Go Back

Atũmwo Chapter 10

• 1. RĨU-RĨ, kũrĩa Kaisarea nĩkwarĩ mũndũ wetagwo Korinelio, waathaga athigari igana a mbũtũ ĩrĩa yetagwo Mbũtũ ya Italia.
• 2. Mũndũ ũcio nĩeamũrĩire Ngai akamwĩtigagĩra marĩ hamwe na andũ ake othe, akaheanaga indo nyingĩ agĩtugaga andũ, na akahoyaga Ngai hingo ciothe.
• 3. Na rĩrĩ, mũthenya ũmwe ta thaa kenda akiumĩrĩrũo nĩ mũraika wa Ngai akĩmuona o wega agĩũka harĩ we, akamwĩra atĩrĩ, Korinelio.
• 4. Nake Korinelio akĩmũcũthĩrĩria amakĩte, akĩmũũria atĩrĩ, Nĩ atĩa, Mwathani? Nake akĩmwĩra atĩrĩ, Mahoya marĩa ũtũire ũhoyaga, o na ũheani ũrĩa ũtũire ũheanaga indo naguo, nĩ gũkinya ikinyĩte Igũrũ igatũma ũririkanwo nĩ Ngai.
• 5. Na rĩu rĩ, tũma andũ Jopa, mathiĩ magĩre mũndũ wĩtagwo Simoni, ũrĩa wĩtagwo rĩĩtwa rĩngĩ Petero
• 6. nake nĩ mũgeni ũikaraga kwa mũndũ wĩtagwo Simoni wĩ mũtanduki wa njũa, nayo nyũmba yake ĩĩ rũhari-inĩ rũa iria rĩrĩa inene.
• 7. Nake mũraika ũcio wamwarĩirie aarĩkia gũthiĩ-rĩ, agĩcoka agĩĩta ndungata ciake igĩrĩ, na mũthigari ũmwe weamũrĩire Ngai, athurĩtwo kũrĩ andũ arĩa maaikaraga nake hingo ciothe;
• 8. na aarĩkia kũmera ũhoro ũcio wothe, akĩmarekia Jopa.
• 9. Na mũthenya ũyũ ũngĩ-rĩ, hĩndĩ ĩrĩa maarĩ njĩra magakuhĩhĩria itũũra rĩu, Petero akĩhaica nyũmba igũrũ ahoe Ngai, hĩndĩ ta mĩaraho:
• 10. akĩigua ahũtiĩ akenda kũrĩa irio: no rĩrĩa irio ciathondekagwo-rĩ, agĩkorũo aringĩtwo nĩ iringi,
• 11. agĩcoka akĩona Igũrũ rĩhingũkĩte, agĩkĩona kĩnyamũ gĩtariĩ ta gĩtama kĩnene gĩgũikũrũkio kĩnyitĩtwo mĩthia ĩna, gĩgĩkinya o thĩ:
• 12. nakĩo gĩgĩkorũo kĩĩ na nyamũ cia mĩthemba yothe thĩinĩ wakĩo, iria cia magũrũ mana, o na iria itambaga thĩ, o na iria ciũmbũkaga na igũrũ.
• 13. Hagĩcoka hagĩũka mũgambo ũkĩmwĩra atĩrĩ, Petero, ũkĩra, ũthĩnje ũrĩe.
• 14. Nowe Petero akiuga atĩrĩ, Aca, ti ũguo Mwathani: nĩ gũkorũo ndirĩ ndarĩa kĩndũ gĩtarĩ kĩamũre o na kana kĩĩ mũgiro.
• 15. Naguo mũgambo ũkĩmwarĩria hĩndĩ ya kerĩ, ũkĩmwĩra atĩrĩ, Kĩndũ kĩrĩa Ngai atheretie, wee tiga gũgĩtua atĩ ti kĩamũre.
• 16. Naguo ũndũ ũcio ũgĩĩkwo gatatũ, na hĩndĩ o ĩo kĩnyamũ kĩu gĩkĩoyũo, gĩgĩcokio Igũrũ.
