Go Back

Atũmwo Chapter 4

• 1. NA rĩrĩa maaragĩria kĩrĩndĩ, athĩnjĩri-Ngai na mũnene wa hekarũ o na Asadukai makĩmoimĩrĩra,
• 2. maiguĩte ũũru mũno tondũ nĩmaarutaga andũ maũndũ, makahunjagia na ũndũ wa Jesu ũhoro wa kũriũkio kwa arĩa akuũ.
• 3. Nao makĩmanyita, makĩmaikia korokoro-inĩ nginya mũthenya ũyũ ũngĩ, nĩ gũkorũo hĩndĩ ĩo kwarĩ hwaĩ-inĩ.
• 4. No rĩrĩ, andũ arĩa maaiguĩte ũhoro, aingĩ ao makĩwĩtĩkia. Naguo mũigana wa andũ arũme ũkĩhinga ta ngiri ithano.
• 5. Na mũthenya ũyũ ũngĩ gũgĩkinya atĩrĩ, anene ao na athuri na aandĩki-marũa makĩroka kũũngana Jerusalemu.
• 6. Nake Anasi mũthĩnjĩri-Ngai ũrĩa mũnene aarĩ ho, na Kaiafa na Johana na Alekisandero, o na arĩa angĩ maarĩ a mũhĩrĩga wa mũthĩnjĩri Ngai ũcio mũnene.
• 7. Na rĩrĩa maamarũgamirie gatagatĩ-inĩ, makĩmoria atĩrĩ, Mũrekire ũndũ ũcio na hinya ũrĩkũ, kana na rĩĩtwa rĩrĩkũ?
• 8. Hĩndĩ ĩo Petero, aiyũrĩtwo nĩ Roho Mũtheru, akĩmera atĩrĩ, Inyuĩ anene a kĩrĩndĩ o na athuri,
• 9. kũngĩkorũo ũmũthĩ nĩ kũũrio tũkũũrio ũhoro wa wĩko ũcio mwega ũrekirũo mũndũ ũcio ũratũire e kĩonje, na ũrĩa arahonirio-rĩ,
• 10. menyai inyuothe, o na andũ othe a Isiraeli, atĩrĩ, atĩ ũndũ ũrĩa ũtũmĩte mũndũ ũcio arũgame haha mbere yanyu, arĩ mũgima, nĩ rĩrĩ, nĩ rĩĩtwa rĩa Jesu Kristo wa Nazarethi, ũrĩa inyuĩ mwaambithirie mũtĩ igũrũ, nake Ngai akĩmũriũkia oime kũrĩ arĩa akuũ.
• 11. Nĩwe Ihiga rĩrĩa rĩaregirũo nĩ inyuĩ aaki, na nĩrĩo rĩtuĩkĩte rĩrĩa inene rĩa koine.
• 12. Naguo ũhoro wa kũhonokio ndũngĩoneka harĩ ũngĩ o na ũrĩkũ: nĩ ũndũ atĩrĩ, gũtirĩ rĩĩtwa rĩngĩ rĩanaheanwo gũkũ thĩ kũrĩ andũ rĩngĩagĩrĩra rĩa gũtũhonokia.
• 13. Na rĩrĩ, mona ũrĩa Petero na Johana momĩrĩirie, na maamenya atĩ nĩ andũ matathomete wega, no andũ o ũguo, makĩgega; magĩkĩmamenya atĩ nĩ andũ maathiaga thiritũ na Jesu.
• 14. Na ningĩ mona mũndũ ũcio ũrahonetio arũngiĩ hamwe nao, makĩrigwo nĩ ũrĩa mangiuga wa gũkararia ũhoro ũcio.
• 15. No maarĩkia kũmaatha moime kĩama-inĩ, magĩcira marĩ oiki,
• 16. makiuga atĩrĩ, Tũngĩgĩĩka andũ aya atĩa? Tondũ ti-itherũ andũ othe arĩa marĩ Jerusalemu nĩmamenyete atĩ nĩharingĩtwo kĩama kĩnene nĩo; naguo ũhoro wakĩo tũtingĩhota kũũkaana.
• 17. No nĩ getha ũhoro ũcio ndũkamemerekio makĩria kũrĩ kĩrĩndĩ-rĩ, nĩtũmakaanie tũmehĩire, atĩ matikanacoke kwarĩria mũndũ o wothe na rĩĩtwa rĩu.
• 18. Magĩkĩmeta, makĩmaatha atĩ matikaanarie kana marutane ũndũ o wothe na rĩĩtwa rĩa Jesu.
• 19. No Petero na Johana makĩmacokeria makĩmera atĩrĩ, Tuai arĩ inyuĩ kana akĩrĩ wega mbere ya Ngai kũmũigua inyuĩ, kũrĩ kũigua Ngai:
• 20. amu ithuĩ-rĩ, tũtingĩhota kwĩgiria kwaria maũndũ marĩa tuonete na tũkamaigua.
