Go Back

Atũmwo Chapter 23

• 1. NAKE Paulo agĩkũũrĩra athuri a kĩama maitho, akĩmera atĩrĩ, Ariũ a baba, niĩ-rĩ, ndũire nyonagwo nĩ Ngai ndĩ na thamiri ĩtarĩ ũcuke nginya o ũmũthĩ.
• 2. Nake Anania, mũthĩnjĩri-Ngai ũrĩa mũnene, agĩatha andũ arĩa maarũngiĩ hakuhĩ nake atĩ mamũgũthe kanua.
• 3. Hĩndĩ ĩo Paulo akĩmwĩra atĩrĩ, Hĩ, wee ũgĩtariĩ ta rũthingo rũhakĩtwo mũnyũ mwerũ, nĩwe ũkũgũthwo nĩ Ngai: githĩ ũgĩikarĩte hau, ũnduĩre cira kũringana na watho, ũgakĩregana na watho nĩ gwathana atĩ ngũthwo?
• 4. Nao andũ arĩa maarũgamĩte hau makiuga atĩrĩ, Kaĩ ũgũkĩruma mũthĩnjĩri-Ngai ũrĩa mũnene?
• 5. Nake Paulo akiuga atĩrĩ, Ariũ a baba, ndikũmenyete atĩ nĩwe mũthĩnjĩri Ngai ũrĩa mũnene: tondũ kwandĩkĩtwo ũũ, Ndũkanaarie ũũru ũhoro wa mũnene wa andũ anyu.
• 6. Ĩndĩ rĩrĩa Paulo aamenyire atĩ amwe nĩ Asadukai, na angĩ nĩ Afarisai, akĩanĩrĩra kĩama-inĩ akiuga atĩrĩ, Ariũ a baba, niĩ ndĩ Mũfarisai, na ndaciarirũo nĩ Afarisai: naguo ũndũ ũrĩa ndĩracirithĩrio nĩguo atĩ ndũire njĩrĩgĩrĩire ũhoro wa kũriũka kwa arĩa akuũ.
• 7. Na aarĩkia kuuga ũguo Afarisai o na Asadukai magĩitĩka gũkararania: nao athuri acio monganĩte makĩamũkana.
• 8. Nĩ gũkorũo Asadukai nĩmoigaga atĩ ũhoro wa kũriũka gũtirĩ, o na gũtirĩ araika kana maroho: no Afarisai o nĩmetĩkagĩra atĩ marĩ ho o merĩ.
• 9. Na hagĩkĩgĩa inegene inene: na aandĩki-marũa amwe a thiritũ ya Afarisai makĩrũgama makĩhatĩrĩria athuri, makiuga atĩrĩ, Tũtikuona ũũru ũrĩa mũndũ ũyũ ekĩte: ĩ hihi kũngĩkorũo nĩ roho warĩtie nake, o na kana mũraika?
• 10. Na rĩrĩa ngarari ĩo yanenehire mũno, mũnene ũcio wa mbũtũ ya athigari agĩĩtigĩra atĩ hihi Paulo aahota gũcucangwo nĩ andũ acio, agĩgĩathana atĩ athigari matherere makamũgĩre na hinya oime harĩ o, mamũrehe nyũmba yao thĩinĩ.
• 11. Na ũtukũ o ro ũcio Mwathani akĩmuumĩrĩra akĩrũgama harĩ we, akĩmwĩra atĩrĩ, Ũmĩrĩria: tondũ o ta ũrĩa woimbũranĩire ũhoro wakwa gũkũ Jerusalemu, ũguo noguo ũtarĩ hingo ũtagatuĩka mũira wa kuumbũranĩra ũhoro wakwa kũrĩa Roma nakuo.
• 12. Na gwakĩa-rĩ, Ayahudi magĩthiĩ ndundu makĩrĩkanĩra, makĩĩoha na mwĩhĩtwa, atĩ matingĩrĩa kĩndũ kana manyue, mataambĩte kũũraga Paulo.
• 13. Nao arĩa maarĩ a ndundu ĩo nĩmaakĩrĩte mĩrongo ĩna.
• 14. Magĩgĩthiĩ kũrĩ athĩnjĩri-Ngai arĩa anene o na athuri, makĩmera atĩrĩ, Nĩtwĩohete na mwĩhĩtwa mũnene atĩ tũtirũma kĩndũ o na kĩ, tũtaambĩte kũũraga Paulo.
• 15. Tondũ wa ũguo, rĩu mwĩrane na mũnene ũrĩa wa athigari, mwĩ hamwe na kĩama, atĩ amũikũrũkie harĩ inyuĩ, mũikare ta mũkwenda gũcira ũhoro wake makĩria: na ithuĩ-rĩ, nĩtũgũkorũo twĩhaarĩirie tũmũũrage atanamũkũhĩhĩria.
• 16. Nake mũihwa wa Paulo nĩaaiguire ũhoro ũcio wao wa kũmuoheria, agĩgĩthiĩ agĩtonya nyũmba ĩo ya athigari, akĩĩra Paulo.