• 17. Na rĩrĩa Petero aakorirũo arigĩtwo mũno nĩ gĩtũmi gĩa kĩoneki kĩu onete, rĩu rĩ, andũ arĩa marareketio nĩ Korinelio, maarĩkia kũũria nyũmba ya Simoni, makĩrũgama kĩhingo-inĩ,
• 18. magĩĩtana, makĩũria kana Simoni ũrĩa wĩtagwo Petero nĩaaikaire kuo e mũgeni.
• 19. Na rĩrĩa Petero eciragia ũhoro wa kĩoneki kĩu, akĩĩrũo nĩ Roho, Atĩrĩ, harĩ na andũ atatũ megũkũũria.
• 20. No ũũkĩre, ũikũrũke mũthiĩ nao, ũtarĩ na mathangania: nĩ gũkorũo nĩ niĩ ndĩmatũmĩte.
• 21. Nake Petero agĩikũrũka harĩ andũ acio, akĩmera atĩrĩ, Mũndũ ũrĩa mũracaria nĩ niĩ: ũndũ ũrĩa watũma mũũke nĩ ũrĩkũ?
• 22. Nao makiuga atĩrĩ, Korinelio, mũndũ wathaga athigari igana, ũrĩa wĩ mũthingu agetigagĩra Ngai, na agekagĩrĩrũo nĩ rũrĩrĩ ruothe rũa Ayahudi-rĩ, we nĩarataarirũo nĩ mũraika mũtheru atĩ atũmane agwĩte ũthiĩ gwake mũciĩ, akaigue ũhoro ũrĩa ũkũmwĩra.
• 23. Nĩ ũndũ ũcio akĩmera matonye nyũmba, akĩmagwata ũgeni. Na mũthĩ ũyũ ũngĩ akĩroka gũũkĩra, agĩthiĩ nao, na ariũ a Ithe witũ amwe a Jopa magĩthiĩ nake.
• 24. Naguo mũthenya wa kerĩ magĩtonya Kaisarea. Nake Korinelio nĩ kũmeterera aametereire, arĩkĩtie kũũngania andũ a nyũmba yao, o na arĩa maarĩ ũrata nake mũno.
• 25. Nake Petero aakorũo agĩtonya harĩa aarĩ, Korinelio akĩmũtũnga, akĩĩgũithia thĩ magũrũ-inĩ make, akĩmũgooca.
• 26. Nowe Petero akĩmũũkĩria akĩmwĩra atĩrĩ, Ta rũgama; niĩ ndĩ o mũndũ tawe.
• 27. Na makĩaranagĩria, agĩtonya nyũmba, agĩkora andũ aingĩ monganĩte.
• 28. Agĩkĩmera atĩrĩ, Inyuĩ inyuene nĩmũũĩ nĩ watho atĩ mũndũ Mũyahudi ndakanegwatanie na mũndũ wa rũrĩrĩ rũngĩ, o na kana akinye gwake: no niĩ-rĩ, nĩnyonetio nĩ Ngai atĩ ndikae gũtua mũndũ o na ũrĩkũ mũndũ ũtarĩ mwamũre o na kana wĩ mũgiro.
• 29. Ũndũ ũcio nĩguo ũratũmire njũke itegũkararania rĩrĩa ndĩretirũo. Nĩkĩo ngũmũũria atĩ nĩ ũhoro ũrĩkũ ũtũmĩte mũnjĩte?
• 30. Nake Korinelio akiuga atĩrĩ, Rĩu nĩ mũthenya wa kana kuuma rĩrĩa ndarĩ nyũmba yakwa ngĩhoya Ngai mahoya ma thaa kenda, o ta rĩu; na atĩrĩrĩ, ngiumĩrĩrũo nĩ mũndũ wĩhumbĩte nguo ikengete mũno,
• 31. akĩnjĩra atĩrĩ, Korinelio, kũhoya kũrĩa ũtũire ũhoyaga nĩkũiguĩtwo, nacio indo iria ũheanaga cia gũtugana nĩitũmĩte ũririkanwo nĩ Ngai.
• 32. Tondũ wa ũguo rekania Jopa, wĩte Simoni ũrĩa wĩtagwo Petero, nake nĩ mũgeni kwa Simoni, mũndũ mũtanduki wa njũa ũikaraga rũhari-inĩ rũa iria rĩrĩa inene.