• 21. Nao maarĩkia kũmakaania rĩngĩ mamehĩire, makĩmarekia mathiĩ, nĩ gũkorũo nĩmaagĩte ũndũ ũrĩa ũngĩtũma mamaherithie, nĩ ũndũ wa kĩrĩndĩ; tondũ andũ othe nĩmaagoocaga Ngai nĩ ũndũ wa ũndũ ũcio ũrekĩtwo.
• 22. Nĩ gũkorũo mũndũ ũcio ũraringĩirũo kĩama kĩu gĩa kũmũhonia nĩaakĩrĩte mĩaka mĩrongo ĩna ũkũrũ wake.
• 23. Nao atũmwo maarekio, magĩthiĩ kũrĩ arĩa maarĩ thiritũ nao, makĩmera ũhoro wothe ũrĩa merĩtwo nĩ athĩnjĩri-Ngai arĩa anene, o na athuri.
• 24. Nao maaũigua, makĩanĩrĩra Ngai na ngoro o ro ĩmwe, makiuga atĩrĩ, Mwathani Mũnene, nĩwe wombire Igũrũ na thĩ, o na iria rĩrĩa inene, na indo ciothe iria irĩ thĩinĩ wacio:
• 25. ningĩ nĩwe woigire na ũndũ wa Roho Mũtheru na kanua ka Daudi ithe witũ, o we ndungata yaku, atĩrĩ, Ndũrĩrĩ nĩ kĩ gĩatũmire ithogonjeke, Nacio irĩndĩ inogone na ũhoro wa tũhũ?
• 26. Athamaki a thĩ nĩmekinyĩire, Anene-rĩ, nĩ kũũngana monganĩte hamwe Mareme Mwathani, o na Kristo wake.
• 27. Nĩ gũkorũo itũũra-inĩ rĩrĩ, ti-itherũ Herode o na Pontio Pilato, me hamwe na andũ a Ndũrĩrĩ o na andũ a Isiraeli, nĩmonganire mokĩrĩre Jesu Ndungata yaku theru ĩrĩa waitĩrĩirie maguta,
• 28. nĩ getha makamwĩke o ũrĩa gwatuirũo nĩwe tene na kwenda gwaku, o na guoko gwaku, atĩ nĩguo gũgatuĩka.
• 29. Na rĩu, Mwathani, ta rora wone ũrĩa matwĩhĩire magĩtũkaanagia, na wĩtĩkĩre atĩ ngombo ciaku ciaragie Ũhoro waku ciũmĩrĩirie mũno,
• 30. nawe ũkorũo ũgĩtambararia guoko gwaku ũhonanie; ningĩ wĩtĩkĩre atĩ ciama iringagwo na morirũ mekagwo na rĩĩtwa rĩa Jesu Ndungata yaku theru.
• 31. Na rĩrĩ, maarĩkia kũhoya, handũ hau monganĩte hagĩthingitha; makĩiyũrũo othe nĩ Roho Mũtheru, magĩkĩaria Ũhoro wa Ngai momĩrĩirie.
• 32. Nao arĩa othe a thiritũ ya arĩa metĩkĩtie maarĩ rũmwe ngoro o na roho: na gũtirĩ mũndũ wao woigaga atĩ kĩndũ o na kĩmwe kĩa indo ciake nĩ gĩake wiki; no indo ciao ciothe ciarĩ cia ngwatanĩro.
• 33. Nao atũmwo nĩmaaheanaga ũira wao wa kũriũka kwa Mwathani Jesu me na hinya mũnene. Nao othe magĩitĩrĩrio Wega wa Ngai mũingĩ.
• 34. Amu thiritũ-inĩ yao-rĩ, gũtiarĩ mũndũ wagĩte kĩndũ: nĩ gũkorũo arĩa othe maarĩ na ithaka kana nyũmba nĩmaaciendirie, magĩtwara mbia iria cioimĩte,
• 35. magĩciiga thĩ kũrĩa atũmwo maaikaire: na mũndũ o mũndũ akagayagĩrũo o ta ũrĩa mabata make maatariĩ.
• 36. Na nĩkwarĩ mũndũ wetagwo Jusufu, ũrĩa atũmwo maatuĩte Baranaba, (narĩo rĩĩtwa rĩu rĩgĩtaũrũo nĩ ta kuuga Mũũmanĩrĩria), nake aarĩ Mũlawii waciarĩirũo Kuporo.
• 37. Mũndũ ũcio, tondũ aarĩ na gĩthaka, nĩaakĩendirie, agĩtwara mbia iria kĩoimĩte, agĩciiga thĩ harĩa atũmwo maaikaire.

Home