Go Back

Atũmwo Chapter 16

• 1. AGĨCOKA agĩkinya Deribe na Lusitera: na atĩrĩrĩ, kũu Lusitera nĩkwarĩ mũrutwo wetagwo Timotheo, mũrũ wa mũtumia Mũyahudi wetĩkĩtie Ngai: nowe ithe aarĩ Mũyunani.
• 2. Nake mũndũ ũcio aarĩ na ngumo njega kwĩ ariũ a Ithe witũ arĩa a Lusitera na Ikonio.
• 3. Na nĩwe Paulo endaga mathiĩ nake; agĩkĩmuoya, akĩmũruithia nĩ ũndũ wa Ayahudi arĩa maatũire ndwere icio: nĩ gũkorũo othe nĩmaamenyete atĩ ithe aarĩ Mũyunani.
• 4. Na rĩrĩa maathiangaga matũũra-inĩ kũndũ o kũndũ, makĩmenyithia andũ akuo matuĩro marĩa maatuĩtwo nĩ atũmwo o na athuri kũu Jerusalemu, nĩ getha matũũre mamarũmagia.
• 5. Ũguo noguo makanitha makĩgĩa na hinya ũhoro-inĩ wa gwĩtĩkia, magĩikara makĩongererekaga andũ o mũthenya o mũthenya.
• 6. Nao aa Paulo magĩtuĩkanĩria bũrũri wa Ferugia na Galatia, nĩ gũkorũo nĩmaakaanĩtio nĩ Roho Mũtheru atĩ matikae kũheana Ũhoro wa Ngai kũrĩa Asia:
• 7. na maarĩkia gũkuhĩhĩria Musia, makĩgeria gũthiĩ na mbere matonye Bithunia; ĩndĩ Roho wa Jesu ndaigana kumetĩkĩria;
• 8. magĩkĩhĩtũka Musia, magĩtherera magĩkinya Teroa.
• 9. Nake Paulo akĩona kĩoneki ũtukũ, agĩkĩona mũndũ wa Makedonia arũgamĩte, akamũthaitha akĩmwĩraga atĩrĩ, Ringa ũũke gũkũ Makedonia, ũtũteithie.
• 10. Na aarĩkia kuona kĩoneki kĩu, tũgĩitĩka o rĩmwe gũcaria njĩra ya gũthiĩ Makedonia, nĩ gũkorũo nĩtwamenyire hatarĩ nganja atĩ Ngai nĩaatwĩtĩte tũkahunjĩrie andũ akuo Ũhoro-ũrĩa-Mwega.
• 11. Na rĩrĩ, twarĩkia kuuma Teroa na marikabu, tũgĩthiĩ tũrũngĩrĩirie tũgĩkinya Samotherake, na mũthenya ũyũ ũngĩ tũkĩroka gũkinya Neapoli;
• 12. na twoima kũu tũgĩkinya Filipi, itũũra rĩrĩa inene rĩa bũrũri wa Makedonia. Nao arĩa maatũũraga kuo nĩmaatuĩtwo Aroma. Tũgĩikara itũũra rĩu matukũ matarĩ maingĩ.
• 13. Naguo mũthenya wa thabatũ wakinya-rĩ, tũkiumagara tũgĩthiĩ mbarĩ ĩrĩa ĩngĩ ya kĩhingo, tũgĩkinya hũgũrũrũ-inĩ cia rũũĩ harĩa twegereirie atĩ nĩho hahoyagĩrũo; tũgĩikara thĩ, tũkĩaria na andũ-a-nja arĩa monganĩte ho.
• 14. Na rĩrĩ, mũtumia ũmwe wetagwo Ludia agĩtũigua, ũrĩa warĩ mwendia wa rangi wa ndaathi, nake aarĩ wa itũũra rĩa Thuatira, na mũhoi Ngai. Nake Mwathani agĩtũma ngoro yake yende gũthikĩrĩria ndeto iria ciaheanagwo nĩ Paulo.
• 15. Na aarĩkia kũbatithio, hamwe na andũ a nyũmba yake, agĩtũthaitha akiuga atĩrĩ, Mũngĩkorũo nĩmwona atĩ nĩndĩĩhokete Mwathani-rĩ, ũkai gwitũ mũciĩ mũikare kuo. Agĩtũringĩrĩria o nginya tũgĩthiĩ.
• 16. Na gũgĩkinya atĩrĩ, atĩ rĩrĩa twarĩ njĩra tũgĩthiĩ handũ harĩa haahoyagĩrũo, tũgĩtũngana na mũirĩtu ũmwe warĩ na roho wa kũragũra, nake nĩonagĩra andũ arĩa ene we uumithio mũnene nĩ ũndũ wa kũragũra.
• 17. Nake agĩtũrũmĩrĩra tũrĩ na Paulo, akĩanagĩrĩra akoiga atĩrĩ, Andũ aya nĩ ngombo cia Ngai ũrĩa wĩ Igũrũ mũno, na nĩmekũmũhunjĩria ũhoro wa njĩra ya kũhonokio.
• 18. Na agĩikara matukũ maingĩ agĩĩkaga ũguo. Nowe Paulo akĩya kũigua kĩeha mũno, agĩkĩhũgũkĩra roho ũcio akĩwĩra atĩrĩ, Ndagwatha na rĩĩtwa rĩa Jesu Kristo atĩ uume thĩinĩ wake. Naguo ũkĩmuuma o ro thaa ĩo.
