Go Back

Atũmwo Chapter 5

• 1. NO rĩrĩ, mũndũ wetagwo Anania, me na mũtumia wake Safira, nĩendirie gĩthaka kĩrĩa aarĩ nakĩo,
• 2. agĩĩtigĩria mbia imwe cia iria kĩoimĩte, agĩtwara imwe, agĩciiga thĩ harĩa atũmwo maaikaire, nake mũtumia agĩkorũo nĩaamenyete ũhoro ũcio.
• 3. Nowe Petero akĩmwĩra atĩrĩ, Anania, nĩ kĩ gĩtũmĩte ngoro yaku ĩiyũrũo nĩ Shaitani, nĩguo ũhenie Roho Mũtheru, na wĩtigĩrie mbia imwe cia iria gĩthaka kiumĩte?
• 4. Rĩrĩa kĩraikaire o ro ũguo-rĩ, githĩ gĩtiragĩikaire kĩrĩ o gĩaku? O na kĩarĩkia kwendio-rĩ, githĩ mbia iria kĩroimĩte itirakĩrĩ o ciaku wĩke ũrĩa ũkwenda nacio? Atĩrĩ, wĩcirĩtie ũhoro ũyũ na ngoro yaku atĩa? Ti mũndũ wakĩhenia, no Ngai.
• 5. Nake Anania aaigua ciugo icio akĩgũa thĩ agĩtuĩkana: nao andũ othe arĩa maaiguire ũhoro ũcio magĩkĩnyitwo nĩ guoya mũnene.
• 6. Nao aanake magĩũkĩra makĩmũthaya na tama, makĩmuumia nja makĩmũthika.
• 7. Na rĩrĩ, ihinda ta rĩa thaa ithatũ rĩathira, mũtumia wake agĩtonya ho, atoĩ ũrĩa gwekĩtwo.
• 8. Nake Petero akĩmũũria atĩrĩ, Ta njĩra kana mbia ici nocio mũrendirie gĩthaka? Nake akiuga, Ĩĩ, nocio.
• 9. Nake Petero agĩcoka akĩmũũria atĩrĩ, Nĩ kĩ kĩratũmire mũrĩkanĩre inyuerĩ atĩ mũgerie Roho wa Mwathani? One, makinya ma arĩa maathika mũthuriguo marĩ o hau mũromo-inĩ, nao nĩmegũkuumia nja o nawe.
• 10. Nake mũtumia ũcio akĩgũa thĩ kahinda o kau magũrũ-inĩ make, agĩtuĩkana. Nao aanake magĩtonya, makĩmũkora akuĩte, makĩmuumia nja makĩmũthika hakuhĩ na mũthuriwe.
• 11. Naguo kanitha wothe o na andũ othe arĩa maaiguire maũndũ macio magĩkĩnyitwo nĩ guoya mũnene.
• 12. Na rĩrĩ, ciama nyingĩ ikĩringwo, o na morirũ maingĩ magĩĩkwo andũ na moko ma atũmwo: nao othe maaikaraga gĩthaku-inĩ kĩrĩa gĩetagwo Gĩthaku gĩa Solomoni, marĩ na ngoro o ro ĩmwe.
• 13. No andũ arĩa angĩ-rĩ, gũtirĩ wao ũigana gweta gũthiĩ thiritũ nao. Ĩndĩ kĩrĩndĩ nĩkĩamakumagia,
• 14. na andũ arĩa metĩkĩtie makĩongerereka o makĩria kũrĩ Mwathani, itutu cia arũme na andũ-a-nja,
• 15. o nginya makĩya gũkuua andũ arĩa arũaru, makĩmaiga ing’aratua-inĩ makomeire itanda o na ibarĩ, nĩ getha, rĩrĩa Petero ekũhĩtũka, naarĩ hihi kĩĩruru gĩake kĩringe amwe ao.
• 16. Nakĩo kĩrĩndĩ gĩkĩũngana kiumĩte matũũra-inĩ marĩa mathiũrũrũkĩirie Jerusalemu, gĩkarehage andũ arĩa arũaru na arĩa maanyamaragio nĩ ngoma thũku; nao othe makĩhonio.
• 17. No rĩrĩ, mũthĩnjĩri-Ngai ũrĩa mũnene agĩũkĩra, na arĩa othe maarĩ hamwe nake (nĩo arĩa a thiritũ ya Asadukai), makĩigua ũiru mũno,
• 18. makĩnyitithia atũmwo makĩmaikia korokoro-inĩ.
• 19. No mũraika wa Mwathani akĩhingũra mĩrango ya korokoro ũtukũ, akĩmoimia nja akĩmera atĩrĩ,
• 20. Thiĩi mũkarũgame hekarũ-inĩ, mũhe kĩrĩndĩ mohoro mothe ma Muoyo ũyũ.
• 21. Nao maaigua ũguo, magĩtonya hekarũ-inĩ, ruoro rũgĩtema, magĩitĩka kũrutana ũhoro. No rĩrĩ, mũthĩnjĩri-Ngai ũrĩa mũnene o na arĩa maarĩ hamwe nake nĩmokire, makĩũngania kĩama, o na athuri othe arĩa athamaki a ciana cia Isiraeli, makĩrekia andũ kũrĩa atũmwo maahingĩirũo mamagĩre.