• 33. Ngĩkĩrekania o rĩmwe kũrĩ wee; na rĩu nĩweka wega woka. Rĩu-rĩ, ithuĩ othe tũkĩrĩ haha mbere ya Ngai, nĩ getha tũigue maũndũ marĩa mothe wathĩtwo nĩ Mwathani.
• 34. Nake Petero agĩitĩka kwaria akiuga atĩrĩ, Ti-itherũ ndĩ kuona atĩ Ngai ndatĩagĩra andũ maũthĩ:
• 35. no thĩinĩ wa ndũrĩrĩ ciothe mũndũ ũrĩa ũmwĩtigagĩra na ageka maũndũ ma ũthingu nĩetĩkagĩrũo nĩwe.
• 36. Atĩrĩrĩ, ũhoro ũrĩa aarekeirie ciana cia Isiraeli, o ũrĩa wa kũhunjanĩria ndeto njega cia thayũ ũrĩa wonekaga na Jesu Kristo, (nake nĩwe Mwathani wa guothe) -
• 37. ũhoro ũcio-rĩ, inyuĩ nĩmũũũĩ, naguo nĩguo wahunjanĩirio Judea guothe wambĩrĩirio o Galili, thutha wa rĩrĩa Johana aaheanire ũhoro wa atĩ andũ mabatithio.
• 38. Naguo nĩ wa Jesu wa Nazarethi, ũrĩa Ngai aamũitĩrĩirie Roho Mũtheru o na hinya; nake agĩcanga agĩĩkaga maũndũ mega, na akĩhonagia andũ arĩa othe maatũire manyariragwo nĩ mũcukani: nĩ gũkorũo Ngai aarĩ hamwe nake.
• 39. Na ithuĩ-rĩ, tũrĩ aira a maũndũ macio mothe ekire kũu bũrũri wa Ayahudi, o na Jerusalemu. Nake nĩoragirũo nĩ andũ na kũmũcuuria mũtĩ igũrũ.
• 40. Nĩwe Ngai aariũkirie mũthenya wa gatatũ, agĩĩtĩkĩra atĩ acoke kuoneka-
• 41. no ti kuonwo nĩ andũ othe, tiga o aira arĩa maathurirũo o mbere nĩ Ngai, nao nĩo ithuĩ, o ithuĩ arĩa twarĩaga na tũkanyuaga hamwe nake, aarĩkia kũriũka akoima kũrĩ arĩa akuũ.
• 42. Na gũtwatha nĩaatwathire atĩ tũhunjagĩrie andũ, na tuumbũrage atĩ we nĩwe watuirũo nĩ Ngai Mũtui-cira wa andũ arĩa marĩ muoyo na wa arĩa makuĩte.
• 43. Nao anabii othe nĩwe maheanagĩra ũira, makoimbũra atĩ mũndũ wa rĩĩtwa rĩake mũndũ o wothe ũrĩa ũgakorũo amwĩhokete nĩakoherũo mehia make.
• 44. Na rĩrĩ, Petero akĩaragia ciugo icio, Roho Mũtheru agĩikũrũkĩrĩra andũ othe arĩa maaiguaga ũhoro.
• 45. Nao andũ arĩa etĩkia a thiritũ ya arĩa maruaga, o acio mokĩte na Petero, makĩgega mũno tondũ atĩ Roho Mũtheru nĩaheanagwo agaitĩrĩrio andũ a Ndũrĩrĩ o nao.
• 46. Nĩ gũkorũo nĩmaamaiguire magĩthioma thiomi na magĩkumagia Ngai. Hĩndĩ ĩo Petero agĩcoka akiuga atĩrĩ,
• 47. Kaĩ gũkĩrĩ mũndũ ũngĩhota kũgiria maĩ, nĩguo atĩ andũ aya maheetwo Roho Mũtheru o ta ithuĩ matikabatithio?
• 48. Agĩgĩathana atĩ mabatithio thĩinĩ wa rĩĩtwa rĩa Jesu Kristo. Nao magĩcoka makĩmũringĩrĩria atĩ aikarange nao matukũ mamwe.

Home