• 19. No rĩrĩa ene mũirĩtu ũcio monire atĩ kĩĩrĩgĩrĩro kĩao gĩa kuona uumithio nĩkĩũrĩte-rĩ, makĩnyita Paulo na Sila makĩmagucũrũria makĩmahira kĩng’ang’a-inĩ kũrĩ aathani.
• 20. Na maarĩkia kũmatwara harĩ aciri, makiuga atĩrĩ, Andũ aya nĩ Ayahudi, na nĩ kũnyarira manyariraga itũũra riitũ mũno,
• 21. makarutanaga mĩtugo ĩrĩa tũtarĩ na rũtha gwĩtĩkĩra o na kana tũmĩĩkage, tũrĩ Aroma.
• 22. Nakĩo kĩrĩndĩ gĩothe gĩkĩmokĩrĩra kĩmeke ũũru; nao aciri makĩmaruta nguo ciao na hinya magĩcitehũrangaga, magĩathana atĩ mahũrũo na thanju.
• 23. Na maarĩkia kũmahũrithia mĩtunda mĩingĩ, makĩmaikia korokoro-inĩ, magĩatha mũnene wa korokoro atĩ amaikarie wega matikore.
• 24. Nake mũnene ũcio, aarĩkia gwathwo ũguo, akĩmatonyia kanyũmba ga korokoro karĩa ga thĩinĩ, agĩcoka akĩmoherera ndungu magũrũ.
• 25. No rĩrĩ, ta ũtukũ gatagatĩ, Paulo na Sila nĩ kũhoya maahoyaga Ngai, makĩmũinagĩra nyĩmbo, nao andũ arĩa angĩ mohetwo makamathikagĩrĩria;
• 26. na kahinda o kau hakĩgĩa gĩthingithia kĩnene gĩa thĩ, o nginya nyũmba ĩo ya korokoro ĩkĩenyenyeka o gĩtina-inĩ kĩayo: nayo mĩrango yothe ĩkĩhingũka o rĩmwe; nayo mĩnyororo ya andũ othe ĩkĩgathũka.
• 27. Nake mũnene wa korokoro aarĩkia kũgurumũka toro, na ona atĩ mĩrango ya korokoro nĩ mĩhingũku, agĩcomora rũhiũ, agĩtigaria hanini eyũrage, nĩ kwĩgereria atĩ no gũkorũo andũ arĩa ohe nĩmorĩte.
• 28. Ĩndĩ Paulo akĩanĩrĩra na mũgambo mũnene, akiuga atĩrĩ, Menya wĩĩke ũũru: nĩ gũkorũo ithuothe tũrĩ o ho.
• 29. Nake aarĩkia gwĩtia matawa, akĩguthũka na thĩinĩ akĩinainaga nĩ guoya, akĩĩgũithia thĩ harĩa Paulo na Sila maarĩ;
• 30. agĩcoka akĩmoimia nja, akĩmoria atĩrĩ, Athuri aya, ndĩkĩagĩrĩirũo nĩ gwĩka atĩa nĩguo ’honoke?
• 31. Nao makĩmwĩra atĩrĩ, Itĩkia Mwathani Jesu, na nĩũkũhonokio, we mwene o na andũ a nyũmba yaku.
• 32. Magĩcoka makĩmũhe Ũhoro wa Mwathani, we mwene, o na arĩa othe maarĩ gwake mũciĩ.
• 33. Na rĩrĩ, kahinda o kau kũrĩ o ũtukũ, agĩthiĩ nao, akĩmathambia kũrĩa maatihangĩtio makĩhũrũo; agĩcoka akĩbatithio hĩndĩ o ĩo, we mwene o na andũ ake othe.
• 34. Thutha ũcio akĩmatwara gwake mũciĩ, akĩmarehithĩrie irio, na agĩkena mũno, marĩ na andũ othe a nyũmba yake, nĩ ũndũ wa ũrĩa metĩkĩtie Ngai.
• 35. No rĩrĩ, kwaroka gũkĩa, aciri magĩtũma athigari, makĩmwĩra atĩrĩ, Reke andũ acio mathiĩ.
• 36. Nake mũnene wa korokoro akĩĩra Paulo ũhoro ũcio, akiuga atĩrĩ, Aciri nĩmaarekania moiga atĩ mũrekwo mũthiĩ: tondũ wa ũguo, rĩu umai mũthiĩ na ũhoro.
• 37. Nowe Paulo akĩmera atĩrĩ, Hĩ! Maratũhũrire tũgĩkĩonagwo nĩ andũ othe, hatarĩ ituĩro tũratuĩrĩirũo, na tũkĩrĩ Aroma, na ningĩ maratũikia korokoro-inĩ. Githĩ rĩu megũkĩenda gũtũrutithia na hitho? Aca, gũtingĩtuĩka ũguo; nĩ kaba moke arĩ o matũrute korokoro-inĩ.
• 38. Nao athigari magĩthiĩ kwĩra aciri ciugo icio, nao magĩgĩĩtigĩra, maamenya atĩ andũ acio maarĩ Aroma;
• 39. magĩũka makĩmaarĩria na wega; na maarĩkia kũmoimia nja, makĩmathaitha moime itũũra rĩu mathiĩ.
• 40. Nao magĩkiuma korokoro magĩthiĩ magĩtonya kwa Ludia. Na maarĩkia kuonana na ariũ a Ithe witũ, makĩmomĩrĩria, magĩcoka magĩthiĩ.

Home