1. NA kũu Ikonio gũgĩkinya atĩrĩ, atĩ magĩtonya thunagogi ya Ayahudi marĩ hamwe, na tondũ wa kwaria kũrĩa maaririe, kĩrĩndĩ kĩingĩ kĩa Ayahudi o na Ayunani gĩgĩĩtĩkia.
2. No Ayahudi arĩa maaregete gwĩtĩkia makĩhatĩrĩria andũ arĩa a Ndũrĩrĩ magĩthũkia ngoro ciao, nĩguo mathũũre andũ a thiritũ ya ariũ a Ithe witũ.
3. No rĩrĩ, nĩ hĩndĩ ndaya Paulo na Baranaba maaikarire kuo, makaaragia na ũcamba mehokete Mwathani, nake agĩtuĩka mũira wa Ũhoro wa Wega wake nĩ gwĩtĩkĩra atĩ ciama iringagwo o na morirũ mekagwo nĩo.
4. Nakĩo kĩrĩndĩ gĩothe gĩa itũũra gĩgĩatũkana, na andũ amwe magĩtuĩka a mbarĩ ya Ayahudi, na arĩa angĩ magĩtuĩka a mbarĩ ya atũmwo.
5. Na rĩrĩa andũ arĩa a Ndũrĩrĩ o na Ayahudi, marĩ hamwe na anene ao, mendete kũmaguthũkĩra mameke maũndũ ma kũmaconorithia, na mamahũre na mahiga nyuguto,
6. magĩkĩmenya, makĩũrĩra matũũra ma bũrũri wa Lukaonia, nĩmo metagwo Lusitera na Deribe, o na ng’ongo ciakuo:
7. kũu nakuo makĩhunjia Ũhoro-ũrĩa-Mwega.
8. Nakuo kũu Lusitera nĩgwaikarĩte mũndũ ũtaahotaga gwĩtwara na magũrũ, na aatũire e gĩthua o kuuma aaciarũo, na ndarĩ etwara o na rĩ.
9. Mũndũ ũcio nĩaaiguire Paulo akĩaria: nake Paulo akĩmũkũũrĩra maitho, na ona atĩ nĩaiganĩtie wĩtĩkio wa gũtũma ahonio,
10. akĩmwĩra na mũgambo mũnene atĩrĩ, Ta rũgama wĩtiire na magũrũ maku. Nake akĩguthũka agĩũkĩra agĩĩtwara.
11. Nao andũ arĩa monganĩte mona ũrĩa Paulo eka, makĩanĩrĩra, makiuga na rũthiomi rũa Lukaonia atĩrĩ, Anga nĩ ngai itũikũrũkĩire ihaana ta andũ.
13. Nake mũthĩnjĩri-ngai ĩo ĩĩtagwo Zeu, yarĩ na hekarũ yayo thome-inĩ wa itũũra, akĩrehe o hau kĩhingo-inĩ ndegwa cia gũthĩnjwo na mahũa matumĩtwo ta thũmbĩ, akĩenda kũruta magongona marĩ hamwe na kĩrĩndĩ.
14. No rĩrĩa atũmwo acio Paulo na Baranaba maaiguire ũhoro ũcio, magĩtembũra nguo ciao, makĩhanyũka na ihenya harĩ andũ acio monganĩte, makĩanagĩrĩra atĩrĩ,
15.
Athuri aya, mũgwĩka maũndũ maya nĩkĩ? Ithuĩ na ithuĩ tũkĩrĩ o andũ, na tũhaanaine na inyuĩ maũndũ-inĩ mothe, na nĩ kũrehe twamũrehere ndũmĩrĩri njega, atĩ mũtigane na maũndũ macio matarĩ bata, mũgarũrũkĩre Ngai ũrĩa ũrĩ muoyo, o we wombire igũrũ na thĩ, o na iria rĩrĩa inene, o na indo ciothe iria irĩ kuo.
16. Nake nĩaatiganĩirie ndũrĩrĩ ciothe ithiage na mĩthiĩre yacio nyene mahinda marĩa ma njiarũa iria ithirĩte.
17. Ĩndĩ ndakĩigana gwĩtiga atarĩ na ũira wa kũmuumbũra atĩ arĩ ho, nĩ ũndũ wa ũrĩa aatuganaga, akamuuragĩria mbura yumĩte igũrũ na akamũrehagĩre imera cia gũciaraga irio, nĩguo mũhũnio wega, na ngoro cianyu ciiyũrũo nĩ gĩkeno.
18. Na rĩrĩ, o na maaririe ciugo icio-rĩ, maatigairie hanini mũno maremwo nĩ kũgiria kĩrĩndĩ kĩu kĩmarutĩre igongona.
19. No rĩrĩ, gũgĩũka kũu Ayahudi moimĩte Antiokia na Ikonio; na makĩhatĩrĩria andũ a kĩrĩndĩ, magĩtũma mahũre Paulo na mahiga, makĩmũkururia makĩmuumia na nja ya itũũra, megereirie atĩ nĩ mũkuũ.
20. No rĩrĩa arutwo maarũngiĩ mamũrigicĩirie, akĩarahũka, agĩtonya itũũra: na mũthenya ũyũ ũngĩ makĩroka gũthiĩ na Baranaba magĩkinya Deribe.
21. Na maarĩkia kũhunjĩria andũ a itũũra rĩu Ũhoro-ũrĩa-Mwega, magĩtũma andũ aingĩ matuĩke arutwo-rĩ, magĩcokera Lusitera na Ikonio o na Antiokia,
22. makĩũmagĩrĩria arutwo ngoro, makĩmataaraga atĩ marũmagie wega morutani marĩa ma Wĩtĩkio, makĩmaririkania atĩ ũthamaki wa Ngai ndũngĩtonyeka nĩ ithuĩ tiga o twambire kuona mathĩna maingĩ.
23. Na maarĩkia kũmathurĩra andũ a gũtuĩka athuri makanitha-inĩ mothe, na kũhoya Ngai makĩĩgiragia kũrĩa irio, makĩmatigĩra Mwathani o we mehokete.
24. Magĩcoka magĩtuĩkanĩria bũrũri wa Pisidia, magĩkinya Pamfulia.
25. Na maarĩkia kũheana Ũhoro wa Ngai kũu Periga, magĩtherera magĩkinya Atalia;
26. makiuma kuo, magĩcoka Antiokia mahaicĩte marikabu. Kũu nĩkuo moimĩte, maarĩkia kũhoerũo Ngai atĩ maheo Wega wake wa kũmahotithia kũruta wĩra o ro ũcio rĩu maarĩkĩtie.
27. Na maakinya kuo, makĩũngania andũ a kanitha, makĩmahe ũhoro wa maũndũ marĩa mothe Ngai ekĩte hamwe nao, o na ũrĩa aahingũrĩire andũ a Ndũrĩrĩ mũrango nĩguo maũtonyere, na matuĩke a gwĩtĩkia.
28. Magĩgĩikara kuo hamwe na arutwo ihinda irayaraya.