• 22. No rĩrĩ, anene a makanga maakinya, makĩmaaga kũu korokoro-inĩ; magĩcoka makĩrehe ũhoro
• 23. makiuga atĩrĩ, Twakora korokoro ĩrĩ hinge o wega, nao aikaria mekũrũngiĩ o hau mĩrango-inĩ: no twarĩkia kũmĩhingũra-rĩ, twakora gũtirĩ mũndũ thĩinĩ.
• 24. Nake mũnene wa hekarũ o na athĩnjĩri-Ngai arĩa anene, rĩrĩa maaiguire ciugo icio, makĩrigwo mũno nĩ ũhoro ũcio wao, meciria ũrĩa ũrĩgĩcoka gũikara hihi.
• 25. Hagĩũka mũndũ akĩmera, Atĩrĩ, andũ acio mũraikĩtie korokoro-inĩ-rĩ, marũgamĩte hekarũ-inĩ makĩrutaga andũ ũhoro.
• 26. Hĩndĩ ĩo mũnene wa hekarũ me hamwe na anene a makanga magĩthiĩ makĩmarehe o na wega hatarĩ buruga, nĩ gũkorũo nĩmetigagĩra andũ matikae kũhũrũo nĩo na mahiga.
• 27. Na maarĩkia kũmarehe makĩmarũgamia harĩ kĩama. Nake mũthĩnjĩri-Ngai ũrĩa mũnene akĩmoria atĩrĩ,
• 28. Githĩ tũtiramũkaanirie o kũmũkaania mũtikae kũrutana na rĩĩtwa rĩu? Na rĩu-rĩ, nĩmũiyũrĩtie Jerusalemu guothe ũrutani wanyu, mũkenda gũtũma thakame ya mũndũ ũcio ĩtũcokerere arĩ ithuĩ.
• 29. Nowe Petero me na atũmwo arĩa angĩ makĩmacokeria makiuga atĩrĩ, Nĩkwagĩrĩire tũigue Ngai kũrĩ kũigua andũ.
• 30. Ngai wa maithe maitũ nĩaariũkirie Jesu, o ũcio inyuĩ mworagithirie na kũmũcuurithia mũtĩ igũrũ.
• 31. Ũcio nĩwe Ngai aatũũgĩririe aikare guoko-inĩ gwake kwa ũrĩo atuĩke Mũnene na Mũhonokia, nĩ getha atũme Aisiraeli merire na moherũo mehia mao.
• 32. Na ithuĩ-rĩ, nĩ ithuĩ aira a mohoro macio; nake Roho Mũtheru no mũira, o we Ngai aheete arĩa mamũiguaga.
• 33. Na rĩrĩa maaiguire ũhoro ũcio, magĩitwo nĩ marakara makĩenda kũmoraga.
• 34. No-rĩ, hau kĩama-inĩ hakĩrũgama mũndũ Mũfarisai wetagwo Gamalieli, nake aarĩ mũrutani wa watho wekĩrĩirũo mũno nĩ andũ othe, agĩathana atĩ andũ acio maambe moimio nja hanini.
• 35. Agĩcoka akĩmera atĩrĩ, Inyuĩ andũ a Isiraeli, ha ũhoro wa andũ aya-rĩ, wĩmenyererei ũrĩa mũkiriĩ gwĩka.
• 36. Amu ihinda rĩngĩ nĩherĩga gũũkĩra mũndũ wetagwo Theuda, ũrĩa wetuaga mũndũ ma, akĩrũmĩrĩrũo nĩ andũ ta magana ana; agĩcoka akĩũragwo, nao acio othe maathĩkaga nĩwe makĩhurunjũka, ũhoro wao ũkĩaga kĩene.
• 37. Na thutha wake hagĩũkĩra ũngĩ wetagwo Judasi wa kũrĩa Galili, matukũ marĩa kweandĩkithagio, na akĩgucĩrĩria andũ amwe mamũrũmĩrĩre: ũcio nake agĩtoma: nao arĩa othe maathĩkaga nĩwe makĩharaganio.
• 38. Naguo rĩu ngũmwĩra atĩrĩ, Ehererai andũ aya, mũtigane nao, tondũ rĩrĩ, ũhoro ũyũ o na kana wĩra ũyũ ũngĩkorũo uumĩte kũrĩ andũ, nĩũrĩũra biũ:
• 39. no ũngĩkorũo uumĩte kũrĩ Ngai-rĩ, nĩmũrĩremwo nĩ gũtũma andũ acio more; tiga hihi mũkorirũo o mũkĩhũrana na Ngai.
• 40. Nao magĩĩtĩkania nake, na maarĩkia gwĩta atũmwo macoke harĩ o, makĩmahũrithia, makĩmakaania matikae gũcoka kwaria ũhoro o na ũrĩkũ na rĩĩtwa rĩa Jesu, makĩmarekia mathiĩ.
• 41. Magĩkiuma kĩama-inĩ makenete nĩ ũndũ wa ũrĩa maatuĩtwo aagĩrĩru a kũmenererio nĩ ũndũ wa Rĩĩtwa rĩu.
• 42. Na matiigana gũtiga kũrutana na kũheana ũhoro wa Jesu atĩ nĩwe Kristo mĩthenya yothe, marĩ hekarũ-inĩ, o na marĩ kwao mĩciĩ.

Home