1. HAKĨRĨ ũguo-rĩ, wee mũndũ ũyũ, o na ũrĩ ũ, wendaga gũcirithia andũ arĩa angĩ-rĩ, ndũrĩ na ũndũ o na ũmwe wa kwĩgwatia: nĩ ũndũ ũgĩcirithia mũndũ ũngĩ-rĩ, no gwĩtuĩra ũretuĩra, nĩ gũkorũo wee mũcirithania nĩwĩkaga o maũndũ macio ekaga.
2. Na nĩtũũĩ atĩ arĩa mekaga maũndũ ta macio, Ngai nĩamatuagĩra ituĩro na kĩhooto.
3. Na rĩrĩ, wee mũndũ ũyũ wendaga gũcirithia arĩa eki maũndũ ta macio, na nĩũmekaga o nawe-rĩ, githĩ ũgwĩciria atĩ wee nĩũkahonoka cira wa Ngai?
4. Kana rĩrĩ, ũtugi wake mũnene ũũ-rĩ, gwata gĩeterero gĩake o na ũkirĩrĩria wake-rĩ, nĩ gũciagĩra ũciagĩire bata, ũgakĩaga kũmenya atĩ ũtugi wa Ngai nĩguo wa gũkũgucĩrĩria wĩrire?
5. Ũrĩa kũrĩ, nĩ atĩ tondũ wa ũrĩa ngoro yaku yũmĩte na ĩkarega kwĩrira, nĩ marakara wĩigagĩra na gũgagũkinyĩrĩra mũthenya ũrĩa wa marakara, o ũcio kĩhooto kĩa matuĩro ma Ngai gĩkaguũranĩrio,
6. o we ũgathukĩra o mũndũ o mũndũ kũringana na maũndũ marĩa aaneka.
7. Arĩa marongoragia ũhoro wa kũheo riri, na gĩtĩo, na mũtũũrĩre ũrĩa ũtarĩ wa kũbutha, nĩ gũtũũra mekaga wega matekũnoga-rĩ, andũ acio makaheo muoyo ũtagathira:
8. no arĩa aremi, arĩa mataathĩkagĩra ũhoro-wa-ma, tiga o gwathĩkagĩra ũhoro ũrĩa ũtarĩ wa ũthingu-rĩ, acio makagũĩrũo nĩ marakara o na mathũgũta.
9. Nĩ ũhoro wa thĩna o na wĩ ruo rũnene ũkagwata ngoro ya mũndũ o wothe wa gũtũũra ekaga maũndũ moru, o mbere Mũyahudi, na thutha wake Mũyunani.
10. No rĩrĩ, mũndũ o wothe wa gũtũũra ekaga maũndũ mega, akaheo riri, na gĩtĩo, o na thayũ, o mbere kũheo Mũyahudi, na thutha wake Mũyunani.
11.
Nĩ gũkorũo Ngai ndatĩagĩra mũndũ maũthĩ.
12. Amu-rĩ, andũ othe arĩa magakorũo mehĩtie matarĩ watho-inĩ nĩ kũninwo makaninwo o ũguo matarĩ watho-inĩ, na andũ othe arĩa magakorũo mehĩtie marĩ watho-inĩ-rĩ, acio magatuĩrũo kũringana o na watho ũcio.
14. Amu andũ a Ndũrĩrĩ, o acio matakĩrĩ na watho-rĩ, rĩrĩa mekaga maũndũ marĩa watho uugĩte no ũndũ wa ũhoro wao ene wa mũciarĩre-rĩ, andũ acio, o na matarĩ na watho, nĩ gwĩtuĩra metuagĩra watho o ene.
15. Nĩ gũtuĩka nĩmonanagia atĩ mĩtaaranĩre ya watho nĩ mĩandĩke ngoro-inĩ ciao, nayo thamiri
yao ene ĩgetĩkanagia nayo, na magĩtarania ũhoro, mũndũ na ũrĩa ũngĩ, magagĩtua atĩ gwĩka ũna nĩ ũũru kana hihi magatua atĩ nĩ wega.