• 17. Nake Paulo agĩĩta mũnene ũmwe wa athigari igana, akĩmwĩra atĩrĩ, Twara mwanake ũyũ kwĩ mũnene ũrĩa wa mbũtũ: nĩ gũkorũo arĩ na ũndũ ekwenda kũmwĩra.
• 18. Agĩgĩthiĩ nake akĩmũtwara kũrĩ mũnene ũcio wa mbũtũ, akĩmwĩra atĩrĩ, Mũndũ ũcio muohe, ti Paulo, nĩekũnjĩtĩte njũke harĩ we, aa’thaitha atĩ ndehe mwanake ũyũ harĩ wee, arĩ na ũndũ ekwenda gũkwĩra.
• 19. Nake mũnene ũcio akĩmũnyita guoko, akĩmũhira ndundu, akĩmũũria atĩrĩ, Ũkwenda kũnjĩra atĩa?
• 20. Nake akĩmwĩra atĩrĩ, Ayahudi nimarĩkanĩire makũhoe atĩ ũroke gũikũrũkia Paulo rũciũ harĩ kĩama, gũtuĩke ta wendete gũtuĩria ũhoro wake wega makĩria.
• 21. No rĩrĩ, menya wĩtĩkĩre, nĩ gũkorũo nĩharĩ andũ ao makĩrĩte mĩrongo ĩna mamuoheirie njĩra-inĩ, nao nĩmeohete na mwĩhĩtwa atĩ matingĩrĩa kĩndũ kana manyue, mataambĩte kũmũũraga: na rĩu nĩmehaarĩirie, metereire maigue atĩ nĩwĩtĩkĩrĩte.
• 22. Aaigua ũguo mũnene ũcio wa mbũtũ agĩkĩreka mwanake ũcio athiĩ, akĩmũtaara atĩrĩ, Menya wĩre mũndũ atĩ nĩwanyumĩrĩria maũndũ macio.
• 23. Agĩcoka agĩĩta anene erĩ a athigari igana, akĩmera atĩrĩ, Thagathagai athigari magana merĩ, na athigari a kũhaica mbarathi mĩrongo mũgwanja, o na andũ marĩ na matimũ magana merĩ, nĩguo mathiĩ Kaisarea thaa ithatũ cia ũtukũ:
• 24. na ningĩ hagĩe mbarathi, nĩ getha athigari matware Paulo ahaicĩte mbarathi, mamũkinyie kũrĩ Felike ũrĩa barũthi hatarĩ ũgwati.
• 25. Agĩcoka akĩandĩka marũa akiuga ũũ,
• 26. Nĩ niĩ Kilaudio Lusia ndakwandĩkĩra marũa maya, wee barũthi mũgathe Felike. Nĩndakũgeithia.
• 27. Atĩrĩrĩ, mũndũ ũyũ nĩaanyitirũo nĩ Ayahudi, nake aatigairie hanini oragwo nĩo. No rĩrĩa ndaiguire atĩ nĩ Mũroma ngĩthiĩ na athigari ngĩmahĩta ngĩmũhonokia.
• 28. Na ndenda kũmenya ũndũ ũrĩa maamũthitakĩire ngĩmũtwarithia harĩ kĩama kĩao.
• 29. Ngĩkĩona atĩ nĩ maũndũ ma kĩrĩra kĩao aathitakĩirũo, na gũtirĩ ũndũ acukĩtwo naguo ũngĩtũma oragwo kana ohwo.
• 30. Na rĩrĩa ’menyithirio atĩ nĩharĩ ũndũ ũthugundĩtwo na wara wa gwĩka mũndũ ũcio ũũru, ndamũrekia kũrĩ we o rĩmwe, na ndera andũ arĩa mamũthitakĩte atĩ o nao mathiĩ maarie ũhoro wake mbere yaku. [Tigwo na ũhoro].
• 31. Gwagĩtuĩka ũguo rĩ, athigari magĩthiĩ na Paulo, o ta ũrĩa maathĩtwo, makĩmũtwara ũtukũ makĩmũkinyia Antipatiri.
• 32. Na mũthenya ũyũ ũngĩ makĩroka kũmũtigĩra athigari arĩa mahaicĩte mbarathi mathiage nake, magĩcoka nyũmba yao.
• 33. Nao acio mahaicĩte mbarathi, rĩrĩa maakinyire Kaisaria, makĩnengera barũthi marũa macio, nake Paulo makĩmũrũgamia harĩ we.
• 34. Nake barũthi aarĩkia kũmathoma akĩũrania atĩ nĩ wa bũrũri ũrĩkũ; na aamenya atĩ nĩ wa Kilikia,
• 35. akĩmwĩra atĩrĩ, Nĩndĩĩigua cira waku rĩrĩa arĩa magũthitakĩte o nao marĩkorũo mokĩte. Agĩgĩathana atĩ agaikario nyũmba ĩrĩa nene ya Herode, o ĩrĩa yaciragĩrũo.

Home