ngai arĩa anene na Afarisai; nao makĩmoria, Mwagire kũmũrehe nĩkĩ?
46 . Makanga magĩcokia atĩrĩ, Gũtirĩ mũndũ ũrĩ aaria ta ũcio.
47 . Afarisai magĩkĩmacokeria atĩrĩ, Inyuĩ na inyuĩ anga mũrĩ kũhĩtithio?
48 . Anene-rĩ, gũkĩrĩ wĩhokete ũhoro wake, kana Afarisai?
49 . Kĩrĩndĩ kĩu gĩtoĩ watho nĩ kĩgwate nĩ kĩrumi!
50 .
Nake Nikodemo (ũrĩa wathiĩte kũrĩ we rĩrĩa rĩngĩ, na aarĩ wao), akĩmoria atĩrĩ,
51 . Watho witũ githĩ nĩũtũmaga mũndũ atuĩrũo cira, ataambĩte kũiguwo we mwene, akamenyeka ũrĩa ekaga?
52 . Magĩcokia makĩmwĩra, O nawe anga ũrĩ wa Galili? Tuĩria, wone Galili gũtiumaga mũnabii. [
53 . Makĩinũka, mũndũ gwake, mũndũ gwake.
Home