16. Gũkonwo ũguo mũthenya ũrĩa Ngai agakinyia cira wa maũndũ ma hitho marĩa me ngoro-inĩ cia andũ, ekĩre ũhoro wamo ituĩro e thĩinĩ wa Jesu Kristo, o ta ũrĩa Ũhoro-ũrĩa-Mwega uugĩte, ũcio niĩ ’hunjagia.
17. No rĩrĩ, ongorũo wee nĩwĩtagwo Mũyahudi-rĩ, na ũkehocagia ũhoro-inĩ wa watho, na ũkerahaga nĩ ũndũ atĩ ũrĩ wa Ngai,
18. o na ũkamenya ũrĩa enda gwĩkagwo, na ũkahota gũkũũrana maũndũ marĩa maagĩrĩire kũrĩ marĩa mangĩ, nĩ ũndũ wa ũrĩa ũrutĩtwo maũndũ ma watho-rĩ,
19. o na ningĩ ũkehoka atĩ wee mwene ũrĩ mũtongoria wa andũ arĩa atumumu, o na ũtheri wa andũ arĩa marĩ nduma-inĩ,
20. o na mũtaari wa andũ arĩa akĩgu, na mũrutani wa kũruta andũ arĩa matariĩ ta tũkenge, tondũ wa ũrĩa watho-inĩ ũcio wonaga mũhianĩre wa ũrĩa ũmenyo na ũhoro-wa-ma itariĩ-rĩ,
22. Wee uugaga atĩ mũndũ ndakanatharanie-rĩ, githĩ nĩũtharanagia? O wee ũthũire mĩhianano ya kũhoyũo-rĩ, githĩ nĩũiyaga indo cia nyũmba iria ihoyagĩrũo?
23. O wee wĩrahaga nĩ ũndũ wa watho-rĩ, githĩ nĩũmenithagia Ngai nĩ ũrĩa wagararaga watho ũcio?
24.
Amu-rĩ, rĩĩtwa rĩa Ngai nĩ gũcambio rĩcambagio Ndũrĩrĩ-inĩ nĩ ũndũ wanyu, o ta ũrĩa kwandĩkĩtwo.
25. Ũhoro waku wa kũrua-rĩ, nĩũrĩ kĩguni ũngĩkorũo wee nĩwĩkaga o ta ũrĩa watho uugĩte; no rĩrĩ, ũngĩkorũo nĩ kũwagarara ũwagararaga-rĩ, ũhoro ũcio waku wa kũrua nĩũtuĩkĩte ta ũtaruĩte.
26. Tondũ ũcio, mũndũ wa arĩa mataruaga angĩkorũo nĩamenyagĩrĩra maũndũ marĩa watho uugĩte-rĩ, githĩ ũhoro ũcio wake wa kwaga kũrua ndũngĩtuwo o ta ũrĩ ũhoro wa kũrua?
27. Na ningĩ mũndũ ta ũcio ũtarĩ mũruu, agaikara o ũrĩa aaciarirũo-rĩ, angĩgĩkorũo nĩahingagia maũndũ ma watho, githĩ ndangĩgũtua mwĩhia wee ũwagararaga, o na watuĩka ũrĩ na mawatho marĩa maandĩke o na ũhoro wa kũrua?
28. Amu-rĩ, Mũyahudi to ũrĩa wĩ na Ũyahudi wa kuonwo na maitho, o nakuo kũrua to kũrĩa gwa kuoneka mwĩrĩ-inĩ:
29.
no rĩrĩ, Mũyahudi kũna nĩ ũrĩa wĩ na Ũyahudi ngoro thĩinĩ, kũu gũtonagwo; kũrua kũna o nakuo nĩ kwa ngoro, ũguo nĩ ta kuuga atĩ nĩ ũhoro wa roho, to ũhingia wa ũhoro mwandĩke Nake mũndũ ta ũcio, ngatho yake ti ĩrĩa yumaga harĩ andũ, nĩ ĩrĩa yumaga harĩ Ngai.